🔵 السلام عليكم يا حبايبي :

الرفاق حائرون يتسائلون عن سبب هبوط الجنيه امام الدولار 76 قرش مرة واحدة

بدون فذلكة و لا فلسفة
السبب 👈🏻 مراجعة صندوق الغم يوم 25 فبراير لصرف شريحة ما بين 2.3 مليار دولار الي 2.7 مليار دولار
وطبعا يا ولاد انتوا عارفين كويس مدي ارتيكاريا كريستالينا اللعينة من انخفاض الدولار امام الجنيه 🤷🏻‍♀️🤷🏻‍♀️

♦بالاضافة للالتزامات ال 51 مليار دولار اللي علي مصر لحد سبتمبر 2026
و التزامات خلال الشهر القادم ده بيؤدي للضغط علي العملة طبعااا 🤷🏻‍♀️🤷🏻‍♀️

هذا هو الحال
يلااااا رمضان كريم علي مصر كلها و يجعله شهر يتفك فيه كرب مصر و اهلها و ينجيها من الظالمين 🤲🏻🤲🏻🤲🏻

🔵 سند المواطن 🙄
ياخويا ربنا يسندنا كلنا 😒

📌من الناحية الاقتصادية للمواطن 👈🏻 حاجة كويسة جدا .. اداة ادخارية جيدة
يعني تقدروا تدخروا فيه اموالكم
و طبعا عائد مضمون
و السند نفسه مضمون

📌من الناحية الاقتصادية للدولة 👈🏻 البلد معذورة في قرشين يا اخواننا 😂

القصة كلها ان نسبة التضخم اللي بيتغني بيها رئيس الوزرا رقم fake
لذلك تم اللجوء لاصدار اداة مالية تلم السيولة من السوق المالي بحيث تحاول تسيطر علي التضخم قبل ما ينفجر في وجه الجميع 👌🏻

🔵 الواحد فطر كده و قال يشوف الدنيا فيها ايه
لقيت السيد المهندس المحافظ لغي احتفالات تعامد الشمس علي وجه مولانا رمسيس التاني
📌 اليوم السابع كتبت بسبب تزامنها مع رمضان 🙄
ايوا ايه العلاقة
انتوا بتوزعوا فيها مفطرات 🤔
يعني السائح قبل ما يدخل لازم يسقي الصائمين بق خمرة ... من الطقوس مثلا 🤔
📌 المصري اليوم قالت لأ .. ده تضامنا مع فلسطين 😒
طب ما انت قعدت صيف 2024 و صيف 2025 تعمل مهرجان العالم علمين
و لا العلمين عليها سكر و باقي المحافظات مزودين فيها الملح 🤔
عضلة فلسطين شدت علي سيادة المحافظ امتي ... ده انت مبقالكش اسبوع حالف اليمين " عليا اليمين انتوا هتجيبوا ضرفها 😒 "

♦وهل السيد المحافظ بيملك القرار بدون العودة الي وزارة السياحة 🤔
هي زريبة
كل واحد بياخد القرار اللي يناسب دماغه و ينفذه .... لا بجد هي ملهاش كبير

يعني فجأة كده مصر بقت عزبة ابوكم
كل واحد ياخد القرار اللي عايزه و ينفذه بدون ما يرجع لحد 🤷🏻‍♀️🤷🏻‍♀️
في بلد بتتسول الدولار من طوب الارض
لدرجة انها بتدبح عيالها المغتربين و تقلبهم في الدولارات في شكل جمارك و رسوم
بتقول للسياحة معلش احنا قافلين عشان صايمين او عشان مقموصين عشان فلسطين ... انتوا مجانين صح 🤔

يعني ياريت حد يقولنا الدنيا فيها ايه وايه مدي مصداقية هذه الكارثة
هتحتفلوا .. هتلغوا
هتمشوها ازاي و ليه 🤷🏻‍♀️🤷🏻‍♀️


