🎯 Design Your Future 2027 រចនាអនាគតរបស់អ្នក ក្នុងឆ្នាំ2027

📅 ថ្ងៃទី៤–៥ ខែវិច្ឆិកា ឆ្នាំ២០២៦ ខ្ញុំនឹងចែករំលែកមេរៀនពិសេស ២ថ្ងៃ ដោយឥតគិតថ្លៃ៖

🧭 ស្វែងយល់ពីខ្លួនឯង កំណត់គោលដៅជីវិត និងរៀបចំផែនការឆ្នាំ២០២៧។
💰 រៀនគ្រប់គ្រងចំណូល–ចំណាយ រៀបចំការសន្សំ និងផែនការសងបំណុល។
🌱 បម្លែងគោលដៅធំ ទៅជាសកម្មភាពតូចៗដែលអាចធ្វើបានរាល់ថ្ងៃ។
🛡️ ត្រៀមខ្លួនប្រឈមនឹងបញ្ហាជីវិត និងសម្ពាធហិរញ្ញវត្ថុ។

💻 រៀនឥតគិតថ្លៃ តាម Zoom Meeting
⏰ ម៉ោង ៧:១៥យប់ ដល់ ១០:៣០យប់
📚 ត្រៀមប៊ិច សៀវភៅ កត់ត្រាក្នុងការសិក្សារ

👥 ទទួលសិស្សតែ ១០០នាក់គត់ គ្មានលេខរងចាំ

https://t.me/+aAAvCd4l7WI3YWU1

🚨 កុំឱ្យពាក្យថា «ឆុង» ក្លាយជាអាវុធបំភ័យអ្នក និងដកប្រាក់ពីគ្រួសារអ្នក!

អ្នកដែលប្រើឈ្មោះជាគ្រូហុងស៊ុយ បំភ័យថានឹងមានគ្រោះ រួចទាមទារប្រាក់ដើម្បី «កាត់ឆុង» កំពុងយកការភ័យខ្លាចរបស់មនុស្សធ្វើជាមុខរបរ។ ការកេងប្រវ័ញ្ចលើទុក្ខលំបាករបស់អ្នកដទៃ គឺជាទង្វើខ្វះសីលធម៌!

ផ្ទះលក់មិនដាច់ ដីលក់មិនបាន ឬអាជីវកម្មជួបបញ្ហា មិនមែនជាភស្តុតាងថា «ឆុង» ទេ។ ត្រូវពិនិត្យតម្លៃ ទីផ្សារ សេដ្ឋកិច្ច និងការគ្រប់គ្រង ដើម្បីរកមូលហេតុពិត។

⚠️ បើមានអ្នកថា «មិនធ្វើពិធី នឹងមានគ្រោះ» ហើយទាមទារប្រាក់រាប់ពាន់ ឬរាប់ម៉ឺនដុល្លារ សូមប្រុងប្រយ័ត្ន! កុំឱ្យការភ័យខ្លាចមួយភ្លែត បំផ្លាញប្រាក់សន្សំជាច្រើនឆ្នាំ។

ខំសាងអំពើល្អ រកស៊ីស្មោះត្រង់ និងបង្កើនចំណេះដឹង។ គោរពជំនឿបាន ប៉ុន្តែកុំឈប់សួររកហេតុផល និងភស្តុតាង។ កុំប្រគល់អនាគតរបស់អ្នកឱ្យអ្នកដែលរកប្រាក់ពីការភ័យខ្លាចរបស់អ្នក!

