⚡️Австралиянең Сидней шәһәрендә ике билгесез кеше Бонди-бич пляжында кешеләргә ут ачкан.

Массакүләм мәгълүмат чаралары хәбәр итүенчә, ул вакытта пляжда җирле яһүд җәмгыяте вәкилләре катнашында Ханука яһүд бәйрәме узган.

Медиалар, аерым алганда Би-би-си Яңа Көньяк Уэльс полициясенә сылтанып язуынча, ут ачучы белән бергә ун кеше һәлак булган, 12 кеше яраланган. Икенче ут ачучы тоткарланган. Ут ачучыларның кем булуы әлегә билгеле түгел.

Шаһитлар сүзләренчә, кара кием кигән ике кеше, бераз читтәрәк торып, пляж янындагы парковкада кешеләргә махсус ут ачкан.

Тулырак 👉монда укыгыз.

@azatliqradiosi

❗️Акмәчеттәге Киев районы мәхкәмәсе тикшерү изоляторында тотылучы кырымтатар мөслимәләре — Эсме Ниметулаева, Насибе Саидова, Эльвиза Алиева һәм Февзие Османованы сак астында тотуны өч айга озайтты.

"Кырым теләктәшлеге" проекты хәбәр итүенчә, утырыш ябык ишекләр артында узган. Мөслимәләрнең туганнары утырыш вакытында мәхкәмә бинасы янында яңгыр астында басып торган. Карар игълан ителгәндә генә тоткарланган мөслимәләрнең гаиләләреннән берәр кешегә керергә рөхсәт иткәннәр.

Тулырак 👉монда укыгыз.

@azatliqradiosi

Хәерле иртә, хөрмәтле укучыларыбыз! Бүген 15 декабрь, дүшәмбе, әлеге сәгатькә булган кайбер хәбәрләрне барлыйк:

🔸Дондагы Ростовта һәм өлкәдә украин дроннары һөҗүме нәтиҗәсендә торак йортлар җимерелгән. Өлкә губернаторы белдерүенчә, Каменски районында электр линиясе өзелгән. Шул сәбәпле су суырту системы һәм насос станциясе эшен туктаткан. Кайбер районнар сусыз калган. Һөҗүм Новошахта нефть эшкәртү ширкәте филиалына зыян салу өчен ясалган булуы ихтимал.

🔸Шулай ук төнлә украина дроннары Белгородта "Луч" электр станциясенә һөҗүм иткән. Бу хакта «Пепел. Белгород" телеграм каналы яза. Өлкә губернаторы Вячеслав Гладков үз телеграм каналында язуынча, шәһәрнең инженер инфраструктурасына җитди зыян салынган.

🔸Украина белән АКШ солых планын тикшерүдә «шактый алга китүгә ирешкән" һәм бүген сөйләшүләрне дәвам итәчәк. Бу хакта кичә Берлинда узган очрашудан соң АКШ президентының махсус вәкиле Стив Уиткофф белдерде. Аның сүзләренчә, сөйләшүләр биш сәгатьтән артык дәвам иткән.

🔸Сиднейда Бонди-Бич пляжында Ханука бәйрәмен уздырган вакытта ясалган һөҗүмдә һәлак булучылар саны 16 кешегә җитте. Аларның берсе ут ачучы 50 яшьлек ир кеше. Икенче ут ачучы, аның 24 яшьлек улы, авыр хәлдә хастаханәгә салынган.

🔸Русия халкының һәм бизнесның салымнар бурычлары рекордлы 3,26 триллион сумга җиткән. Бу узган елның шушы ук чоры белән чагыштырганда 20 процентка күбрәк. Бу хакта Росстат мәгълүматларына сылтанып «Известия» яза. Бурычлар салым идарәсе таләпләренең кырыслануы, бизнес табышының кимүе, төп ставка югары булуы һәм инфляция аркасында арта.


@azatliqradiosi

Русия баш прокуратурасы Башкортстанның элекке премьер-министры урынбасары вазифасын башкаручы Алан Марзаевтан һәм аның белән бәйле тагын алты кешедән милекләрен дәүләт файдасына тартып алу турында шикаять иткән.