🔹و يا تري السيد وزير السياحة ال flight mood ده فيييين من العبث ده 🤷🏻‍♀️

" اااه بمناسبة شهادة السيد وزير السياحة
حضرتك مفيش حاجة اسمها كلية الخدمة الاجتماعية
اسمه المعهد العالي للخدمة الاجتماعية
و سنة 83 وقت تخرج سيادة الوزير مكنش في معاهد خدمة اجتماعية 4 سنين الا معهد الاسكندرية و تلااااه معهد القاهرة
بيدخلوه طلبة المرحلة التالتة في الثانوية العامة ب12% تقريبا 🙄 "
بس مش حاجة تقفوا قدامها
اهو ده معاه معهد و اشتغل علي نفسه و بقا وزير طيران مدني و بعدها وزير سياحة

غيره مخدش ثانوية عامة اساسا
و مشتغلش الا عند امه
و بقا وزير تعليم
كل شهاداته انه جده حارب في 73 🙄

الواحد حاسس انه ضيع سنين من عمره اونطة في دبلومات و ماجستريهات و دكتوراهات
في بلد بتعتمد استراتيجية العلم في الراس مش في الكراس
و الكيمي كيمي كاا سلام للكيميا ياااه
الكيمي كيمي كي زغردي للكيميا يا بيييه

المخرج علي عبد الخالق الله يرحمه كان عارف اننا هنشوف احداث اسود من قرون الخروب .. و تنبأ عنها
بس احنا اللي ضلينا طريقنا و فشلنا وكملنا تعليمنا و متاجرناش في المخدرات ... يلاااا مننا لله ضيعنا مستقبلنا 🙄🙄

🔵 الناس اللي بتسألني عن السند الجديد " سند المواطن " مرة كمااااان عشان الحبايب 🙏🏻🙏🏻

📌 ليه الدولة نزلته .. و هو ده مش بيزود عبء الديون 🤔
ركز معايا يا عزيزي واحدة واحدة

🔹نفتكر كده مع بعض وقت ما بدأت الحرب الروسية و بدأ التضخم يجتاح العالم
البنك الفيدرالي بدأ يرفع الفايدة
ثم تبعه البنوك المركزية في كل العالم ومنها مصر
▪ ليه البنوك المركزية رفعت الفايدة 👈🏻 لكبح التضخم و السيطرة علي ارتفاع الاسعار و الحفاظ علي العملة المحلية ذات قوة شرائية جيدة

🔸ازاي ده بيحصل 👈🏻 اما بيرفع الفايدة في البنوك
الناس بتروح تودع اموالها في البنوك طمعا في الحصول علي عائد مرتفع
بالتالي رفع الفايدة هو الطعم اللي البنك المركزي بيصطاد بيه البنكنوت اللي في الاسواق
▪ طب و البنك المركزي يصطاد الفلوس ليه 🤔 .. هو ماله ما يسيبها مع الناس 🤷🏻‍♀️
لا طبعاااا كده غلط و اكبر غلط
لييييه 👈🏻 احنا اتفقنا ان العملة سلعة
و قانون السلعة اييييه 👇🏻👇🏻
المعروض كتير .. المطلوب قليل 👈🏻 القيمة تنزل
المعروض قليل .. المطلوب كتير 👈🏻 القيمة ترتفع

طيب في اوقات التضخم
القوة الشرائية بتقل
لأن السلع بتكون اسعارها مرتفعة

طيب لما اكون انا مش محتاج اشتري سلع نظرا لارتفاع اسعارها " مطلوب قليل" .. لكن معايا فلوس كتير ومش قادر اشتري بيها " معروض كتير "
هنا قيمة العملة المحلية هتفضل تقل .. تقل في مواجهة الاسعار لحد اما تكون حاجة اسمها الفجوة الشرائية
و ده ثقب اسود يبتلع السوق الاقتصادي كاملاااا 🤷🏻‍♀️🤷🏻‍♀️