ខ្ញុំចង់ការពារប្រជាជន កុំអោយចាញ់បោកគ្រូហុងស៊ុយក្លែងក្លាយតើខុសដែរទេ ? គ្រូហុងស៊ុយរីកដូចផ្សិត អ្នកខ្លះរៀនបាន ១វគ្គ ២វគ្គ ដឹងរៀនពីប្រភពណា គ្មានចេះស្អីឡើងធ្វើគ្រូ បំភ័យប្រជាជនបោកប្រាស់ អ្នកទន់ខ្សោយ បំបាក់ស្មារតី ឆុងគ្រប់យ៉ាងឡើងគ្នាលែងហ៊ានរកសុីអី ។ លក់យ័ន លក់របស់ការពារ បោកលុយគ្នារាប់ពាន់ដុល្លារភាគច្រើន គឺពិតជាបោកប្រាស់ពិតមែន។ ខ្ញុំមិនបានថាគ្រូហុងស៊ុយទាំងអស់សុទ្ធតែបោកប្រាស់នោះទេ គឺបោកភាគច្រើន ពិតមានតិច។ ដូចនេះ បើអ្នកជាគ្រូហុងស៊ុយក្នុង ចំណោម 10% ត្រូវជួយគ្នាកម្ចាត់គ្រូខូចៗគ្រូក្លែងក្លាយអោយអស់។ ត្រូវអរគុណខ្ញុំដែលខំជួយផ្សាយ ជួយលាតត្រដាងគ្រូហុងស៊ុយក្លែងក្លាយលុបបំបាត់គ្រូបោកប្រាស់ ហេតុអីបានជាមកខឹងខ្ញុំវិញ ? ដើរសួរគេ 1000នាក់ មើល គេថាគ្រូហុងស៊ុយបោកប៉ុន្នាននាក់ហើយ ត្រូវទទួលស្គាល់ការពិត កែពី 10% ឡើងដល់គេទុកចិត្តវិញ កុំបណ្តោយអោយ 90% ឡើងដល់ 99% អោយសោះ ។

🚨 រួមគ្នាលុបបំបាត់ល្បិចបោកប្រាស់របស់ «គ្រូជោគជ័យហុងស៊ុយ»!

គេថាផ្ទះបងប្អូន «ឆុង»។ មុននឹងរើទ្វារ ឬដកលុយធ្វើពិធីកែឆុង សូមអានសំណេររបស់ខ្ញុំឱ្យចប់សិន។

🏠 ស្រមៃមើលថា បងប្អូនជាម្ចាស់ហាងមួយ។ ពីរបីខែនេះ ភ្ញៀវចូលតិច ថ្លៃជួលក៏ជិតដល់ថ្ងៃបង់។ ស្រាប់តែមានគ្រូហុងស៊ុយម្នាក់ដើរចូលមក មើលមុខហាងបន្តិច រួចនិយាយថា «ទ្វារនេះបែរខុសទិស បានជារកស៊ីមិនសល់»។ ស្តាប់មួយភ្លែត ហាក់ដូចជាគាត់មើលត្រូវ ព្រោះយើងពិតជាកំពុងពិបាកមែន។ ប៉ុន្តែសូមគិតបន្តិច។ ទ្វារនៅទិសដដែលតាំងពីថ្ងៃបើកហាង។ ចុះកាលពីឆ្នាំមុនដែលលក់ដាច់ ហេតុអ្វីទ្វារហ្នឹងមិនឆុង? ស្ថានភាពសេដ្ឋកិច្ចសកលអាចប៉ះពាល់ដល់ការលក់ដូរ។ មុននឹងបន្ទោសទ្វារ គួរមើលសិនថា តើអតិថិជនយើងនៅមានលទ្ធភាពចាយដូចមុនដែរឬទេ?

អ្វីដែលខ្ញុំចង់ដាស់តឿនបងប្អូន គឺល្បិចដែលកើតឡើងបន្ទាប់ពីពាក្យមួយម៉ាត់នោះ។ ដំបូង គេនិយាយតែរឿងលក់មិនដាច់។ ដល់យើងស្ទាក់ស្ទើរ គេបន្ថែមថា «បើទុកយូរ ខ្លាចប៉ះដល់កូន។ ក្នុងគ្រួសារអាចមានអ្នកស្លាប់»។ អ្នកខ្លះហ៊ានទាំងអះអាងថា ខ្លួនមើលឃើញថ្ងៃស្លាប់ទៀតផង! ត្រឹមមួយឃ្លានេះ ពីរឿងទ្វារហាង ស្រាប់តែក្លាយជារឿងអាយុជីវិតកូន។ ឪពុកម្តាយណាស្តាប់ហើយមិនបារម្ភ?

