❤️ "Әппақ болып жатыр екен. Желкесінен шұңқыр көрінеді". Дүрбелең күндері із-түзсіз жоғалған күйеуін шарқ ұрып іздеп, соңында Алматының мәйітханасынан тапқан Шапағат Қадырова төрт жыл бұрынғы оқиғаны осылай еске алды.

2022 жылғы қаңтардың алғашқы күндері Жаңаөзеннен басталған бейбіт наразылық дүрбелеңге ұласты. Ахуал ушыққан тұста Қазақстан президенті ескертусіз оқ атуды бұйырды. "Азаттық Азия" асыраушысынан айырылған, бірақ қылмысқа кінәлілерді жауапқа тартқыза алмаған отбасылармен сөйлесті.

🔗Толығырақ оқыңыз

🗣Ирандағы наразылық акциялары барысында кемінде 20 адам қаза тапқан

Мұндай деректі ирандық Human Rights Activists News Agency (HRANA) құқық қорғау ұйымы хабарлады. Тағы 51 адам зардап шеккен, олардың басым бөлігі бытыра я резеңке оқ тиіп жараланған. Наразылық акцияларына қатысқан кемінде 990 адам ұсталған. Құқық қорғаушылардың пікірінше, ұсталғандар саны бұдан да көп болуы мүмкін.

Ирандағы наразылықтар 28 желтоқсанда, экономикалық дағдарыс дендеген елде ұлттық валюта күрт құнсызданып, инфляция күшейіп жатқан шақта басталды. HRANA деректерінше, сегіз күн ішінде кемінде 222 елді мекенде шерулер өткен.

The Times басылымы барлау есебіне сүйеніп, Иранның 86 жастағы рухани көсемі, аятолла Әли Хаменеидің елде күшейіп келе жатқан наразылықтарды билік баса алмаған жағдайға дайындаған балама жоспары бар, ол – Ресейге қашу деп жазды.

🔗 Толығырақ оқыңыз

🗣 Астананың полиция департаменті Каспий құбыр консорциумы (КҚК) нысандарына жасалған шабуылға қолдау білдіргендердің "теріс сипаттағы мәлімдемелерін" сотқа дейінгі тергеп-тексеруді бастаған. Ондай әрекеттерге түпкілікті құқықтық баға беріліп, процестік шешім қабылданатынын бас прокурор Берік Асылов депутаттық сауалға жауабында айтқан.

Полиция Қылмыстық кодекстің 174-бабының 1-бөлігі (ұлтаралық араздық қоздыру) бойынша, сотқа дейінгі тергеп-тексеруді бастады деп жазған Асылов.

17 желтоқсан күні мәжіліс отырысында депутат Айдос Сарым Бас прокуратура мен Мәдениет және ақпарат министрлігінен Каспий мұнай құбыры нысанардына Украина жасаған шабуылды қолдаған азаматтардың жазбаларын тексеруді сұраған. Ол Қазақстан үшін аса маңызды инфрақұрылым нысанына шабуылды әлеуметтік желіде "ашық қолдайтын және құптайтын жазбалар жарияланып" жатқанын, олар "ұлт мүддесіне соққы боп тиетінін" айтып, құзырлы органдарға тексерісті "терроризмді насихаттау" және "мемлекетке опасыздық жасау" баптары аясында саралауды ұсынған.

🔗 Толығырақ оқыңыз

🔴Бақытжан Төреғожина: қоғам төрт жыл бұрынғыдан жақсы өмір сүріп кетті деуге келмейді

Қаңтар неге халықаралық деңгейде көп айтылмады? Құрбандардың нақты саны қанша? Көтеріліске қатысқан, қаза тапқан, азапталған, билік тарапынан сотталған адамдардың соттарында қандай ұқсастық я айырма бар? Осы сұрақтарға "Ар.Рух.Хақ" қоғамдық қорының президенті Бақытжан Төреғожина жауап берді.

🔗Толығырақ оқыңыз

💬 Трамп Гренландияны сатып алғысы келеді

АҚШ президенті Дональд Трамп Гренландияға бақылау орнатудың түрлі амалын қарастырып жатыр, ол тіпті күш қолданудан да бас тартпауы мүмкін. Бұл жөнінде Ақ үйдің баспасөз хатшысы Кэролайн Левитт мәлімдеді. Оның сөзінше, Трамп Гренландияға бақылау орнатуды "АҚШ-тың ұлттық қауіпсіздік бойынша басымдығы" деп атаған және бұл " Арктика аймағындағы қарсыластарды тежеу үшін" маңызды.

