Чаллы кешесенә "Алабуга" һәм "КАМАЗ" турында Украинага мәгълүмат җыю эше нигезендә 21 ел колония җәзасы бирелгән

Татарстан Югары мәхкәмәсе Чаллыда яшәүче кешене дәүләткә хыянәт итүдә һәм үтерүгә әзерләнүдә гаепле дип танып, кырыс тәртипле колониядә 21 елга ирегеннән мәхрүм иткән. Бу хакта мәхкәмәнең матбугат хезмәте хәбәр итә.

"Татар-Информ" агентлыгы мәгълүматынча, хөкем ителгән кешенең исеме — Сергей Вишняков. Тикшерү фаразынча, сугыш башланганнан соң ул Украина махсус хезмәтләре белән элемтәгә кергән һәм хезмәттәшлек турында килешкән.

Дәүләт гаепләүчесе белдерүенчә, Чаллы кешесе үзенең "кураторына" дроннар җыела торган "Алабуга" махсус икътисади мәйданы объектлары һәм "КАМАЗ" ширкәтенең җитештерү куәтләре турында мәгълүмат тапшырган.

Моннан тыш, Вишняковны 2024 елның маенда саклану-сәнәгать комплексы өчен йөк ташылган Куйбышев тимер юлында реле шкафларын фотога төшерүдә, шулай ук соңрак күршесенә һөҗүм итүне планлаштыруда гаепләгәннәр.

"Татар-Информ" язуынча, Вишняковның күршесе Украинаның көньяк-көнчыгышында сепаратистларның "Спарта" батальоны белән җитәкчелек иткән, "Моторола" кушаматлы Андрей Павловның урынбасары булган. Һөҗүм әзерләнгән хәрбинең исеме хәбәр ителми, дип яза "Медиазона".

Суд бәхәсләре вакытында дәүләт гаепләүчесе Вишняковка 22 ел ирегеннән мәхрүм итү җәзасы сораган булган. Аның гаебен таныган-танымаганлыгы турында хәбәр ителми. Тикшерү версиясен раслаучы бәйсез дәлилләр юк.

31 июль иртәсендә Татарстанның Яшел Үзән янындагы логистика комплексларына һөҗүм омтылышы булды.
Моны рәсмиләр дә раслады. Аларның белдерүенчә, дроннар шәһәрдән читтә бәреп төшерелгән.
Ozon склады хезмәткәрләре эвакуацияләнгән.

Wildberries складларында эш гадәти тәртиптә дәвам итә дип хәбәр ителде.

Бүген шулай ук Түбән Камадагы сәнәгать объектларына да һөҗүм омтылышы булды.

Украина Кораллы көчләре Русиядәге стратегик әһәмияткә ия предприятиеләргә даими рәвештә һөҗүм итә. Киев моны Русиянең Украинага ясаган һөҗүмнәренә җавап дип атый.

Соңгы вакытта Русиянең төрле төбәкләрендә Wildberries компаниясенең дистәдән артык складына һөҗүм ясалды.

⚡️Уфаның төньягында сәнәгать мәйданында көчле янгын күренә.

Украина мониторинг телеграм каналлары язуынча, нефть эшкәртү заводына дрон һөҗүме булган.

Шимбә иртән Башкортстанда дрон һөҗүме куркынычы игълан иелде. Аспекты язуынча, җирле вакыт белән 10:30да нефть ширкәтләре өстендә шартлаулар ишетелгән һәм төтен чыга башлаган.

Русия ягыннан да, Украина ягыннан да әлегә рәсми хәбәрләр юк.

Astra: Уфада дроннар «Башнефть-Уфанефтехим» нефть эшкәртү ширкәтенә һөҗүм иткән

Уфага 1 август иртәсендә булган дрон һөҗүме «Башнефть-Уфанефтехим» нефть эшкәртү ширкәтенә ясалган. Моны Astra басмасының OSINT-анализы күрсәтә.