لذلك كان لازم نرفع الفايدة

لكن رفع الفايدة زي ما له جانب حلو .. بردو له جانب حادق 👌🏻
▪ الجانب الحلو بتاعه يخص المدخرين
▪ الجانب الحادق بتاعه بقا بيعور المستثمرين
ازاااااي 👈🏻 ما هو انت لما بترفع الفايدة .. بترفعها علي الاقراض " الودائع و الشهادات " و علي الاقتراض " القروض "
هنا المستثمرين و المصنعين اللي بيحتاجوا تمويل لاستمرارية انتاجهم
بيكون صعب عليهم يقترضوا بفايدة عالية .. لأن الفايدة العالية دي بتساهم في رفع تكلفة الانتاج ... يعني في النهاية بتصب في حجر المواطن من ارتفاع اسعار 🤷🏻‍♀️🤷🏻‍♀️

ف لازم البنوك المركزية بعد فترة
تبدأ رحلة خفض الفايدة
عشان الاسواق التمويلية اللي اتجمدت تبدأ تتحرك 👌🏻👌🏻

و بالفعل البنك المركزي المصري بينزل الفايدة
و بيقول ان بيانات الحكومة بتقول ان التضخم بينزل
دي بقا حضرتك معلومة مزيفة
الحكومة بتزيفها عشان تقدم تقارير انضباط لصندوق النقد او بتزيفها عشان ترفع تقارير متخرش الميه تثبت نجاحها و تمرد المواطن ابن الكلب الطماع اللي مبيملاش عينه الا التراب 🙄🙄
السبب مش هيفرق معايا الحقيقة
لكن الحقيقة اللي انا اعرفها انها ارقام و بيانات مزيفة بشهادة الجهاز المركزي للتعبئة و الاحصاء
و اللي رئيسه طار قريب
بسبب تصريحاته انه من سنة 2022 بيتم التكتم علي بيانات التضخم 🤷🏻‍♀️
" وااااارد تكون الحكومة مش عايزة تظهر الارقام الحقيقية لصندوق النقد
لأنهم ملتزمين في 2026 يخفضوا التضخم ل 9.6% و ده شئ مستحيييييل
التضخم في مصر من 24.5% ل 27.8% "

♦و امام هذه المعضلة المدبولية
البنك المركزي مينفععععش يرفع الفايدة تاني ابداااا
لأن ده هيعمل اضطراب في الاسواق 🤷🏻‍♀️

ف هنا كان لازم حل بديل
و الحل اننا نلم الفلوس من الاسواق لكن لازم يكون في حافز يدفع المواطن تجاه الحل ده
الحل كان 👈🏻 اصدار سند المواطن

📌 الاقاويل كتير في موضوع العائد
ناس قالت 17.5%
لكن الرقم اللي وصلني ان العائد يتراوح من 25% الي 30%

🔹الناس اللي عايزة تشتريه
اول حاجة لازم تسأل عنها هل معفي من الضريبة و لا عليه ضريبة
لان ضريبة السندات في مصر 20% بيتم استقطاعها من البنك مباشرة

ف لو هيكون 17.5%
اكيد هيكون معفي من الضريبة كليا

انما لو فعلا من 25% الي 30%
اتأكد قبلها
طيب هتتحسب ازاي :
هفترض انك هتشتري سندات بقيمة 100.000 ج .... العائد بتاعها 30%
يعني 30.000 ج
اللي هيدخل جيبك كعائد 24000 ج مش 300000 ج
ليه 👈🏻 لانك هتضرب 30 الف × 20%
هيطلع ضرايب 6000 ج
يبقا صافي عائد 24 الف
بكده صافي الفايدة 24% و ليست 30%

انا معرفش لسه العائد كام
و هل معفي من الضريبة و لا لا
بقول تاني اهووووو 🙄

🔸طب لو انا قررت اشتريه .. اعمل ايه يا چيلان 🤔
و لا اي حاجة
حضرتك هتتوجه لبنك مصر او الاهلي
وتدخل علي خدمة العملة
و تقوله عايز اشتري سند المواطن بقيمة كذا

