⚡Шайдоровтың жүлдеге мүмкіндігі бар ма?

🔹Қысқа бағдарламадан кейінгі жағдай

Олимпиадада мәнерлеп сырғанаудан ерлер арасындағы жарыстың қысқа бағдарламасынан соң Қазақстан үміт артқан Михаил Шайдоров әзірге 5-орында келеді.

Қысқа бағдарламада Шайдоров 92,94 ұпай алды. Ол төрт айналым лутц+үш айналым тулуп каскадында сәл қателік жіберіп алды. Кейін үш айналым аксель мен төрт айналым тулупты қатесіз секірді.

Ал бірінші орында екі дүркін әлем чемпионы Илья Малинин (АҚШ) тұр. Ол мәнерлеп сырғанаудағы қиын элементтердің қатарына кіретін төрт айналым флип және төрт айналым лутц+үш айналым тулуп каскадын таза секіріп, жоғары ұпай алды – 108,16. Екінші орында жапониялық Юма Кагияма келеді – 103,07 ұпай. Ол Милан олимпиадасының командалық жарысында 108,67 ұпай алған еді. Бірақ жекелей сында үш айналым аксельден қателік жіберіп алды.

Үшінші орында франциялық Адам Сяо Хим Фа (102,55), төртінші орында италиялық Даниэль Грассл (93,46) тұр.

🔹Негізгі бағдарлама қашан?

13 ақпан негізгі бағдарламадан соң олимпиада чемпионы мен жүлдегерлері анықталады. Шайдоров алғашқы үштікте тұрған қарсыластарынан кемі он ұпай қалып келеді. Егер Малинин, Кагияма, Сяо Хим Фа негізгі бағдарламаларын таза орындаса, үшеуін озу басқа спортшыларға қиынға соқпақ.

Бірақ мәнерлеп сырғанауда негізгі бағдарламадан соң жағдай күрт өзгеріп, қысқа бағдарламадан кейін үштікте тұрған спортшылар жүлдеге ілінбей қалған кездері жиі болады.

2014 жылы Сочи олимпиадасында қазақстандық Денис Теннің қысқа бағдарламадан кейін тоғызыншы орында тұрып, кейін қола медаль жеңіп алғанын еске алып жатыр.

Сочи олимпиадасында Тен қысқа бағдарламада 84,06 ұпаймен 9-орын алған. Бірақ 3-орын мен 9-орынның арасын үш ұпай ғана бөліп тұрған еді. Кейін Денис Тен негізгі бағдарламасын мінсіз орындап, ал қысқа бағдарламада оның алдында болған спортшылар негізгі бағдарламаларын таза орындай алмаған еді.

Азаттық тілшісі Руслан Меделбек Миланнан хабарлайды

Белсенді Амангелді Жаһиннің ісі бойынша тергеу аяқталды

"Алға, Қазақстан" оппозициялық партиясын құру жөніндегі бастамашыл топ жетекшілерінің бірі Амангелді Жахиннің ісі бойынша тергеу аяқталды. Бұл жөнінде адвокаты Бақытжан Омарханов хабарлады.

10 ақпанда белсенділер адвокатпен бірге Көкшетау қаласындағы изоляторға барып, белсендінің жағдайын білген.

“Адвокаттың айтуынша, Амангелді қатты арықтап кеткен. Ол бұрыннан-ақ арық еді, ал соңғы екі айдың ішінде тіпті одан да қатты салмақ тастаған. Бұл оның денсаулығына қатысты үлкен аландаушылық туғызады. Адвокат Амангелдімен жеке кездесіп, егжей-тегжейлі сөйлесті. Оның айтуынша, Амангелді Жахинге катысты кылмыстык іс аяқталған, тергеу тәмамдалып, іс сотқа жолданнып жатыр. Амангелді тоғыз томдық іспен толық танысып шыққан. Адвокаттын мәліметінше, алдағы уақытта, шамамен наурыз айында, сот процесі басталуы мүмкін. Амангелді өзіне қолдау білдіріп жатқан барша жандарға үлкен алғысын жеткізді” деп жазылған құқық қорғаушы Бақытжан Төреғожина жариялаған жазбада.