The Wall Street Journal хабарлауынша, АҚШ мемлекеттік хатшысы Марко Рубио Конгресс мүшелеріне арналған жабық брифингте әкімшілік аралды Даниядан сатып алуға тырысып жатқанын айтты.

Еуропа елдерінің жетекшілері Трамптың мәлімдемесін қатаң сынады.

🗣Алматы облысында жол апатынан Үндістанның екі азаматы қаза болды

Алматы облысы полиция департаментінің хабарлауынша, жол апаты 6 қаңтарда Алматы – Бішкек тас жолының 86-шақырымында болған. Көлікте Үндістанның бес азаматы болған: төртеуі Оңтүстік Қазақстан медициналық университетінде оқиды, біреуі – турист. Олар Алматыдан Шымкентке қарай жол тартқан.

"Алдын ала мәлімет бойынша, 33 жастағы Toyota Alphard көлігінің жүргізушісі рөлді басқара алмай, соның салдарынан көлік аударылған. Жүргізуші сол жерде қайтыс болды. Екі жолаушы ауруханада көз жұмды, тағы үш адам түрлі жарақатпен ауруханаға жатқызылды" деп хабарлады Алматы облыстық полиция департаменті.

🔴АҚШ Атлант мұхитында Ресей туы ілінген танкерді басып алды

АҚШ-тың әскери-теңіз күштері Атлант мұхитының солтүстігінде Ресейдің "көлеңкелі флотына" жататын танкерді басып алды. Мұның алдында америкалық күштер бірталай күн бойы кеменің артынан еріп жүрген. Бұл – Вашингтонның Венесуэла мұнайын заңсыз тасымалдады деген кемелерге қарсы кейінгі қадамы.

АҚШ-тың Еуропадағы қолбасшылығы (EUCOM) 7 қаңтар күні әлеуметтік желіде таратқан мәлімдемесінде бұрын Bella 1 деп аталған, кейін атауы Marinera болып өзгерген танкердің Исландия мен Ұлыбритания аралығындағы Солтүстік Атлант аймағында қолға түскенін хабарлады.

Толығырақ оқыңыз

💬 Сеулден Астанаға ұшқан Air Astana ұшағы жолшыбай Пекинге қонуға мәжбүр болды

“Ұшақ техникалық себепберге байланысты – дәретхана бөлмелерінің істен шығуына орай қонуға мәжбүр болды” деп хабарлады әуе компаниясының баспасөз қызметі.

Ұшақ жөнделгеннен кейін сапарын жалғастырады. Виза қажет жоқ жолаушыларға Пекинді аралауға рұқсат етілмек. Ал қалған жолаушылар транзит аумағында қалады. Оларға тамақ пен көрпе-жамылғылар берілмек.

Желтоқсан басында да Фукуоктан Алматыға ұшқан Air Astana ұшағы дәл осы себепті Делиге қонуға мәжбүр болған еді.

💬 Трамп АҚШ-ты 66 халықаралық ұйымнан шығару туралы жарлыққа қол қойды

Дональд Трамп АҚШ-ты 66 халықаралық ұйымнан шығару туралы жарлыққа қол қойды. Арасында БҰҰ-ның климаттың өзгеруі бойынша негіздемелік конвенциясы да бар.

Ақ үйдің хабарлауынша, бұл ұйымдар Американың "мүддесіне сәйкес емес". Хабарламаға қарағанда, мәселе БҰҰ-ның 31 құрылымы мен оған кірмейтін 35 ұйым жөнінде болып отыр. Ақ үйдің айтуынша, бұл ұйымдардың көбі "АҚШ егемендігі мен экономикалық қуатына қайшы радикалды климаттық саясатты, жаһандық басқаруды және идеологиялық күн тәртібін насихаттайды".

Ақ үй сонымен бірге АҚШ құрамынан шығуы керек ұйымдардың да тізімін жариялады.

🔴BBC: Құлыбаев Англиядағы Саннингхилл-парк сарайын жемқорлыққа қатысы бар компания арқылы сатып алған

Қазақстандық миллиардер Тимур Құлыбаев 2007 жылы Эндрю ханзададан Саннингхилл-парк зәулім сарайын жемқорлық ісіне қатысы бар компания арқылы сатып алған деп жазды ВВС сайты жаңа зерттеуінде.

ВВС экс-президент Нұрсұлтан Назарбаевтың күйеубаласы Құлыбаев зәулім сарайды Италиядағы жемқорлық істерінде аталған Enviro Pacific Investments компаниясы арқылы алған дейді.

🔗Толығырақ оқыңыз