▪ لازم حضرتك يكون عندك حاجة اسمها Unified Code
رقم كود في مصر المقاصة
و ده بردو بيتعمل في البنك
هو بس الموظف هيخليك توقع علي حاجة اسمها طلب تكويد
و يتقدم الطلب و بناءا عليه بتاخد الكود بتاعك اللي بيكون هو رقم ثابت مدي الحياة لادارة محفظتك من السندات

▪ السند مرن .. تقدر تبيعه و تشتريه
تتداول عليه يعني
غير الشهادة لو فكتها تخسر
لا السند و اذون الخزانة ادوات مرنة مفيهاش خساير كسر مدة

لو عرفت اي معلومة تانية سواء عن اعفاءه الضريبي او العائد او صافي العائد
هنزلكم بوست مفصل
لكن لو 17.5% و معفي ضريبيا
ف هو كويس جداا ومع مرونته
يعتبر اداة ادخال جيدة 👌🏻👌🏻

🔵 حاجة كمان مهمة:

انا سمعت زي زيكم عن لغط وجدال الايس و الشابو خلاص مبقوش مخدرات
و مفيش عليهم عقوبة جنائية
و قرار هيئة الادوية
و بعدها حكم المحكمة الدستورية بعدم دستورية القرار ده

🔸لا هبحث ورا تفاصيل و لا اي هري
الحاجة اللي هقولها 👈🏻 ابحث عن لوبي اللاجئين السوريين
" اااه اصل مصر بقت لوبيهات و جماعات ضغط سياسي و مالي دلوقت 😒 "

الكريستال ايس و الشابو هو تصنيع سوري خالص ... و معامله بنوها في مصر
و غرقوا الاسواق بيه
و ضربوا شبابنا بيه
الشابو ده مادة بتطفي لمبات المخ و تحول الانسان لشئ متهالك كده و بعدها بيموت

اللاجئين دخلوه بلدنا عشان لما يجي الدور علينا وفقا للاجندة .. ميبقاش في شباب تقدر ترفع سلاح وتحارب

🔹و لأن الاجندة مستعجلين فيها قبل مصر ما تبوظها تاني
و لأن انت عدو عدوك حتي لو حطيت ايديك في حضنه و بقيت شريكه في مجلس سلام

ف أصبح تدمير ولادك لازم يتم بشكل اسرع

📌 ياريت اي حد لسه يهمه امر مصر يشوف مين ورا الرجالة اللي في هيئة الدواء
ومين في مجلس العار بيدعمهم و بيدفع وراهم
هتلاقوا رجالة الكارتلات السوريين في مصر
و هتلاقوا مبالغ كتير مدفوعة رشاوي و شاي بالياسمين 🤷🏻‍♀️🤷🏻‍♀️

ده لو لسه في حد في مصر بيدور علي مصلحة الشعب " مش المستثمرين او اللاجئين " 🤷🏻‍♀️🤷🏻‍♀️

ربنا ينتقم منكم بحق جاه الايام المباركة دي و يجعل تدبيركم تدميركم 🤲🏻🤲🏻

بطالب اي حد من المنتجين السينمائيين يعملنا عمل رمضاني كبير .. يحكي فيه معاناة شعب غلبان كده وقع ضحية لصحاب الارض و خونة العرض و بياعين الشرف و القوادين
يمكن نصعب علي حد في اي حتة .. ونجد من يحنو علينا 😒

🔵 السلام عليكم :
انا لا يهمني امريكا و لا اسرائيل و لا ايران
يولعوا في بعض ب افلام الدرجة التانية بتاعتهم دي

♦اللي يهمني ان ميكونش الخروج الامن للشلة الايرانية
علي حساب جرجرة الخليج للدمار
حتي يتسني لاسرائيل السيطرة علي اراضيه

