Аят
“Алла иман етіп, игілікті істер істегендерге кешірім етуді һәм үлкен сый-сияпатқа, зор сауапқа бөлеуді уәде етті”.(Мәида сүресі, 9)

Хадис
“Жақсылық жасауда ешбір нәрсені азсынба. Тіпті, бауырыңа қарап жымиғаның болса да...” (Муслим)

Дұға
“Уа, жақсылықтарын есепсіз берген Раббымыз! Өзіңнің жанындағы ұқсасы болмаған сұлулықтармен бейнемді көркейт! Әрбір пайдасыз нәрсені менен алыстат! Әрбір бос, жанға жайсыздық беретін ойларға санамды жабық ет”. (Зуннун-и Мысри)

Мақал
“Жақсылықтың ерте-кеші жоқ”.

Аят
“Енді кім де кімнің таразысы ауыр басса (сауап жағы басым болса), Ол өзі разы болатындай өмір кешеді”. (Қариға сүресі, 6-7)

Хадис
“Қайсыбіріңе дұға есігі ашылған болса, демек оған рақым есігінің ашылғаны”. (Тирмизи)

Дұға
“Уа, бізге нығметтерін есепсіз төккен Жаратқан Иеміз! Өзіңнің ұлылығыңның құрметіне маған жәрдем ете гөр! Сен мені бүкіл мүминдердің анасы еттің һәм жүрегіме оларға деген аналық махаббат орнаттың. Дүниеде ешбір ана өз балаларының отқа күйюін қаламайды. Уа, Раббым, оларды менімен бірге Өз жәннатыңа ал, не мені олармен бірге тозағыңа таста!” (әзірет Айша (р.анһа))

Мақал
“Игіліктің ерте-кеші жоқ”.

Аят
“Сондай-ақ, Оның (құдіретінің шексіздігін көрсететін) айқын дәлелдерінің бірі; бауыр басып, жандарың жай тапсын, деп, сендер үшін өз болмыстарыңнан жұбайлар жаратып, араларыңа сүйіспеншілік һәм мейірім сезімін ұялатқандығы. Міне, осыда ақылға салып ойланатын қауым үшін анық дәлелдер мен талай ғибрат бар”. (Рум сүресі, 21)

Хадис
“Ері әйеліне, әйелі де еріне сүйіспеншілікпен қараса, Жаратушы Жаппар Ие де оларға сүйіспеншілікпен қарайды. Егер ері әйелінің қолынан сүйіспеншілікпен ұстаса, екеуініңде күнәлары саусақтарының арасынан төгіледі”. (Жамиу әс-Сағир)

Дұға
“Уа, Раббымыз! Сені пәктеп, Саған ғана құлшылық етеміз. Біздің күнәларымызды кешіріп, мейіріміңе бөле. Әлбетте, Сен біз білмейтін нәрселерді білесің”.

Мақал
“Отан отбасынан басталады”.

Аят
“Сондай-ақ, ішіп жүрген суларыңа қарамайсыңдар ма? Оны бұлттан жаудырған сендерсіңдер ме, әлде жаудыратын Біз бе? Қаласақ, оны тұзды қылар едік. Ендеше, шүкіршілік етулерің керек емес пе?” (Уақиға 68-69-70)

Хадис
-

Дұға
“Уа, Раббымыз! Сенен кешірім мен жәрдем әрі тура жол сұраймыз. Өзіңе иман еттік. Күнәларымыз үшін тәубе етіп, Өзіңе ғана сүйенеміз. Өзіңді бар жан-тәнімізбен мадақтап, бізге берген ырыс-несібеңе шүкір етеміз”.

Мақал
“Барыңа шүкір ет, жоғыңа сабыр ет”.

Аят
“Жер бетіндегі барлық нәрсе пәни! Тек сенің асқан айбат пен ұлылықтың әрі теңдессіз жомарттық иесі болған Раббыңның жүзі (яғни, Өзі) ғана мәңгі-бақи қалады!” (Рахман сүресі, 26-27)

Хадис
“Кімде-кім діндес бауырының ары мен намысын оны ғайбат етушілерден қорғаса, Алла тағала да оны қиямет күні тозақ отынан қорғайды”. (Тирмизи)

Дұға
“Уа, Раббым! Өзіңді еске алудан тосатын, Өзіңе деген құштарлығымды су сепкендей ететін, Өзіңді пәктеуден алған ләззатымды жоятын һәм жайсыздығымен абыржытатын бір ауырудан бізді сақта. Өз мейірімділігіңмен осы дұғамды қабылда”. (әзірет Мәулана)

Мақал
“Жақсы ниет – жарым ырыс”.

