Нью-Йорктагы “Melodia" хатын-кызлар хоры татарча җырлар башкарды

26 апрель Нью-Йорк шәһәрендә Манхеттенда урнашкан "Илаһи апостоллар" чиркәвендә "Melodia" хатын-кызлар хоры концерты узды. "Melodia" — Нью- Йоркта 24 ел дәвамында эшләп килүче хор.

Бу тоташ хатын-кызлардан торган хор, аның музыкантлары да хатын-кызлар. Алар классик һәм заманча әсәрләр башкара, даими концертлар оештыра. Быел алар үз програмнарына татар җырларын да алган. Концертта ике татар җыры башкарылган. Аның берсе — татар халык җыры "Умырзая", аның көен хор өчен Татарстан композиторы Миләүшә Хәйруллина эшкәрткән. Икенче җыр — Татарстан халык шагыйре Ренат Харисның сүзләренә Элмир Низамов көй язган "Акчарлаклар".

Дирижер Нью-Йоркта Зәринә Вилданованың татарча җырлавын ишеткән. Узган ел "Melodia" хоры азәрбайҗан җырын башкарган булган. Зәринәнең кем, кайдан булуын сорашкан, җырчы исә татарлар турында, татар җырлары, Татарстан турында сөйләгән. Шунда хор белән татарча җырларга туры килерлек җырлар бармы дип сораган һәм бергә чыгыш ясарга тәкъдим ясаган.

Концертка якынча 30 татар килгән. Тамашачылар арасында Нью-Йорк, Нью-Джерси, Канададан татарлар булган.

Тулырак👉 монда укыгыз.

@azatliqradiosi

Көн яңалыгы: Уфа мэры Ратмир Мәүлиев тоткарланды.
Ул эшен явыз максатта куллануда һәм ришвәт алуда шикләнелә.

Әлегә аны 48 сәгатькә тоткарладылар.

Мәүлиев белән бергә аны урынбасары һәм мэриянең җир һәм милек эшләре идарәсе башлыгы да тоткарланган.

Сәясәт белгечләре моны Башкортстан хакимиятенә тап төшерү дип саный.

Бу хакта зуррак мәкаләне алдагы көндә укый алырсыз.

❗️Татар милли хәрәкәте ветераны, 71 яшьлек Фазыл Валиәхмәтовка “ВКонтакте”дагы ике посты өчен алты ел колония җәзасы бирелгән

Үзәк бүлге хәрби мәхкәмәсе әлеге карарны бүген, 28 апрельдә чыгарган.

Моннан тыш, аңа өч ел ярым дәвамында сайтлар һәм социаль челтәрләр белән идарә итү тыелган. Бу хакта “Медиазона” хәбәр итте.

Пенсионерны Русия армиясен "дискредитацияләү" һәм "террорчылыкны аклау" маддәләре нигезендә гаепле дип таптылар. "Idel.Реалии" язуынча, Вәлиәхмәтов гаебен танымаган.

Ул 2024 елның декабреннән бирле тикшерү изоляторында утыра.

Тулырак 👉 безнең сайтта укыгыз.

Фото: Медиазона

@azatliqradiosi

Хәерле иртә, хөрмәтле укучыларыбыз! Бүген 29 апрель, әлеге сәгатькә булган кайбер хәбәрләрне барлыйк:

🔸Башкортстанда һәм Татарстанда дрон куркынычы кертелгән, һава аланнары эшләми, очышлар тоткарлана.

🔸Украин дроннары Оренбур өлкәсенең Орски шәһәренә һөҗүм ясаган. Украинаның Exilenova+ күзәтү каналы хәбәренчә, дрон җирле нефть эшкәртү ширкәтләренед берсенә очкан. Шәһәр башлыгы Артём Воробьёв шәһәр халкын урамга чыкмаска һәм тәрәзәләргә якын килмәскә чакырды.

🔸Пермь шәһәренә дә Украина дроннары һөҗүм иткән, сәнәгать объектында янгын чыккан диелә. Нинди объект икәне әйтелми.

🔸Татарстанның "Зәкят" хәйрия фонды Дагыстанда су басуда зыян күрүчеләр өчен барлыгы 9 млн сум акча җибәргән. Моннан тыш, шешәләргә тутырылган эчәргә яраклы 4 тонна су тапшырылган.