Адвокаттың сөзінше, Жахинге “тыйым салынған ұйымның ісіне араласу” және “экстремистік ұйымды қаржыландыру” баптары бойынша айып тағылған. Дәл осындай баппен тіркелмеген "Алға, Қазақстан" партиясының жетекшісі, қазір қамауда отырған Марат Жыланбаев сотталған.

Қызметінен шеттетілген Қамшыбек Ташиев Садыр Жапаровтың шешімі жөнінде пікірін айтты

Ташиевтің мәлімдемесін оған жақын адам саналатын журналист Нұрғазы Анарқұлов Facebook желісінде жариялады.

"Мен ауырып қалып, президенттің рұқсатымен Германияға келгенмін. Бұған дейін жасалған отаға байланысты тексеруден өтуім керек болды. Алайда кеше мені қызметтен босатты, бұл мен үшін күтпеген жағдай. Не болса да, президент шешімін орындауға міндеттіміз. Мемлекет, халық және президент алдында қызметтік міндетімді адал атқардым және оны мақтан тұтамын. Бар болғаны жеке құраммен қоштасуға мүмкіндік берілмегеніне өкініш білдіремін. Ұлттық қауіпсіздік жөніндегі мемлекеттік комитеттің әрбір қызметкеріне алғыс айтып, оларға сәттілік тілеймін. Елімізде бейбітшілік пен тұрақтылық сақталуы үшін ешкім заңсыз әрекетке бармауы керек және біздің әрбір әрекетіміз заң аясында жасалуы қажет" деді Қамшыбек Ташиев өз мәлімдемесінде.

Бас прокуратура Нығматулиндер ісіне қатысты түсініктеме берді

Бас прокурордың орынбасары Ғалымжан Қойгелдиевтің айтуынша, тергеу Нығматулиндер отбасына қатысы бар үшін адамға қатысты жүріп жатыр. Мәселе – мәжілістің бұрынғы спикері Нұрлан Нығматулиннің ағасы Арғын Нығматулин, экс-спикердің егіз бауыры Ерлан Нығматулин және ұлы Нұржан Нұрланов жөнінде болып отыр.

“Қазіргі кезде Түркияға құқықтық көмек туралы өтініш жібердік, жауабын күтіп отырмыз” деді Қойгелдиев 11 ақпанда мәжіліс кулуарында. Оның сөзінен “За нами выехали” телеграм-арнасы үзінді келтіреді.

Былтыр бас прокуратура бюджет қаржысын жымқыру фактісі бойынша іс қозғалып, Арғын Нығматулинге халықаралық іздеу жарияланғанын хабарлаған. Нұржан Нұрлановтың өзі бұған дейін өзіне қатысты шыққан ақпараттарға қатысты ешқандай мәлімдеме жасаған жоқ. Оның қазір қайда екені белгісіз. Былтыр оппозициялық "Бәсе" арнасы оның Қазақстан азаматтығынан бас тартып, Дубайда тұрып жатқанын жазған.

Бүгін конституциялық реформа жөніндегі комиссияның соңғы отырысы өтті. Комиссия мүшелері жаңа Конституция жобасын референдумға шығаруды қолдады.

Енді жоба президенттің қарауына жіберіліп, одан кейін жалпыұлттық референдум мерзімі де бекітілуі мүмкін.

Айдос Үкібай Сара Назарбаеваның ауруханадан шығарылғанын растады

Қазақстанның бірінші президенті Нұрсұлтан Назарбаевтың әйелі Сара Назарбаева ауыр инфарктен кейін емделіп, ауруханадан шығарылды. Бұл жөнінде бірінші президенттің баспасөз хатшысы Айдос Үкібай хабарлады.

Оның сөзінше, Сара Назарбаева былтыр сәуірден бері президент пс басқармасы медициналық орталығының Алматы қаласындағы ұлттық госпиталінде емделген.

