Қазақстандық танымал әнші Yenlik (Еңлік Құрарбек) германиялық танымал Colors музыкалық шоуында ән айтты. Бұл беделді жоба әр елдегі танымал әртістердің өнерін әлем аудиториясына таныстырады.

💵 АҚШ президенті Дональд Трамптың әкімшілігі "Бейбітшілік кеңесінен" тұрақты орын алғысы келетін елдерден кемінде 1 миллиард доллар көлемінде жарна төлеуді талап етіп отыр. Мұны топтың жарғы жобасымен танысқан Bloomberg агенттігі жазды.

Құжатқа сәйкес, жарғы күшіне енгеннен кейінгі алғашқы бір жыл ішінде жарна төлеген мемлекеттер тұрақты мүше құқығына ие болады. Ал өзгелері үш жылдан аспайтын мерзімге тағайындалады. Жарғы жобасында Дональд Трамп "Бейбітшілік кеңесінің" алғашқы төрағасы болатыны және ұйымға кімді шақыру керегін өзі шешетіні көрсетілген. Сонымен қатар ол, егер кеңеске қатысушылардың үштен екіден астамы қарсы болмаған жағдайда, мүше елдерді кеңес құрамынан шығару құқығына да ие болады.

Кеңесте шешім көпшілік дауыспен қабылданады, әрбір мүше мемлекет бір дауысқа ие. Алайда құжатта атап өтілгендей, қабылданған барлық шешімді төраға мақұлдауы тиіс.

❗Тоқаев: Жаңа Конституция деуге болады

Қазақстан президенті Қасым-Жомарт Тоқаев парламентті реформалау жөніндегі жұмыс тобының отырысында алдағы уақытта Конституцияға біраз түзетулер енгізілетінін меңзеді.

"Парламент реформасын жүзеге асыру үшін Конституцияның бірден бірнеше бөлімін қайта қарау қажет болады. Сондықтан Ата заңымызға осыған дейін енгізілген өзгертулерді ескерсек, жұмыс тобы ұсынып отырған түзетулер жобасы Қазақстанның шын мәнінде жаңа Конституциясы туралы айтуға мүмкіндік береді" деді ол.

Бұған қоса, Тоқаев ертең, 20 қаңтарда өтетін Ұлттық құрылтайда "ел тағдырына қатысты бұл мәселе бойынша нақты пікірін айтатын" жеткізді. Ол "заң шығарушы билік тармағын жүйелі түрде қайта форматтау қажет" дейді.

📚Қазақстанда жеке мектептерді ашуға талап өзгереді

Қазақстанда жеке мектептерге қойылатын талаптар өзгереді. Бұл туралы оқу-ағарту министрі Жұлдыз Сүлейменова Алматыдағы жеке мектептер өкілдерімен кездесуде айтты.

Не өзгереді?

Енді Қазақстанда жеке мектептер нақты қажеттілік туындаған өңірлерде ғана ашылады. Министрліктің айтуынша, лицензия үш ауысымды мектептерді, апатты жағдайдағы білім орындарын алмастыру үшін мемлекеттік мектептер жетіспейтін өңірлерге ғана беріледі.

Жеке мектептердің иелері білім сапасына, ұстаздардың біліктілігі мен оқушылардың қауіпсіздігін қамтамасыз етуге жауапкершілік алады. Ал мектеп директорларын құрылтайшылары тікелей тағайындай алмайды. Директор тағайындағанда министрлік пен жергілікті білім бөлімдерінің келісімін алу керек.

Қанша жеке мектеп бар?

Қазақстанда кейінгі кезде жеке мектептердің саны артқан. Елде 890 мектеп лицензия алған.

Бірақ қоғамда жеке мектептердегі бағаның қымбаттығына қатты түрлі пікірлер айтылған. Қазақстандағы кейбір халықаралық мектептерде жылдық оқу ақысы 18 миллион теңгеге барады. Мемлекеттік субсидия есебінен шығынын жауып отырған жеке мектептердің бір бөлігі ата-анадан ақша алмай, тегін білім береді. Бірақ ел бойынша шәкіртті оқуға іріктеп қабылдау жүйесін енгізді. Мемлекеттік "ҚазАқпарат" агенттігінің дерегінше, 2024 жылы жеке секторда оқитын балаларға үкімет бөлген қаржы 185 миллиард теңгеден асқан.

