Kecha PhD (mustaqil izlanuvchilik) uchun suhbatga kirib chiqqandim. Bugun qaror tayyorlanayotgani haqida aytib telefon qilishdi. Demak, oʻxshagan.

Universitetda oʻtiladigan ona tili oʻqitish metodikasi fani mazmunini takomillashtirishni maqsad qilganmiz. Oʻylaganimizga erisha olsak, OTMlar uchun manfaatli bir ish boʻladi.

@birgap

Vaziyatni tushuntirishga harakat qilaman.

Bu xatni tuman taʼlim boʻlimi boshligʻi tumandagi maktab direktorlariga yozyapti.

Aytilishicha, tumanda 6 ta xususiy maktab bor. Ulardan biri (savdo markazi ikkinchi qavatidagisi😳) juda ham zoʻr, ayniqsa, matematika ustozi. Shuning uchun hamma maktablarda shu xususiy maktabni reklama qilish kerak.

Qiziq, juda qiziq.

Isroil Tillaboyevning yozganidan esa shuni angladimki, qachonlardir oʻqituvchi boʻlgan, Respublika taʼlim markazida ishlagan akamiz xususiy maktablarga chap koʻz bilan qaraydi. Bu yaxshi emas.

@birgap

Erudit-kvartet (Zakovatning bir yoʻnalishi) boʻyicha OʼZBEKISTON chempionati saralashida qatnashdim.

40 ta savolning faqatgina BITTAsi Oʻzbekiston bilan bogʻliq ekan.

Qoyil qolmadim.

@birgap

Eng yomon koʻrgan narsam – darsimga boshqa kimningdir aralashishi.

"Sodiq school" dars daxlsiz tamoyili ishlaydi. Sening darsingga birov aralashmaydi. Oʻquvchilaring toʻpolon qilyaptimi, xonadan shovqin chiqyaptimi farqi yoʻq. Birov kelib oʻquvchilaringga baqirmaydi. Sendan oʻtib ularga buyruq bermaydi.

Hamma maktablarda shu madaniyatni shakllantirish kerak. Siz boshqaning darsiga kirib baqirsangiz, uning dars boshqarishiga aralashsangiz oʻsha oʻqituvchiga hurmatsizlik qilgan boʻlasiz. Oʻquvchilar oldida uni uyaltirgan, obroʻsini toʻkkan boʻlasiz.

Siz jim oʻtiradigan, pashsha uchsa ovozi eshitiladigan sinf xohlasangiz bu xohish sizniki, boshqalar shovqinroq sinfni, muhokamalarga boy darsni, biroz erkinlikni xushlashi mumkin. Oʻz qoidalaringizni boshqalarga tiqishtirmang.

@birgap

Ona tili ustozlariga savol:

Nima deb oʻylaysiz, nega oʻquvchilar darsimiz uchun oʻzlari istagandek emas, aynan chiziqli daftar tutishlari kerak?

@birgap

Til- millat ko'zgusidir!

Rahimov School maktabi o'z ishiga fidoyi ona tili va adabiyot fani o'qituvchilarini o'z jamoasiga taklif etadi

Ish sharoitlari

— To'liq ish kuni, 08:30—17:15|5/2
— Maktab hududida tushlik. Maktab hisobidan 50% to'lab beriladi
— Farzandlaringiz uchun 30% lik chegirma
— Hujjatbozliklardan holi avtomatlashgan ish jarayoni
— Maishiy xaridlarda maktab tomonidan ko'mak
— 500 ga yaqin kitoblarga ega kutubxona
— Ustozlar uchun dam olish xonalari
— Yuqori oylik maosh: 8-8,5 mln

Talablar

• Ta'lim sohasida oliy ma'lumot
• 5 yillik ish tajribasi
• Bolalar psixologiyasi va fiziologiyasini yaxshi bilish
• Tashkilotchilik va muloqot qilish qobiliyatlari

Ishga kirish uchun

— Arizangizni @RahimovSchool_jbot orqali qoldiring va bilimingizni maxsus sinov testlarimiz orqali tekshirib oling.
— Yoki mos tanishlaringizga shu postni jo'natib qo'ying.

@birgap

5-sinf oʻquvchilarim 6-sinflardan koʻra kuchli chiqib qoldi. Har taraflama:
– fikrlash doirasi;
– fikrini yetkazish koʻnikmasi;
– tahlil koʻnikmasi;
– tasavvur kengligi.

@birgap

Oʻqituvchilikning eng birinchi sharti – oʻquvchilaring seni yaxshi koʻrishi. Shundagina ularga bemalol mavzularni tushuntirsa boʻladi.

@birgap

Sogʻinmas jannat ul-maʼvoni Bobur,
Aning koʻnglida to maʼvo qilibsen.

