🏭👋 Асайын асады, жасайын жасады. "Сол жағалау" Павлодар облысы әкімінен құтылуды ойластыра бастады

Астанада Павлодар облысының әкімі Асайын Байхановтың мәселесін "реттеу" бойынша Үкімет пен Ақорда арасында жабық пікір алмасулар кезеңі басталды. Бұл туралы DALA INSIDE дереккөзі хабарлады.

Асайын Қуандықұлының жеке басына, тазалығы мен адалдығына сұрақ жоқ. Оның шешімдерінде жемқорлық фактілері байқалмаған.

Әңгіме басқада. Павлодар өндірістік, техногендік проблемалары бастан асатын алып өңір. Бұл жақта барлық мәселені шешіп, апаттарды болдырмай отыру үшін бизнесмендерді босаңсытпайтын, бәрін жұдырығында ұстап отыратын авторитет, саяси "тяжеловес" керек. Соңғы рет Қанат Бозымбаев сондай фигура болған. Бозымбаев кеткелі Павлодарға тяжеловестер табылмай жүр.

Бозымбаев кезінде Павлодарда алып зауыттары бар Машкевичтерді бір қоңыраумен жинап, өздеріне артылған жауапкершілік салмағын сезіндіретін. Асайын Байханов облысқа 2022 жылдың аяғында келді. Бірақ Павлодардың жер асты байлығын сорып жатқан олигарх кәсіпкерлер Байханов бар ма, жоқ па, мүлде елемейді және білгенін жасай бастады.

Мысалы, ішінде адам толы автобус құлап кеткен Майқайындағы рудникке ие компания Кипрдегі оффшорда, Сербия азаматына тіркелген. Нақты қожайыны кім? Алтын қазатын рудникте еш қауіпсіздік ережелері сақталмаған. Олар қазған қуыстарына цемент құюы керек еді. Әкімдік өзімен-өзі отыра берген соң, әкім талап етпегеннен кейін олигархтар да артық шығын шығармай, барынша пайда сорып, қауіпсіздікті тәрк етуге үйреніп алған.

"Майқайын алтын" рудниктері сияқты апаттар Павлодар облысының басқа да өндірістік ошақтарында болуы мүмкін. Сол себепті, бұл жаққа сөзі өтетін, шаруақор, саяси салмағы бар кандидат іздестіріле бастады.

Асайын Байхановтың ауыл шаруашылығы саласында біліктілігі мықты. Сондықтан оны өңірдің ауыл шаруашылығы саласын дамыту бойынша пайдалану идеялары да айтылды. Оған Асайын Қуандықұлы келісе ме? Ол жағы белгісіз.

Өңірлердегі ауыс-түйістердің алғашқысы осы Павлодардан басталады деген болжам бар. Оны да көре жатармыз. DALA INSIDE қосулы болсын 👇

https://t.me/dalainside

🙅 Қазақтың Әлиханы демалсын: Парламент Үкіметті отставкаға жіберу мәселесін өзара шеше алмай қырылып жатыр

Алдағы жұмада өтетін Парламент палаталарының біріккен отырысында Amanat партиясы Үкіметке "сенімсіздік вотумын" жариялауды ойластырып отыр. Вотум Президент Тоқаевтың Парламентке арнайы үндеуі аясында бастама ретінде көтерілуі мүмкін. "Оның нақты шешімі ертең белгілі болады", - дейді, DALA INSIDE дереккөзі.

Мәжіліс фракциялары екі лагерьге бөлінген. Мәжіліс Спикері Ерлан Қошанов бастаған топ Үкіметті осы отырыстан қалдырмай отставкаға жіберуге дайын отырса, ешкімді ренжіткісі келмейтін "көгершіндер" тобы Әлихан Смайылов басқаратын Үкімет ең болмағанда Наурыз мейрамына дейін жұмыс істесін деген пікірде.

Бір жағынан Ерлан Қошанов Әлихан Смайыловты да, оның командасын да алып тастаса, оның орнына кімді қоямыз деген мәселе тіпті ушығып тұр. Қазақстанның проблемасы - Премьер-Министр ретінде барлық тараптарды қанағаттандыратын, берілген тапсырмаларды түбіне дейін жеткізіп орындайтын кәсіби тұлға жоқ.