Аят
“Иә, олар иман етіп, көптеген игі іс істеді. Олар қандай бақытты! Ақырында баратын ең керемет мекен де соларға тән!” (Рағыд сүресі, 29)

Хадис
“Жүрегіндегі дүниеге деген есіктерді бекіткен адамға машақаты көп қиыншылықтар түкке тұрғысыз һәм жеңіл келеді”. (Муснәду әш-Шәриф)

Дұға
“Уа, Раббымыз! Саған үлкен-кішіміз жаппай тәубе етеміз. Бізге терең тәубе нәсіп ет. Бізді тәубесіне келмегендерден ете гөрме!” (Абдулла ибн Абдуллазиз)

Мақал
“Мың күнәға бір тәубе”.

Аят
“Әрі ата-анаға, жақын туыстарға, жетімдерге, міскіндерге, туыс көршіге және бөгде көршіге жақсылық жасаңдар” (Ниса сүресі, 36-аят).

Хадис
“Маған Жәбірейіл (а.с) келіп, көршінің хақысын көп ескерткені сонша мен көрші көршіге мұрагер бола ма деп ойладым”. (Бұхари)

Дұға
“Уа, Алла тағалам! Ынта-ықыласымыздың бәсеңдеуінен, іс-әрекеттеріміздің нұқсандықтарынан, ажалымыздың таяп қалуынан, ізгі, тақуа құлдарыңның арамыздан жойылуынан сақта деп Өзіңе сыйынамыз”. (Абдулла ибн Ғалиб)

Мақал
“Көрші ақысы – Тәңір ақысы”.

Аят
“Расында, адам баласы шыдамсыз әрі (әр неге) құмар болып жаралған”. (Мағариж, 19)

Хадис
“Қызғаныштан сақ болыңдар! Себебі, ол оттың отынды жеп бітіргендей, бүкіл жақсылықтарды жалмап бітіреді”. (Әбу Дәуіт)

Дұға
“Уа, Раббымыз! Бізге Өзіңді шынайы тануды әрі шынайы құлшылық жасауымызды һәм бізге Өзіңе жақындататын істерді нәсіп қыла гөр. Біздерге таудай тәуекел, дұрыс ой-пікір, дүниеде, ақиретте де есен-саулық және ізгіліктер бере гөр”. (Әбу Мухаммед Рази)

Мақал
“Жаман адам өзі бола алмайды, Болғанды көре алмайды”.

Аят
“Ізгілік жолында садақа берген мүмин ерлер мен мүмин әйелдердің және Аллаға көркем қарыз бергендердің қарымы еселеніп қайтарылады. Сондай-ақ, олар үшін әсте ортаймайтын сондай керім сый да бар.” (Хадид сүресі, 18)

Хадис
“Әрбір жақсылық – садақа”. (Бұхари)

Дұға
“Уа, Раббым! Бізге берген нығметтеріңді одан сайын арттыра түсуіңді тілейтін әрі бір өзіңе бас иетін құлдарың болуымызға септігін тигізетін шүкіршілік нәсіп еткейсің”. (Омар ибн Зәр)

Мақал
“Жақсылыққа жақсылық – әр жігіттің ісі, Жамандыққа жақсылық – нар жігіттің ісі”.

Аят
“Сол күні жауапқа тартылу үшін Алланың алдына келтірілесіңдер. Сөйтіп, (Алла тағаланың алдында) бірде-бір жасырын сырларың болмайды”. (Хаққа сүресі, 18)

Хадис
“Білімі өзіне де, өзгелерге де пайда бермеген ғалымдар Қиямет күні адамдар арасынан ең ауыр азапқа душар болатындар”. (Кәшфул-Хафа)

Дұға
“Уа, Раббым! Біздей әлсіз құлдарыңның кемшіліктерін елемей, тәубемізді қабыл ете гөр әрі күнәларымызды Өз кеңшілігіңмен кешіре гөр! Бізді әрқашан сергек рухты, терең пікірлі һәм тақуалық кернеген жүрекке ие құлдарыңның қатарына қоса гөр!” (Омар Насухи Билмен)

Мақал
“Зейіні кең – көреген, Пейілі кең – береген”.