«Тоқаевты сайлауға қайта түсуге шақырған» көкпаршы: «Бұл – жеке ойым»

Желіде «Жаппай көкпаршылар ұйымының» мүшесі Біржан Қалдыбаев үндеу жолдап, «Қазақстан президенті Қасым-Жомарт Тоқаев президент сайлауына түсуін қолдауымыз қажет деп санаймыз» деді. Ол бұл ұсынысын «Жаппай көкпар федерациясы» атынан және «ат үстінде жүрген 500 мыңнан астам» адамнын атынан жасайды.

«Басқа президент келіп жаңа жүйе қалыптастарғанша біршама уақыт жоғалтамыз. Ал ол басшының қандай адам екені, әлемдік деңгейде мемлекеттермен қандай қарым-қатынас жүргізетіні бізге беймәлім. Қазіргі президентімізді біз жақсы білеміз, танимыз. Оның жетіден артық тілді меңгеріп, еркін сөйлей алуы шет мемлекеттермен жақын қарым-қатынас орната алатынының айқын дәлелі» дейді ол үндеуінде.

🔹Қалдыбаев үндеуі жайлы не дейді?

Қалдыбаев Азаттыққа бұл «өзінің жеке ойы екенін» айтады.

«Негізі ой-пікір жеке өзімдікі. Өзімнен туындаған нәрсе. Мессенджердегі чаттарымызда бәрі қолдап, видеоны түсіруге тура келді. Әлемде қандай ахуал екенін өздеріңіз көріп отырсыздар ғой, ал бізде тыныштық, соғыссыз бейбіт өмір. Президентіміз қаншама елмен тығыз қарым-қатынаста» деді ол Азаттыққа.

🔹Көкпар федерациясы ше?

Жаппай көкпар федерациясының президенті Ғани Дирманов Азаттық тілшсіне ұсыныс федерация атынан жасалғанын жоққа шығарып, жеке Қалдыбаевтың ойы екенін айтты. Қалдыбаев та 500 мың қолды қалай жинағанына дәлел келтірмеді.

Қазіргі заң бойынша, Қазақстанда президент 7 жылдық бір мерзімге сайланады. Тоқаев бұған дейін президент сайлауына түспейтінін айтқан.

Колесникова Еуропа одағын Лукашенкомен келіссөз жүргізуге шақырды

Беларусьте жақында ғана қамаудан шыққан саяси тұтқын Мария Колесникова Еуропа одағының лидерлерін Беларусьтің авторитар жетекшісі Александр Лукашенкомен келіссөз жүргізуге шақырды.

Колесникова (Оппозициялық саясаткер Виктор Бабарико штабының басшысы болған, 2020 жылғы Беларусьтегі наразылықтың лидерінің бірі) Financial Times газетіне берген сұхбатында Еуропаның Беларусьтен оқшаулануы Лукашенконы Ресеймен жақындастырады деді.

"Еуропа Лукашенкомен АҚШ-тан бұрын келіссөз бастамағанын түсіне алмаймын. Мысалы, Германияның Беларусьпен байланысы әлдеқайда көп. [Лукашенко] санкциялар жеңілдеген жағдайда саяси тұтқындарды босатып, Беларусьте тәуелсіз БАҚ пен үкіметтік емес ұйымдардың жұмысына рұқсат берсе, онда мұны талқылау керек" деді Колесникова сұхбатында.

🔹Колесникова кім?

Колесникова 2020 жылы Беларусьтегі билікке қарсы наразылықтан соң 11 жылға түрме жазасына кесілген. Колесникова және бір топ саяси тұтқын 2025 жылы желтоқсанда АҚШ-тың араласуымен түрмеден шыққан. Вашингтон Минск саяси тұтқындарды босатқан соң санкцияларды жеңілдеткен.

Колесникова түрмеден шыққаннан кейін Украинадағы баспасөз мәслихатында "Лукашенкоға қамаудан босатқаны үшін алғыс айтқан" еді. Оның бұл сөзін кейбір адам сынға алған.

🔹ЕО мен Лукашенконың қарым-қатынасы

Еуропа одағындағы елдер Лукашенконы Беларусьтің легитимді президенті деп мойындамайды. Ал АҚШ Джо Байден президент болып тұрған тұста Лукашенко билігін мойындамаған. Президенттікке Трамп келгелі Вашингтон өкілдері бірнеше рет Минскіге келіп, АҚШ Беларуське салынған кейбір санкцияларды жеңілдетті.

Зеленскийдің дипломатиядан үміті жоқ. Украина АҚШ-пен талқыны жалғастырып жатыр | Соғыс жаңалықтары

Биыл Мәскеу Украинаға қарата күніне 1000 дроннан ұшырмақ. Бұл қазіргі көрсеткіштен екі жарым есе көп. Ал Украина президенті ресми Кремльдің бітімге ниеті жоқ, «агрессияны тоқтатудың бірден-бір жолы – қысым» деді.

