🥇 Azərbaycanın Dakar-2026-da ilk qızıl medalı

Azərbaycan cüdoçusu İbrahim Talıbov Yeniyetmələrin IV Yay Olimpiya Oyunlarında qızıl medal qazanıb.

▪️ 55 kq çəki dərəcəsində mübarizə aparan idmançımız finalda xorvatiyalı Zvorc Jonaya qalib gəlib.

▪️ Talıbov yarımfinala qədər Mərkəzi Afrika Respublikasından İbrahim Mussanı və Səudiyyə Ərəbistanından Muratz Hebahı məğlub edib.

Qeyd edək ki, noyabrın 13-dək davam edəcək Dakar-2026-da Azərbaycan 8 idman növü üzrə 13 idmançı ilə təmsil olunur.

@bakutvxeber

🗓 Emin Sabitoğlunun anadan olmasının 89 illiyidir

Azərbaycan musiqi mədəniyyətinin görkəmli nümayəndəsi, Xalq artisti Emin Sabitoğlu 1937-ci il noyabrın 2-də Bakıda, tanınmış yazıçı-dramaturq Sabit Rəhmanın ailəsində anadan olub.

Emin Sabit oğlu Mahmudov Bülbül adına Orta İxtisas Musiqi Məktəbində, daha sonra Azərbaycan Dövlət Konservatoriyasında Qara Qarayevin sinfində təhsil alıb. Təhsilini Moskva Dövlət Konservatoriyasında davam etdirib.

Yaradıcılığı ərzində 600-dən artıq mahnı, 9 musiqili komediya və 40-a yaxın filmə musiqi bəstələyib. «Bakı, sabahın xeyir», «Dərələr», «Uzaq yaşıl ada», «Dağlar», «Şükriyyə» kimi mahnıları bu gün də sevilərək dinlənilir.

Bəstəkar «Dədə Qorqud», «Bizim Cəbiş müəllim», «Gün keçdi», «Ad günü», «Bəyin oğurlanması» və «Təhminə» kimi məşhur filmlərə yazdığı musiqilərlə Azərbaycan kinosunun inkişafına mühüm töhfə verib.

Emin Sabitoğlu 1997-ci ildə «Şöhrət» ordeni ilə təltif olunub, 2000-ci ildə Xalq artisti fəxri adına layiq görülüb.

Görkəmli bəstəkar 2000-ci il noyabrın 18-də Bakıda vəfat edib. Onun zəngin musiqi irsi Azərbaycan mədəniyyətində yaşayır.

@bakutvxeber

🗓 Bu gün Xalq artisti Hökümə Qurbanovanın anım günüdür

Bu gün görkəmli teatr və kino aktrisası, SSRİ Xalq artisti Hökümə Qurbanovanın vəfatından 38 il ötür.

Hökümə Abbasəli qızı Qurbanova 1913-cü il iyunun 11-də Bakıda anadan olub. 1931-ci ildə Bakı Pedaqoji Texnikumunu bitirib, daha sonra Azərbaycan Dövlət Konservatoriyasında fortepiano üzrə təhsil alıb.

Aktyorluq fəaliyyətinə 1933-cü ildə «Azərbaycanfilm» kinostudiyasında başlayıb. Cəfər Cabbarlının təşəbbüsü ilə «Almaz» filmində Yaxşı obrazını canlandırıb. 1938-ci ildən ömrünün sonunadək Azərbaycan Dövlət Dram Teatrında fəaliyyət göstərib.

Hökümə Qurbanova «Şeyx Sənan», «Od gəlini», «Vaqif», «Qış nağılı» kimi tamaşalarda yaratdığı obrazlarla teatr tarixində özünəməxsus yer tutub. «Bir ailə», «Uzaq sahillərdə», «Ögey ana», «Böyük dayaq», «Əhməd haradadır?» və digər filmlərdəki rolları ilə də tamaşaçıların yaddaşında qalıb.

Sənətkar 1943-cü ildə Əməkdar artist, 1960-cı ildə Xalq artisti, 1965-ci ildə isə SSRİ Xalq artisti fəxri adlarına layiq görülüb.

Hökümə Qurbanova 1988-ci il noyabrın 2-də Bakıda vəfat edib və Fəxri xiyabanda dəfn olunub.

@bakutvxeber

🗓 Nailə İslamzadənin 65 yaşı tamam olur

Bu gün tanınmış teleaparıcı, diktor və Əməkdar artist Nailə İslamzadənin doğum günüdür. Onun 65 yaşı tamam olur.

Nailə İslamzadə 1961-ci il noyabrın 2-də Balakən rayonunda anadan olub. Bakı Dövlət Universitetinin (keçmiş Rus dili və Ədəbiyyatı İnstitutu) məzunudur.

1982-ci ildən Azərbaycan Dövlət Televiziyasında diktor, aparıcı və jurnalist kimi fəaliyyət göstərib. Uzun illər «Xəbərlər» informasiya proqramının aparıcılarından biri olub. Müəllifi və aparıcısı olduğu «Ailələr, talelər» verilişi Azərbaycan televiziyasında ilk sosial tok-şoulardan biri kimi yadda qalıb.

Müxtəlif illərdə Türkiyənin TRT AVAZ kanalında «İş'te kadın» proqramının müəllifi və aparıcısı olub, Nəqliyyat, Rabitə və Yüksək Texnologiyalar Nazirliyinin Multimedia Mərkəzinə rəhbərlik edib.

Nailə İslamzadə 1998-ci ildə «Əməkdar artist» fəxri adına layiq görülüb. 2019-cu ildən İctimai Televiziyada «Ötən günlər» verilişinin aparıcısıdır.

O, uzun illər ərzində peşəkar fəaliyyəti və özünəməxsus aparıcılıq üslubu ilə Azərbaycan tamaşaçılarının rəğbətini qazanıb.

@bakutvxeber