"Ведомости" үз чыганакларына таянып язуынча, сүз якынча 20 күчемсез милек корылмасы һәм кыйммәтле машиналар өчен автопаркинг турында сүз бара.

Аерым алганда, Марзаевтан Төньяк Осетиядәге 13 бинаны, шул исәптән Марзаевның туган ягы булган Ардон районында урнашкан корылмаларны тартып алырга ниятлиләр. Шикаять гаризасында шулай ук Югары Фиагдондагы биналар комплексы һәм Владикавказдагы фатиры, Ставрополь төбәгендәге Кисловодски шәһәрендә 900 квадрат метр мәйданлы йорт та телгә алына. Моннан тыш, элекке түрәдән Башкортстанның Кырмыскалы районындагы дачаны һәм Мәскәүдәге фатирны да дәүләт файдасына алу сорала.

Алан белән беррәттән, шикаятьтә аның әти-әнисе, ике улы белән әниләре, шулай ук шоферы да телгә алына. Әйтик, өлкән улы Кисловодски һәм Фиагдонда күчемсез милек хуҗасы булып тора. Башкалар исеменә автомобильләр рәсмиләштерелгән, шул исәптән Mercedes-Benz S, Maserati Ghibli һәм Toyota Land Cruiser. Чыганак сүзләренчә, аларның гомуми бәясе 20 миллион сумнан артып китә. Баш прокуратура ачыклавынча, гаилә милкенең гомуми бәясе Марзаевның 24 еллык хезмәт дәверендәге кануни керемнәреннән шактый арта.

▪️21 ноябрьдә Башкортстан вице-премьеры вазифасын башкаручы Алан Марзаевка 37 миллион сумлык ришвәт эше өчен 13 ел кырыс тәртипле колония хөкеме бирелде. Тикшерү мәгълүматынча, ул 2023 елның декабреннән 2024 елның апреленә кадәр арадашчы аша эшкуардан акча алып килгән. Шуның өчен Марзаев аңа юл төзекләндерү контрактларын биреп барган. Әлеге хәл 2023 елның декабреннән 2024 елның апреленә кадәр дәвам иткән диелә. Моннан тыш, Марзаевка 561 миллион сум күләмендә штраф салынды.

@azatliqradiosi

Казан дәүләт университетының (КДУ) Химия институтында бинага MAX аша кертмәкчеләр

«Гроза» телеграм-каналы язуынча, институт старосталарына узган җыелышта 2026 елның гыйнварыннан электрон студент таныклыгы, электрон зачетка һәм институтка керү өчен Max мессенджерындагы QR-код кулланылачагын әйткәннәр.

«Бу керү-чыгу режимын әлегә сынау рәвешендә бары тик безнең институтта гына кертәчәкләрен, аннары аның ничек эшләвен караячакларын әйттеләр», — дип яза «Гроза» үз укучыларына сылтанып.

Әлегә старосталар MAX мессенджерында төркем чатларына керергә тиеш.

КФУның Мәгълүмати технологияләр һәм интеллектуаль системнар институты (ИТИС), Социаль-фәлсәфи фәннәр һәм массакүләм коммуникацияләр институты (ИСФНиМК), Икътисад, идарә һәм финанслар институты, шулай ук Психология һәм мәгариф институты студентларына да аралашуны Max мессенджерына күчерү таләбе куелган иде. Бу хакта «Гроза» язды.

Элегрәк Татарстанда активист республика президенты Рөстәм Миңнехановка мәктәп чатын MAX мессенджерына күчерүгә зарланды. Ул моны "көчләп тагу" дип атады.

▪️Русия мессенджерын булдыру турындагы канунны Русия президенты Владимир Путин 24 июньдә имзалаган иде.

▪️“Роскомсвобода”га нигез салучыларның берсе Саркис Дарбинян әлеге мессенджер аша куәт оешмалары сөйләшүләрне контрольдә тота алачак дип саный.

@azatliqradiosi

Татарстан белән Башкортстанга табутлар күпләп кайтуын дәвам итә.

