📹Трамп Ресейге салынған санкцияны созды, Кения Мәскеуді айыптады | Соғыс жаңалықтары

АҚШ президенті Дональд Трамп 2014 жылы Ресейге салынған санкция режимін тағы бір жылға созды. Бұл құжат Украинаның қауіпсіздігі мен тәуелсіздігіне қауіп төндіруге жауапты жеке және заңды тұлғалардың активін бұғаттауға рұқсат береді. Ал Еуропа Украинаға әскери көмек көрсетуді жалғастырып жатыр.

Толығырақ көріңіз

💬 Bloomberg: Қытай жаңа бағыт бойынша дрондарды Ресейге экспорттайды

Қытай дрондарды Ресейге жаңа бағыт – Таиланд арқылы экспорттап жатыр деп жазды Bloomberg.

Ақпарат агенттігінің жазуынша, Таиландтан Ресейге дрон экспорты 2022 жылы күрт артқан. Бір мезетте Қытайдан Таиландқа дрон экспорттау көлемі де күрт ұлғайған. Bloomberg дереккөзінің айтуынша, украин шенеуніктері бұл тенденцияны байқаған.

Былтыр 11 айда Ресей Таиландтан құны 125 млн доллар болатын дрон импорттаған. Bloomberg-тің жазуынша, бұл Таиландтан шығарылған дрон экспортының 88 пайызы және 2024 жылғы көрсеткіштен сегіз есе көп. 2022 жылы Таиланд құны 1 млн доллар болатын дрон экспорттаған және ешқайсысы Ресейге жіберілмеген.

🗣Ресейлік жойғыш ұшақ Атырауға шұғыл қонды

20 ақпанда сағат 9:40 шамасында Атыраудағы Хиуаз Доспанова атындағы халықаралық әуежайға көпнысанды төртінші буындағы Су-30 жойғыш ұшағы шұғыл қонды. Бұл жөнінде "Ақ жайық" жазды. Ұшқышқа медициналық көмек көрсетілген.

Басылымның жазуынша, ұшақты 1986 жылғы Ресей азаматы, Белорецк қаласының тумасы (Башқұртстан) Дмитрий Нифантьев басқарған. Ақпаратқа қарағанда, ол Каспий теңізі акваториясы үстінде әскери-жаттығу тапсырма орындаған.

💬 АҚШ соты Трамптың өзге елдерге қарсы енгізген тарифтерін заңсыз деп таныды

АҚШ Жоғарғы соты президент Дональд Трамптың өзге елдерге қарсы енгізген тарифтерінің басым бөлігін заңсыз деп таныды. Арасында әлемнің барлық-дерлік елінен келетін импортқа салынған "өзара" баж салықтары мен Канада, Мексика, Қытайдан әкелінетін тауарларға салынған 25 пайыздық тарифтер де бар. Бұл жөнінде The Wall Street Journal жазды.

Сот Трамп 1977 жылғы "төтенше экономикалық өкілеттер туралы" заңды (IEEPA) қолданып, өзінің өкілетін асыра пайдаланды деген ұйғарымға келді.

❗️ОСК Demoscope бюросына Конституция жобасы туралы сауалнама жүргізуге рұқсат етпеді

Орталық сайлау комиссиясы (ОСК) Demoscop қоғамдық пікірді зерттеу бюросына "Қазақстанның конституциялық реформаны қабылдауы" атты сауалнама жүргізуіне рұқсат етпеді. Бұл жөнінде ұйым өз ресми сайтында хабарлады.

Demoscope ұйымы қарайтын халықаралық MediaNet журналистика орталығының айтуынша, ОСК "Республикалық референдум туралы" заңның 8-бабы 3-бабына сүйенген. Оған сәйкес, "халықаралық ұйымдар мен халықаралық қоғамдық бірлестіктер, шетелдің мемлекеттік органы мен заңды тұлғалары, азаматтығы жоқ азаматтарға референдумға қатысы бар шараларды қаржыландыруына тыйым салынған".