Әлихан Асханұлы Қазақстанды кері кетірді дей алмаймыз. Бірақ оның үкіметі елді даму жолына бағыттауға қауқарсыз және Ұлттық қорды барған сайын аяусыз сора бастады. Осы тұста "Сол жағалаудағы" кей қырағы көздер Ерболат Досаевты еске алып отыр дейді, дереккөз.

Қошанов көгершіндерді сындыра білсе, осы жұмада Үкіметті талқандайтын болады. Ерлан Жақанұлына да осындай бір ерлік жасау керек болып тұр. Ол өзі басқаратын Мәжілістің бәрін дірілдететін органға айналғанын қалайды.

Ал Әлихан Смайылов Конституция бойынша Ерлан Қошановқа қарсы шыға алмайды. Сондықтан өз мансабының кілтін Парламент қолына тапсырып, үнсіз жұманы күтпек. DALA INSIDE дереккөзі қазақтың Әлиханы отставкаға кетуге кет әрі емес дейді. Сәл демалып алғаннан кейін Алматы сынды қалаға әкім болып бару Смайылов үшін тамаша шешім болар еді.

Бәрі Парламентке, және бастысы Қошановтың Президент әкімшілігімен қандай консультация жүргізгеніне байланысты. Жұмаға екі күн қалды.

DALA INSIDE қазақтың Әлиханы келе жатқан ауыр әрі жауапты еңбек жолын қадағалап отыр. Бірге қадағалайық 👇

https://t.me/dalainside

🌅 Асқар Мамин саяси аренаны біржолата тастады

Қазір ол Ыстамбұлда демалып, Истикләл көшесі мен Таксим алаңында көбірек қыдыратын болған. Босфорға қарап, кешкі уақытын ойланумен өткізеді.

"Жаңа Қазақстан" тарапынан әзірге Асқар Маминге сұрақ жоқ. Сондықтан ол шетелге емін-еркін шыға алады. Ал онымен кезінде қызметтес болған көптеген шенеуіктерге Қазақстан аумағын тастауға бейресми тиым салынған. Яғни, шекарадан өткізбейді.

DALA INSIDE Асқар Ұзақбайұлын ұмытпайды. Бізге жазылып алыңыздар.

https://t.me/dalainside

🍼 "Самұрық-Қазына" қорын әлдекімдер тыныш қана сорып келген

"Самұрық-Қазына" қорына қарасты "Қазақстан темір жолы" ұлттық компаниясының сатылған әр билетінен жекеменшік "Instant Payments" фирмасына ақша түсіп отырған. Жалпы алғанда тоғыз жылда 5,7 миллиард теңге аударылған.

Ол компанияның қазіргі қожайыны кезінде "Оператор РОП" штатында қызмет еткен Диас Мәдиқожин болып шықты. Оның атында криптовалютамен айналысатын "Global crypto mining limited" фирмасы тіркелген. Одан бөлек ауыл шаруашылығындағы лизинг бойынша қызмет көрсететін "Leasing group" компаниясында үлесі бар. Ол туралы бірінші болып "Еуразия" телеарнасы хабарлады.

Осылайша, Әлия Назарбаеваның мойнына қыл арқан түсті. Және ол жайлап тартылып келеді.

"Әлияға қатысты қылмыстық істің қозғалуына жетерлік 18 томдық дәйек жиналды. Әсіресе РОП-тың құрылтайшысы болған, Әлия Назарбаеваның үй күтушісі деп саналатын Шынар Мұхтарованың Дубайдан экстрадициялануы көп көмектесті. Ол тергеуде қажет барлық ақпаратты берді. Тергеумен келісіп, шартты жазаға кесіліп, бостандыққа шықты", - дейді, DALA INSIDE дереккөзі.

Қазір Дариға, Динара мен Әлия Назарбаевалардың қылмыстық іс орбитасына ілініп, Интерпол арқылы қудалауға ұшырамауына Кремль ара-ағайындық етіп, "Жаңа Қазақстан" фемидасын әрең ұстап тұр. Бірақ ол статус-кво қанша уақытқа дейін созылатыны белгісіз.

DALA INSIDE осы әулетке қатысты бірнеше құпия инсайдты сіздер үшін сары майдай сақтап отыр. Бізбен бірге болыңыздар 👇

https://t.me/dalainside

🔥 Тимур Турлов отпен ойнай бастады

Және онысы өзі үшін қайғылы аяқталуы мүмкін.

