2026-yil 26-oktyabr kuni Toshkent shahar “Bilim” axborot-kutubxona markazi mutaxassislari tomonidan O‘zbekiston davlat san’at va madaniyat instituti talabalari hamda “Kitobxonlar klubi” a’zolari  ishtirokida yozuvchi, tarjimashunos olim, filologiya fanlari doktori, O‘zbekistonda xizmat ko‘rsatgan madaniyat xodimi Jumaniyoz Sharipov tavalludiga bag‘ishlab “Jumaniyoz Sharipov — so‘z san’atining fidoyi ijodkori” hamda shoir va jurnalist, O‘zbekiston Yozuvchilar uyushmasi a’zosi, O‘zbekistonda xizmat ko‘rsatgan yoshlar murabbiysi Bahodir Iso tavalludining 70 yilligiga bag‘ishlangan “Asarlarida inson taqdiri va hayot haqiqati” mavzularida suhbat bo‘lib o‘tdi.
Suhbat davomida taniqli yozuvchi, tarjimon, filologiya fanlari doktori Jumaniyoz Sharipovning hayoti va ijodiy faoliyati, shuningdek, shoir va jurnalist Bahodir Isoning adabiyot va jurnalistika sohasidagi xizmatlari haqida so‘z yuritildi. Ishtirokchilar adiblarning ijodiy merosi, asarlarining mazmun-mohiyati va yosh avlod ma’naviyatini yuksaltirishdagi ahamiyati haqida fikr almashdilar. Bunday adabiy-ma’rifiy davra suhbatlari yoshlarning kitobxonlik madaniyatini rivojlantirish, badiiy adabiyotga bo‘lgan qiziqishini oshirish hamda milliy adabiy merosimizga hurmat ruhida tarbiyalashda muhim ahamiyat kasb etadi.

2026-yil 23-oktyabr kuni Toshkent shahar “Bilim” axborot-kutubxona markazi mutaxassislari tomonidan Bektemir tuman axborot-kutubxona markaziga tashrif buyurildi.

Ushbu tashrifdan ko‘zlangan asosiy maqsad — markaz faoliyatini o‘rganish, tahlil qilish hamda xodimlarga uslubiy va amaliy yordam ko‘rsatishdan iborat bo‘ldi.

Tashrif davomida TAKM faoliyatidagi ijro intizomiga rioya etilishi va ish yuritish hujjatlarining belgilangan talablar asosida rasmiylashtirilishi, axborot-kutubxona faoliyatiga oid me’yoriy hujjatlarning yuritilishi, aholining kitobxonlik madaniyatini yuksaltirish borasida olib borilayotgan ishlar atroflicha tahlil qilindi.

Shuningdek, o‘rganish davomida axborot-bibliografik xizmatni to‘g‘ri tashkil etish, ma’lumot-bibliografiya apparatini (MBA) yuritishdagi mavjud kamchiliklarni bartaraf etish hamda zamonaviy bibliografik qo‘llanmalar tayyorlash texnikasi bo‘yicha kutubxona xodimlariga zarur tavsiya va ko‘rsatmalar berildi.

Tashrif yakunida faoliyat samaradorligini oshirish maqsadida, aniqlangan kamchiliklarni bartaraf etish, ish hujjatlarini sifatli yuritish hamda belgilangan me’yor va talablarga qat’iy rioya qilish bo‘yicha zarur amaliy-metodik yordam ko‘rsatildi.

2026-yil 27-oktyabr kuni Toshkent shahar “Bilim” axborot-kutubxona markazi hamda O‘zbekiston Respublikasi Milliy gvardiyasi Harbiy musiqa akademik litseyi hamkorligida “Biz kitobni sevamiz” mavzusida davra suhbati va litseyning  yuqori bosqich o‘quvchilari o‘rtasida “Ma’naviyat qalqoni” respublika  kitobxonlik ko‘rik-tanlovining 2-bosqichi o‘tkazildi.
       Tadbir avvalida litsey rahbariyati hamda Toshkent shahar “Bilim” axborot-kutubxona markazi mutaxassislari so‘zga chiqdilar. Ular o’z ma’ruzalarida kitobxonlikning inson ma’naviyati va dunyoqarashini shakllantirishdagi ahamiyati, shuningdek, mamlakatimizda kitobxonlikni rivojlantirishga qaratilayotgan e’tibor haqida alohida to'htaldilar.
       Shundan so‘ng o‘quvchilar o‘rtasida kitobxonlikni keng targ‘ib qilishga qaratilgan “Ma’naviyat qalqoni” ko‘rik-tanlovining 2-bosqichiga start berildi. Unda litseyning saralab olingan faol kitobxon o‘quvchilari o‘zaro bellashdilar. Tanlov quyidagi ikki shart asosida o‘tkazildi.
1. “Tezkor savol-javob” sharti:
Ishtirokchilarning o‘zbek tili tarixi, adabiyotga oid nazariy bilimlari, zukkoligi, hozirjavobligi va nutq ravonligi sinovdan o‘tkazildi.
2. “Badiiy asar bilimdoni” sharti:
O‘quvchilar o‘zbek va jahon mumtoz adabiyoti durdonalaridan o‘qigan asarlari, ularning mazmun-mohiyati hamda ma’naviy-tarbiyaviy ahamiyati yuzasidan teran fikr-mulohazalarini namoyon etdilar.
       Qizg‘in va mazmunli kechgan bellashuv yakunida hakamlar hay’ati tomonidan g‘oliblar e’lon qilindi. Tanlovda faol ishtirok etgan hamda g‘oliblikni qo‘lga kiritgan o‘quvchilar O‘zbekiston Respublikasi Milliy gvardiyasi Harbiy musiqa akademik litseyi rahbariyatining esdalik sovg‘alari bilan taqdirlandilar.
Mazkur tadbir o‘quvchilarning kitobxonlikka bo‘lgan qiziqishini oshirish, ularning bilim va dunyoqarashini kengaytirish hamda ma’naviy-axloqiy fazilatlarini rivojlantirishga xizmat qildi.