اتمني ان الخليج يتثبت للحكمة و العقل و لا ينزلق للكمين ده

و اكيد مش هكون سعيدة ابداااا لو اي أذي طال الدول الخليجية
بكفاية تدمير لدول المنطقة علي يد اسرائيل و امريكا و اعوانهم

📌 ازاي القواعد الامريكية تستهدف بصواريخ مبتأذيش 🤔
و اشمعني الصاروخ اللي استهدف الرياض هو اللي عمل تفجيرات شديدة
مفيش قواعد امريكية في الرياض اصلا🤷🏻‍♀️
القاعدة الجوية في الخرج جنوب
ايران استهدفت دبي .. مستهدفتش قاعدة الظفرة الامريكية 🤷🏻‍♀️

صحيح دي القواعد اللي انضرب منها العراق و انتهي ... لكن مش اللي يقوم بتصفية الحسابات اسرائيل يعني 🤷🏻‍♀️
و اسرائيل اصلا قصفت العراق دلوقت وسقط ضحايا كتير جدا بردوووو .. ده قدر العراقيين

♦مفيش حاجة اسمها تغيير النظام بضربات عسكرية و لا حرب
و لا حاجة اسمها : اصلنا بنضرب القصر الرئاسي عشان نغتال القيادات
جواسيسكم " حسب كلامكم يعني " ماليين ايران ... و زي ما وصلتوا لاسماعيل هنية " ده مثلا 🙄 " تقدروا توصلوا لعراقجي و بزشكيان و المرشد 🤷🏻‍♀️
الضربة العسكرية دي كمين للخليج
و أتمني انهم ينجوا منه و ألا يطول الشعوب اي ضرر 🤲🏻

اكيد في تفاصيل كتير علي اخر اليوم هتظهر
ربنا يقدرها سليمة علي كل المدنيين في الخليج 🤲🏻

🔵 #الكمين:

و الله يا جماعة اللي مش معانا في جروب المناقشات فايته كتييييير جدااا 🤷🏻‍♀️ .. فايته سيناريوهات محسوبة بالمللي بفضل الله 👌🏻

✨ فاكرين فيلم المولد بتاع عادل امام
اما سرق دولارات الراجل و ولع له في اليخت
الراجل ساعتها فكر تفكير سليم
العداوة مع واحد حاسس بنفسه زي غريب بيه .. ومحاوط نفسه ببلطجية يحموه مش هتفيد
طب يعمل اييييه عشان يستولي علي فلوسه بشكل قانوني 🤔
الحل 👈🏻 يجيب الناس بتاعته يطربقوا الدنيا فوق دماغ عادل امام و يوقعوا الابراج و يخربوا بيته و يبقا اوشك علي الانهيار
يقوم يضطر يجري عليه عشان ينقذه 👌🏻👌🏻

و ساعتها هينقذه
لكن بشروط 👈🏻 يجوزه اخته .. و ينقل كل ثروته باسمها ... و بعدهاااا هيقتله
و تبقا اخته هي الكوبري اللي عبر عليه لملايينه .. و بالقانووووون
لأن غريب بيه وقتها عضمة ناشفة مش لقمة طرية 👌🏻👌🏻

♦هو بقا يا عزيزي سيناريو فيلم المولد ده
بيتمثل امامك
و اتمني من قلبي ان النهاية في الواقع تماثل النهاية في الفيلم 🤷🏻‍♀️🤷🏻‍♀️

🔘 التفصيلة الاولي:
الخليج مش هفق .. والمنطقة بتحاول تحصل علي مقعد في العالم الجديد
و تمثلك ثروات ضخمة
مجلس التعاون الخليجي هو القوة الضاربة في سوق الطاقة
بيملك 33% من اجمالي نفط العالم و 22% من اجمالي غاز العالم