អ្នកខ្លះដឹងថារឿងហ្នឹងស្តាប់ទៅមិនសមហេតុផលទេ តែនៅតែសុខចិត្តបង់លុយកែស៊យ ព្រោះគិតថា បើថ្ងៃក្រោយកូនឈឺមែន ខ្លួននឹងស្តាយថា «កាលនោះ គួរតែធ្វើតាមគ្រូ»។ គ្រូហុងស៊ុយដែលហ៊ានបំភ័យគេ ដើម្បីលក់យ័ន្តមួយសន្លឹក យកលុយកែធាតុ គាស់ផ្នូរ កែផ្ទះ ឬធ្វើចៅអុង ដឹងច្បាស់ណាស់ថា ពេលមនុស្សកំពុងភ័យ គេសុខចិត្តបង់លុយ ទោះនៅក្នុងចិត្តគេមិនទាន់ជឿក៏ដោយ។

☕ មួយឆ្នាំ បើគេបង្កើតរឿងបំភ័យ ៥–៦ ដង ម្តងលើករឿង «យុគទី៩» ម្តងថាឆុងថ្ងៃ ឆុងខែ ឆុងឆ្នាំ ឆុងទិស… ឆុងម៉ែអាឆុង! បើតាមខ្ញុំដឹង អ្នកដែល «ឆុង» ខ្លាំងជាងគេ គឺអ្នកឆុងមី ឆុងកាហ្វេ ឆុងតែផឹករាល់ថ្ងៃហ្នឹងហើយ! តែពាក្យ «ឆុង» ដែលគេយកមកបំភ័យរួចទារលុយពីបងប្អូន នោះជារឿងដែលយើងត្រូវនិយាយឱ្យច្បាស់។

💰 សាកស្រមៃមើល បើម្នាក់បង់ ១,០០០ ដុល្លារដើម្បី «កាត់ឆុង» ត្រឹមតែ ១០០ នាក់ គេប្រមូលបាន ១០០,០០០ ដុល្លារ។ ចុះបើ ១,០០០ នាក់? គឺ ១ លានដុល្លារ។ ចុះបើ ១០,០០០ នាក់? គឺ ១០ លានដុល្លារ! នេះគ្រាន់តែជាឧទាហរណ៍គណនាថ្លៃកាត់ឆុងមួយមុខប៉ុណ្ណោះ។

នៅមានទាំងវគ្គបង្រៀនរបស់ «គ្រូជោគជ័យហុងស៊ុយ» ថ្លៃគាស់ផ្នូរ កែធាតុ និងការណែនាំឱ្យទិញដីដែលគេហៅថា «ដីដង្ហើមហ្សង» ឬ «ដីដង្ហើមនាគ»។ ចំពោះម្ចាស់ជំនួញ បើគេបញ្ចុះបញ្ចូលឱ្យដាក់លុយ ២០ ម៉ឺន ឬ ៣០ ម៉ឺនដុល្លារម្តង រហូតដល់ខ្ទង់លានដុល្លារ សូមសួរឱ្យច្បាស់ថា តើដីនោះមានតម្លៃប៉ុន្មាន បើយើងដកពាក្យ «ដង្ហើមនាគ» ចេញ? គេអាចរៀបក្បួនខ្នាត បង្ហាញឧបករណ៍ជាច្រើន ហើយហៅវាថា «ជំនឿបែបវិទ្យាសាស្ត្រ»។ ប៉ុន្តែឧបករណ៍ដែលគេកាន់ក្នុងដៃ បញ្ជាក់បានត្រឹមអ្វីដែលវាវាស់។ ត្រីវិស័យអាចប្រាប់ទិសដីបាន។ តើវាប្រាប់បានដែរទេថា អ្នកទិញដីនោះនឹងមានបាន?

