#Current_Affairs
#Copa
#Messi

'कोपा'चा पराभव जिव्हारी; मेस्सीची निवृत्ती:

जगातील सर्वोत्तम फुटबॉलपटू अशी ओळख असलेल्या अर्जेंटिनाच्या लिओनेल मेस्सीने आंतरराष्ट्रीय फुटबॉलमधून निवृत्त होण्याची घोषणा केली आहे. सोमवारी 'कोपा अमेरिका' स्पर्धेतील अंतिम सामन्यात चिलीकडून पेनाल्टी शूटआऊटमध्ये झालेल्या पराभवानंतर मेस्सीने तडकाफडकी हा निर्णय जाहीर केला.

तब्बल पाच वेळा जगातील सर्वोत्तम फुटबॉलपटूचा मान पटकावणाऱ्या मेस्सी आजपर्यंत एकदाही अर्जेंटिनाला 'कोपा अमेरिका' ही स्पर्धा जिंकून देऊ शकला नव्हता. यंदा जेतेपदाचा हा दुष्काळ दूर करण्याची त्याला संधी होती. मात्र. पेनाल्टी शूटआऊटमध्ये मिळालेली पहिलीच संधी त्यानं वाया घालवली. तिथंच अर्जेंटिनाचा पराभव जवळपास निश्चित झाला. बार्सिलोना क्लबकडून खेळताना गोलचा सपाटा लावणाऱ्या मेस्सीला देशासाठी मोठ्या स्पर्धेत सर्वोत्तम कामगिरी करता आलेली नाही. याआधी २०१४च्या विश्वचषक स्पर्धेच्या अंतिम फेरीत अर्जेंटिनाचा जर्मनीकडून पराभव झाला होता. तेव्हाही मेस्सीवर चहूबाजूंनी टीका झाली होती. यंदा कोपा स्पर्धेत सलग दुसऱ्या वर्षी मेस्सीने अर्जेंटिनाच्या चाहत्यांची निराशा केली.

'पराभवाचं विश्लेषण करण्याची ही वेळ नाही. ड्रेसिंग रुममध्ये असताना मी यावर बराच विचार केला. माझ्यासाठी राष्ट्रीय संघातील खेळ आता संपलेला आहे', असं ट्विट मेस्सीनं निवृत्तीच्या निर्णयानंतर केलं आहे.

अर्जेंटिनाकडून सर्वाधिक गोल...

ज्या कोपा अमेरिका स्पर्धेतील पराभवामुळे मेस्सीने निवृत्ती जाहीर केली आहे. त्याच स्पर्धेत राष्ट्रीय संघाकडून खेळताना सर्वाधिक ५५ गोल करण्याच्या विक्रम मेस्सीने स्वतःच्या नावावर केला.

मोठ्या स्पर्धेचे जेतेपद स्वप्नच...

अनेक सामन्यांमध्ये अर्जेंटिनासाठी तारणहार ठरलेल्या मेस्सीला अखेरपर्यंत देशाला मोठ्या स्पर्धेचे जेतेपद मिळवून देण्यात यश आले नाही. मेस्सी २००५मध्ये अर्जेंटिनाच्या राष्ट्रीय संघात दाखल झाला. त्यानंतर एकाही मोठ्या स्पर्धेचे जेतेपद संघाला मिळवता आले नाही.

> मेस्सीने अर्जेंटिनाकडून ७२ सामन्यांमधून ५५ गोल केले आहे. अर्जेंटिनाकडून सर्वाधिक गोल करण्याचा विक्रम त्याचाच नावावर आहे.

> बार्सिलोना क्लबकडून खेळताना मेस्सीने ३८० सामन्यातून विक्रमी ३२३ गोल केले आहेत.

> मेस्सीने वयाच्या २१व्या वर्षी फिफाच्या सर्वोत्तम खेळाडूचे नामांकन मिळवले होते.
> मेस्सीच्या शैली आणि क्षमतेमुळे त्यांची तुलना महानफुटबॉलपटू डिएगो मारडोना यांच्याशी केली जाते.

> मेस्सीने अर्जेंटिनाला २००८मध्ये बीजिंग येथे झालेल्या ऑलिंपिकचे सुवर्णपदक मिळवून दिले होते.
______________________________________
Join us Here @ChaluGhadamodi