شلونكم

بعد شلونكم

هم بعد شلونكم

اني خالة القناة لاختلاجاتي النفسية الماتخلص فتحملوني
المن باقين بيها انتو مادري😂💔..

- الرساله ؛ اذا م تحملنا هالجمال وش نتحمل !؟

بالله تخجلون الواحد گوة

- الرساله ؛ جد والله ، ترا أجمل شيء يُبتلى به الإنسان هو فكره ، وفكرك لايكفّ عن ارسال ومضات تلامس شغاف القلب ثم ترفعيننا برفق نحو عوالم أرقى من الإدراك العادي .

فنحن، شئنا أم أبينا، أسرى لعقلك الذي يُصرّ على أن يجعل من كل رسالة شعور، ومن كل شعور فكرة، ومن كل فكرة دهشة.

للمعلومية ترا الجمال لا نتحمّله، بل نخضع له، وننصت إليه، ونتماهى معه…

والله ماعرف شكول
تكبرون راس الواحد 😅، الله لايحرمني هلمودة الصادقة .. ويارب ع طول اكون نفس ظنكم ، والواقع اقل مما تكولين بالف مرة ..
الله يجمع بينا بخير بالدنيا والاخرة ♥️

- الرساله ؛ عادي بنية تحب واحد اصغر منها بسنه وحدة

بعيدًا عن الحب
نحجي ع الارتباط الشرعي الي يضل عمر ..
ماله علاقة العمر .. اهم شي الرجل بتصرفاته ع طول يحسسج انو اكبر منج .. فمو بالعمر بالإدراك ..
احيانا اكو اكبر منج وميعرف يحتوي ولا يعرف يكون قوّام ولا ينطي حق القوامة " الشعورية مو الإنفاقية" ..
فيبقى السؤال مو عادي اصغر او اكبر
السؤال الحق هو يعرف يحتوي لو حيعاملج كأنج " امه" .

- الرساله ؛ شلون يعاملج كأنج أمه
وضحيلي

يعني يكون الاهتمام بس منج
الاحتواء منج
امثلة بسيطة
من تصيرلج مشكلة بسيطة متلتجأيله " لان اكو فكرة انو انتي الجبيرة وانتي الي تعرفين تتصرفين فمراح تحتاجي بينما يجوز هو حيلجألج بصفتج اكبر وهاي بحد ذاتها مو حلوة بالعلاقة ..
اكلت شربت لبست طلعت طبيت مدري ايش هاي هم اهتمام " امه "
العلاقة الناجحة تحتاج الرجل يفكر بيها اكثر وينطي بيها اكثر ويحتوي اكثر
ويضحي اكثر ، ويجي ع نفسه اكثر
ف اذا هو هذا الرجل ماكو مشكلة بال١٢ شهر الي بيناتكم

- الرساله ؛ وااذا متقدم شخص تمام من كلشي بس ممكمل دراسة بس مكون نفسه

من تحجين وياه مبين ممكمل لو مثقف؟ متحسين بيناتكم ذاك الفرق الطبقي العقلي؟

الدراسة حتفيده اله ولاطفاله بينما انت الي تفيدج وجاهته يم الناس ودينه ومصدر دخله!
اذا كلهن تمام يجوز تكونين انت دافع حتى يكمل دراسته ..
بالعراق من تخلصين دراسة وتنخرطين بالحياة بعيدًا عن الوظيفة الي تشلع الكلب شهر كامل ع ٥٠"_٧٠٠ الف تستوعيبين يحتاجلج قرن علما تكونين حياة مقبولة
بينما اهل التجارة الي مامكملين ع كولتج
تلكي بعمر ال٢٢ ممكن يجيب بيت ، محل ، سيارة !

فمقصد الكلام الدراسة مو كل شي بهذا الوقت ..
ومو كل شخص حتلكي كامل المواصفات
يجوز اكو دين ماكو مادة
يجوز اكو مادة ماكو دين
يجوز اكو دين ومادة وماكو دراسة
فالفكرة انو اكو اشياء انت تكدرين تكمليها مدام معدن الشخص جيد واكو مودة ودين
وبنفس الوقت واحد ممجبور يجور ع نفسه ويقبل باشياء يشوفها مو استحقاقه ولا توالم عقليته .. فكسر وجبر الي تقتنعين بي سوي

- الرساله ؛ صح كلامج
مثقف ومتفهم ومعتدل بدينه وخلوق وجاي يدرس خارجي علمود يكدر يتقدملي

ي خو تمام ،
الله يجمعكم بحلاله دام اكو سعي ورضا

محتاجة دعاءكم هلمرة من صدك♥️

منو رايح مشي ؟..
لتنسوني بدعواتكم " امانة"