Түркістан облысында "егде тартқан әкесін ұрған" ер адам сотталды

Түркістан облысында "егде тартқан әкесін ұрды" деп айыпталған ер адам 5 жылға түрме жазасына кесілді. Жетісай ауданының соты А.С. есімді ер адамды Қылмыстық кодекстің "Қасақана денсаулыққа орташа зиян келтіру" және "Қинау" баптарымен айыпты деп тапты. Бұл туралы полиция департаментіне сілтеме жасап, Tengrinews сайты хабарлады.

Оқиға қалай болған?

Тергеу құжаттарына қарағанда, А.С. 2025 жылы мамырда ауыр дертке шалдыққан әкесін қолына алған. Бірақ сол жылы тамызда әкесінің қауқарсыздығына ашуланып жиі ұра бастаған. Сот ер адамның әкесін кемі үш рет ұрғанын анықтаған.

Қыркүйекте А.С. мен әйелі қарт адамды ұрып жатқанын көршісі видеоға түсіріп алып, желіге жариялап жіберген еді. Бұл қоғамда резонанс тудырған. Ал соққыдан кейін 70 жастағы егде адамның жағдайы нашарлап, көз жұмған.

Сот-медицина экспертизасы егде адамның қабырғасы сынғанын, денесінде көп жарақат болғанын анықтаған еді.

Айыпталушы не деді?

15 қаңтарда соттағы соңғы сөзінде А.С. кінәсін мойындап, "өмір бойы өкініп өтетінін" айтып, елден кешірім өтінген. Прокурор күдіктіні 6 жыл 2 айға соттауды сұраған еді.

Егде тартқан адам қайтыс болған соң А.С. мен әйелі де күдікке ілінген. Зейнеткердің келінінің үстінен "Ұрып-соғу" бабы бойынша іс қозғалып, бірақ дәлел болмаған соң іс жабылған.

Захарова Соловьевтің сөзін "ресми ұстаным емес" дейді

Ресей сыртқы істер министрлігінің ресми өкілі Мария Захарова кремльшіл журналист Владимир Соловьевтің "Орталық Азия мен Арменияға арнайы әскери операция жүргізу" жайлы айтқан сөзін "журналистің жеке ойы", "Мәскеудің ресми ұстанымы емес" деді.

Бұған қоса, Захарова Соловьев мұны "мәлімдеме емес, сұрақ ретінде айтты", ал "диван сарапшылар оны Ресейдің ресми позициясы ретінде провокацияға бұрды" деп отыр. Ресей сыртқы істер министрлігінің өкілі "Ресейдің ресми позициясын ресми өкілдер айтады" дейді.

Захарова мәлімдемесінде жағдайды "іспен сараптауға" шақырып, Ресей Орталық Азия мен Арменияға "талай рет көмекке келіп, қол ұшын созды" дегенді меңзеді.

"Қанша рет көмекке келіп, қол ұшын создық қой?.. Қанша рет тарихтағы қиын сәттерден қалай шығу жолын іздедік. Қанша рет түсініспеушілік болған сәттерді артта қалдырдық. Міне, осыған мән беру қажет. Ешқашан сүрінбей, провокацияға баса назар аудармау керек" деді ол.

🔹Соловьев не деп еді?

10 қаңтарда Ресейдің пропагандашыл журналисі Владимир Соловьев "Соловьев Live" хабарында Армения мен Орталық Азияны Ресейдің ықпал аймағы санап, "қажет болса, неге өз ықпал аймағымызда арнайы әскери операция бастамасқа?" деген еді.

🔹Соловьевтің сөзіне реакция

Армения Ресей елшісі Сергей Копыркинді шақырып наразылық нотасын табыс етті. Өзбекстан депутаты Әлішер Қадыров мұндай сөздер "стратегиялық әріптестікке кері әсер ететінін", "Орталық Азия елдері кез келген агрессияға тойтарыс бере алатынын" айтқан. Қырғызстанда парламент депутаты Дастан Бекешев Соловьевті нон грата тұлға деп жариялауды ұсынды. Ал Қазақстан депутаты Айдос Сарым "Соловьев сынды "сәуегейлердің"пікіріне мемлекеттік дәрежеде реакция берудің асқан қажеті жоқ" деген.

ІІМ кісі қолынан қаза тапқан Нұрай Серікбайдың ісін бақылауына алды

ІІМ Шымкентте кісі қолынан қаза тапқан 21 жастағы Нұрай Серікбайдың өліміне қатысты істі бақылауына алды. Бұл туралы Polisia.kz сайты хабарлады.

Министрлік жас қыздың өлімін тексеру үшін "тәжірибелі мамандардан арнайы тергеу тобы құрылғанын" айтады.
11 қаңтарда Шымкентте студент Нұрай Серікбай пышақ жарақатынан қаза болды. Желіде тараған видеода жас жігіттің, қызды пышақтап, қашып кеткені байқалады. 13 қаңтарда полиция 28 жастағы күдіктіні Шымкенттен 10 шақырымдай жерден ұстаған. Оның үстінен адам өлтіру бабымен іс қозғалған. Күдікті — Нұрайдың танысы.