🔎 នៅសិង្ហបុរី ប្តីប្រពន្ធមួយគូបានបញ្ចុះបញ្ចូលមនុស្ស ៩ នាក់ឱ្យជឿថា មានគ្រូអាចសរសេរយ័ន្តឱ្យពួកគាត់។ ប្រាក់ដែលបោកបានសរុបជាង ៨០ ម៉ឺនដុល្លារសិង្ហបុរី។ តុលាការបានកាត់ទោសប្តីប្រពន្ធទាំងពីរឱ្យជាប់ពន្ធនាគារ។ (straitstimes.com⁠)

នៅហុងកុង មានករណីមួយទៀតដែលគួរឱ្យគិត។ ក្នុងពាក្យបណ្តឹងដែលស្ត្រីម្នាក់បានដាក់ទៅតុលាការក្នុងឆ្នាំ២០២៣ គាត់រៀបរាប់ថា គាត់និងប្តីបានប្រគល់មាស គ្រឿងអលង្ការ និងនាឡិកា Rolex ដែលសរុបមានតម្លៃជាង ៤ លានដុល្លារហុងកុង ឱ្យគ្រូហុងស៊ុយម្នាក់យកទៅធ្វើពិធីសុំពរ។ ពេលប្រគល់របស់ឱ្យ គាត់យល់ថាគេគ្រាន់តែយកទៅធ្វើពិធី ហើយនឹងយកមកសងវិញ។ តាមការអះអាងក្នុងពាក្យបណ្តឹង ទ្រព្យទាំងនោះមិនបានត្រឡប់មកវិញតាមការសន្យាឡើយ។ (thestandard.com.hk⁠)

បងប្អូនមិនចាំបាច់ចេះក្បួនហុងស៊ុយ ទើបអាចសម្គាល់ល្បិចបែបនេះបានទេ។ សូមសង្កេតមើល៖ ពេលយើងសួររកភស្តុតាង តើគេឆ្លើយសំណួរយើង ឬគេបន្ថែមរឿងឱ្យយើងកាន់តែភ័យ រួចទាមទារឱ្យបង់លុយធ្វើពិធី? នេះជាល្បិចលេងនឹងអារម្មណ៍។ ដំបូង យើងចង់ដឹងថារឿងដែលគេនិយាយពិតឬអត់។ ដល់ពេលគេបំភ័យខ្លាំង យើងបែរជាសួរគេថា «ត្រូវបង់ប៉ុន្មាន ទើបកូនខ្ញុំរួចគ្រោះ?»។ ត្រង់ហ្នឹងហើយដែលយើងធ្លាក់ចូលអន្ទាក់។

ចំពោះអ្នកដែលសួរថា ហេតុអ្វីខ្ញុំហ៊ាននិយាយខ្លាំងលើរឿងនេះ ខ្ញុំចង់ឱ្យអ្នកគិតដល់គ្រួសារដែលត្រូវរស់នៅជាមួយពាក្យទំនាយនោះ ក្រោយពេលគ្រូយកលុយហើយដើរចេញ។ កូនក្តៅខ្លួនម្តងក៏ភ័យ។ ហាងស្ងាត់មួយថ្ងៃក៏ភ័យ។ សូម្បីតែចង់ចាប់ផ្តើមរកស៊ីថ្មី ក៏លែងហ៊ានសម្រេចចិត្តដោយខ្លួនឯង ត្រូវសួរគ្រូគ្រប់ពេល។ នេះហើយជាអ្វីដែលខ្ញុំសោកស្តាយ និងអាណិតបងប្អូនជាងគេ។ លុយអស់ម្តងហើយ គ្រួសារមួយនៅតែបន្តបង់ថ្លៃឱ្យពាក្យ «ឆុង» ជារៀងរាល់ថ្ងៃ ដោយរស់នៅក្នុងការភ័យខ្លាច។