Сугышта үлгән хәрбиләр исемлеген Азатлык Радиосы ачык чыганаклардан туплый. Хакимият сугышта үлүчеләр санын әйтми. Чын саннар күпкә зуррак булырга мөмкин.

Русия буйлап үлгән хәрбиләр саны белән Башкортстан – беренче, Татарстан икенче урында бара.

▪️Барлык исемнәрне Азатлык Радиосы хисабында табып була. Анда безгә үлүчеләр турында мәгълүмат та җибәреп була.

#сугышта_үлүчеләр
@azatliqradiosi

🕌19 декабрьдә, җомга көнне, төзекләндерүдән соң Мәскәүнең тарихи мәчете ачылачак.

Бу хакта бүген XXI Халыкара мөселман форумының пленар утырышында Русия Диния нәзарәте рәисе мөфти Равил Гайнетдин әйтте.

Мәскәүдәге Тарихи мәчет төзекләндерү эшләре өчен бер ел элек ябылган иде. Ул Мәскәүдә сакланган иң борынгы мөселман гыйбадәтханәсе.

Тарихи мәчет 1823 елда 1812 елгы Наполеон сугышындагы мөселман каһарманнары хөрмәтенә төзелгән. Ул шәһәрнең тарихи үзәгендә, Зур Татар урамында урнашкан.

Тарихи мәчетне төзекләндерергә кирәклеге турында соңгы 4-5 ел дәвамында сөйләштеләр. Бу мәсьәләне Русия мөселманнары Диния нәзарәте рәисе, мөфти Равил Гайнетдин 2020 елда Русия президенты Владимир Путин белән очрашуда күтәргән иде. 2022 ел башында Татарстан президенты Рөстәм Миңнеханов Тарихи мәчетне төзекләндерү мөһимлеген әйткән иде.

▪️Узган ел 13 июльдә Мәскәүдәге Тарихи мәчет ишек төбенә дуңгыз башы атканнар иде. Бу хәлне Равил Гайнетдин провокация диде һәм аны инкарь итәргә чакырды.

▪️Соңрак —шул ук елның октябрь башында Мәскәүдәге мәчетләргә, шул исәптән Тарихи мәчеткә вандаллар һөҗүм итте. Мәчет коймалары диварына алар "Русия православлар өчен" ("Россия для православных") дип язып калдырган һәм ахырдан "1488" санын күрсәткән иде. 14/88 — неонацилар һәм ак милләтчеләр шигаре.

@azatliqradiosi

АКШ кинопродюсеры, Studio Mao ширкәтенең җитәкчесе Стивен Мао танылган татар балет биючесе, балетмейстер Рудольф Нуриев турында кино төшерергә җыена.

Аның сүзләренчә, әлеге фильм Нуриевнең "Биюче" дип аталган биографиясенә нигезләнәчәк, һәм ул аның туган якларын сагынуы, ата-анасын күрергә теләве турында бер хикәя булачак.

Әлегә фильм сценариенең ике варианты бар, шуларның берсен сайлау бара, дип белдерә продюсер. Төп рольне башкаручы актер да әлегә билгеләнмәгән.

Мао белдергәнчә, киноны төшерү идеясе берничә ел элек туган. Әмма ул чакта Рэйф Файнсның "Ак карга" дип аталган фильмы чыккан чыга (2018 ел), шуңа бу эшне кичектерергә булалар. "Хәзер бу проектка кайтасы иттек", ди продюсер.

Studio Mao – 2006 елда Нью-Йорк штатында нигезләнгән бәйсез АКШ киноширкәте. Студия төшергән "Тире" (Skin) дигән кыскаметражлы фильмы "Оскар" премиясенә лаек булган.

Ширкәтнең Мәскәүдә офисы бар, ул 2018 елда ачылган. Кайбер фильмнарны ул Русия белән берлектә төшерә. Мәсәлән, 2022 елда "Соло" дип аталган фильм өлешчә Русиядә төшерелгән, аның режиссеры – Мәскәү дәүләт университетын тәмамлаган Ольга Панкратова.

@azatliqradiosi