✔️Xavfsizlikni ta’minlash — har birimizning mas’uliyatimiz

Bugun Vobkent tumanida tuman hokimligi, Favqulodda vaziyatlar bo‘limi hamda mas’ul tashkilotlar hamkorligida tumandagi Dehqon bozori va Buyum bozorida favqulodda vaziyatlarning oldini olish, ularga tayyorgarlik ko‘rish hamda yuzaga kelishi mumkin bo‘lgan holatlarda to‘g‘ri harakatlanish bo‘yicha o‘quv mashg‘uloti va targ‘ibot tadbiri o‘tkazildi.

Tadbir davomida bozor ma’muriyati mas’ullari va tadbirkorlarga favqulodda vaziyat yuzaga kelganda odamlarning erkin va xavfsiz harakatlanishiga to‘sqinlik qiluvchi qo‘shimcha rastalarni zudlik bilan bartaraf etish, elektr ta’minotidan belgilangan talablar asosida foydalanish hamda yong‘in xavfsizligi qoidalariga qat’iy rioya qilish bo‘yicha tegishli tavsiyalar berildi.

Shuningdek, bozorlardagi yong‘in xavfsizligi uchun zarur bo‘lgan suv hovuzlari, yong‘in gidrantlari hamda yong‘in xavfsizligi burchaklarida mavjud jihozlarning sozligi va foydalanishga tayyorligi ko‘rikdan o‘tkazildi.

Amaliy mashg‘ulotlar davomida ishtirokchilarga birinchi tibbiy yordam ko‘rsatish tartibi tushuntirilib, evakuatsiya xaritasi asosida bino va bozor hududini xavfsiz tark etish bo‘yicha amaliy harakatlar bajarildi.

Bunday tadbirlar aholi va tadbirkorlarning favqulodda vaziyatlarda to‘g‘ri va tezkor harakat qilish ko‘nikmalarini mustahkamlash, bozorlarda xavfsizlikni ta’minlash hamda yuzaga kelishi mumkin bo‘lgan ko‘ngilsiz holatlarning oldini olishga xizmat qiladi.

Rasmiy sahifalarimiz👇
Telegram| 💬Facebook| 📹Youtube|🌍Web-sahifa|🕊X|🌐Instagram