O‘chadigan yumaloq-dumaloqchalar 😁😊🥰

#Kechinmalar

Ba’zan yuzlaringga qarab, vaqtni to‘xtatib qo‘ygim keladi... Kechagina seni ilk bor bag‘rimga bosgandim...
Bugun esa yuzimga qarab kulasan, ovozimni taniysan, meni qidirasan. Har bir yangi odating mani quvontiradi, lekin yuragimning bir cheti g‘alati bo‘ladi...
Chunki san ulg‘ayyapsan... Balki san bu kunlarni eslamassan. Lekin men hech qachon unutmaydigan lahzalarni yashayapmiz, qizim. Chunki seni esingda qolmaydigan bu kunlar — meni hayotimdagi eng go‘zal xotiralarim bo‘ladi...
Va bu xotiralarni sen uchun ham saqlab borishni istayman...

Hozir ham his qilganlarimni shu onda muhrlab qo‘ymoq istayman.
Eng avvalo — shukronalik…
Ba’zan lablarim o‘z-o‘zidan pichirlaydi: ʼʼRobbim, meni bunday go‘zal ne’matingga loyiq ko‘rganing uchun Senga behisob hamd-u sanolar bo‘lsin. Ammo bu ne’matingning haqqini ado etishga ojizman…ʼʼ
Chunki qalbimdagi shukrni so‘zlarga sig‘dirish qiyin. Seni qanchalik yaxshi ko‘rishimni ifodalashga esa ba’zan so‘zlarim ojizlik qiladi. Bilasanmi, sen bilan birga qalbimda nimalar uyg‘onganini his qilishning o‘ziyoq menga bir olam baxt beradi. Ko‘nglimning uzoq vaqtdan beri yorug‘lik kutib turgan burchaklariga nur kiritgan Sensan qizim... kunlarimga quvonch, oddiy lahzalarimga alohida mazmun kirgandek Sen bilan...
Va men bularning barchasini his qilganimda, yana Robbimga yuzlanaman: Alhamdulillah, Xudojonim!

❤️ Chunki bu tuyg‘ularning ichida ham shukr bor, hayrat bor, ba’zan ko‘zlarimga yosh keltiradigan bir baxt bor. Sen esa… sen mening uzoq kutgan kunlarimsan!
Kutishning nimaligini, qalbda bir umidni asrab yashashni, ba’zan ichingdagi hislarni hech kimga to‘liq tushuntirib berolmasang ham, ularni yo‘qotmay yashashni o‘rgatgan Farishtamsan qizalog‘im…
Shuning uchun ham bugungi quvonchimni oddiy bir quvonch deb bilmayman. Chunki uning ortida men bosib o‘tgan yo‘llar, ichimda saqlagan hislarim va qancha vaqt kutganim bor.
Balki shuning uchundir, seni yaxshi ko‘rishim bilan birga, sen borliging uchun ham shukr qilaman. Qalbimda sen bilan bog‘liq yorug‘ xotiralar, samimiy tuyg‘ular va yana-da ko‘proq yaxshiliklarga umid uyg‘ongani uchun ham…