🔸Май аендагы Мәскәүдә узачак парадта хәрби техника катнашмаячак, дип белдерде Русия саклану министрлыгы. Моннан тыш, "оператив хәлгә бәйле рәвештә", Кызыл мәйданнан кадетлар, суворовчылар һәм нахимовчылар да узмаячак.

Уфада Владимир Жириновский урамы барлыкка килде: депутатлар әлеге карарны бертавыштан хуплады

29 апрельдә Уфа шәһәре депутатлары Башкортстан башкаласы урамнарының берсенә Русия сәясәтчесе Владимир Жириновский исеме бирүне бертавыштан хуплаган.

800 метрга сузылган бу яңа урам Уфаның Дим һәм Ленин районнары арасында булачак.

Моңарчы Уфа мэриясе икенче тапкыр уздырган сораштыруда катнашучылар шәһәрдәге урамга Жириновский исемен бирүне яклап чыкты.

Шул ук вакытта "Гражданский Союз — Уфа" сәүдәгә корылмаган оешма (НКО) вәкилләре тавыш бирү барышындагы сәер үзгәрешкә игътибар иткән иде.

Аларның мәгълүматларынчв, атна дәвамында урамга исем бирүне "яклап" килүчеләр даими рәвештә 200 тавышка калышып килгән. Әмма соңгы төн эчендә хәл кискен үзгәргән: әлеге инициативага өстәмә рәвештә 800дән артык тавыш өстәлгән. Сораштыру 1 апрельгә кадәр дәвам итте.

Республикада Жириновский исемен мәңгеләштерүгә каршы башкорт милли оешмалары да чыгыш ясады.

1990нчы еллар башында беренче президент сайлавы алдыннан Жириновский "татарларны һәм башкортларны Монголиягә күчерергә кирәк, шунда ачлыктан һәм сифилистан кырылсыннар" дигән иде.

Тулырак монда укыгыз.

Беларуста повестка килгән Русия кешеләрен чик аша башка илләргә чыгармый башлаганнар.

Русия ватандашына хәрби хезмәткә чакыру кәгазе тапшырылган һәм аңа Русиядән чит илгә чыгу тыелган икән, ул Беларус аша да чыгып китә алмаячак. Бу хакта Беларус чик хезмәтенә сылтанып "Белсат" язды.

"Кеше махсус исемлектә булса, чыгармыйбыз. Әгәр андый исемлектә юк икән, чыгарабыз", — дип өстәгәннәр.

Шулай итеп, Русия белән Беларус арасында уртак мәгълүмат базасы барлыгы раслана.

Моңа кадәр гаскәргә барудан аңлы рәвештә баш тартучылар хәрәкәте Беларсутан Русия кешесен чыгармауның беренче очрагын теркәгән иде: хәрби хезмәткә чакырылучыга башта Русиядән Беларуска чыгу чикләнгән, ә аннары Минскидан очып китәргә рөхсәт ителмәгән.

Ике пост өчен алты ел: 71 яшьлек Фазыл Вәлиәхмәтовка хөкем карары чыкты

28 апрель көнне Екатеринбурның Үзәк хәрби мәхкәмәсе татар милли хәрәкәтенең 71 яшьлек ветераны Фазыл Вәлиәхмәтовны алты елга ирегеннән мәхрүм итү карарын чыгарды.

📌 "Сәяси тоткыннарга ярдәм. Мемориал" хокук яклау җитәкчесе Сергей Давидис фаразынча, Вәлиәхмәтовка озын төрмә мөддәте бирелүе аның кайчандыр татар милли хәрәкәтендә актив катнашуы белән дә бәйле була ала. Халыкның бүгенге режим алга сөргән империячел идеяләре тирәсендә түгел, ә милли һәм төбәк темалары һәм мәсьәләләре тирәсендә берләшүеннән хакимиятләр бигрәк тә курка, ди белгеч.

Давидис монда шулай ук Фазыл Вәлиәхмәтовның кечкенә бер шәһәрдә яшәве дә роль уйный ала дип саный.

📌 Үз вакытында Фазыл Вәлиәхмәтов та актив катнашкан Бөтентатар иҗтимагый үзәге (ТИҮ) рәисе, Фәрит Зәкиев әлеге карарны "Сталин заманының кире кайтуы" дип бәяли. Сәламәтлеге какшаган 71 яшьлек кешене Русия колониясендә 6 ел тоту карары "үлем җәзасына тиң" ди Зәкиев. Аның сүзләренчә, хакимият әле дә татардан курка, шуңа күрә "милли үзаңны куркытып үтерергә" тели.

