🗣Конституция жобасына қатысты пікір айтқан журналистер Дина Елгезек пен Жалғас Ертай үйлеріне полиция келгенін хабарлады.

“Үйге полиция келді. “Түсіндірме жұмысы” дейді мыс. Мен, Дина Елгезек, Қазақстан азаматы ретінде Конституцияны талқылауға толық қақым бар. Тілімді қорғау - Отаным алдындағы перзенттік парызым!” деп жазды Дина Елгезек желідегі парақшасында.

Жалғас Ертайдың айтуынша, полиция одан желіде жобаға қатысты айтқан жазбасын өшіруді талап еткен. Ол одан бас тартқан.

Бұған дейін азаматтық қоғам өкілдері, сарапшылар мен құқық қорғаушылар, белсенділер ел президенті Қасым-Жомарт Тоқаевқа үндеуінде Конституцияны өзгертуде асығыстық танытпауға шақырып, толымды қоғамдық талқылау жүргізу қажеттігін айтқан еді.

Қоғамда әсіресе, жобадағы 9-бап 2-тармақты алып тастауды немесе өзгертуді талап еткендер көп. 2-тармақта "мемлекеттік ұйымдарда және жергілікті өзін-өзі басқару органдарында орыс тілі ресми түрде қазақ тілімен тең қолданылады' деп жазылған.

Бұл бап қазіргі Конституцияда да бар. Белсенділер осы бапты өзгертіп, мемлекеттік тіл – қазақ тілінің ахуалын жақсартатын сәт баяғыда жетті дейді.

💬 Рубио: Украина мәселесі бойынша қайшылық кеміді, бірақ әлі де шешілмеген мәселелер бар

4 ақпанда Әбу-Дабиде Ресей-Украина соғысын аяқтау бойынша келіссөздің кезекті кезеңі өтті. Оған Ресей, Украина және АҚШ өкілдері қатысты. Кездесу шамамен 5 сағатқа созылды және жабық режимде болды. Тараптар келіссөзді 5 ақпанда да жалғастырмақ.

Ресей-Украина соғысын аяқтау бойынша келіссөзде шешілмеген сұрақтар саны едәуір қысқарды, бірақ күрмеуі қиын "ең күрделілері" әлі шешімін тапқан жоқ. АҚШ мемлекеттік хатшысы Марко Рубио келіссөзден кейін осылай деп мәлімдеді.

🗣Ермек Нарымбаев екі айға қамалды

Астананың тергеу соты “сот үкімін орындамағаны үшін” (430-бап) белсенді Ермек Нарымбаевты екі айға қамады. Ол тергеу жалғасқанша 3 сәуірге дейін қамауда болады. Бұл жөнінде адвокаты Василий Садықов Азаттыққа хабарлады.

– Ермек Нарымбаев қызына, немерелеріне бару үшін 1 ақпанда Алматыдан Бішкекке ұшқан. 3 ақпанда күндізгі сағат 12-де Қырғызстанның ішкі істер полковнигі және подполковнигі оны ұстады. Одан кейін оны қазақ-қырғыз шекарасындағы өткізу бекетіне алып келіп, сол жерде Қазақстан жағына тапсырды. Қордайдан Балқаш одан әрі Қарағанды арқылы Астанаға жеткізді. 4 ақпанда ол Астанада болды. Кеше түнгі сағат бірге дейін отырдық. Тергеу болды. Сот оны екі айға қамады, – деді адвокат Василий Садықов.

Адвокат бұдан басқа ақпаратты айта алмайтынын жеткізді.

🔴Билік ұсынған жаңа Конституция жобасын қолдау мен сын

Қазақстан Конституциясына ауқымды өзгерістер енгізуді жұрт әлеуметтік желіде қызу талқылап, үкімет жариялаған жобаны сынға алған пікір жиілеген тұста, оны қолдап сөйлегендер саны да арта түсті. Қолдағандардың кейбірі бір-бірінің мәтінін айна-қатесіз көшірсе, енді бірі жасанды интеллект көмегімен жазғанын сол қалпында желіге жариялады.

🔗Толығырақ оқыңыз

🗣Семейде белсенді Нұржан Сембаев ұсталды

Бұл жөнінде "Белсенділер экстремист емес" тобы хабарлады.

Белсенді Елдос Досановтың Азаттыққа айтуынша, Нұржан Сембаевты 3 ақпанда арнайы жасақ жұмыс істеп жатқан жерінен алып кеткен.

"Таныс жігіттің цехында жұмыс істеп жатқан екен. Арнайы жасақ жүгіріп келіп, арасында полицейлер бар дейді, қолын қайырып, ұстап алып кеткен. Не үшін ұстағанын түсіндермеген. Мемлекет тағайындаған адвокат хабарласып, "405-бап ("тыйым салынған ұйымның ісіне араласу") бойынша ұстады"деп айтты" деді Елдос Досанов 5 ақпанда.

Сурет: "Белсенділер экстремист емес" тобы

🗣Сот Айдар Сыздықовтың түрмеден ерте босап шығу туралы өтінішін орындамады

"Мекеме өкілдерінен "оң мінездеме" жоғы айтылды. Оны жібергісі келмей отырған сияқты. Не үшін жібергісі келмей отырғанын барлықтарыңыз біліп тұрған боларсыздар. Сот қаулысы әлі қолымызға тиген жоқ" деді Мейіржан Досқараев Азаттыққа.

Былтыр да сот белсендінің "түзелмегенін", "теріс қимыл-әрекеттері барын" алға тартып, өтінішін орындамаған еді.

📹"Мәнерлеп сырғанауды бұқаралық спортқа айналдыру – мақсатымыз"

Астанада кейінгі уақытта мәнерлеп сырғанау спортына қызығушылық артып келеді. Қымбат әрі элиталы спортпен денсаулығы, жан рахаты үшін айналысып жүргендер де, кәсіби шұғылданатындар да бар. Бұған Денис Тен жеңісінің эффектісі әсер етті ме? Мәнерлеп сырғанауға қызығушылыққа не түрткі болды? Азаттық Миландағы қысқы олимпиада қарсаңында Астанадағы мәнерлеп сырғанау мектебінің бапкерімен бұл спорттың дамуы жайлы сөйлесті.

🔗Толығырақ көріңіз