🔹فكرة ان الخليج بياخد خطوات في صالحه ده شئ غير مقبول امريكيا
▪ الامارات بقت مركز مالي لتداول التجارة العالمية بعملات غير الدولار " و دي حدوتة تخوف بالنسبة لسوق الدولار "
▪السعودية ااه لم توقف النفط بالدولار .. لكنها بردو لم تجدد اتفاقية البترودولار
و بتتدخل ضد الدعم السريع اللي بتدعمه بريطانيا.. و بتتدخل ضد الحوثي ذراع ايران كلبة امريكا الاليفة
▪الكويت تقريبا طردت 40% من الاخوان اللي فيها و اسقطت عنهم الجنسية
و كتير منهم هاجر امريكا 🤷🏻‍♀️🤷🏻‍♀️

📌طب و الاردن .. دي مش خليج .. علي الله حكايتهم ومحتاسين في عزومات الفطار و السحور 🤔
و ده سؤال 👈🏻 رافضة تاخد الضفاوية وتوسع علي اسرائيل🤷🏻‍♀️

🔘 التفصيلة التانية :
روسيا مش مريحة امريكا
و مش عارفين يلوا دراعه و لا يجوا عليه 👌🏻👌🏻

فلاديمير بوتين حاطط شروط و مش هيتنازل عنها .. و الغرب متخبط و اوروبا متضررة و بقا ضهرها للحيط
لدرجة انها عادي تعلن العداء لامريكا 🤷🏻‍♀️🤷🏻‍♀️
📌 ولا احد ينكر ان اهمية الخليج گ داعم ل روسيا و سوق لها لا تقل اهمية عن الصين 👌🏻
ده كفاية الامارات اللي بتمررلها تجارة النفط و الغاز 🤷🏻‍♀️🤷🏻‍♀️

و وجود مجلس التعاون الخليجي مع علاقات جيدة بروسيا في منظمة اوبك و اوبك+

ده مش خبر سار لشيطان العالم بالتأكيد 🤷🏻‍♀️

🔘 التفصيلة التالتة :
العلاقات الخليجية الصينية زي الفل 👌🏻
▪استثمارات متبادلة
▪الصين سوق لنفط و غاز الخليج
▪التعاون الدفاعي و التسليح
▪سوق العقارات وكذلك التعاون اللوجيستي
▪اهمية الخليج في طريق الحرير و اللالئ المضيئة

كل ده يعمل ضد الصالح الامريكي 🤷🏻‍♀️🤷🏻‍♀️

امريكا تضرب الصين قلم
تقوم الصين رافعة ايديها و متعازمة و لسعاها قلم اجمد
و امريكا مش واخدة علي كده ... اااه هي اتعودت انها تضرب اي دولة بالقلم تقوم الدولة دي لافة و مدياها قفاها و تقولها و النبي قفا بركة من ايدك يا سيد المعلمين 🙄

🔘 التفصيلة الرابعة :
الناس دي بتتعامل معانا بصراحة ترقي للبجاحة 😒

ترامب من اول يوم قالك اسرائيل مساحتها صغيرة
اسرائيل لازم تكون قوة اقليمية تحمي نفسها و تخوف اللي حواليها
كل الساسة الامريكان قالك حماية اسرائيل واجب ديني مقدس

يقولك ايه تاني يعني عشان يفهمك انه لا بتاع سلام ولا بلبيس 😏

📌وهو من زمان و هو زارع في عقلك البائس ان ايران شعارها في الحياة الموت : لاسرائيل.. الموت لامريكا
و ان ايران هي الداعم الاول للقضية الوهمية المسماة القضية الفلسطينية 🤷🏻‍♀️🤷🏻‍♀️

و بالرغم ان ايران محتلة جزيرتين اماراتيين .. و عدوة السعودية الاولي و طمعانة في المقدسات .. و بترازي سلطنة عمان و الكويت في الخليج العربي .. و شاركت في تدمير العراق .. و كانت الجاسوس اللي اسقط سوريا .. و ما فعلته في سنة اليمن معملوش الحجاج بن يوسف الثقفي ووزيره الحصن بن النمير في اعداءهم .. و هي سبب انقسام لبنان و ضياعها