🔗 КӨРІҢІЗ

Кассация соты Қаңтарда көзінен айырылған Әбдірешовтің өтемақысын сәл өсірді

Астанадағы кассациялық сот Қаңтар оқиғасында зардап шеккен Ермек Әбдірешовтің өтемақы жөніндегі талабын ішінара қанағаттандырып, мемлекет төлеуге міндетті өтемақыны 5 млн теңгеге ұлғайтуды шешті.

🔹25 миллионның орнына бес миллион теңге

Қаңтар оқиғасында екі көзінен айырылған Ермек Әбдірешов мемлекеттен 25 млн теңге өтемақы талап етіп жүр. Астана қаласының соты Әбдірешовтің талабын 2023 жылы қарап, «оны заңсыз қудаланды, бірақ нақты залал келтіруші анықталмады» деп, 2 миллион теңге өтемақы төлеуге міндеттеген. Апелляциялық сот алғашқы инстанцияның шешімін өзгеріссіз қалдырған.

Екі жылдан кейін, бүгін 19 қаңтарда Астанадағы кассациялық сот өтемақыны көтеру шешімін қабылдады. Сот отырысы кезінде жауапкер қаржы министрлігі мен бас прокуратура өкілдері шешімді өзгертпеуді сұраған.

🔹Әбдірешовтің ұсталуынан ақталуына дейін

Әбдірешов 2022 жылы 5 қаңтарда көзін жаралап алған күні №7 қалалық клиникалық ауруханаға жеткізіліп, нейрохирургияның жансақтау бөліміне жатқызылады. Бірақ 8 қаңтарда оны құзырлы орган өкілдері ереуілге қатысты жауап алу үшін тергеу изоляторына күштеп алып кеткен. Әбдірешовтің қорғаушысы сол кезде оны алып кетпей, көзіне ота жасатуға мүмкіндік бергенде бір көзін сақтау қалуға болар еді дейді.

Әбдірешов тергеу изоляторында алғашқы екі күн азапталғанын, сол кезде көзі мүлде көрмей қалғанын айтады. Қаңтар оқиғасынан 8 ай өткен соң үстінен қозғалған қылмыстық іс дәлелденбеді деп жабылады.

🔹Прокуратура Әбдірешовтен кешірім сұраған

Алматы прокуратурасы заңсыз қылмыстық қудалағаны үшін Әбдірешовтен кешірім сұрап, "келтірілген материалдық, моральдық шығынның өтеуін сұрауға құқығыңыз бар" деген. Содан бері жәбірленуші екі көзі көрмей, еңбекке толық жарамсыз болып қалғанын, ары қарай тағы да емделуге қомақты қаражат қажет екенін айтып, Қазақстан сотынан 25 миллион теңге көлемінде моральдық зиян өтемақысын өндіруді сұрап келеді.

⚽Қазақстанның FIFA Series турниріндегі қарсыластары анықталды. Матчтар Қазақстанда өтеді

Қазақстанда биыл FIFA Series-2026 турнирінің бір тобы ойнайды. Бүгін, 19 қаңтарда FIFA Қазақстанға келетін құрамалардың тізімін жариялады.

🔸Бұл турнирде Қазақстан Африкадағы Комор аралдары және Намибия елдерімен, Азиядағы Кувейт елімен бір топта ойнайды. Әр ел топта тек екі матч өткізеді. Қазақстан қай елдермен кездесетіні алдағы күндері анықталады.

FIFA Series – әр құрлықтағы елдер жолдастық матч ретінде ойнайтын турнир. 48 елдің құрамасы 12 топқа бөлініп, жолдастық кездесу өткізеді.

FIFA Series турнирі 23-31 наурызда Астанада өтеді.

Биылғы турнирдің бір тобы Өзбекстанда ойнайды. Өзбекстанға Габон, Тринидад және Тобого, Венесуэла келеді.

Тоқаев сайлауға қайта түсе ме? — AzatNEWS | 19.01.2026

- Тоқаевты қайта президент сайлауына қатысуға үндейтін мәлімдеме пайда болды.

- Қаңтар көтерілісінде көзіне оқ тиген азаматтың өтемақы туралы арызын сот қайта қарады.-

Істі болып жатқан журналист Гүлнәр Бажкенованың адвокаты Мұрат Адам лицензиясынан айырылды.