📌 Сәясәт белгече, читтәге "Татар шурасы" оешмасына нигез салучы Руслан Айсин дә мондый кырыслыкны Русия хакмияте куркыту сәясәте өчен куллана дип саный.

"Бу хәзерге вакытта Русяинең чын йөзе. Беренче чиратта, ул кешеләрне, җәмгыятьне шундый кейслар аша куркыту сәясәтен алып бара, икенчедән, милли активистларга ачык ишарә җиткерә: сәясәткә кермәгез, үзгезнең татар икәнегезне, сугышка мөнәсәбәтегезне белдермәгез, тик утырыгыз. Бу кызганыч хәл, ләкин чынбарлык", диде ул Азатлык Радиосына.

Мәкаләне тулырак 👉 монда укыгыз

Уфа мэриясенең милек идарәсе башлыгы урынбасары Рушат Фазлиәхмәтов кулга алынды

Аны 11 июльгә кадәр сак астында калдырдылар.

Фазлиәхмәтов эшен явыз максатларда куллануда шикләнелә. Тикшерү комитеты хәбәр итүенчә, ул 28 апрельдә Уфа шәһәре хакимияте башлыгы Ратмир Мәүлиев, вице-мэр һәм бер шифаханә җитәкчесе белән бергә тоткарланган.

Әлеге вакытта шәһәр шурасы депутаты, "Агыйдел" кунакханәсе мөдире Алексей Силин мәхкәмәгә китерелгән.

Ратмир Мәүлиевның тоткарлау мөддәте иртәгә иртән чыга.

Хәерле иртә, хөрмәтле укучыларыбыз! Бүген 30 апрель, әлеге сәгатькә булган кайбер хәбәрләрне барлыйк:

🔸28 апрельдә тоткарланган Уфа мэры Ратмир Мәүлиевны мәхкәмәгә китерделәр, аңа чикләү чарасы билгеләнергә тиеш. Ул вазифа вәкаләтләреннән чыккан эшләр башкару һәм ришвәт алуда шикләнелә.

🔸Дроннар янә Пермьгә һөҗүм итә, шәһәрдә шартлау тавышы ишетелә.

🔸Ульяновски өлкәсе күгендә өч дрон бәреп төшерелде дип хәбәр итте губернаторы Алексей Русских.

🔸Җиңү көне уңаеннан Русия-Украина арасында атышлар туктатылып торырга мөмкин, аның төгәл вакыты соңрак игълан ителәчәк диде Путин сүзчесе Дмитрий Песков.

🔸Доналд Трамп Германиядә АКШ гаскәрләре санын киметү мөмкинлеге барлыгын белдерде.

🔸АКШ Һормуз бугазын контрольдә тоту өчен коалиция төзү белән шөгыльләнә.

🔸Владимир Путин Рамзан Кадыровның сентябрьдә үтәчәк Чечня башлыгы сайлауларында катнашуын хуплады.

❗️Уфа мэры Ратмир Мәүлиев ике айга сак астына алынды

11 июльгә кадәр ул тикшерү изоляторына җибәрелергә тиеш. Бу хакта мәхкәмә залыннан журналист Рамил Рәхмәтов хәбәр итә.

Шәһәр башлыгы вазыйфа вәкаләтләреннән чыккан эшләр башкаруда (Русия Җинаять кодексының 286 маддәсе, 3 өлеш) һәм аеруча зур күләмдә ришвәт алуда (290 маддә, 6 өлеш) шикләнелә.

Мәүлиев белән бергә тоткарланган Уфа башкарма комитетының җир һәм милек мөнәсәбәтләре идарәсе башлыгы урынбасары Рушат Фазлыйәхмәтов һәм "Агыйдел" кунакханәсе мөдире, шәһәр думасы депутаты Алексей Силин да 11 июльгә кадәр тикшерү изоляторына җибәрелде.

Алар вазыйфа вәкаләтләренә карамаган эшләр башкаруда гына шикләнелә.

Мәвлиев, Фазлыйәхмәтов, Силин һәм мэр урынбасары Агарагим Кагиргаджиев 28 апрельдә тоткарланды.

Тулырак 👉 монда укыгыз.

Фото: Рамил Рәхмәтов.