Toshboʻron qilsangiz ham aytaman, Boburni Navoiydan ustun koʻraman.

@birgap

​​Ijtimoiy tarmoqlarning foydalari

7-sinf “Ona tili” darsligida bir maqolamga QR kodli havola berilgan. Ayni payda oriftolib.uz sayti texnik sabablar bilan vaqtincha ishlamayapti. Tabiiyki, havola manzilida maqola ham yoʻq. Shu sababli maqola matnini soʻraganlar, QR kod rasmini joʻnatganlar koʻp boʻldi. Shu masalaga yechim boʻlsin deb maqolani Telegraphga joyladim. Quyida maqolaning anonsi va toʻliq shakliga havola berilyapti.

Axborot asrida zamonaviy texnologiyalar hayotimizga tobora koʻproq kirib boryapti. Bugun hatto bogʻcha tarbiyalanuvchisi ham mobil telefondan, undagi ilovalar va internetdan foydalanishni oʻrganib olyapti. Katta-yu kichik orasida internetdan foydalanuvchilar, vaqtini koʻproq u bilan oʻtkazuvchilar ortyapti. Kelajak hayotni internet va hali kashf etilmagan yuqori texnologiyalarsiz tasavvur etib boʻlmaydi. Toʻgʻri, ular ijobiy va salbiy xususiyatlarga ega. Biroq yuksak texnologiyalardan unumli foydalanmaslik yoki yoshlarga olaboʻji qilib koʻrsatish faqat va faqat zarar keltiradi xolos

Yuqoridagi fikrlar ijtimoiy tarmoqlarga ham tegishli. Internet va ijtimoiy tarmoqlardan foydalanishda ham oltin qoidaga – meʼyorni unutmaslik shartiga amal qilish zarur. Keling, ularning ijobiy jihatlari haqida mushohada yuritamiz:

1️⃣ Izlash va muloqotdagi qulaylik.

2️⃣ Axborot topish va almashishdagi yengillik.

3️⃣ Shaxsiy tarbiya, oʻz-oʻzini rivojlantirish vositasi.

4️⃣ Biznes yuritishda beminnat yordamchi.

5️⃣ Turli ijtimoiy aksiyalar va yordamlar.

6️⃣ Ijodkorlar va boshqa soha vakillari uchun keng maydon.

👉 Toʻliq oʻqish

🟢 Maqolani ona tili va adabiyot oʻqituvchilariga yuborib qoʻying.

@oriftolib

Oʻppa-oʻzimga qolsa shu soʻzni ayrapoʻrt deb qoʻya qolgan boʻlardim.

Buni egasi atay shunday yozgan. Bu biz bilgan aeroport soʻzining xato yozilgani emas, bu yangi soʻz deb qabul qilinishi kerak.

@birgap

Bu oʻquv yili men uchun juda qizgʻin boshlandi, qizgʻin davom etsa ham kerak.

Bir haftada 5-, 6-, 7-, 8- va 9-sinflarga darsga kiraman. Ikkita maktabda ishlayman.

Bu oʻquv yili qiyoslashlar, tahlillar yili boʻlsa kerak.

@birgap

Maktabimizda kutmagan paytimda ish haqi berishdi. Oʻzi u kunlar uchun ish haqi olishimiz aytilmagan va men ham reja qilmagan edim. Ammo pul berishdi.

Asoschiga pullaring koʻp boʻlsin deb yozdim. Asoschimiz esa, pulimiz deya toʻgʻrilab qoʻydi.

Men oʻzimni maktabga daxldor odam sifatida koʻraman, maktab hayotining har jabhasiga daxldor his qilaman. Ammo shu bitta soʻz daxldorlik hissimni yanada oshirdi.

@birgap

🏃‍♂️ Tanaffusga shoshib turgan oʻquvchi kvant fizikasini ham tushundim deyaveradi (Adabiyot darsi boʻlsa ham)

Mavzudan mavzuga oʻtganda doim oldingi tushunchalarga murojaat qilinadi. Lekin oʻquvchilar oldingi darsni tushunmagan boʻlsa-chi?

Oddiy savol-javoblar doim ham ish bermaydi. Ular zerikarli, koʻp vaqt oladi va baʼzan samarasiz.

Ushbu maqolada oʻquvchilarning qanchalik tushunganini aniqlash uchun usullar keltirilgan. Shu orqali sinfingizni sinab koʻringchi, mavzuni tushunishdimikan?

Kecha bir koʻrsatuvda ekspertlar maktab taʼlimidagi islohotlar haqida berilib gapirdi. Ozroq tanqid qilsam yomon koʻrishdi.

