🗣Оралда тәуелсіз бақылаушылардың нөмірін белгісіз біреулер жарнама сайттарына жариялап тастаған

Батыс Қазақстан облысының әкімшілік орталығы Орал қаласында референдумды бақылайын деп отырған “Жария” қоғамдық бірлестігінің екі өкілі Хакім Меңдібай мен Самал Ғилманованың атынан белгісіз біреулер Olx пен хабарландыру жарияланатын мессенжерлерге өтірік жарнама жазып, нөмірлерін жариялаған.

“Осының салдарынан бақылаушылардың телефонында тыным жоқ, жұмыс істеуіне кедергі жасалып жатыр” деді ұйымның төрағасы Бекнұр Сыражанов 14 наурызда Азаттыққа.

“Кеше видео түсіріп, ол видео Facebook-та тұр, қарап көрсеңіздер болады, “Орал қаласындағы учаскелердің бәрін қамтимыз ба деп отырмыз, бірақ бақылаушылар жетіспей жатыр. Бақылаушы болғысы келетін азаматтар болса, міне, мына нөмірге хабарласыңыз” деп Хакім мен Самалдың нөмірін қалдырған едік. Сол видео жарияланғаннан кейін бүгін таңертеңнен бастап, сол жарияланған екі нөмірдің біреуін olx-қа салып жіберген, кір машинасын сатады деп. Екіншісін мына оңтүстік жақта жұмысқа шақыратын WhatsApp-топтар бар ғой. Сондай топқа салып жіберген. Енді сол “жұмыс керек” деп қайта-қайта хабарласып, мазасын алып жатыр” деді ол.

Бақылаушылар полицияға арыз түсірген. Полициядағылар арызды қабылдап алған.

Ұйым төрағасының сөзінше, аймақта тәуелсіз бақылаушы боламын деген азаматтарға қысым жасалып жатыр, соның салдарынан кемінде 10 адам бақылаушы болудан бас тартқан.

“Оларға “ермеңдер” деп айтылғаннан, қазір енді бақылаушы болуға ниет білдірген қыз-жігіттер бақылаушы болудан бас тартып жатыр. Оларға енді жұмыс керек қой. Жұмыстарынан айырылмау үшін бас тартады. Отбасыларын асырау керек, несиелерін төлеу керек деген сияқты. Біз оларға "бақылаушы бол" деп талап қоя алмаймыз” деді Бекнұр Сыражанов

❗️Қазақстанда жаңа Конституцияға қатысты референдум басталды

Азаттық күні бойы референдум барысынан, негізгі оқиғалардан ақпарат таратады.

Референдум учаскелерінің басым бөлігі жергілікті уақыт бойынша сағат 7-де ашылады, алайда жекелеген арнайы учаскелерде сағат 6-да ашылады.

ОСК дерегінше, елде 10,4 мыңнан астам учаске бар, 600-ден астамы – арнайы учаскелер. Бұлар медицина мекемелер, әскери бөлімдер, перзентхана және өзге орындарда орналасқан.

Қазақстан аумағынан тыс жүрген азаматтар 54 елдегі 71 учаскеде дауыс бермек.

ОСК дерегінше, Қазақстанда 12 миллионнан астам сайлаушы бар.

💬 Өскеменде белсенді Руслан Нұрханов 15 тәулікке қамалды деп хабарлады “Белсенділер экстремист емес” тобы. Сот шешімінде белсендінің 12 наурызда Ұлан ауданы Айыртау ауылында “басқа тұлғаға қатысты жедел іс-шараларын жүргізу барысында полиция қызметкерінің заңды талабына бағынбағаны” жазылған.

Сотта белсенді өзіне тағылған айыпты мойындамаған.

Топтың хабарлауынша, аймақта белсенді Ерденбек Заркумхановтың да соты жүріп жатыр. Оған “бейбіт жиын өткізу тәртібін бұзу” бабы бойынша айып тағылған.

Құқық қорғаушылар Facebook-та Қазақстанда референдум қарсаңында қудаланғандардың тізімін жасаған. Ондағы тізімде ондаған адамның аты-жөні бар.