Басма мәгълүматларына караганда, әлеге ширкәт елына 8,2 миллион тоннага кадәр нефть эшкәртә. Монда шулай ук мотор ягулыгы, нефть коксы, сыекландырылган газ, күкерт һәм ароматлы углеводородлар җитештерелә.

Башкортстан башлыгы Радий Хәбиров Уфага чираттагы дрон һөҗүмен расалды.

Аның сүзләренчә, сәнәгать мәйданына бәреп төшерелгән дрон калдыклары төшү сәбәпле төтен чыккан.

«Урында барлык хезмәтләр дә эшли, һөҗүм китергән зыянны тиз арада бетерәләр. Һәлак булучылар да, җәрәхәтләнүчеләр дә юк», дип язды Хәбиров үзенең Telegram-каналында.

Astra белдергәнчә, Башнефть Уфаның төньяк сәнәгать мәйданында бер-берсенә бик якын урнашкан өч нефть эшкәртү заводы белән идарә итә: «Башнефть-Уфанефтехим», «Башнефть-Новойл» һәм «Башнефть-УНПЗ».

Мәхкәмә этнолог Илдар Габдрафыйковның эштән җибәрелүенә шикаятен кире каккан, аны эштән бирелгән фатирыннан да чыгаралар

Самардагы Алтынчы кассация мәхкәмәсе Уфа этнологы Илдар Габдрафыйковның эштән җибәрелүен кануни дип таныган карарга биргән шикаятен кире каккан.
Шулай итеп, Уфаның Октябрь районы мәхкәмәсе чыгарган карар гамәлдә калган.

Габдрафыйков сүзләренчә, шул ук вакытта аны эшеннән бирелгән фатирыннан мәҗбүри чыгару процессы да бара. Аның әйтүенчә, Уфа федераль тикшеренү үзәге быел мартта фатирыннан чыгару турында дәгъва белән мәхкәмәгә мөрәҗәгать иткән, ә 7 июльдә район мәхкәмәсе бу таләпне канәгатьләндергән.

Галим әлеге карарга да шикаять биргән. Ул мәхкәмә Русия Фәннәр академиясенең Этнология һәм антропология институты җитәкчесе Валерий Тишковның хатын исәпкә алмаган дип саный. Габдрафыйков әйтүенчә, хәзер ул әлеге институтта дистанцион рәвештә эшли, һәм Башкортстанда этник мониторинг һәм социологик тикшеренүләр үткәрү өчен Уфада булуы кирәк.
Габдрафыйков алга таба Русия Югары мәхкәмәсенә мөрәҗәгать итү мөмкинлеген карый.

🔹Русия Фәннәр академиясенең Уфадагы Этнологик тикшеренүләр институтының өлкән фәнни хезмәткәре Илдар Габдрафыйков былтыр вазифасы өчен үткәрелгән бәйгедә җиңә алмагач эшеннән җибәрелде. Әлеге вазифага филология фәннәре докторы Элвина Салихова билгеләнде.

1990 елдан институтта эшләгән Габдрафыйков эштән җибәрелүен мәхкәмәдә бәхәсләшергә тырышты.

Галимне яклап, Русия Фәннәр академиясе президиумы әгъзасы, Ширшов исемендәге Океанология институтының фәнни җитәкчесе һәм Мәскәү дәүләт университеты профессоры Роберт Нигъмәтуллин Уфа федераль тикшеренү үзәге президиумыннан чыккан иде. Ул Габдрафыйковны эштән алуны үзәк җитәкчелегенең "канунсыз гамәле" дип атады. Аңа Русия Фәннәр академиясенең Этнология һәм антропология институты җитәкчесе Валерий Тишков та кушылды.

Үзәк җитәкчесе Василий Мартыненко бу гаепләүләрне кире какты. Аның сүзләренчә, вазифага бәйге гамәлдәге кануннар нигезендә үткәрелгән.