Русия матбугат иреге рейтингында тагын да аска тәгәрәгән

“Чикләрне танымаучы репортерлар" халыкара иҗтимагый оешмасы төзегән Матбугат ирегенең дөнья индексында Русия 172нче урынны били — бу узган ел белән чагыштырганда бер баскычка түбәнрәк.

Барлыгы рейтингта 180 ил бар. Русиядән түбәнрәк урыннарда, аерым алганда, Кытай, Иран, Согуд Гарәбстаны, Төньяк Корея урнашкан. Беларус югарырак — 165нче урында.

Гомумән, «Чикләрсез репортёрлар» билгеләп үткәнчә, матбугат иреге буенча Матбугат ирегенең дөнья индексы тарихында беренче тапкыр дөнья илләренең яртысыннан артыгы «проблемлы» яки «бик җитди» хәл категорияләренә кергән.

«Яхшы» категориясенә Төньяк Европаның нибары җиде иле генә эләккән, тагын якынча 30 илдә хәл «канәгатьләнерлек» дип бәяләнә.

АКШ рейтингта җиде дәрәҗәгә төшкән һәм 64нче урынны биләгән.

Уфа мэры вазифаларын вакытлыча башкаручы итеп шәһәр хакимияте башлыгының беренче урынбасары Сергей Кожевников билгеләнгән.

Бу хакта шәһәр хакимияте хәбәр итте. Элекке мэр Ратмир Мәүлиев коррупция эше нигезендә тоткарланып, тикшерү изоляторына җибәрелде.

Кожевниковка 51 яшь. Ул Уфада туган, Уфа энергетика техникумын һәм Мәскәүдә икътисади үзгәрешләр һәм базар белән идарә итү институтын тәмамлаган. 15 елдан артык ул «УМПО» ширкәтендә эшләгән. 2015–2022 елларда Калинин районы хакимияте башлыгы вазифасын башкарган. 2022 елдан алып бүгенгә кадәр мэр урынбасары булып эшләгән.

Мәүлиев 11 июльгә кадәр сак астына алынды. Тикшерү мәгълүматынча, ул оешкан төркем белән эш иткән һәм вәкаләтләреннән чыгып, «Радуга» шифаханәсенә караган җирләрне муниципаль милектән чыгарган, аннары җирнең бер өлешен саткан. Моннан тыш, хакимият башлыгын халыкара эзләүдә булган Гарипов исемле кешедән 10 миллион сум ришвәт алуда да гаеплиләр.

Мәктәп укучылары 1 сентябрьдән «Русиянең рухи-әхлакый мәдәнияте» фәнен өйрәнә башлаячак

Русия Мәгариф министрлыгы хәбәр итүенчә, бу фәнне 2026/27 уку елының икенче яртыеллыгыннан 5нче сыйныф укучылары өйрәнә башлаячак, ә 2027/28 уку елыннан ул 6нчы һәм 7нче сыйныфлар тезмәсенә дә кертеләчәк.

«Бу фән федераль дәрәҗәдә расланган каһарманнар пантеонына таянып, традицион әхлакый кыйммәтләрне өйрәнүгә нигезләнә. Аның асылы — укучыларны илебез тарихында зур роль уйнаган күренекле дәүләт һәм җәмәгать эшлеклеләренең тормышы һәм эшчәнлеге белән таныштыру», — дип белдергән Русия мәгариф министры Сергей Кравцов.

Русия Украинага каршы сугыш башлаганнан соң хакимият мәгариф програмына зур үзгәрешләр кертте. Моны түрәләр "көнбатыш тәэсирен юкка чыгару" дип аңлата, ватанпәрвәрлек арттыру сылтавы белән Русия пропагандасы киң җәелә.

Русия мәктәпләрендә 2022 елның 5 сентябреннән «Мөһим нәрсәләр турында сөйләшүләр» дип аталган дәрестән тыш шөгыльләр циклы да үткәрелә, 2023 елның сентябреннән — «Русия — минем офыкларым» һөнәри юнәлеш бирү курсы кертелде, ә «Тормыш иминлеге нигезләре» фәне «Ватанны саклау һәм иминлек нигезләре» форматына үзгәртелде.

Хәерле иртә, хөрмәтле укучыларыбыз! Бүген 1 май, әлеге сәгатькә булган кайбер хәбәрләрне барлыйк:

🔸Туапседа Украина дроннары һөҗүме нәтиҗәсендә диңгез терминалы җирлегендә янгын чыккан, дип хәбәр итә Краснодар крае оператив штабы.