▪Оқиға қалай болған?

Марқұмның жақындары "Курсив" сайтына Нұрай күдіктімен былтыр жазда тойда танысқанын айтқан. Көп өтпей жігіт сөз салып, қазан айында еркінен тыс алып қашқан. Бұл некеге қыз да, оның отбасы да қарсы болған. Қызды полиция көмегімен жігіттің үйінен алып кетіп, артынша арызданған. Бірақ күдікті қайта мазаламайтынын айтып уәде еткендіктен, кешірім берген.

Алайда аңду, қорқытып-үркіту тоқтамаған. Бұл бойынша ата-анасы қалалық прокуратура мен полиция департаментіне арызданғаны айтылады. Нұрайдың туысы "прокуратура мен полиция бұл арыз бойынша жұмыс жүргізбеген" дейді. 11 қаңтар күні Нұрай дүкеннен ұн алуға шыққан оны үйін торуылдап жүрген күдікті ұстап алып, артынан қуып, пышақтап кеткен.

Ішкі істер министрлігі "полиция арыз бойынша жұмыс жүргізбеді" деген мәлімдемелерге байланысты қызметтік тексеріс тағайындалғанын хабарлады.

Сот адвокат Мұрат Адамды лицензиясынан айырды

16 қаңтарда Алматы қаласы Бостандық ауданы сотының судьясы Дәурет Тілеубаев министрлік шағымы бойынша адвокатты лицезиясынан айырды.

🔹Не болды?

Бұған дейін әділет министрлігі Orda.kz сайтының бас редакторы Гүлнара Бажкенованың мүддесін қорғап жүрген адвокат Мұрат Адамды лицензиясынан айыруды сұрап сотқа жүгінген. Министрлік тұжырымы бойынша, адвокат сотқа дейінгі тергеу барысы туралы бірнеше рет жалған ақпарат таратқан. Адам бұл айыптарды терістеген.

🔹Қорғаушы не дейді?

Адвокат сотта да министрліктің таққан айыбын жоққа шығарып, сотта дәлел ұсынғанын айтады.

"Шағымда айтылған әрбір жоққа шығару үшін қолдан келгеннің бәрін жасадық. Бұл қолымызден келді деп ойлаймын. Әділет министрлігінің шағымында айтылған әрбір айыпты дәлелдермен жоққа шығарды. Сот неше мұндай шешім шығарғанын түсінбей тұрмын. Сот шешімін әлі алған жоқпыз. Танысқан соң құқығымызды пайдаланып, апелляциялық шағым түсіреміз" деді Адам соттан соң.

Қазақстанда жүзден аса адвокат Мұрат Адамға араша түсіп, мәлімдеме жасаған еді.

🔹Бажкенова ісі

1 желтоқсанда Алматыда полиция Orda.kz сайтының редакциясында тінту жүргізді. Басылым қызметкерлері мен заңгерлер тергеу тобы жалақы төлеуге арналған қаражатты алып, құжаттар мен техниканы тәркілеп, сейфті бұзғанын хабарлады. Сол кезде адвокат Мұрат Адам тиісті өкілеттігі бола тұра редакцияға да, Бажкенованың пәтеріне де кіргізілмегенін және тінтуге санкциямен танысуға мүмкіндік берілмегенін мәлімдеді, бұл қылмыстық-процестік заңнаманы бұзу екенін айтқан.

Белсенділер бір палаталы парламентті партия тізімімен сайлау ұсынысына қарсы шықты

Алматыда қоғам белсенділері бір палаталы парламент реформасын талқылап, парламент тек партия тізімімен сайлануы керек деген ұсынысқа қарсы шықты.

🔹Белсенділер не ұсынды?

Жиыннан соң сайлау заңнамасына өзгеріс енгізу туралы қарар қабылданды. Қарарда Қазақстандағы сайлау туралы заң халықаралық талаптарға сай емес екені айтылып, бірқатар баптарды қайта қарау ұсынылған. Атап айтқанда, парламент мәжілісін қалыптастыруда мажоритарлық жүйенің үлесін 70% дейін арттырып, партиялық тізім арқылы сайланатын депутаттар санын 30% шектеу қажет екені көрсетілген.

Қарар авторларынің бірі - тарихшы, белсенді Есенғазы Қуандық "елде электораттың 98% ешбір партияға мүше емес. Себебі билік төменнен жасақталған партияларды әдейі тіркемей отыр. Партия деген шынайы болуы үшін төменнен жасақталуға тиіс" деді.

Сонымен бірге қарарда сайлау комиссияларының құрамын тек саяси партиялар ұсынуға тиіс деген норманы өзгертіп, қоғамдық ұйымдарға да кандидат ұсыну құқығын беру ұсынылған.
Жиынды қоғам қайраткері Рысбек Сәрсенбайұлы бастаған бір топ азаматтық белсенді, "желтоқсаншылар" бірлестігі ұйымдастырып, қаржыландырған.