إلا ان السرمديات و الافيونات الدينية غفرت لها ما تقدم من ذنبها و ما تأخر عشان بس مروج لها انها بتدعم مجموعة المرتزقة المسماة حماس و القدس و غزة و كل الكلام الحلو ده 🙄

🔸لكن خلااااص
انتهت القضية الفلسطينية
غزة بقت منتج مالتي ناشيونال بموافقة الجميع .. وتم ضم الضفة لاسرائيل
برغم الاستنكار و الشجب الذي لم يشجبه شجاجيب من قبل 😏😏

ف انتهي دور ايران
او الدور الذي صنع لأجله نظام المرشد 👌🏻
ألا وهو 👈🏻 التخديم علي اسرائيل لحد تحقيق توسعتها 👌🏻

و يتبقا الخروج الامن لهؤلاء
و قبل الخروج الامن
لازم يمثلوا المشهد الاخير من بطولتهم السينمائية المطلقة وهي 👈🏻 الايقاع بالخليج في براثن امريكا من جديد
عشان تفرض عليهم شروط النجاة و هو الاستيلاء علي الثروات من خلال الوكيل الحصري للماسون في المنطقة 👈🏻 اسرائيل
و فرض اتفاقية ابراهام علي الجميع 👌🏻

♦حط التفاصيل الاربعة جنب بعض
هتعرف و تفهم ايه بيحصل
و ايه هيحصل بكرة

🔷🔶طبعا يا ولاد احنا عارفين ان الموتي يا بيروحوا الجنة .. يا بيروحوا النار ده في الاخرة
و في الدنيا بيروحوا القبور
ما عدا قتلي امريكا
بيروحوا منتجع جوالامور في مكان آمن تحده الطبيعة الخلابة من كل الجهات 🙄
المرشد تعب و من حقه يتخلب في الخلابة شوية بقا 🤷🏻‍♀️🤷🏻‍♀️

📌انتوا عارفين من اللي انا علي يقين باغتيالهم 👈🏻 امير عبد اللهيان و ابراهيم رئيسي
لأن امير عبد اللهيان كان اتمرد
و زهق من لعب ايران دور العميل و تمثيلها لدور ابو زبعبع للسنة في المنطقة
و كان اخد خطوات تجاه تطبيع العلاقات مع مصر و السعودية و الامارات و الكف عن دعم اذرع القذارة في المنطقة الحوثي و حزب اللات و كل الزبالة دي 👌🏻👌🏻


🔷🔶 فاضل اننا ننظر نظرة خاطفة علي #البديل 😎
تركيا ما شاء الله العقل و الرزانة محاوطاها
و كل التصريحات في اتجاه : لابد من الحلول السياسية
ننبذ العنف و نحبذ الدبلوماسية

" و انا كمان أحبذ .. انت تحبذ يا حنفي ... حنفي لا يحبذ يا دكتور رأفت 🙄"
📌اومال فين التصريحات العنترية ضد اسرائيل يا جدع 🤔

بالرغم ان في حفلة الافطار الجماعي انهاردة قالوا شوية تصريحات انما عنب 😏
▪اتكلموا عن امبراطوريتهم العثمانية المزدهرة المنتصرة
و انهم ايامهم جااااية و القرن الحالي سيكون القرن التركي
▪اتكلموا عن توسعهم و تواجدهم في القرن الافريقي و ازااااي بقوا قوة علي الارض في السودان و الصومال و چيبوتي و اريتريا
" اقسم بالله ما كان يحلم بيها 😒 .. ومش فاهمة السبب و من كتر قرفي مش عايزة ادور
لكن اللي اعرفه كويس و اللي التاريخ بيعلنه يوميا ان مفيش اخواني يتآمن له و لا عداوة الاخوان لغير فصائلهم ممكن تقلب صداقة ابدااا 🤷🏻‍♀️🤷🏻‍♀️"
▪اتكلموا عن انهم بقوا اهم ناس في المنطقة
و امريكا بتحبهم و روسيا بتعزهم و الصين بتودهم 🙄
و الخليج و مصر في حضنهم 🙄
▪ اتكلموا عن تواجدهم الرااااائع في ليبيا و انهم بيحاولوا يصلحوا علاقاتهم بحفتر و بيدعموا صدام حفتر للرئاسة " طبعا بعد ما حفتر و ابنه اغتالوا سيف الاسلام القذافي😏 "

