💬 Италия билігі әлдекімдер темір жолда диверсия жасамақ болғанын айтты

7 ақпанда Италияның солтүстігінде үш рет темір жол инфрақұрылымы бүлініп, жол қауіпсіздігіне әсер еткен, пойыздардың жүру кестесі бұзылған. Билік қысқы Олимпиада ойындарының өтуіне байланысты диверсия болуы болуы мүмкін деп болжады.

Атап айтқанда, сенбі күні таңертең Пезаро қаласы маңында белгісіз біреулер коммутаторды өртеп жіберген. Кейін Болоньеде жарылғыш зат табылып, электр кабельдері қиылған. Полицияның пікірінше, оқиғалардың бір-біріне қатысы бар. Әзірге, ешкім мойнына алмады.

🗣Жапониядағы сайлау: премьер Санаэ Такаичидің жақтастары жеңіп жатыр

Жапонияда парламент сайлауында премьер-министр Санаэ Такаичидің жақтастары жеңіп жатыр. Сайлау учаскелерінің шыға берісінде жиналған сауалнама қорытындысына сүйенген Жапонияның NHK қоғамдық телеарнасы дауыс беру аяқталғаннан кейін осылай деп хабарлады.

Болжам бойынша, премьер Такаичидің либералдық-демократиялық партиясы 465 орындық парламенттің төменгі палатасынан 274-328 аралығында орын алуы мүмкін. Ал парламентте басымдыққа ие болу үшін 233 орын керек. Сайлаудың алдын ала қорытындысы жақын арада жарияланады.

🗣Қазақстан президенті Қасым-Жомарт Тоқаев өз әкімшілігіндегі ішкі саясат бөлімінің меңгерушісі етіп парламенттегі AMANAT фракциясының жетекшісі болған депутат Елнұр Бейсенбаевты тағайындады.

2025 жылғы желтоқсанның ортасынан бастап осы қызметті атқарған Айбек Смадияровты бұдан бір жарым апта бұрын Тоқаев өзіне көмекші әрі баспасөз хатшысы етіп алған.

Елнұр Бейсенбаев 2023 жылғы наурыз айында сегізінші шақырылған парламент мәжілісіне биліктегі AMANAT партиясы тізімімен сайланған еді.

🔴 АҚШ президенті Дональд Трамптың бастамасымен құрылған Бейбітшілік кеңесінің жұмысына қатысуға шақырылған елдер басшыларының алғашқы отырысы 19 ақпанда Вашингтонда өтпек. Трамп бірқатар шет мемлекеттер басшыларына шақырту жіберген деп жазды америкалық басылымдар.

Бейбітшілік кеңесі бастапқыда Трамп ұсынған бейбіт жоспар аясында Израиль мен палестиналық топтар арасындағы қарулы қақтығыстар аяқталған соң Газа секторын басқару мен қалпына келтіруді үйлестіретін орган ретінде қарастырылған еді. Алайда биылғы қаңтар айында Давоста жиырмаға жуық елдің басшылары қол қойған кеңес жарғысынан ұйымның өкілеттігі кеңейтілгені байқалады.

Трамп төрағалық ететін жаңа кеңестің жұмысына қатысуға келіскендер арасында Қазақстанмен бірге Аргентина, Армения, Әзербайжан, Болгария, Біріккен Араб Әмірліктері, Венгрия, Индонезия, Пәкістан, Израиль, Қатар, Сауд Арабиясы мен Түркия бар. Сондай-ақ Беларусьтің авторитар билеушісі Александр Лукашенко да кеңеске шақыруды қабыл алғанын айтқан.

🔴 Жапонияда өткен кезектен тыс сайлау нәтижесі бойынша, премьер-министр Санаэ Такаичи басқаратын Либерал-демократиялық партия айқын басымдықпен жеңіске жетті. Консервативтік коалиция парламенттің төменгі палатасындағы орындардың үштен екісінен астамына, яғни көпшілік қолдауын қажет ететін шешім қабылдауға жеткілікті дауысқа ие болды.

1955 жылы құрылған ЛДП тарихында бұрын-соңды мұндай жоғары көрсеткіш болмаған. Бақылаушылар биліктегі консервативтік партияның мұндай жеңісін көбіне Такаичидің жеке басының танымалдығымен байланыстырады.

Бұған дейін парламентте 167 мандатқа ие болып келген негізгі оппозициялық күш – центристік реформаторлық альянс сайлауда ойсырай жеңілді: дауыс беру қорытындысына сәйкес, небәрі 49 орын алған.