Freedom Holding Corp. (банк, брокерлік, инвестициялық және сақтандыру бизнесі) қожайыны Тимур Турлов монетарлы билікке қарсы риторикасын күшейтіп келеді. Бірақ оның бұл жүрісі бизнесіне үлкен залал келтірмек.

"Ақорда Турловтың әр қадамын жіті бақылап отыр. Сол жағалау үшін оның бизнес аренадан саяси аренаға ауысып кетпеуі аса маңызды. Сондықтан оның соңғы мәлімдемелері мұқият саралануда", - дейді, DALA INSIDE дереккөзі.

Дереккөздің айтуынша, 2024 жылдан бастап Тимур Турлов үшін өте қауіпті кезең басталды. Ол өзін кланаралық ойындарға араластыруға жол беріп, қаржылық тәуекелдерін бақылауды күшейтпесе биылғы жыл Freedom экожүйесі үшін жақсылықпен аяқталмайын деп тұр.

2023 жылдың қарашасында Тимур Турлов қадағалаушы органдардың (Ұлттық Банк пен Қаржы нарығын реттеу және дамыту агенттігі) комплаенс (қаржы полицейі) бойынша жаңа талаптары банктерге штат бойынша ауыр жүк артып отырғанын мәлімдеген еді. Сол кезде оның қадағалаушы органдармен арасы суып бара жатқаны байқалған.

Ал 2024 жылдың басында Тимур Турлов Ұлттық Банкке тікелей шабуыл жасады. Ол жоғарғы базалық ставканың кез-келген экономикалық жобаларды өлтіріп жатқанын мәлімдеп, банктердің экономиканы кредиттемеуіне монетарлы билікті айыптаған еді.

Өткен жұма күні алғашқы жауап Ұлттық Банк төрағасы Тимур Сүлейменовтен келді. Бас банкир Freedom қаржылық моделі базалық мөлшерлеме, TONIA және банкаралық мөлшерлеме деңгейіне өте сезімтал екенін айтып, оларды осы жағынан алғанда жақсы түсінетінін мәлімдеді. Бірақ Сүлейменовтың осы жауабының артында, оның Freedom-ның осы моделіне барынша мұқият назар аударатынын сездіретін емеурін анық байқалған.

Freedom тәуекелі жоғары, авантюралық қаржылық модельмен жұмыс істейді. Біраз елдерде бұл модель заңсыз болып табылады. Бір сөзбен айтқанда Freedom құнды қағаздарды айналдырып қайта кепілдікке салып, сол арқылы қаржылық есептілікте өз активтерін үрлеп, яғни үлкейтіп көрсетеді. Сол кезде спекуляциялық жолмен облигацияларды қайта айналдыра беруге гандикап алады. Тек ол үшін TONIA ставкасының төмен болғаны және ҚНРДА-ның осы манипуляцияларға көз жұмып қарағаны аса маңызды.

Ұлттық Банк Тимур Турлов жасаған демаршты есінде сақтап қалды және келесі айда ҚНРДА арқылы өзінше болып кеткен банкирді жазалауды ойластыра бастады дейді, DALA INSIDE дереккөзі.

Бір сөзбен айтқанда, ҚНРДА қаржылық ұйымдардың пруденциалды нормативтеріне құнды қағаздардың қайта кепілдікке салынуына шектеу қояса, сол күннен бастап Freedom Bank үлкен проблемаларға тап болмақ.

Бұған дейін қаржы нарығындағы қадағалаушы және монетарлы билік (ҚНРДА мен Ұлттық Банк) Турловтың кейбір тентек қылықтарына көз жұмып келгендей болған. Бірақ Тимур Русланұлы қызыл сызықтың арғы жағына көбірек өте бастады. Ал Қазақстанда еш қылықтың жауапсыз қалмайтынын бесінші сынып оқушысына дейін біледі.

DALA INSIDE Турлов тағдырын мұқият бақыламақ. Бұл бір қызық кейс болатынын ішіміз сезеді. Бізбен бірге бақылаңыздар 👇

https://t.me/dalainside

👊 LRT, қазбалар базасы, жер сілкінісі жүйесі: Нұралы Әлиев тергеу орбитасына жақындап келеді

Ведомствоаралық тергеу тобына Назарбаевтың жиен немересі Нұралы Әлиевтің бар тірлігін саралау тапсырылды дейді, DALA INSIDE дереккөзі. Себебі LRT ісінің айыпталушылары "неге тергеу кезінде Астана қаласы әкімінің орынбасары болған Нұралы Әлиевті жауапқа тартпады" деген заңды сұрақты бірнеше рет көпшілік алдында қойған болатын.