MediaNet өкілдері ОСК-ның рұқсат етпеуі туралы шешімімен келіспейтінін және 2012 жылдан бері қоғамдық пікірге, оның ішінде сайлау мен референдумға қатысты тұрақты түрде сауалнама жүргізгенін алға тартады.

💬 Жаңаөзеннің бірнеше тұрғыны Конституция жобасына қатысты пікірлерін айтты

Жаңаөзенде бірнеше адам видеомәлімдеме жасап, елде "халықпен тиісті деңгейде талқыланбаған жаңа Ата заңды референдумға шұғыл түрде шығаруды құптамайтындықтарын" айтты.

"Біз, жаңаөзендік бір топ азамат, мемлекеттің болашағына алаңдай отырып, еліміздің тағдыры таразыға түсіп тұрған шақта билік тарапынан асығыс дайындалған халықпен тиісті деңгейде талқыланбаған жаңа Ата заңды референдумға шұғыл түрде шығаруды құптамайтындығымызды, ондай реформаларды қолдамайтындығымызды мәлімдейміз" деді мәлімдемені оқыған жаңаөзендіктердің бірі.

Тұрғындар мәлімдемеде қазақ тілінің ахуалы, құрылтайға депутаттардың партиялық тізіммен сайлануы, президенттің өкілеті сияқты қоғамда қызу талқыланған мәселелерге назар аударады. Мәлімдеме авторлары "жаңа Конституция суперпрезиденттік жүйені күшейтеді" деп қауіптенетіндіктерін де жеткізді.

"46-бап бойынша президент тікелей конституциялық сот төрағасын, жоғарғы сот төрағасын, жоғарғы сот кеңесінің төрағасын, бас прокурорды, ҰҚК төрағасын, Ұлттық банк төрағасын, ОСК төрағасын, жоба аудиторлық палата төрағасын, мемлекеттік күзет бастығын, ҚР адам құқығы жөніндегі уәкілін тағайындайды не босатады. Ал бұдан өзге премьер министрді, құрылтай спикерін, вице-президент лауазымдарын құрылтайдың келісімімен тағайындайды. Егер құрылтай екі рет мақұлдамаса президент оны таратуға құқылы. Бұл парламенттің заң шығару тетігін де президентке бағынышты ету деген сөз" деді олар.

Қазақстанда Конституция жобасы бойынша референдум 15 наурызда өтеді.

Ақорда конституциялық түзетулерді «жаңа тарихи дәуірдің талаптарына сәйкес мемлекетті қайта құру және қоғамдық сананы жаңарту» қажеттілігі ретінде түсіндіреді. Президент жанындағы Орталық коммуникациялар қызметі құрылымына енетін Дезинформацияға қарсы іс-қимыл орталығы Конституция жобасы президент билігін күшейтеді деген пікірлерді жоққа шығарып, оларды "аңыз" деп атады.

🔴Тегеранда студенттер күштік құрылым өкілдерімен қақтығысты

Үкіметке қарсы ұран көтеріп, айқайлаған Иран студенттері Тегеран университеті маңында күштік құрылым өкілдерімен қақтығып қалды. Әлеуметтік желіде видеолар мен жазбалар жарияланды.

Наразылық 21 ақпанда Шариф университеті маңында тұтанды. Студенттер бұдан бұрынғы саяси наразылықты басу кезінде маңызды рөл атқарған еріктілерден құралған әскериленген жасақ "Басидж" сарбаздарымен қақтығысты.

🔗Толығырақ оқыңыз

💬 Украинаның Львов қаласында жарылыстан бір полиция қызметкері қаза болып, 14 адам жарақаттанды

Украинаның Львов қаласының мэрі Андрей Садовой жексенбіге қараған түні қалада теракт болғанын хабарлады.

Қала мэрінің сөзінше, 23 жастағы әйел полиция қызметкері қаза болып, кем дегенде 14 адам жарақат алған, зардап шеккендер ауруханаға жеткізілген.