– ikki yil oldin yozib tugatilgan va tasdiqlangan darslikni hamon nashr etib maktabga yubora olmagan;

– bu yil yangilanishi kerak boʻlgan darsliklarni hamon maktablarga yetkaza olmagan (yarim yil eski darslikni oʻqib turinglar, qolganini yangi kitobdan oʻqiysizlar degan);

– mana bir necha yildirki yagona oʻquv dasturi mavjud boʻlmagan holda oʻquvchilarni oʻqitayotgan;

– zamonaviy baholash tizimi deya ilmga zid mazmunga ega baholash tizimini tiqishtirayotgan;

– maktabning elementar ehtiyojlari boʻlmish isitish, sport zal va hojatxona uchun openbudjetdan ovoz yigʻishga maktab jamoasini yalinib yurishga majburlagan;

– oʻqituvchilarga litsenziya beradigan imtihoni abituriyentlar topshiradigan imtihondan deyarli farq qilmaydigan;

– bolalarning eng asosiy oʻrganish manbasi boʻlmish darsliklarni bitta (taʼlimni tushunmaydigan, maqsadi pul ishlash boʻlgan) odam qoʻliga toʻliq topshrib qoʻygan tizimda qanday islohotlar haqida gapirish mumkin. Vijdon qanday chidaydi? Oʻzi bormi u vijdon?

Eng maddoh va qoʻrqoq odamlar taʼlimda toʻplanib qolganday goʻyo.

@birgap

Orif aka yozganidan keyin esimga tushib ketdi. Juda qiziq voqea guvohi boʻldik.

18-sentyabr kuni Maktabgacha va maktab taʼlimi vazirligi saytida "Yilning eng yaxshi oʻzbek tili oʻqituvchisi" tanlovi haqida eʼlon berildi.

Yutuqlar ham kichik emas:
🥇 1-o‘ringa “Yilning eng yaxshi o‘zbek tili o‘qituvchisi” I darajali diplomi, 20 mln so‘m pul mukofoti;

🥈 2-o‘ringa “Yilning eng yaxshi o‘zbek tili o‘qituvchisi” II darajali diplomi, monoblok;

🥉 3-o‘ringa “Yilning eng yaxshi o‘zbek tili o‘qituvchisi” III darajali diplomi, noutbuk.

Yutish uchun "Men tavsiya etaman..." nomi ostida oʻz oʻqitish uslubingiz haqida videotaqdimot tayyorlaysiz. Har bur hudud uchun maxsus bot yaratilgan, oʻsha bot orqali yuborasiz. Maʼqul topilsa, keyingi bosqichga oʻtasiz.

Qizigʻi shundaki, 18-kuni eʼlon qilingan tanlov haqida vazirlik telegram kanalida 19-kuni xabar tarqatildi. Hujjatlarni qabul qilish muddati esa 20-sentyabr 18:00 gacha ekan.

Tushundingiz-a vaziyatni?

Endi shu tanlov nizomini ochib qarasak, eʼlon 16-sentyabrda eʼlon qilinishi kerakligi yozilgan. Shu nizomning oʻzi 18-kuni eʼlon qilingan.

Oʻzi 4 kunda tuzukroq videotaqdimot tayyorlashning imkoni yoʻq, muddatlar masalasini qayta koʻrib chiqish lozim.

Bundan tashqari, vazirlik hujjat topshirish istagida boʻlganlardan olib qoʻyilgan 3 kunni qaytarib berishi va muddatlarni choʻzishi lozim. Ana shunda adolatdan boʻlardi.

P.S. Agar nizom ichki kanallar orqali oʻz vaqtida sizdirilgan boʻlsa ham uzr soʻramayman, chunki tanlov nizomini ommaviy eʼlon qilish shart. Ichki kanallardan hamma ham maʼlumot ololmasligi mumkin.

@birgap

Bolalarga baribir hamma maʼlumotni oʻrgatib tugata olmaysiz, yaxshisi oʻrganish zavqini tuyushlari uchun sharoit yarating. Mana shu sizni ustoz qiladi.

@birgap

"Havas" doʻkonlaridan shedevr. Chegirma soʻzining yangi maʼnosi paydo boʻlibdi shekilli.

P.S. chegirmalarning asl mohiyatini ochib qoʻyibdi

@birgap

Bunisi ham "Havas"dan.

Birinchidan, videokuzatuv qoʻshib yozilishi kerak.

Ikkinchidan, oʻgʻirlik emas, oʻgʻrilik.

Uchinchidan, matnga koʻra oʻgʻrilik qilganlar emas, oʻgʻirlanganlar sudlanar ekan. Yaʼni siz doʻkondan non oʻgʻirlasangiz sizni emas, oʻsha nonni sud qilishadi.

Toʻrtinchidan, sud jarayoni qoʻzgʻatilmaydi, jinoyat ishi qoʻzgʻatilishi mumkin.



@birgap