⚡️️ Қырғызстанда 17 жастағы мектеп оқушысы қызды өлтірді деген күдікпен қамауға алынған 41 жастағы ер адам Бішкектегі тергеу изоляторында қаза болған.

Қырғызстан үкіметі жанындағы Жаза орындау қызметі таратқан ақпаратта 2026 жылғы 7 ақпанда сағат 12:30 шамасында Бішкектегі №21 тергеу изоляторының камерасында айыпталушы А.К.К. асылып тұрған қалпы табылғаны айтылған. "Мекеме қызметкерлері алғашқы медициналық көмек көрсеткенімен, ол оқиға орнында қайтыс болды" деп хабарлады Жаза орындау қызметі.

Күдікті былтыр 17 желтоқсанда Бішкек қалалық ішкі істер басқармасының уақытша ұстау изоляторынан ауыстырылған.

Айсулуу Мукашева 2025 жылғы 27 қыркүйекте Ыстықкөл облысында хабар-ошарсыз кеткен еді. Кейін ол Шу облысындағы Боом шатқалынан өлі табылған.

⚡️️️️️Тараз қаласында бесінші қабаттағы пәтердің терезесінен 3 жасар ұлы мен 5 жасар қызын лақтырып жіберген 36 жастағы әйел ұсталып, уақытша ұстау изоляторына қамалды.

Әйел екі баласын бірінен соң бірін лақтырып, артынан өзі де секірмекші болған. Қыз баланың бас сүйегі мен миына қатты зақым келіп, жамбасы сынған, кішкентай ұл да басынан қатты жарақат алған, сүйектері сынған, оларға ота жасалған деп хабарлады облыстық денсаулық сақтау басқармасы.

Қазақстанның бала құқықтары жөніндегі уәкілі Динара Закиева бұған дейін қатты күйзелісте болған әйел толық ем алмағанын айтты деп жазды Instagram әлеуметтік желісінде.

Кәмелетке толмаған екі баланы өлтіруге оқталу дерегі бойынша сотқа дейінгі тергеу басталған.

🔸 Қазақстанның экс-президенті Нұрсұлтан Назарбаевтың зайыбы Сара Назарбаева Алматыдағы президент іс басқармасының медициналық орталығына қарасты госпитальден қаңтар айында үйіне шыққан. Мұны 9 ақпанда жергілікті басылымдар жазды.

Сара Назарбаева Алматыдағы "совминка" ауруханасына түсіп, ауыр хәлде жатқаны былтыр мамыр айында белгілі болған еді. Сол кезде Назарбаевтың баспасөз хатшысы Айдос Үкібай "Сара Назарбаева қайтыс болды" деген сыбысты жоққа шығарған.

Шілде және қыркүйек айларында аурухана әкімшілігі журналистерге "Сара Назарбаева әлі ем қабылдап жатқанын" айтқан.

Биыл 12 ақпанда 85 жасқа толғалы отырған Сара Назарбаева кезінде елге қандай істерімен танылған еді, толығырақ оқыңыз

⚡️АҚШ әскері 9 ақпанда Ресейдің "тасадағы флотыныкі" болуы мүмкін тағы бір танкерді ұстады. Пентагонның баспасөз қызметінің хабарлауынша, Aquila II танкерінің ізіне Кариб теңізінен бастап түсіп, үш аптаға жуық уақыттан кейін Үнді мұхитында қолға түсірген.

АҚШ әскери министрлігі ұсталған танкер "Кариб теңізіндегі санкцияға іліккен кемелерге президент Трамп енгізген карантин талаптарын бұзған" деп мәлімдеді. Танкер санкцияларға қарамастан, Венесуэла мұнайын Қытайға жеткізуге әрекет етті деген күдікке ілінген. Бұған қоса ол Ресейдің "тасадағы флотының" бір бөлігі ретінде санкция тізіміне енгізілген.

"Тасадағы флотқа" Ресей мұнайы мен басқа да ресурстарды таситын, басқа елдердің туын пайдаланатын, бірақ іс жүзінде Ресей бақылауында болатын кемелер жатады. Мұндай жүздеген кеме АҚШ, Еуроодақ және Ұлыбританияның санкция тізіміне енгізілген.
🔗Толығырақ

🔸АҚШ вице-президенті Джей Ди Вэнс 9 ақпанда Арменияға ресми сапармен барды

АҚШ-тың мұндай жоғары лауазымды өкілі Арменияға алғаш рет барып отыр.

