#райца #гара_цэгла #sacral_mill
А зараз пра тое, як збегчы з Райцы/Варончы ды прыемныя сюрпрызы.

Пачатковы план быў дабрацца толькі да Варончы. Але ў працэсе стала зразумела, што дарога зручна праходзіць праз Райцу. Што, канешне, вэры найс. І вось калі абедзве вёскі былі агледжаныя, да аўтобуса на Карэлічы ўсё адно заставалася гадзіны 4. Ну, трэба лавіць спадарожку. Але ж доўга стаяць на прыпынку сумна, тым больш, што кіроўцы актыўна ігнаравалі паднятую руку. Можна ж рухацца ў бок горада. Ідэя была цудоўная, бо прайшоўшы сотню-дзве метраў ад прыпынку, заўважыў у кустах рэшткі нейкага муру. І вось неспадзяванка: рэшткі былога вадзянога млына, штучны вадаспад і маляўнічая рачулка Зямчатка.
Калі кусты з дрэвамі пазарастаюць, заўважыць будзе складана, яшчэ складаней прабрацца.

А аўтаспын на гэтым кавалку не спрацаваў. Праз 5 км звярнуўся да мясцовага таксі, бо міласэрная душа пашкадавала спадарожніка, менш звыклага да такіх шпацыраў. 12 км акурат да карэліцкага кафэ “Апельсін” абышліся ў 10 рублёў.

#заслаўе #sacral_museum
Дарэчы, яшчэ ўзімку даехаў да маладога заслаўскага музею беларускай маляванкі і неяк забыўся пахваліцца. Акрамя легендарных Драздовіча і Алены Кіш, там хапае дываноў і прасцінак працы невядомых майстроў.
І вось што стала цікава. Асабіста ніколі не сустракаў падобныя ўзоры народнага мастацтва ў сваім натуральным, так бы мовіць, асяроддзі. А ці даводзілася вам бачыць маляваныя дываны ў вёсках? У бабуляў, сваякоў ці іншых візітаў у вясковыя хаты?

#карэлічы #гара_цэгла #sacral_brovar?
Два гады назад давялося наведаць Карэлічы. І з улікам таго, што вольнага часу бракавала, прыйшлося правільна расстаўляць прыярытэты. Тады паспеў наведаць занядбаныя татарскія могілкі.
Сёлета часу было трохі больш, але без расстаноўкі прыярытэтаў не абышлося. У пасёлку знойдзены руінкі: былая гаспадарчая пабудова сярэдзіны ХІХ стагоддзя былой жа сядзібы Радзівілаў. У сеціве будынак называюць броварам, але гэта недакладна. Неяк больш на свіран падобна ці іншае сховішча.
Насамрэч, у часы будаўніцтва «бровара» гаспадарамі сядзібы былі Вітгенштэйны. Стафанія Радзівіл, дачка Дамініка Радзівіла і апошняя спадкаемніца дагасаючай галіны нясвіскіх Радзівілаў, у 1828 годзе пабралася шлюбам з Людвікам Леанам Вітгенштэйнам, бацька якога ўдзельнічаў у здушэнні паўстання Касцюшкі ды змагаўся з французскай арміяй у 1812-м.

Знаходзіцца ля берага ракі Рутка, у мясцовым парку.

#карэлічы #sacral_urban
Карэліцкія замалёўкі.
Як бачым, у пасёлку ёсць старая царква-мураўёўка 1866 года і менш стары касцёл міжваеннай пабудовы. Пасля Другой сусветнай яго перарабілі ў савецкі алка-маркет.