Одан бөлек тергеушілер Қазақстан теміржолына қарасты "Транстелеком" алпауытының Нұралы Әлиевтың қолына өтіп кетуі, ондағы мемлекет үлесінің 25 пайызға дейін қысқарып қалуындағы эпизодтарды тексерсе, міндетті түрде бір гәп табары анық.

Соңғы уақытта Әлиев араласқан екі маңызды жобадан шикілік шығып отыр. Алдымен "Транстелеком" "Казгеология" тендеріне қатысып, шарт бойынша минералды ресурстардың ақпараттық базасын әзірлеп беруі тиіс. Ол шаруа аяқсыз қалды.

Одан кейін, Нұралы Әлиев қомақты үлесін ұстап отырған TNS-INTEC компаниясы Nege.Aqsha дерегі бойынша Алматыда жер сілкінісі кезінде халықты ерте құлақтандыратын автоматтандырылған жүйе жасап беруі тиіс еді. Ол үшін Төтенше жағдайлар департаменті 1,1 миллиард теңге төлеуі керек. Акт бойынша іс бітіп, жоба тапсырылса да, өткен зілзала кезінде бұл жүйе жұмыс істемеді.

"Назарбаев әулетінің жиендері, немерелерінен бастап үй күтушісіне дейін мемлекеттік қаржыға ауыз салғаны "Жаңа Қазақстанды" кәдімгідей ашуландырып отыр. Тамырға дейін сіңіп кеткен осы дертті түгел сылып тастауға айқын пәрмен берілді", - дейді, дереккөз.

Нұралы Әлиев Қазақстанға аяқ басуды қойған болатын. Тіпті директорлар кеңесін сенімхат бойынша тағайындаған өкілі арқылы жүргізеді. Алда-жалда келіп жатса, бұдан кейін шыға алмай қалуы мүмкін.

DALA INSIDE Нұралы Әлиевтің бұдан басқа да былықтарының жетіп артылатынын біледі. Бізге жазылыңыздар 👇

https://t.me/dalainside

💥 Тина Канделаки суицидтен аман қалды

Қазақтардың әлеуметтік желіде көрсеткен буллингі мен Қазақстан "персона нон грата" деп танып, елге кіруге тиым салғаннан кейін ресейлік тележүргізуші, ТНТ директоры Тина Канделаки күйзеліске ұшырап, суицидке баруға талпынған.

Оқиға осы түнде Мәскеуде орын алды, және Кремль тарапынан дереу құпияландырылды дейді, DALA INSIDE дереккөзі. Мәскеу полициясына іс қозғауға тиым салынды.

Тина Канделаки күйзелісті алкоголь арқылы баспақ болған. Артынан, шамадан тыс ішкеннен кейін, өмірден кетуге шешім қабылдап, ұйықтатататын дәрінің бір қорабын ішкен. Құрбысы байқап қалып, дәрігерлер шақырған. Дәрігерлер дереу токсикологиялық реанимация шараларын қолданып, тележүргізушінің өмірін сақтап қалды.

Күйзеліске ұшырардың алдында, Тина Канделаки Қазақстанға кіруге тиым салынғаны туралы мәлімдеме жасаған ҚР Сыртқы істер министрлігінің ресми өкілі Айбек Смадияровты Мәскеуге әңгімеге шақырып, телеграм каналына пост жазған еді.

Ал оның алдында Тина Канделаки Қазақстанның орысша лингистикалық атаумен қалып қалған теміржол бекеттерін қазақшалап жатқанына шамданып, империялық стильде пост қалдырғаны есте. Одан кейін комментте қазақтардың қарғысы мен буллингіне ұшырап, аудиториясы алдында ақтала бастады. Ақыры психологиялық күйзеліске ұшарады.