📢 លើលោកនេះ គ្មាន «ឆុង» គ្មាន «ឆីង» គ្មាន «ឆាំង» គ្មាន «ឆួយ» ឯណាមកកំណត់ថា កូនបងប្អូនត្រូវមានគ្រោះ ឬបងប្អូនត្រូវរកស៊ីបរាជ័យទេ។ ឈប់យកអនាគតដ៏ស្រស់បំព្រងរបស់ខ្លួនទៅឱ្យគ្រូហុងស៊ុយទាត់លេងដូចបាល់។ ឈប់ទិញរបស់ដែលគេបំភ័យឱ្យទិញ។ ពីមុនល្បីរឿង «គ្រូជោគជ័យ» ដែលយកដីខ្យល់មកលក់។ ឥឡូវនេះល្បីមួយកម្រិតទៀត “ គ្រូជោគជ័យហុងស៊ុយ “ ដែលរកស៊ីលើការភ័យខ្លាចរីកដូចផ្សិតទៀត តើនឹងមានប៉ុន្មានគ្រួសារត្រូវរងគ្រោះ?

🚀 សូមបងប្អូនគិតបន្តិច។ សហរដ្ឋអាមេរិក និងចិន សុទ្ធតែអាចផលិតយានអវកាស បញ្ជូនមនុស្សទៅកាន់គន្លងផែនដី ហើយនាំពួកគេត្រឡប់មកដីវិញ។ មុននឹងបាញ់បង្ហោះ តើវិស្វករគេយកអ្វីមកសម្រេចថា យាននោះអាចហោះបានដោយសុវត្ថិភាព? គេគណនាគន្លងហោះហើរ សាកល្បងម៉ាស៊ីន និងពិនិត្យអាកាសធាតុ។ បើម៉ាស៊ីនមានបញ្ហា ទោះថ្ងៃនោះគេថាជាថ្ងៃល្អប៉ុនណា ក៏វិស្វករត្រូវរកមូលហេតុ និងជួសជុលវាដែរ។ តើមានយ័ន្តមួយណាអាចជួសជុលម៉ាស៊ីនជំនួសវិស្វករបាន?

ងាកមកមើលបើអ្នកជាម្ចាស់ហាងវិញ។ បើខែមុនលក់ដាច់ តែខែនេះភ្ញៀវស្ងាត់ អ្វីដែលម្ចាស់ហាងគួរពិនិត្យមុនគេ គឺតម្លៃទំនិញ គុណភាព សេវាកម្ម និងលទ្ធភាពចំណាយរបស់អតិថិជន។ ចុះបើមានគ្រូម្នាក់ គ្រាន់តែឈរមើលទ្វារមួយភ្លែត ក៏ហ៊ានប្រាប់ឱ្យយើងចំណាយរាប់ពាន់ដុល្លាររើទ្វារ ហេតុអ្វីយើងមិនសួរគាត់វិញថា «លោកគ្រូ ទ្វារនេះនៅកន្លែងដដែលតាំងពីថ្ងៃបើកហាង។ ចុះកាលហាងខ្ញុំលក់ដាច់ ហេតុអ្វីវាមិនឆុង?»

សូម្បីតែនៅប្រទេសជឿនលឿន ក៏មនុស្សម្នាក់ៗមានជំនឿរៀងៗខ្លួនដែរ។ ប៉ុន្តែយានអវកាសមួយអាចហោះចេញពីផែនដីបាន ព្រោះមានមនុស្សហ៊ានសួរ ហ៊ានសាកល្បង ហើយពេលរកឃើញកំហុស គេកែវាមិនមែនពឹងលើ គ្រូជោគជ័យហុងស៊ុយនោះទេ ។

ស្មេរដោយ ✝️ ឧកញ៉ា ជា តុងហ៊ួរ 🇰🇭

រឿងពិតចាញ់បោកគ្រូហុងស៊ុយ នៅហុងកុង https://www.thestandard.com.hk/news/article/51525/Feng-shui-master-sued-in-alleged-28m-scam

រឿងពិត ចាញ់បោកគ្រូហុងស៊ុយនៅ
Singapore  https://www.straitstimes.com/singapore/courts-crime/couple-who-cheated-victims-out-of-more-than-800k-sentenced-to-jail