💬 Рубио: АҚШ "Иранның батыл халқын қолдайды"

Жұма күні кешке және сенбіге қараған түні Иранның көптеген қалаларында жаппай наразылық акциялары өтті. Наразылықтың жалғасып жатқанына екі апта болды және билік оларға күш қолданып, таратуға тырысып жатса да кейінгі күндері наразылардың саны артқан. Елде интернет өшкен, соған қарамастан әлеуметтік желілерде көшеге көп адамның шыққанын дәлелдейтін видеолар жарияланды.

9 қаңтарда Иран билігінің наразыларға шамадан тыс артық күш қолдануын ЕО елдерінің бірқатар жетекшісі айыптады. Франция, Германия, Ұлыбритания басшылары ортақ мәлімдеме таратты.

АҚШ мемлекеттік хатшысы Марко Рубио сенбі күні АҚШ "Иранның батыл халқын қолдайды" деп жазды.

Видео: X/Karim Sadjadpour

💬 Нетаньяху Тоқаевқа "Ибраһим келісіміне" қосылғаны үшін алғыс айтты

Ресми хабарламаға қарағанда, телефон әңгіме туралы бастаманы Израиль жағы көтерген.

"Израиль премьер-министрі бұл қадамды бейбітшілік, тұрақтылық пен халықаралық диалогты нығайту ісіндегі батыл әрі көреген шешім ретінде бағалады. Қасым-Жомарт Тоқаев пен Биньямин Нетаньяху байланыстарды жандандыруға, соның ішінде жоғары деңгейдегі сапарлар ұйымдастыруға уағдаласты" деп жазылған Ақорда хабарламасында.

Қараша айында Қазақстан президенті Қасым-Жомарт Тоқаевтың АҚШ-қа сапары кезінде, Астана Израиль мен Араб елдері арасындағы қатынасты реттеуді көздейтін Ибраһим келісіміне (Авраам келісімі деп те аталып жүр) қосылады деп мәлімдеген еді.

🗣Иран билігі наразылықты басып-жаншу күшейгенін мойындады

Иран полициясының басшысы Ахмад Радан "қауіпсіздік күштері және құқық қорғау органдарының бірігіп қимылдауының арқасында" наразыларға қарсы көп күш қолданылғанын мойындады. Бұл жөнінде Азаттықтың Иран қызметі – Фарда радиосы хабарлады.

Раданның сөзінше, "сот-медицина сараптамасының қорытындысына қарағанда, қаза болғандардың едәуір бөлігі суық қару мен пышақ жарақатынан" мерт болған. Мұндай мәлімдеме Иран күштік құрылымдарының наразыларға тікелей оқ атып жатқаны көрінетін видеолар мен хабарламалар тараған шақта жасалып отыр.

⚡️ Украина қарулы күштерінің бас штабы Каспий теңізіндегі ресейлік "Лукойл" компаниясына тиесілі үш бұрғылау қондырғысына шабуыл жасалғанын хабарлады. Оның мәлімдеуінше, аталған нысандар Ресей армиясын қамтамасыз етуге пайдаланылған.

Бас штаб келтірілген залал ауқымы нақтыланып жатыр деді. Мәлімдемеде шабуыл қандай құралмен жасалғаны көрсетілмеген. Бұл ақпаратты тәуелсіз дерек көздерінен растау әзірге мүмкін болмай отыр.

🔗Толығырақ оқыңыз

🗣 Иранда екі аптадан астам уақыт жалғасып жатқан жаппай наразылықтар барысында қаза тапқандар саны 500 адамнан асқан. Бұл туралы АҚШ-та орналасқан құқық қорғаушы белсенділер агентігі (HRANA) хабарлады. Иран билігі қаза тапқандар саны жөнінде ресми дерек жариялаған жоқ.

HRANA мәліметінше, наразылықтар салдарынан 490 демонстрант пен 48 күштік құрылымдар қызметкері көз жұмған. Сонымен қатар наразылықтар барысында 10 600-ден астам адам ұсталған.

Иранның мемлекеттік телеарнасы Тегерандағы сот-медициналық сараптама ғимаратының алдында жатқан мәйіт салынған ондаған қапты көрсетіп, "қарулы террористер арандатқан" оқиғалардың құрбандары деп сипаттаған.

Бірқатар ауруханалардың қызметкерлері жараланғандар мен қаза болғандар өте көп екенін айтып жатыр.

🔗Толығырақ оқыңыз

❤️ Астана соты 2025 жылғы желтоқсанда отбасылық дос болып араласатын төрт азаматқа терроризм, экстремизм айыптары бойынша үкім кесті. Олардың отбасы тағылған айыпқа келіспей, апелляциялық арыз бермек. Азаттық елдегі дін ұстану бостандығы мен экстремизм ұғымының анықталуы жөнінде дінтанушы Естай Қалмұратпен талқылады. 📹Азаттықтан көріңіз

❗️ 12 қаңтар күні Астана уақытымен сағат 11:44 кезінде Алматы облысы аумағында жер сілкінді

Қазақстан ұлттық деректер орталығының дерегінше, магнитудасы 3,7 шамасында болған жер сілкінісі ошағы Алматы қаласынан оңтүстік-шығысқа қарай 54 шақырым қашықта, жер қабатының 5 километр терең тұсында тіркелген.

