Өзбекстанда қамаудағы қарақалпақ белсендісі Дәулетмұрат Тәжімұратовқа жаңа айып тағылды

2022 жылғы Қарақалпақстандағы наразылық бойынша 16 жылға сотталған белсенді Дәулетмұрат Тәжімұратовқа қосымша жаза берілуі мүмкін. Оған "мекеменің жұмысын бұзды" деген айып тағылған. Туыстары мен қорғау жағының сөзінше, оны түрме қызметкерлері арандатқан болуы мүмкін.

Белсендінің бауыры Ренат Тәжімұратов жуырда түрмеге барып, оны көре алмай қайтқан. Оның сөзінше, бауырының орнына шыққан тергеуші Дәулетмұрат Тәжімұратовқа жаңа айып тағылғанын айтқан.

⚡Алматыда жер сілкінді

"Сейсмологиялық зерттеу институтының" хабарлауынша, жер сілкінісі ошағы Алматы қаласынан  шығысқа қарай 74 шақырым жерде орналасқан. Зардап шеккендер мен қираулар туралы мәлімет түскен жоқ.

ТЖМ мәліметінше, Алматыда 2 балдық жер сілкінісі болған. Алматы облысында 2-4 аралығында болған.

Еуропа-жерорта сейсмологиялық орталығының мәліметінше, жер сілкінісі 17 ақпанда Астана уақытымен сағат 15:08-де болған. Жер сілкінісінің магнитудасы – 5

Маңғыстау облысындағы полигонда сарбаз қаза болды

Бас прокуратура сарбаздың өліміне қатысты сотқа дейінгі тергеу амалдары басталғанын хабарлады.

"Қажетті жедел-тергеу іс-шаралары жүргізіліп жатыр, сараптамалар тағайындалды. Іс бойынша процессуалдық прокурор айқындалды" деп жазылған хабарламада.

Кейінгі кезде Қазақстанда қатардағы жауынгерлер мен курсанттар арасында өлім-жітім жиілеп барады. Өткен айда Қазақстанның түрлі өңірінде бірнеше сарбаз қаза болған.

⛸️Самоделкина қысқа бағдарламада қалай өнер көрсетті?

Олимпиадада мәнерлеп сырғанаудан әйелдер арасындағы жарыстың қысқа бағдарламасынан кейін қазақстандық София Самоделкина 12-орында келеді. Ол қысқа бағдарламада 68,47 ұпай иеленді. Бұл – оның биылғы маусымдағы жарыстарда алған ең жоғарғы ұпайы.

– Бұл – өмір бойы жасап келе жатқан еңбегім. Менің ойымша, бапкерімнің ойынша мінсіз сырғанап шықтым. Егер бапкерім Рафаэль Арутюнян "мінсіз сырғанап шықтың" десе, демек бұл шынымен мақтауға тұрарлық сырғанау. Өте ризамын, көңілім толды. Бір деммен сырғанап шықтым. Қобалжу болмады. Қобалжымай бүкіл дайындығымды көрсеткім келді. Аренадан Қазақстанның туын ұстаған жанкүйерлерді көргенде, олимпиада шығыршықтарын көргенде тіпті шабыттанып кеттім, – деді спортшы.

Қандай элементтер секірді?

Самоделкина қысқа бағдарламада екі айналым аксель, үш айналым лутц және үш айналым флип+үш айналым тулуп каскадын секірді. Төрешілер қазақстандық спортшының секіру элементтеріне жоғары ұпай бергенімен, мұздағы қадамдары (Step Sequence) мен мұздағы айналымдарына (spin) үшінші деңгей қойды. Әдетте бұл элементтерде төртінші деңгей жоғары саналады.

Спортшының бапкері Арутюнянның төрешілер берген ұпайға көңілі толмағаны байқалды.

Самоделкина 19 ақпандағы негізгі бағдарламада “таза сырғанап шығу үшін барын салмақ”.

Кімдер көш бастап тұр?