"Сол кезеңде ол ауыр миокард инфарктін бастан кешірді. Дәрігерлер ұзақ уақытқа созылған ауыр қант диабеті мен үдемелі созылмалы бүйрек жеткіліксіздігі аясында дамыған жүректің ишемиялық ауруын, жүрек және өкпе жеткіліксіздігін анықтады" деп жазды баспасөз хатшысы.

Оның сөзінше, Сара Назарбаева ұзақ уақыт бойы өкпені жасанды желдету және жасанды бүйрек аппараттарына қосылған.

Биыл қаңтарда жағдайы тұрақталғаннан кейін ауруханадан шығарылған. Қазір Алматы қаласында үй жағдайында дәрігерлердің бақылауында деді ол.

Президент Қасым-Жомарт Тоқаев жақын арада жаңа Конституцияны қабылдау бойынша республикалық референдум өткізу туралы жарлыққа қол қояды. Бұл жөнінде Ақорда хабарлады.

Бүгін конституциялық комиссия жаңа Конституция жобасы бойынша жұмысын аяқтаған. Осыдан кейін Тоқаев комиссия төрағасы Эльвира Әзімова, комиссия төрағасының орынбасары, мемлекеттік кеңесші Ерлан Қарин мен комиссия мүшесі Ержан Жиенбаевты қабылдады.

Жаңа Конституция бойынша референдум 15 наурызда өтеді

Президент жарлығына қарағанда, азаматтарға "БАҚ-та 2026 жылғы 12 ақпанда жарияланған Қазақстан Республикасының жаңа Конституциясын қабылдайсыз ба?" деген сұрақ қойылады.

11 ақпанда Италиядағы олимпиадада украиналық скелетоншы Владислав Гераскевич тыйымға қарамастан соғыста қаза тапқан спортшылардың суреті жапсырылған шлеммен жаттығуға қайта шықты.

Халықаралық олимпиада комитеті (ХОК) Гераскевичке бұл шлеммен олимпиадаға қатысуға тыйым салған еді. Ережеге сай, спортшылар олимпиада жаттығуында, жарыста, марапаттау кезінде саяси тақырыптарды көтеруге болмайды. Бірақ Гераскевич шлем ешқандай да саяси насихат емес, "олимпиадаға қатыса алмай кеткен спортшыларға тағзым" деп санайды.

ХОК бүгін, 11 ақпанда Украина скелетоншысынан тыйым салынған шлеммен жарысқа қатыспауды сұрап, егер қатысса жарыстан шеттетілетінін ескертті. Бірақ Гераскевич шлеммен жарысқа шығамын деп отыр. Ол жүлдеден бұрын адамдардың өмірі қымбат деп санайды.

ХОК өкілі Марк Адамс "Біз оның жарысқа қатысқанын қалаймыз. Біз онымен бүгін байланысып, спортшыларға тағзым көрсететін басқа да мүмкіндіктерді ұсынып көреміз" деді.

Гераскевич соғыс құрбандарының суреті бар шлемді 9 ақпандағы жаттығуға киіп шыққан еді.

Жапаров Ташиевті неге кетірді?

Германияда емделіп жатқан Қамшыбек Ташиев Қырғызстан президенті Садыр Жапаровтың жарлығымен ұлттық қауіпсіздік жөніндегі мемлекеттік комитет төрағасы лауазымынан босатылды. Ташиевтің өзі мұны «күтпеген шешім» деп сипаттады. Ел ішінде екі достың арасында не болды деп, жаңалықтың саяси астарын іздегендер көп.

Тоқаев референдум күнін белгіледі, Алматыда Алтынбекті еске алды — AzatNEWS l 11.02.2026

🔹 Жаңа Конституция қабылдау туралы референдум күнін президент 15 наурызға белгіледі.

🔹 Алтынбексіз 20 жыл. Алматыда қастандықтан қаза тапқан саясаткер Алтынбек Сәрсенбайұлын еске алды.

🔹 Канадада мектепте атыс болып, он адам қаза тапқаны хабарланды.