🔸Би-би-синың Рус хезмәте «Медиазона» һәм волонтерлар төркеме белән бергә Украинага каршы сугышта һәлак булган 216 205 Русия хәрбие исемен ачыклаган.

🔸Казанда марафонга бәйле рәвештә урамнарны яба башладылар. 1 майда балалар йөгерешләре булачак. 2 май иртән 10 километрга, көндез 3 километрга йөгерешләр узачак. 3 майда Русия марафон чемпионаты үтәчәк, анда Русиядән һәм чит илләрдән иң көчле атлетлар катнашачак.

🔸ФИФА президенты Джанни Инфантино Иран җыелма такымының футбол дөнья чемпионатында катнашачагын раслады. Төркем этабындагы барлык матчларын такым АКШта уздырачак.

Салават Юлаев һәйкәле нык тузган, активистлар ул кире куелмас дип курка

29 апрельдә Башкортстанның мәдәни мирас объектларын саклау буенча күзәтү шурасы демонтажланган Салават Юлаев һәйкәлен тикшергән. Шура утырышы реставрация цехында узган.

Башкортстанның мәдәни мирас объектларын дәүләт тарафыннан саклау идарәсе җитәкчесе Салават Колбахтин һәйкәлнең торышы бик начар дип белдергән. "Һәйкәл гади авария хәлендә түгел, ә бик начар хәлдә", дигән ул.

Экспертлар билгеләгәнчә, 60 ел дәвамында һәйкәл тиешенчә реставрацияләнмәгән. Буяу катламнары бер-берсе өстенә ябылган, барлыгы җиде катлам барлыкка килгән. Аттагы дренаж тишеге дә ябылып куелган, бу исә дым җыелуга китергән.

Башкортстан башлыгы Радий Хәбиров Салават Юлаев һәйкәлен яңа коярга кирәк дип белдерде.

Башкорт активисты, сценарист Таңсулпан Буракаева үзенең социаль челтәрләрендә сүтелгән Салават Юлаевның һәйкәлендә әледән-әле җитешсезлекләр табу һәм аны зурлап сөйләү һәйкәлне кире урынына кайтырмас өчен сәбәп буларак кулланыла ала дип фаразлый.

"Хәзер яңа һәйкәлне бронзадан коярга тәкъдим итәләр, ә искесен башка урынга, мәсәлән, Салават районына илтеп куярга диләр. Илтеп куячаклар, анысын беренче эш итеп башкарачаклар, аннары бронзадан яңаны кояр өчен сугыш барган вакытта акча юк дип киләчәккә калдырачаклар. Әмма ул якты киләчәк булмаячак", дип язды ул социаль челтәрләрдә.

Салват Юлаев һәйкәле 2025 елда сүтелде. Реставрация эшләре 2027 елның апреленә кадәр узачак.

Танатаналы ачылыш 2027 елның 11 октябренә, һәйкәлнең 60 еллыгына планлаштырыла.

Мәкаләне тулырак 👉 монда укыгыз.

Татарстан белән Башкортстанның сугышта югалтулары Әфган сугышы югалтуларыннан арткан

Русиянең Украинага каршы сугышына һәлак булган Русия хәрбиләренең 216 меңнән артык исеме расланган. Моны Би-би-синың урыс хезмәте "Медиазона" һәм волонтерлар такымы белән бергә ачыклаган.

Югалтулар саны белән беренче ике урында Башкортстан белән Татарстан республикалары бара. Ике республикада гына югалтулар саны Әфган сугышындагы бөтен совет гаскәрләре югалтуларын узып киткән.

Әфганстанда Советлар берлегенең 10 ел дәвам иткән сугышы барышында, рәсми саннарга караганда, 15 меңгә якын кеше үлгән. Шулай итеп, Башкортстан белән Татарстан югалтулары бу күрсәткечтән инде 20%ка югарырык, ди Би-би-си.

Сугышта һәлак булган Татарстан һәм Башкортстан сугышчылары үлемнәре исемлеген Азатлык Радиосы да алып бара. Бүгенге көндә исемлектә ике республикадан 18406 исем бар. Башкортстаннан 9741, Татарстаннан 8665 үлем турында билгеле. Алар бары тик ачык чыганаклардан җыела. Чын саннар яшерелә.

Тулырак монда укыгыз.

