2026-yil 27-oktyabr kuni Toshkent shahar “Bilim” axborot-kutubxona markazi hamda O‘zbekiston Respublikasi Milliy gvardiyasi Harbiy musiqa akademik litseyi hamkorligida “Biz kitobni sevamiz” mavzusida davra suhbati va litseyning  yuqori bosqich o‘quvchilari o‘rtasida “Ma’naviyat qalqoni” respublika  kitobxonlik ko‘rik-tanlovining 2-bosqichi o‘tkazildi.
       Tadbir avvalida litsey rahbariyati hamda Toshkent shahar “Bilim” axborot-kutubxona markazi mutaxassislari so‘zga chiqdilar. Ular o’z ma’ruzalarida kitobxonlikning inson ma’naviyati va dunyoqarashini shakllantirishdagi ahamiyati, shuningdek, mamlakatimizda kitobxonlikni rivojlantirishga qaratilayotgan e’tibor haqida alohida to'htaldilar.
       Shundan so‘ng o‘quvchilar o‘rtasida kitobxonlikni keng targ‘ib qilishga qaratilgan “Ma’naviyat qalqoni” ko‘rik-tanlovining 2-bosqichiga start berildi. Unda litseyning saralab olingan faol kitobxon o‘quvchilari o‘zaro bellashdilar. Tanlov quyidagi ikki shart asosida o‘tkazildi.
1. “Tezkor savol-javob” sharti:
Ishtirokchilarning o‘zbek tili tarixi, adabiyotga oid nazariy bilimlari, zukkoligi, hozirjavobligi va nutq ravonligi sinovdan o‘tkazildi.
2. “Badiiy asar bilimdoni” sharti:
O‘quvchilar o‘zbek va jahon mumtoz adabiyoti durdonalaridan o‘qigan asarlari, ularning mazmun-mohiyati hamda ma’naviy-tarbiyaviy ahamiyati yuzasidan teran fikr-mulohazalarini namoyon etdilar.
       Qizg‘in va mazmunli kechgan bellashuv yakunida hakamlar hay’ati tomonidan g‘oliblar e’lon qilindi. Tanlovda faol ishtirok etgan hamda g‘oliblikni qo‘lga kiritgan o‘quvchilar O‘zbekiston Respublikasi Milliy gvardiyasi Harbiy musiqa akademik litseyi rahbariyatining esdalik sovg‘alari bilan taqdirlandilar.
Mazkur tadbir o‘quvchilarning kitobxonlikka bo‘lgan qiziqishini oshirish, ularning bilim va dunyoqarashini kengaytirish hamda ma’naviy-axloqiy fazilatlarini rivojlantirishga xizmat qildi.

2026-yil 29-oktyabr kuni Toshkent shahar “Bilim” axborot-kutubxona markazi mutaxassislari tomonidan O‘zbekiston davlat jahon tillari universiteti Xalqaro jurnalistika fakultetining “Xalqaro munosabatlar” yo‘nalishi 2-bosqich talabalari ishtirokida “Kitobning inson psixologiyasiga ta’siri” mavzusida davra suhbati va psixologik trening tashkil etildi.

Tadbir davomida kutubxona mutaxassislari kitob mutolaasining inson ruhiyati, tafakkuri va dunyoqarashiga ta’siri haqida ma’ruza qildilar. Xususan, muntazam kitob o‘qish stressni kamaytirish, xotira va diqqatni rivojlantirish, so‘z boyligini oshirish, mustaqil fikrlash hamda insonning ruhiy holatini barqarorlashtirishdagi ahamiyati haqida fikr yuritildi.

Shuningdek, badiiy asarlarni mutolaa qilish orqali inson turli qahramonlar taqdirini anglab, hamdardlik, bag‘rikenglik va insoniylik kabi ijobiy fazilatlarni rivojlantirishi ta’kidlandi. Talabalarga kitob tanlash, mutolaa jarayonini to‘g‘ri tashkil etish va o‘qilgan asarlarni tahlil qilish bo‘yicha tavsiyalar berildi.

Uchrashuvning amaliy qismida talabalar uchun psixologik trening o‘tkazildi. Trening davomida ishtirokchilar turli topshiriq va mashqlarni bajarib, o‘z fikrlarini erkin ifoda etdilar. Tadbir yakunida qizg‘in savol-javoblar tashkil etilib, talabalar o‘zlarini qiziqtirgan savollarga mutaxassislardan batafsil javob oldilar.

Qiziqarli va samimiy ruhda o‘tgan tadbir yoshlarning kitob mutolaasiga bo‘lgan qiziqishini oshirish, ularning ruhiy-intellektual salohiyatini rivojlantirish hamda kitobxonlik madaniyatini yuksaltirishga mustahkam baza yaratadi.