2026-yil 23-oktyabr kuni Toshkent shahar “Bilim” axborot-kutubxona markazi mutaxassislari tomonidan kitobxonlarning qiziqishlari, mutolaa madaniyati va adabiyotlarga bo‘lgan ehtiyojlarini o‘rganish maqsadida foydalanuvchilar o‘rtasida ijtimoiy so‘rovnoma tashkil etildi. Unda O‘zbekiston davlat san’at va madaniyat instituti Kutubxona-axborot faoliyati fakulteti talabalari faol ishtirok etdilar.

So‘rovnoma davomida talabalarning kitobxonlikka bo‘lgan munosabati, qaysi yo‘nalishdagi adabiyotlarga ko‘proq qiziqishi, zamonaviy va klassik asarlar hamda mutaxassislikka oid adabiyotlarga bo‘lgan talabi o‘rganildi. Shuningdek, elektron va bosma nashrlardan foydalanish darajasi, axborot izlash manbalari hamda mutolaa jarayonida zamonaviy texnologiyalarning o‘rni yuzasidan ham fikrlar olindi.

Bundan tashqari, ishtirokchilarning Toshkent shahar “Bilim” AKM tomonidan ko‘rsatilayotgan xizmatlar sifati, kutubxona fondini yangi adabiyotlar bilan boyitish, foydalanuvchilarga yaratilgan imkoniyatlar va xizmat turlarini takomillashtirish borasidagi taklif hamda mulohazalari tinglandi.
Ijtimoiy so‘rovnoma natijalari kitobxonlarning axborotga bo‘lgan ehtiyojlarini chuqurroq anglash, ularning qiziqishlariga mos adabiyotlarni tanlash va kutubxona xizmatlari samaradorligini oshirishda muhim ahamiyat kasb etadi.

Olingan fikr-mulohazalar asosida axborot-kutubxona markazi fondini yangi, zamonaviy va sohaga oid adabiyotlar bilan boyitish, kitobxonlikni keng targ‘ib etishga qaratilgan yangi loyihalarni amalga oshirish hamda yoshlarning intellektual salohiyatini yuksaltiruvchi ma’naviy-ma’rifiy tadbirlarni tashkil etish rejalashtirilmoqda.

Toshkent shahar “Bilim” AKM tomonidan o‘tkazilayotgan bunday so‘rovnomalar foydalanuvchilar bilan samarali muloqotni yo‘lga qo‘yish, ularning talab va istaklarini inobatga olish, kitobxonlik madaniyatini rivojlantirish hamda jamiyatda mutolaa muhitini yanada mustahkamlashga xizmat qiladi.

2026-yil 26-oktyabr kuni Toshkent shahar “Bilim” axborot-kutubxona markazi mutaxassislari tomonidan O‘zbekiston davlat san’at va madaniyat instituti talabalari hamda “Kitobxonlar klubi” a’zolari  ishtirokida yozuvchi, tarjimashunos olim, filologiya fanlari doktori, O‘zbekistonda xizmat ko‘rsatgan madaniyat xodimi Jumaniyoz Sharipov tavalludiga bag‘ishlab “Jumaniyoz Sharipov — so‘z san’atining fidoyi ijodkori” hamda shoir va jurnalist, O‘zbekiston Yozuvchilar uyushmasi a’zosi, O‘zbekistonda xizmat ko‘rsatgan yoshlar murabbiysi Bahodir Iso tavalludining 70 yilligiga bag‘ishlangan “Asarlarida inson taqdiri va hayot haqiqati” mavzularida suhbat bo‘lib o‘tdi.
Suhbat davomida taniqli yozuvchi, tarjimon, filologiya fanlari doktori Jumaniyoz Sharipovning hayoti va ijodiy faoliyati, shuningdek, shoir va jurnalist Bahodir Isoning adabiyot va jurnalistika sohasidagi xizmatlari haqida so‘z yuritildi. Ishtirokchilar adiblarning ijodiy merosi, asarlarining mazmun-mohiyati va yosh avlod ma’naviyatini yuksaltirishdagi ahamiyati haqida fikr almashdilar. Bunday adabiy-ma’rifiy davra suhbatlari yoshlarning kitobxonlik madaniyatini rivojlantirish, badiiy adabiyotga bo‘lgan qiziqishini oshirish hamda milliy adabiy merosimizga hurmat ruhida tarbiyalashda muhim ahamiyat kasb etadi.