لكن مجبوش سيرة ايران الا بطريقة : اووووه يا حراااام ربنا معاهم 🤷🏻‍♀️🤷🏻‍♀️

هو بيسخن بقاله 20 سنة عشان ينزل الملعب و اخيراااا المدير الفني نزله و حطه امام الجون 🤷🏻‍♀️🤷🏻‍♀️

♦احنا في انتظار الحج محمد بهلوي
اللي الحقيقة مجدد باقة الواي فاي و هااااري الدنيا تغريدات و بوستات 🙄

و مش عارفين هل غريب بيه هيروح للراجل عشان ينقذه و يجوزه اخته
و لا هيدور علي حد تاني يقف معاه ويمسك العقل كده 🤔🤔
" انا مش شمتانة في الخليج و لا هشمت فيه و بدعي ربنا ينجيهم
لأن لو الخليج وقع
ف انت واقع لا محااااالة
خليكوا عاقلين و سيبوكم من جنون الشعارات و العنتريات .... بص حواليك و تخيل كده شارع كله زلزال هدمه .. هل في برج واحد هيقدر يكمل فيه 🤷🏻‍♀️🤷🏻‍♀️ "

انا عارفة
بس الحقيقة قبل الفطار اتأمنت معملش توقعات و اتقالي كفاية بقا يا لووووچي .. الفراندة ولعت في الكوكب 🙄🙄

انا مااااالي يا عم
هما اللي مش مبدعين .. معندهمش ابتكار 🥹🥹

♦اللي بيحصل ده هيأثر علي مصر يا چيلان :
طبعا حضرتك
▪مضيق هرمز بيمر منه 20% من تجارة النفط في العالم
و ده هيأثر علينا
▪هنترازي شوية في قناة السويس تااااني
▪ارتفاع اسعار النفط و الغاز هترفع اسعار سلاسل الامداد .. وربما ده يدخلنا في شوية تضخم عالمي مؤقت ومصر جزء من العالم
▪رأس المال جبان 🤷🏻‍♀️ .. و بالتالي وارد نواجه خروج بعض الاموال الساخنة
و ده هيرفع سعر الدولار مقابل الجنيه

ده قدرنا 🤷🏻‍♀️🤷🏻‍♀️
و لا منجي من قدر الله إلا قدر الله 🤷🏻‍♀️🤷🏻‍♀️

الموضوع مش هيطول
و ربنا يحفظ بلدنا و جيشنا و يكتب لنا السلامة 🤲🏻🤲🏻

" اعذروني اتأخرت عليكم
لكن احنا بدأنا التهجد و الوقت للعبادة .. ده أيام معدودااات يعني .. ويا عالم بالأجل هل هنصادف رمضان تاني ولا لأ 🤷🏻‍♀️🤷🏻‍♀️"

🔵 ناقلة النفط سكاي لايت اللي هي عليها نفط ايراني
و طاقم بحارة 15 هندي و 5 ايرانيين
غرقت و كل البحارة ماتوا نتيجة قصفهم ميناء الدقم في سلطنة عمان بالقرب من مضيق هرمز

هدف جميل .. ولكن في مرماهم 😎😎

انا معرفش هما زعلانين ليييييه
ما العمة بتاعت المرشد سليمة مجرلهاش حاجة .... يعني مبني كامل بقا فتافيت و جثث بقت اشلاء و لحمة مفرومة و سدق
بس العمة محتفظة بكامل رونقها و بياضها 🙄🙄

اكيد مراته بتغسل ب برسيل چل من الغالي ده 🤔