Львов облыстық прокуратурасының мәліметінше, жергілікті уақыт бойынша сағат 00:30-да полицияға қаланың орталық көшелерінің біріндегі дүкенде тонау болғаны туралы хабарлама түскен.

"Көрсетілген мекенжайға патрульдік полиция қызметкерлері барған кезде жарылыс болды. Екінші бригада келгенде тағы бір жарылыс болды" деп жазылған хабарламада.

🗣Қоғамдық бақылау комиссия өкілдерінің Жыланбаевқа кіріп шыққаны хабарланды

Қамаудағы белсенді, марафоншы Марат Жыланбаевқа адвокаты кіре алмай, туыстары оның денсаулығына алаңдап отырған шақта Ақмола облыстық қоғамдық комиссия өкілдері Жыланбаевқа кіріп шыққан. Бұл жөнінде ELIMAY құқық қорғау қозғалысының өкілі Айя Сәдуақасова хабарлады.

Жауапқа қарағанда, қоғамдық комиссияның төрағасы Н.В.Шаврова және комиссия мүшесі З.К.Салимова 19 ақпанда Степногорск қаласы №4 мекемесіндегі Марат Жыланбаевқа кіріп шыққан.

Құқық қорғау тобы "Қазақстан билігі саяси тұтқын Марат Жыланбаевтың құқықтарын жүйелі түрде бұзып жатыр (БҰҰ оны дереу босатып, ақтауды талап етеді). Қазіргі кезде Мараттың қамалу жағдайы онан сайын қатайтылды" деп жазды.

Құқық қорғаушы Айя Сәдуақасова комиссия мүшелеріне "оған адвокаты мен отбасын неге кіргізбей жатыр?" деп сұрақ қойған кезде комиссия мүшелері "тәртіптік изоляторда отырған кезде кездесуге тыйы салынады" деп жауап берген.

Ал белсендінің жақындары Марат Жыланбаевтың өмірі мен денсаулығына алаңдап отыр. Олардың сөзінше, оның түрмеде құқығы жиі бұзылады, қысым жасалады, намысына тиеді. Түрме басшылығы оған ашық қоқан-лоқы жасаған. Олар түрлі желеумен Жыланбаевтың жазасына жаза қосуы мүмкін деп қауіптенеді.

🗣Астана тұрғыны 15 тәулікке қамалды. Ол жаңа Конституция жобасын сынаған

Астана тұрғыны Қантемір Алмышев 15 тәулікке қамалды. Ол бұған дейін Threads желісінде биліктің әрекеті мен Конституцияға түзетулерді сынаған. Алмышевтің қамалғанын әйелі хабарлады.

Сот шешімінде Алмышев биыл "9 ақпанда Threads желісінде балағат сөз айтып, пост жариялағаны, осылайша айналасындағыларға құрмет көрсетпегені және қоғамдық тәртіп пен тыныштықты бұзғаны жазылған". Оған 434-бап 1-бөлігі ("Ұсақ бұзақылық") бабы бойынша айып тағылған.

⚡️️АҚШ құпия қызметі агенттері президент Трапмптың Флоридадағы Мар-а-Лаго резиденциясы аумағына заңсыз кірді деп күдікке ілінген ер адамды атып өлтірген.

Құпия қызметтің мәлімдеуінше, мылтыққа ұқсас зат пен жанармай құйылған ыдыс ұстаған, жас шамасы 20-дағы жігіт түнгі уақытта қатаң күзетілетін аумаққа рұқсатсыз кірген.

Баспасөз мәслихатында Палм-Бич округінің шерифі Рик Брэдшоу құпия қызметтің екі агенті мен шериф орынбасары күдіктіге жақындап, қаруы мен канистрасын тастауды бұйырғанын айтты. Күдікті қолындағы ыдысты жерге қойғанымен, мылтықты "кеземек болған" кезде агенттер оқ атқан, деді шериф.

