#новыуборак #sacral_dominium
На поўдні ад Марʼінай Горкі ёсць вёска Новы Уборак. Назва чыгуначнага прыпынку (Вяленскі) побач нагадвае пра былую назву колішняга фальварка «Вялень». Шмат гадоў назад даводзілася праязджаць гэтыя мясціны, каб праз агароджу паглядзець на захаваны будынак былой сядзібы 1904 года. Магчыма, то быў палац, а мо і нейкі гаспадарчы корпус. Да 2015 года быў у стане руінаў.
Гэтым разам зноў даводзіцца глядзець на яго праз плот, бо як і раней, на тэрыторыі месціцца закрытая ўстанова – Пухавіцкі псіханеўралагічны інтэрнат.
Верагодна, у 1861 годзе шляхціч Баніфацый Крупскі набыў маёнтак Вялень (разам з Навасёлкамі ды Марʼінай Горкай). Ён быў з тых землеўладальнікаў, што рыхтавалі стварэнне Літоўскага таварыства сельскай гаспадаркі, але расейскі імператар згоды на стварэнне ня даў. Ідэя з падобным таварыствам будзе рэалізавана пазней і ў іншым выглядзе (варта будзе пра гэта распавесці асобна),
а пакуль наш герой у 1863 падтрымаў паўстанне Каліноўскага, прыняўшы пасаду камісара Ігуменскага павета, распаўсюджвае дакументы з рэвалюцыйнымі распараджэннямі. Быў арыштаваны і ў траўні 63-га знаходзіўся ў менскім турэмным замку (будучая «Валадарка»).
Па судовай пастанове маёнткі былі сканфіскаваныя (іх атрымае будучы міністр унутраных спраў імперыі Леў Макаў, пра гэта ўжо згадвалася тут), а сам Крупскі, пазбаўлены дваранскай годнасці, высланы на 8 гадоў у Іркуцкую губерню. Яго жонка Стэфанія вырашыла ехаць з мужам, пакінуўшы двух дзяцей у сястры Баніфацыя – Леакадзіі. Адзін з іх, Урбан, у будучым працягне бацькаву справу – клопат аб гаспадарчым жыцці ды нацыянальным адраджэнні.
У канцы 70-пачатку 80-х пан Крупскі вяртаецца на радзіму, аднаўляе дваранскія правы. Дажыў свой век Баніфацый Урбанавіч у маёнтку Мяцявічы Слуцкага павету.

Партрэты Баніфацыя і Стэфаніі Крупскіх, верагодна, зроблены ў Варшаве, куды першапачаткова прыехала сям'я пасля высылкі.

#гара_цэгла #sacral_industrial #sacral_video
Адцягніцеся ад паўсядзённай мітусні на хвіліначку і паўдзельнічайце ў віртуальным шпацыры па познесавецкай гіга-занядбанцы:

https://youtube.com/shorts/EUpleZfQLTk

Ну як? Працуем далей🤓