Уфаның «Нур» татар дәүләт театры Мәскәүдә Алтын битлек театр премиясе кысаларында «Тау» спектаклен куячак

Мәскәү тамашачылары спектакльне 2 майда Е.Вахтангов исемендәге театрның төп сәхнәсендә карый алачак.

«Нур» татар дәүләт театрының «Тау» спектакле «Драма театры. Зур форма» номинациясендә премиягә тәкъдим ителгән.

Спектакльне режиссер Айдар Җаббаров Татарстанның халык шагыйре Илдар Юзеев әсәре буенча сәхнәләштергән. Спектакльдә Башкортстанның халык артисты Рушат Мөдәрисов, Айдар Хөснетдинов, Башкортстанның атказанган артисты Чулпан Раянова, Илгизә Муллабаева, Башкортстанның һәм Татарстанның атказанган артисты Айнур Баянов катнаша.

“Тау” спектакле Илдар Юзеевның “Гашыйклар тавы” поэмасына нигезләнгән. Анда сугыш аерган парның язмышы турында сөйләнә.

Узып баручы атна милли хәрәкәт ветераны 71 яшьлек Фазыл Вәлиәхмәтовның Вконтактедагы ике посты өчен алты елга колониягә хөкем ителүе белән тарихка кереп калды.

Пенсионерны Русия армиясен "дискредитацияләү" һәм "террорчылыкны аклау" маддәләре нигезендә гаепле дип таптылар

"Сәяси тоткыннарга ярдәм. Мемориал" хокук яклау җитәкчесе Сергей Давидис өлкән яшьтәге кешегә ни өчен мондый озын төрмә мөддәте бирелүенең сәбәпләрен барлады.

Ул Украинага каршы сугыш башлаганнан соң Русиядә хатын-кызларга, балаларга, өлкәннәргә карата һуманлык күрсәтү кебек әле азмы-күпме сакланган хокукый рудиментлар бар иде, хәзер инде алары даюкка чыкты ди. Бу беркем дә үзен имин дип хис итмәсен өчен эшләнә ди ул.

Давидис сүзләренчә, Вәлиәхмәтов сәяси тоткын дип танылган һәм ул ирегеннән мәхрүм ителерегә тиеш түгел. "Аңлашыла ки, бу башка төрле фикер йөртүчеләргә, башка позициядә булучыларга, сугышны хупламаучыларга каршы көрәшнең чагылышы. Русия мондый җәзага корылган сәясәтне 4 елдан артык алып бара", диде Давидис Азатлык Радиосына.

Аның фаразынча, 71 яшьлек Вәлиәхмәтовка озын төрмә мөддәте бирелүе аның кайчандыр татар милли хәрәкәтендә актив катнашуы белән дә бәйле була ала. Халыкның бүгенге режим алга сөргән империячел идеяләре тирәсендә түгел, ә милли һәм төбәк темалары һәм мәсьәләләре тирәсендә берләшүеннән хакимиятләр бигрәк тә курка, ди белгеч.

Фазыл Вәлиәхмәтов 1990-нчы елларда татар милли хәрәкәтендә актив катнашты, ләкин соңгы елларда ул күбрәк дәүләт карамагандагы татар оешмалары белән хезмәттәшлек итте: Дөнья татар конгрессы, Татарстанның туган якны өйрәнүчеләр җәмгыяте һәм Казан федерал университеты оештырган туган якны өйрәнү форумнарында һәм конференцияләрендә актив катнашып килде.

Давидис монда шулай ук Фазыл Вәлиәхмәтовның кечкенә бер шәһәрдә яшәве дә роль уйный ала дип саный. "Җәзага корылган сәясәт алып баручы оешмалар "дәүләт дошманнарын" табып хөкем итүләре турында хисап биреп барырга тиеш. Зур шәһәрдә "андый дошманнарны" табу җиңелрәк булса, провинциядә сайлау мөмкинлеге зур түгел. Анда берәр кеше килеп чыкса, аңа ябышалар һәм халык алдында җәзага тарталар. Бу гомуми күренеш түгел, күбрәк хосусый бер әйбер, ләкин шулай ук үз ролен уйный", диде Сергей Давидис.

Тулырак 👉 монда укыгыз.

Башкортстанда дрон һөҗүме куркынычы игълан ителде.

Уфа һава аланында "Ковер" планы кертелгән, ул эшләми тора.