Аят
“Сондай-ақ түннің бір бөлігінде Оған сәжде ет һәм де түнде ұзақ уақыт Оны («Сен – мінсізсің, кемшіліктен адасың», – деп) ұлықта”. (Инсан сүресі, 26)

Хадис
“Күдіксіз, Алла тағала сөзі мен ісі жиренішті болған әрі сонысынан қысылып-қымтырылмай сөйлей беретін бейпіл ауыздарға лағынет етеді”. (Рамуз әл-Әхадис)

Дұға
“Уа, Алла тағалам! Мені Өзіңе һәм пайғамбарыңа деген бойұсынушылықтың һәм дініңнің аясында ет. Мені Өзің тыйған нәрселеріңнен әрі азабыңнан аулақ ете гөр”. (Абдулла ибн Омар)

Мақал
“Көп өткен су батпақ болар, Көп сөйлеген адам шатпақ болар”.

Аят
«Мен мал мүлікті есепсіз шашамын» деп мақтанады. Ол өзін ешкім көрмей тұр деп ойлай ма?”. (Бәләд сүресі, 6-7)

Хадис
“Ешбіріңіз өзі үшін қалағанын мұсылман бауыры үшін қаламайынша шынайы иман келтірген болып саналмайды”. (Бұхари)

Дұға
“Уа, Раббым! Өлім мен қабірді һәм Өзіңнің алдыңда ертең есеп беретінімді біле тұра қалайша қуанамын! Амал дәптерімнің оң жағымнан, не сол жағымнан берілетінінен бейхабармын. Қалайша Өзіңнен дүниелік бір нәрсе сұрай алам?” (Мухаммед Бакір)

Мақал
“Сөзшең болғанша, ісшең бол”.

Аят
“Уа, иман еткендер! Мал-мүліктерің мен бала-шағаларың сендерге Алланы еске алуды ұмыттырмасын (яғни Аллаға лайықты түрде құлшылық етулеріңе кедергі келтірмесін). Біліп қойыңдар, кімде-кім солай істейтін болса, нағыз зиян шегетіндер міне солар”. (Мунафиқун сүресі, 9)

Хадис
“Тілің Алланны еске алудан құрғамасын”.

Дұға
“Уа, Алла тағалам! Бізді Өзіңе, періштелеріңе, пайғамбарларыңа және ізгі құлдарыңа сүйікті ет”. (Дұғалар жинағынан)

Мақал
“Жақсы дос пайдасын тигізбесе де, Зиянын тигізбейді”.

Аят
“Ол күллі аспан әлемі мен жерді хақ мақсатта, орын орнымен және ақиқатқа сүйенген мінсіз жүйеге негіздеп жаратты. Сендерге кескін-келбет берді, һәм де қандай көркем кескін-келбет берді десеңші. Түбінде (бәрің де) Оған қайтасыңдар”. (Тағабун сүресі, 3)

Хадис
“Мүминдердің иман тұрғысынан ең кемелі мінез-құлығы ең көркем болғандар”. (Ибн Мәжә)

Дұға
“Уа, Алла тағалам! Сен құлдарыңның кеміштіктеріне қарама; айыптарын беттеріне баса көрме; оларды айырылысу отына салып жақпа! Бізге рақымшылық жасап, жәрдем берген Алла тағалам!” (Азиз Махмуд Һудайи)

Мақал
“Соқырдық еліне барсаң, көзіңді қыс, Ақсақтың еліне барсаң, аяғыңды көтер”.

Аят
“(Атқарған қызметіңді, істеген жақсылық-тарыңды) көп көріп, міндетсінбе!” (Мүддәссир сүресі, 6)

Хадис
“Мүмін адамға ренжіскен діндес бауырымен үш күннен артық сөйлеспеуі дұрыс болмайды”. (Кәнзул-Ирфан)

Дұға
“Уа, Раббым! Сен мені өзімнен де жақсырақ білесің. Мен де өзімді мені мақтағандардан жақсырақ білем. Олардың менде бар деп ойлаған ізгі қасиеттерді маған нәсіп ете гөр әрі менің бойымдағы олар білмейтін кемшіліктерімді жасыр һәм кешір”. (әзірет Әбу Бакір (р.а))

Мақал
“Жақсы адамның ашуы бөз орамал кепкенше”.