Вэнс Армениядан кейін сейсенбі күні Әзербайжанға да бармақшы. Ақ үй осы сапар алдында Вэнстің Армения мен Әзербайжанға сапары осы екі ел арасындағы бейбіт келісімді қолдауды көздейді деп мәлімдеген. Келіссөздерде Әзербайжанның негізгі аумағын оның анклавы – Нахичеван автономиялық республикасымен байланыстыратын көлік дәлізін салу мәселесі де талқыланбақ. Бұл жол Армения аумағы арқылы өтеді деп жоспарланған. Армения мен Әзербайжан басшылары былтыр тамыз айында АҚШ президенті Дональд Трамптың атымен аталатын осы дәліз жөнінде келісімге келген, алайда көптеген техникалық және саяси мәселелер әлі шешілген жоқ.

Дүйсенбі күні Ереванда АҚШ вице-президенті Джей Ди Вэнс пен Армения премьер-министрі Никол Пашинян бейбіт атом саласындағы ынтымақтастық туралы келісімге қол қойды. Вэнс АҚШ Арменияның ядролық энергия саласына 9 миллиард доллар инвестиция құяды деп мәлімдеді.

Сарапшылар бұл сапар Оңтүстік Кавказда АҚШ-тың ықпалы артып келе жатқанын байқатады дейді.
🔗Толығырақ

❗️ 9 ақпанда Куба үкіметі елге қатынайтын халықаралық әуе компанияларын аралда авиация отыны сейсенбіде толық таусылады деп ескертті.

Гаванадағы билік жолдаған хабарламада елде кемінде бір ай – 11 наурызға дейін ұшақтарды жанармаймен қамтамасыз ету мүмкін болмайтыны айтылған. Ал содан екі күн бұрын, билік өкілдері елдегі қазіргі отын тапшылығы әуе қатынасына әсер етпейді деп мәлімдеген еді.

Кейінгі жылдары Куба авиация жанармайымен қамтамасыз ету мәселесінде Николас Мадуро басқарған Венесуэлаға сүйеп келген. Алайда, хабарларға қарағанда, АҚШ былтыр желтоқсанның ортасынан бастап Венесуэладан мұнай экспортын іс жүзінде тоқтатып тастағаннан кейін, Кубаға ол елден шикі мұнай да, мұнай өнімдері де жеткізілмеген. Бұл жағдай АҚШ арнаулы операция жүргізіп, Мадуроны ұстап әкеткеннен кейін де өзгерген жоқ.

АҚШ билігі биыл қаңтар айында Кубаға жанармай бермеуді көздейтін шаралар қабылдайтынын, соның ішінде аралға жанармай жеткізген елдерге қосымша баж енгізуі мүмкін екенін мәлімдеген.
⛓‍💥Толығырақ оқыңыз

❤️Тоқаев таңдаған сайлау түрі әлемдік тәжірибе екені рас па? Азаттық талдауы

Қазақстанда парламент сайлауы қайтадан толықтай партиялық тізім бойынша өтпекші. Билік бұл әлемде кең тараған тәжірибе деп мәлімдеді. Кең тарағаны рас, бірақ оның арасынан Ақорда таңдаған түріне мысал табу қиын. Партиялық тізіммен сайлаудың немесе пропорциялық сайлау жүйесінің қазақстандық үлгісі қалай жұмыс істейді? Түсіндіреміз. 🔸Оқыңыз, көріңіз, пікір жазыңыз:

🗣Шымкент қаласында бір отбасының үш адамы – ұлы, анасы мен әжесі иіс тиіп қайтыс болған. Үйден ешкім шықпай қалғанына секемденген көршілері құтқарушыларды шақыртқан.

Қазақстанда қыс түскелі бері осыған ұқсас бірнеше қайғылы оқиға болды.

Өткен аптада Алматы облысы Райымбек ауданы Сарыбастау ауылында бір үйдің төрт адамы иіс тиіп көз жұмды, арасында 1,5 жасар нәресте де бар.

Осы айдың басында Түркістан облысы Түлкібас ауданында уақытша салынған тұрғын үйдегі пештің ақауы салдарынан ерлі-зайыпты екі адам уланып, біреуі қайтыс болған. Ал қаңтар айында Ордабасы ауданы Шұбарсу ауылында жекеменшік үйді жалға алып тұрып жатқан бір отбасының үш адамы иіс тиіп опат болды.