Югары Радада кырымтатарлар, кырымчаклар һәм караимнарның вәкиллекле оешмалары турында канун өлгесе теркәлгән

 Бу хакта Украина Югары Радасы депутаты Тамила Ташева хәбәр итте.
Аның сүзләренчә, канун өлгесе кырымтатар халкы Мәҗлесе башлангычы белән әзерләнгән. Документны эшләүдә Мәҗлес вәкилләре, шул исәптән аның рәисе Рефат Чубаров, халык депутатлары Мостафа Җәмилев һәм Әхтәм Чийгоз, шулай ук Украина Юстиция министрлыгы вәкилләре катнашкан.

Ташева фикеренчә, канун өлгесен кабул итү Украинаның төп халыклар хокукларын яклау йөкләмәләрен үтәүдә тагын бер адым булачак.

"Кырым оккупациядән азат ителгәннән соң һәм ярымутрауны торгызу барышында мондый һәм башка кораллар аеруча мөһим булачак. Алар ярымутрауны яңадан берләштерүгә һәм халыкның үз туган, ирекле йортын торгызуда чынлап та катнашуына нигез булып хезмәт итәчәк", — диән ул.

📌2021 елның июлендә Украина Югары Радасы "Украинаның төп халыклары турында" канун кабул иткән иде. Ул кырымтатарларны, караимнарны һәм крымчакларны илнең төп халыклары дип таный. Канун аларның мәдәният, мәгариф һәм тел өлкәләрендәге төп хокукларын билгели, шулай ук төп халыкларның вәкиллекле органнарын төзү һәм аларның эшчәнлеген оештыру тәртибен күздә тота.

Тулырак 👉 монда укыгыз.

Көзге шимбә кичендә "Галиябану" әсәрен тыңларга тәкъдим итәбез.

Аны Әйдә!Online проекты татар телен өйрәнүчеләр өчен махсус әзерләп яздырган.

Вашингтонда Төрки халыклар җәмгыятьләре һәм мирасы Дөнья шурасы (Global Council of Turk Communities and Heritage, GCTCH) оешкан

Сәүдәгә корылмаган халыкара яңа оешма төрки халыкларның телләрен, тарихи хәтерен һәм мәдәни гореф-гадәтләрен саклау, шулай ук аларның мәнфәгатьләрен халыкара мәйданда яклау белән шөгыльләнергә җыена.

Рәсми сәхифәдә язылганча, GCTCH эшчәнлегенең төп юнәлешләре арасында юкка чыгу куркынычы янаган телләрне саклау, архивлар булдыру, тарихи тикшеренүләр үткәрү һәм мәгариф програмнарын гамәлгә ашыру бар. Шура шулай ук төрки халыклар берлекләренең мәдәни һәм һуманитар мәсьәләләрен алга сөрү максатыннан университетлар, фәнни оешмалар, хөкүмәтләр һәм халыкара оешмалар, шул исәптән БМО структуралары белән хезмәттәшлек итәргә ниятли.

Оешманы төзү башлангычы белән House of Afshar "Афшарлар йорты" чыккан. Аерым игътибар үз дәүләтләре булмаган яки мәдәни мирасын саклау мөмкинлекләре чикләнгән халыкларга биреләчәк дип әйтелә.

Шурага 37 җәмгыять керә дип язылган. Алар арасында башкортлар, кырымтатарлар бар. Шул ук вакытта Себер татарлары һәм Идел буе татарлары аерым җәмгыятьләр буларак күрсәтелгән.

Бу хәл Мәскәүнең татарны аерым төркемнәргә бүлү омтылышының дәвамы буларак кабул ителмиме, ничек уйлыйсыз?

@azatliqradiosi