Аят
“Уа, иман еткендер! Арақ-шарап (сынды адамды мас қылып, ақылынан адастыратын нәрселер), құмар һәм өзге де ұтыс ойындары, табыну үшін орнатылған пұттар және жебелермен (яки құмалақ, карта сынды басқа да нәрселермен) бал ашу шайтанға ғана тән лас істердің қатарында. Ендеше, (екі дүниеде де) мақсат-мұраттарыңа жету үшін бұлардан аулақ болыңдар”. (Мәида сүресі, 90)

Хадис
“Көбі мас қылатын нәрсенің азы да харам”. (Кәнзул-Ирфан)

Дұға
“Уа Раббым! Өзіңнің жәрдемің болмаса, қалауыма жете алмаймын, өз бетімше жамандықтардан сақтана алмаймын. Уа, Раббым! Саған аса мұқтажбыз! Бізді керемет ризықпен ризықтандыра гөр, сол ризық үшін Өзіңе көп шүкір етейік”. (Бәкр ибн Абдулла Музени)

Мақал
“Арамдық алысқа бармайды”.

Аят
“Раббыңның атын үнемі жадыңда ұстап, (күндіз-түні) аузыңнан тастамай зікір ет һәм Оған жан-тәніңмен бетбұр”. (Муззәммил сүресі, 8)

Хадис
“Жаныңа жылу сыйлайтын көркем сөз де – садақа”. (Бұхари)

Дұға
“Уа, Алла тағалам! Сараңдықтан, қорқақтықтан және қабір азабынан мені сақтай гөр”.

Мақал
“Жақсының өзі де жақсы, Сөзі де жақсы”.

Аят
“Сондай-ақ Оған тең келетін ешкім де, еш нәрсе де жоқ”. (Ықылас сүресі, 4)

Хадис
“Кімде-кім Алладан басқа сыйынуға лайықты құдай жоқ” – десе,“Жәннәтқа кіреді”.

Дұға
“Уа, Алла тағалам! Бізді өз ұлылығыңмен назарыңа ал. Біз (құлдарың) қателесушіміз. Егер әлсіздігімізден қандай да бір күнә жасасақ, кешіріміңді үміт еткендігіміз үшін ғана жасаймыз”. (Сади-и Ширази)

Мақал
“Кішіпейілділік – кісінің көркі”.

Аят
“Олар Алланың нұрын (Исламды немесе Құранды) ауыздарымен үрлеп сөндіруді көксейді. Алла болса, кәпірлер қанша жерден жақтырмаса да нұрын ақыр аяғына дейін жеткізіп, жарқырата түсуден басқа еш нәрсеге разы болмайды”. (Тәубе сүресі, 32)

Хадис
“Адамның Исламды көркем ұстануының белгісі оның бос нәрселерден арылуы”. (Тирмизи)

Дұға
“Уа, Алла тағалам! Бізге Өзіңе бой ұсынуда, әртүрлі қиыншылықтарға қарсы сарқылмас сабыр бер”. (Салих ибн Бәшир әл-Мурри)

Мақал
“Жаманмен егескенше, жақсымен кеңес”.

Аят
“Алла сендердің жүктеріңді (яғни, сендер үшін дінді) жеңілдеткісі келеді. Өйткені, адам баласы өте әлсіз болып жаралған (яғни осал тұстары көп, сондықтан да ол Алланың қолдауынсыз әуейіліктеріне, нәпсіге, азғырушы шайтанға өз бетімен төтеп бере алмайды)”. (Ниса сүресі, 28)

Хадис
“Жеңілдетіңдер, қиындатпаңдар. Сүйіншілеңдер, бездірмеңдер”. (Бұхари)

Дұға
Уа, Раббым! Өзің жеңілдеткен істен жеңіл еш нәрсе жоқ. Егер Сен қаласаң қандай ауыр істі де жеңілдетесі.

Мақал
“Жылы-жылы сөйлесең, Жылан інінен шығады. Қатты-қатты сөйлесең, Жақының діннен шығады”.