Жер сілкінісі салдарынан адамдар зардап шеккені я дүние-мүлікке зиян келгені жайлы хабар түспеген.

💬 Қазақстанда Конституцияның 30 жылдығына орай 2025 жылы жарияланған амнистия аясында қылмыстық-атқару жүйесі мекемелерінен 2 мыңнан астам адам босатылған.

ҚАЖК дерегінше, елдегі соттар шамамен 16 мыңға жуық арыз-өтінішті қараған. Нәтижесінде 11 мыңнан астам азаматтың жаза мерзімі қысқартылған. Бұдан бөлек, пробация қызметі есебінде тұрған адамдарға қатысты материалдар қаралып, 2,9 мыңға жуық адам жазаның қалған бөлігін өтеуден босатылған, тағы 7,6 мыңнан астам адамның жаза мерзімі азайтылған.

Амнистияға кәмелетке толмағандар, кәмелетке толмаған баласы бар әйелдер, аяғы ауыр әйелдер, қарт адамдар және мүгедектігі бар жандар ілінген.

Амнистия тек онша ауыр емес және орташа ауырлықтағы қылмыстар жасап сотталған адамдарға қолданылды. Ауыр және аса ауыр қылмыс жасағандар, сыбайлас жемқорлық, экстремизм мен терроризм айыбымен сотталғандар, кәмелетке толмағандарға жыныстық сипаттағы қылмыс жасағандар, азаптау айыбымен жауапқа тартылғандар, сондай-ақ қайтадан қылмыс жасап сотталғандар амнистияға ілінген жоқ.

⚠️Өзбекстанның Самарқан облысына қарасты Пахтачи ауданында 21 жастағы тарих пәнінің мұғалімі Telegram-арналардың бірінде қалдырған пікірінде Мұхаммед пайғамбарды қорлайтын сипатта сөздер жазған деген айыппен 12 күнге әкімшілік қамауға алынды. Мұндай ақпаратты Gazeta.uz басылымы таратты.

Іс материалдарында мұғалім пікірін 30 желтоқсанда жариялағаны жазылған. Ал 7 қаңтар күні әлеуметтік желілерде оның скриншоттары тарап, пікір авторын жауапқа тартуды талап еткен үндеулер пайда болған.

9 қаңтарда ішкі істер органдары қызметкерлері мұғалімнің ұялы телефонын тексеріп, даулы пікір авторы соның аккаунтынан кіріп, желіге жазғанын анықтаған. Осыдан кейін оған Әкімшілік жауапкершілік туралы кодексnің 184-3-бабы ("Ұлтаралық немесе діни араздық қоздыруды, нәсілшілдікті насихаттайтын материалдар дайындау, сақтау немесе тарату") бойынша әкімшілік хаттама толтырылған.

Сол күні істі Пахтачи аудандық соты қарап, оны 12 күнге әкімшілік қамауға алу туралы шешім шығарған. Айыпталушы кінәсін мойындаған. Cот пікір жарияланған ұялы телефонды жоюды бұйырып, "қайтара құқық бұзудың алдын алу мақсатында" оған Telegram-аккаунтын пайдалануға шектеу қойған.

🔺 АҚШ президенті Дональд Трамп АҚШ қаржы министрлігінің шоттарында сақтаулы тұрған Венесуэла мұнайын сатудан түскен кірістерді сот арқылы бұғаттауға, тәркілеуге немесе өндіріп алуға тосқауыл болатын жарлыққа қол қойды. Құжатта арнайы рұқсат болмаса, бұл қаражатты қандай да бір операция жүргізіп пайдалануға қатаң түрде тыйым салынатыны айтылған.

Ақ үйдің түсіндіруінше, аталған кірістер Венесуэла мемлекетінің меншігі болып қала береді, алайда уақытша АҚШ билігінің басқаруында болады. Бұл қаражатты түрлі себеппен, мысалы, кредиторлар мен жекелеген тұлғалардың талап-арыздары бойынша тәркілеп алуға жол бермеу үшін оны осылай қорғау қажет екені айтылған.

Вашингтон аталған жарлық "америкалық және венесуэлық халықтардың игілігі үшін" қабылданды және АҚШ-тың ұлттық қауіпсіздігі мен сыртқы саясатын қорғауды, сондай-ақ Венесуэлада тұрақтылық орнатуға бағытталған бастамаларды қолдауды көздейді деп түсіндірген.

Бұл шешім Венесуэланың мұнай ресурстарына АҚШ бақылауын күшейтуге бағытталған бірқатар шаралардан кейін қабылданды. Атап айтқанда, Венесуэланың биліктен кетірілген басшысы Николас Мадуроның тұтқындалуына қатысты кейінгі оқиғалар және мұнай өндіру мен экспортты америкалық бақылаумен қайта жандандыру жоспарлары осындай қадамға негіз болған.

🔗Толығырақ оқыңыз