Қысқа бағдарламада жапониялық Ами Накаи ең қиын элементтің бірі үш айналым аксельді таза секіріп, 78,71 ұпаймен бірінші орында келеді. Екінші орында 2022-2024 жылдардың арасында әлем чемпионы болған жапониялық Каори Сакамото тұр – 77,23. Үшінші орында – былтырғы әлем чемпионы Алиса Лю (АҚШ) – 76,59 ұпай. Лю үш айналым лутцты толық секірмегені үшін ұпайы кемді. Бейтарап атлет ретінде қатысып жатқан ресейлік Аделия Петросян 72,89 ұпаймен бесінші орында тұр.

Жүлдегелер негізгі бағдарламадан соң анықталады.

Самоделкина "олимпиадаға қатысуға мүмкіндік берген" Қазақстанға алғыс айтады

Олимпиадада норвегиялық журналист Самоделкинадан не үшін Ресейден Қазақстанға ауысқанын сұрады. Спортшы "екі жыл болды Қазақстан атынан жарысқа қатысып жүрмін. Бұл – менің елім. Қазақстанға осы олимпиадаға қатысуға мүмкіндік бергені үшін алғысым шексіз" деп қысқа қайырды. Кейін журналистердің екінші тобына берген сұхбатында "Қазақстан боламағанда олимпиадаға қатыса алмас едім" деді.

Самоделкина Ресейде туған. 2023 жылы Қазақстан азаматтығын алғанда Ресей басылымдары спортшының Қазақстанға кеткені жайлы көп жазып, екі елде бұл үлкен талқы тудырған.

Ал Қазақстан коньки одағы Азаттыққа "Біз Ресейден не басқа елден мәнерлеп сырғанаушы сұраған жоқпыз. Азаматтықты спорттан бөлек басқа жолдармен алуға болады ғой. Оның анасы Қазақстанда туған, сол арқылы азаматтық алған сияқты" деп мәлімдеген.

Самоделкина 2024 жылдан бастап Қазақстан атынан халықаралық жарыстарға қатыса бастады.

Жамбыл облысында әлімжеттік көрген сарбаз ауыр жарақатпен ауруханаға түсті. Отарда әскери борышын өтеген Есбол Қапар туыстарына сержанттар темір затпен ұрғанын айтып берген. Жағы мен мұрны сынған оған екі рет ота жасалған. Бірақ бұл туралы әскери бөлімше туыстарына хабарламаған, отадан шыққан сарбазды белгісіз жерде ұстаған.

ҚазТАГ агенттігінің бас редакторы Әмір Қасеновтің үйқамақ мерзімі ұзартылды

Желтоқсан басында ҚазТАГ ақпарат агенттігінің бас директоры Әсет Матаев пен бас редакторы Әмір Қасенов "көрінеу жалған ақпарат таратты" деген күдікке ілінген.

Желтоқсан айының соңында Әмір Қасенов үйқамаққа алынды. Сот шешімі бойынша ол дәрігер және адвокаттан басқа ешкіммен сөйлесе алмайды. Әлеуметтік желіде жазба жариялауға, сұхбат беруге тыйым салынған.

Агенттіктің үстінен Freedom Finance компаниясы арыз түсірген.

Қамаудағы белсенді, марафоншы Марат Жыланбаев 4 қаңтардан бері аштық ұстап жатыр. 16 ақпанда жақтастары мен адвокаты Степногорск қаласына келіп, Жыланбаевқа кірмек болған. Бірақ №4 түрме бастығы «бұл үшін Жыланбаевтың өзі өтініш жазуы керек» деп адвокатты кіргізбеген. Бұл жөнінде Qaharman тобы жазды.

Түрме бастығының сөзінше, Марат Жыланбаев «шәй және сусын ішеді». Жақтастары оның денсаулығына алаңдап отырғанын айтады.

Адвокат Бақытжан Омарханов Азаттыққа сол күні бастықтың кабинетіндегі камерадан Марат Жыланбаевты көргенін айтты.

«Түрме бастығының кабинетінен көрдім. Тікелей режимде. Жалғыз өзі спортпен айналысып жүр» деді адвокат.

«Не үшін аштық жариялады?» деген сұраққа адвокат жауап бере алмады.

Марат Жыланбаев бұған дейін де түрмеде талай аштық жариялаған. Ол түрмеде өзінің құқықтарының бұзылып жатқандығын және сот үкімімен келіспейтіндігін айтқан.