Түркістан облысы әкімінің баспасөз қызметі референдум күні қалада «карусель» ұйымдастырылды» деген ақпаратты жоққа шығарды.

«Жарияланған ақпарат шындыққа жанаспайтынын хабарлаймыз.

Қоғамдық тасымал қызметін негізінен жеке кәсіпкерлер жүзеге асырады. Осы референдумда облыс орталығы Түркістан қаласында жеке тасымалдаушы компания өз еркімен қолдау білдіріп, қала тұрғындарының дауыс беру учаскелеріне баруына қолайлы жағдай жасау мақсатында автобустарын тегін ұсынған.

Айта кету керек, референдум күні азаматтарды тасымалдау заңға қайшы емес. Бұл –тұрғындардың өз конституциялық құқығын жүзеге асыруына қолайлы жағдай жасауға бағытталған ұйымдастырушылық шаралардың бірі. Сонымен қатар, дауыс беру – әр азаматтың ерікті таңдауы» деді Азаттыққа Түркістан облысы әкімінің баспасөз хатшысы Мира Мүслім.

⚡Экзит-полл: Конституцияны дауыс берушілердің 86 пайыздан астамы қолдады

Конституция бойынша референдумның экзит-полл қорытындысы шыға бастады. Еуразиялық интеграция институты жүргізген сауалнама бойынша дауыс берушілердің «86,7 пайызы жаңа Конституцияны қолдаған».

Ал Астана «Социс-А» әлеуметтік зерттеулер институты «87,4 пайыз адам жаңа Конституция жобасын қолдады» дейді.

⚡Қазақстанда жазда парламент сайлауы өтпек

Бұл туралы Қазақстан президенті Қасым-Жомарт Тоқаев жаңа Конституцияның үгіт-насихатына қатысқан жастармен кездесуде мәлімдеді.

⚡️Қазақстан президенті Тоқаев экзит-полл қорытындысымен танысып, жаңа Конституция қабылданғанын мәлімдеді.

"Қазір ғана экзит-поллдың нәтижелері шықты. Соған сәйкес қазақ елі түбегейлі тарихи таңдауын жасады. Халқымызға шынайы ризашылығымды айтқым келеді. Бүгін жұртымыз дауыс беріп, Қазақстанның тарихын, тағдырын айқындады. Бұл шешім дүние жүзі тарихында мәңгі сақталады" деді ол.

Бұған қоса, Тоқаев енді 15 наурыз елде Конституция күні болатынын да мәлімдеді.

🏆 АҚШ-та «Оскар-2026»сыйлығы иегерлері жарияланды

АҚШ-та өткен салтанатты кеште америкалық комик әрі тележүргізуші Конан О’Брайен төрешілер ұйғарымы бойынша "Оскар-2026" сыйлығы кімдерге берілетінін жария етті.

🎬 Негізгі жеңімпаздар:

Үздік фильм – "Шайқастан кейінгі шайқас";
Үздік режиссер – Пол Томас Андерсон ("Шайқастан кейінгі шайқас");
Үздік ер адам рөлі – Майкл Б. Джордан ("Күнәһарлар");
Екінші пландағы үздік әйел рөлі – Эми Мэдиган ("Құрал");
Екінші пландағы үздік ер адам рөлі – Шон Пенн ("Шайқастан кейінгі шайқас").

🎥 Техникалық санаттар бойынша "Франкенштейн" фильмі озды.

Ал "Жын аулайтын кей-поп әнші қыздар" анимациялық фильмі екі бірдей (үздік анимация және үздік ән) марапатқа ие болды.

📽 Үздік деректі фильм жанрында "Путинге қарсы беймәлім мырза" (Mr. Nobody Against Putin) шығармасы бас жүлдені жеңіп алды.

📊 Зерттеу: салық реформасы қазақстандықтардың шығынын көбейтті

Demoscope ұйымы зерттеуіне сәйкес, халықтың 77,6% қаңтардан бері шығындары өскенін, азық-түлік, киім-кешек, көлік, демалыс пен коммуналдық төлемдерге ақша үнемдеуге мәжбүр екенін айтқан.

Респонденттердің 65% қосылған құн салығы өскеннен кейін өмір сапасы нашарлады деп есептейді, соның 40,5% – елеулі түрде нашарлағанын айтады. Тек 8,2% жағдай жақсаратынына сенеді.

Demoscope жазуынша, Қазақстан тұрғын халқы негізгі тауарлар мен қызметтерге қол жеткізу қиындығын басты мәселе ретінде атаған 15 мемлекеттің қатарына кіріп отыр.

АҚШ Иран экономикасы үшін маңызды саналатын Харк аралына соққы жасады. Бұл арал арқылы Иран мұнайының 90 пайызы экспортталады.