"Янги Ўзбекистон — миллатлараро дўстлик ва бағрикенглик диёри"

30 июль — Халқлар дўстлиги куни муносабати билан Наманган вилоятида миллатлараро тотувлик, ўзаро ҳурмат ва бағрикенглик ғояларини кенг тарғиб этишга қаратилган маданий тадбир ташкил этилди.

Давлатобод туманидаги "Афсоналар водийси" тематик паркида ўтказилган гала-концертда вилоятда фаолият юритаётган миллий маданий марказлар вакиллари, санъаткорлар ҳамда кенг жамоатчилик иштирок этди.

Тадбирни Наманган вилояти ҳокимининг ўринбосари Ботиржон Нуриддинов кириш сўзи билан очиб, йиғилганларни Халқлар дўстлиги куни билан самимий табриклади. У мамлакатимизда миллатлараро тотувлик ва диний бағрикенгликни мустаҳкамлашга қаратилган эзгу ишлар Янги Ўзбекистон тараққиётининг муҳим омили эканини таъкидлади.

Тадбир давомида вилоятимиз ижтимоий-иқтисодий ривожига муносиб ҳисса қўшиб келаётган рус, корейс, қирғиз ва тожик миллий маданий марказлари раҳбарлари ҳамда фаолларига Наманган вилояти ҳокимлигининг ташаккурномалари ва эсдалик совғалари топширилди.

Фестивалнинг бадиий қисмида турли миллат вакиллари миллий куй-қўшиқлар, рақслар ва саҳна чиқишлари билан иштирок этиб, халқлар дўстлиги, ўзаро ҳурмат ва ҳамжиҳатлик ғояларини тараннум этдилар.

Тадбирдан кўзланган асосий мақсад — асрлар давомида бир заминда аҳил-иноқ, дўст-биродар бўлиб яшаб келаётган миллатлар ўртасидаги дўстлик ришталарини ёш авлодга етказиш, уларда Ватанга муҳаббат, миллий ғурур, бағрикенглик ва ҳамжиҳатлик туйғуларини мустаҳкамлашдан иборат бўлди.

—————————

"Yangi Oʻzbekiston — millatlararo doʻstlik va bagʻrikenglik diyori"

30-iyul — Xalqlar doʻstligi kuni munosabati bilan Namangan viloyatida millatlararo totuvlik, oʻzaro hurmat va bagʻrikenglik gʻoyalarini keng targʻib etishga qaratilgan madaniy tadbir tashkil etildi.

Davlatobod tumanidagi "Afsonalar vodiysi" tematik parkida oʻtkazilgan gala-konsertda viloyatda faoliyat yuritayotgan milliy madaniy markazlar vakillari, sanʼatkorlar hamda keng jamoatchilik ishtirok etdi.

Tadbirni Namangan viloyati hokimining oʻrinbosari Botirjon Nuriddinov kirish soʻzi bilan ochib, yigʻilganlarni Xalqlar doʻstligi kuni bilan samimiy tabrikladi. U mamlakatimizda millatlararo totuvlik va diniy bagʻrikenglikni mustahkamlashga qaratilgan ezgu ishlar Yangi Oʻzbekiston taraqqiyotining muhim omili ekanini taʼkidladi.

Tadbir davomida viloyatimiz ijtimoiy-iqtisodiy rivojiga munosib hissa qoʻshib kelayotgan rus, koreys, qirgʻiz va tojik milliy madaniy markazlari rahbarlari hamda faollariga Namangan viloyati hokimligining tashakkurnomalari va esdalik sovgʻalari topshirildi.

Festivalning badiiy qismida turli millat vakillari milliy kuy-qoʻshiqlar, raqslar va sahna chiqishlari bilan ishtirok etib, xalqlar doʻstligi, oʻzaro hurmat va hamjihatlik gʻoyalarini tarannum etdilar.

Tadbirdan koʻzlangan asosiy maqsad — asrlar davomida bir zaminda ahil-inoq, doʻst-birodar boʻlib yashab kelayotgan millatlar oʻrtasidagi doʻstlik rishtalarini yosh avlodga yetkazish, ularda Vatanga muhabbat, milliy gʻurur, bagʻrikenglik va hamjihatlik tuygʻularini mustahkamlashdan iborat boʻldi.

Sayt | Telegram | Instagram | Facebook | X | YouTube