🔹Жиындағы шу

Сәрсенбайұлының айтуынша, талқылауды өткізу барысында көп кедергілер болған. Жиын өтуі керек болған төрт жер де ойнынан айнып, өткізбей тастаған. Ақыры ұйымдастырушылар кедергі болмас үшін "Дат" газетінің дөңгелек үстелі форматында өткізуге мәжбүр болған. Мұны мәжіліс депутаты Ермұрат Бапи ұсынған. Ол қоғамдық талқылауда айтылған ұсыныстарды 20 қаңтарда өтетін ұлттық құрылтайда ел билігіне жеткіземін деген.

Жиында депутаттың өзі болмады. Талқыны "Дат" газетінің атынан келген Құтмағамбет Талапбайұлы бастап, жүргізе бастаған. Алайда ол жиынның басында сөйлеген спикер Есенғазы Қуандықтың сөзіне шүйлігіп, оның мемлекеттік кеңесші Ерлан Қарин туралы айтқан сыни сөздерінен кейін, "тақырыптан ауытқыдың, регламентті сақтамадың" деп бірнеше рет ескерту жасап сөзін бөлді. Кейін Талапбайұлы "біз бұлай келіскен жоқпыз" деп жиыннан шығып кетті.
Алматылық белсенділер талқыдағы ұсыныстарын ресми түрде билікке жолдамаған.

🔹Парламент реформасы

Тоқаев бір палаталы парламент құру ұсынысын былтыр 8 қыркүйекте халыққа жолдауында айтқан. Ол парламентті тек партиялық тізіммен сайлауды ұсынды. Биліктің жоспары бойынша, ұсыныстар биыл талқыланып, 2027 жылы референумға шығарылуы керек. 20 қаңтарда Қызылордадағы ұлттық құрылтайда да реформа жайлы айтылмақ.

Кавказ.Реалии: Адам Қадыров жол апатына ұшырап, ауруханаға түсті

Шешенстан басшысының ұлы Адам Қадыров жол апатына ұшырап, Грозныйдағы ауруханаға жеткізілді деп хабарлады екі дереккөз және оппозициялық әлеуметтік желі топтарына сүйенген Кавказ.Реалии сайты.

Дереккөздің айтуынша, Қадыров жатқан ауруханаға баратын жол жабылған.

NIYSO шешен оппозициялық қозғалысының мәліметі бойынша, Адам Қадыровтың кортежі «көліктерді бірінен кейін бірін басып озып, жылдам жүріп келе жатып, кенет кедергіге тап болған».

Тоқаев Қазақстан қарулы күштері бас штабының бастығын ауыстырды

Президент Қасым-Жомарт Тоқаев қорғаныс министрінің бірінші орынбасары - Қазақстан қарулы күштері бас штабының бастығы Сұлтан Камалетдиновті қызметінен босатып, бұл қызметке Қаныш Әубәкіровті тағайындады. Бұған дейін Әубәкіров қорғаныс министрінің тыл және әскери инфрақұрылым бойынша орынбасары болған.

Қырғызстанда сауда орындары мен дүкендерден қырғызша сөйлеуді талап еткен блогер істі болып жатыр. Оның «Куликов» кондитерлік дүкені қызметкерлерінің қырғызша сөйлемегені жайлы видеосы елде тіл дауына түрткі болды. «Куликов» блогердің үстінен арыз жазған, бірақ жақында екі тарап татуласқан. Қырғызстандағы тіл дауының анық-қанығы

Ресейдің сыртқы істер министрлігі алты күн өткенде кремльшіл пропагандист Владимир Соловьевтың Орталық Азияда “арнайы әскери операция” бастауды қарастыру керек пе?!” деген даулы мәлімдемесіне жауап берді. Мекеме тележүргізушінің сөзі ресми позицияны білдірмейді деді.

Қазақстандық танымал әнші Yenlik (Еңлік Құрарбек) германиялық танымал Colors музыкалық шоуында ән айтты. Бұл беделді жоба әр елдегі танымал әртістердің өнерін әлем аудиториясына таныстырады.

💵 АҚШ президенті Дональд Трамптың әкімшілігі "Бейбітшілік кеңесінен" тұрақты орын алғысы келетін елдерден кемінде 1 миллиард доллар көлемінде жарна төлеуді талап етіп отыр. Мұны топтың жарғы жобасымен танысқан Bloomberg агенттігі жазды.

Құжатқа сәйкес, жарғы күшіне енгеннен кейінгі алғашқы бір жыл ішінде жарна төлеген мемлекеттер тұрақты мүше құқығына ие болады. Ал өзгелері үш жылдан аспайтын мерзімге тағайындалады. Жарғы жобасында Дональд Трамп "Бейбітшілік кеңесінің" алғашқы төрағасы болатыны және ұйымға кімді шақыру керегін өзі шешетіні көрсетілген. Сонымен қатар ол, егер кеңеске қатысушылардың үштен екіден астамы қарсы болмаған жағдайда, мүше елдерді кеңес құрамынан шығару құқығына да ие болады.

Кеңесте шешім көпшілік дауыспен қабылданады, әрбір мүше мемлекет бір дауысқа ие. Алайда құжатта атап өтілгендей, қабылданған барлық шешімді төраға мақұлдауы тиіс.