Қаза тапқан адамның аты-жөні туыстарына ресми хабар берілгенге дейін жарияланбайды. Оның іс-әрекетінің себептері әзірге белгісіз. Оқиғаны АҚШ федералдық тергеу бюросы тексеріп жатыр.

❤️2022 жылғы 24 ақпаннан кейін Қазақстан Украинадағы соғыс аймақтарынан, атыс-шабыс пен оккупациядан, өміріне төнген қауіп-қатерден қашып, туған елі мен жерін тастап, әлемге босып кеткен украин азаматтары пана іздеген елдердің біріне айналды. Босқындардың көбі бірнеше айға қалып, жағдай тұрақтанғаннан кейін үйге оралармыз деп үміттенген.

Алайда соғыс созылып, уақытша деп келген адамдардың құқықтық мәртебесі мәселе туғызды. Заң бойынша Қазақстанда арнайы рұқсатсыз қалуға белгіленген 90 күн мерзім аяқалғаннан кейін үш жолдың бірін таңдауға тура келеді: соғыс болып жатқан отанға оралу, болмаса үшінші бір ел іздеу я Қазақстаннан пана сұрап өтініш беру.

Заң жүзінде Қазақстан халықаралық босқындарды қорғау жүйесіне қатысушы елге жатады, бірақ іс жүзінде ондай өтініші орындалған адам саны шамалы. Қазақстаннан пана іздегендер қандай кедергілерге кезігеді? Азаттықтан оқыңыз

⚡️22 ақпан күні Алматының іргесіндегі тауда қар көшкіні салдарынан бір адам опат болып, қасындағы екінші адам қар құрсауынан өз күшімен аман шыққан.

Төтенше жағдайлар министрлігі баспасөз қызметінің хабарлауынша, оқыс оқиға теңіз деңгейінен 3400 метр биіктегі Титов асуында болған. Төрт адамнан тұратын туристер тобындағы екі адамды көшкін басып қалған.

Оқиға орнына барған іздестіру-құтқару тобы қар астында қалып опат болған адамды іздеп тауып, сүйегін алып шыққан.

🔴Батыс Қазақстан облысының орталығы Орал қалалық соты "Уральская неделя" газетіне "Сайлауға байланысты қоғамдық пікірге сауалнама жүргізу талаптарын бұзғаны" үшін 129 750 теңге (259 доллар) көлемінде айыппұл салды.

Іс материалдарында Қазақстан президенті референдум 15 наурызға белгіленетінін жариялаған күні басылымның Telegram-арнасында жарияланған жазбаның соңында "Референдумға барасыз ба?" деген сұрақ берілгені айтылған. Сол күні кешке бас редактор Тамара Еслямованың үйіне екі прокурор мен бір полиция қызметкері барған. Кейін оны Батыс Қазақстан облысы прокуратурасына шақыртып, сонан соң істі әкімшілік сот қараған.

Басылымның мүддесін қорғаған MediaQoldau заң қызметі сот шешіміне келіспейтіні жайлы апелляциялық шағым түсіретінін мәлімдеді. Сонымен қатар, осындай жағдайлардың қайталануына байланысты ұйым Конституциялық сотқа жүгінбекші.

Қазақстанның "Сайлау туралы" конституциялық заңында "қоғамдық пікірге сауалнаманы кемінде бес жылдық тәжірибесі бар, тіркелген заңды тұлғалар жүргізе алады және бұл туралы Орталық сайлау комиссиясын жазбаша түрде алдын ала хабардар етуге тиіс" деп жазылған.

"Алайда әлеуметтік желі сторисіндегі сұрақтарды немесе көшедегі тұрғындардан алынған пікірлерді қоғамдық пікір сауалнамасына теңестіріп бұл талаптарды журналистерге қолдану дұрыс емес. Журналист жұмысының ерекшелігі мен табиғатын ескерсек, мұндай жанрлар сауалнама бола алмайды", – деп есептейді "Құқықтық медиа орталық" қоры өкілдері.