DALA INSIDE Тина мен қазақ халқы арасындағы ақпараттық соғысты бақылап отыр. Канделаки сияқтылар қазақтың бірігуіне таптырмайтын фактор. Сондықтан тірі жүргені дұрыс. Бізбен бірге тірі болыңыздар 👇

https://t.me/dalainside

💰 Алтын үшін соғыс: бандиттер Маралды ауылының тұрғындарын арандатуға көшті

Шығыс Қазақстан облысы Күршім ауданы Маралды ауылында бандиттер тобы алтын зауытының құрылысына кедергі келтіріп, осы зауытты толық өз ықпалының астына алмақ ниетте. Олар құрылысқа қатысты қоғамдық тыңдауларда, одан кейін әлеуметтік желілерде арандатушылық әрекеттер жасап, зауыт құрылысының барлық кезеңінде қарсылық білдіріп отыр. Әлеуметтік желіде жарияланған видеода ауылдық клубтың залына халықты кіргізбей, қоғамдық тыңдауларды бұзуға тырысқандары анық көрінеді.

Маралдыда жоспар бойынша ауылдық округтің ғана емес, жалпы облыстың дамуына мультипликативтік әсер беретін алтын өндіру фабрикасы іске қосылуы тиіс еді. Жоба Қазақстан Республикасының қолданыстағы заңнамасының талаптарына сәйкес барлық рұқсат беру рәсімдерінен өтті. Сол кезде Маралдыға экология және табиғи ресурстар, өнеркәсіп және құрылыс вице-министрлері арнайы келіп, тұрғындармен кездесіп, жобаны тоқтатуға заңды негіздердің жоқтығын жан-жақты түсіндірген болатын. Көптеген тексеріс нәтижесінде фабриканың құрылысы мен жұмысы барысында заң бұзушылықтар анықталған жоқ.

Мамандардың айтуынша зауыт қоршаған орта мен адамдар үшін қауіпсіз. Мұндай ондаған жоба қазірдің өзінде бүкіл Қазақстан бойынша тыныш жұмыс істеуде.

Бандиттер ауыл тұрғындарын зауыт құрылысы жобасын қолдағаны, тыңдауларға қатысып, өз пікірлерін білдіргені үшін қорқытып, зорлық-зомбылық көрсетіп келеді дейді, DALA INSIDE дереккөзі. Маралды ауылының тұрғындары аудандық сотқа бандиттердің үстінен 10-нан астам арыз жазған.

Одан кейін өз өмірлеріне қауіп төнген ауыл тұрғындары Президентке үндеу жазды. Тәуелсіз сарапшылардың айтуынша, соңғы екі жылда әдейі осы «Maralicha Cold» тау-кен компаниясы» фирмасының төңірегінде шиеленісті арттыруға кәдімгідей күш салынған. Мемлекеттік органдар да наразылық пен арандатушылықтардың артында белгілі бір адамдар тобы тұрғанын анықтай алды. Олар зауыт ашудың нақты фактілері мен артықшылықтарына назар аудармай, қарапайым халықтың санасын манипуляциялауға тырысып келеді.

Не үшін? Зауыт инвесторларын бопсалап, ақша және осы өндірістен үлес алу үшін. Мұны рейдерліктің жаңа, қой терісін жамылған түрі деп айтуға болады. DALA INSIDE әр смартфонда тіркелген болсын 👇

https://t.me/dalainside

🗣️ Самат Әбіш тергеуде сөйлей бастады. Енді тағы бірнеше тұлғаға тықыр таянбақ

Ұлттық қауіпсіздік комитетінде Самат Әбішті тергеу өте сәтті өтті деп хабарлады, DALA INSIDE дереккөзі. Назарбаевтың немере інісі Кәрім Мәсімовтың барлық тірліктерімен қоса, Қаңтар оқиғасына кімнің қалай араласқанын, шенеуіктер мен олигархтардың сол күндері шетелге ақшаны қалай шығарғанын, бір сөзбен айтқанда толық схеманы жайып салған.

"Енді біраз экс шенеуіктер пен олигархтардың үстінен қылмыстық іс қозғауға негіз бар. Самат Әбіш тергеуге құнды ақпарат берді", - дейді, DALA INSIDE дереккөзі.

Осы құнды ақпараттың ішінде Болат Назарбаевтың баласы Нұрбол Назарбаев пен Қайрат Сатыбалдыға қатысты біраз компромат бар. Қайрат Сатыбалдының абақтыда екенін ескерсек, енді "Жаңа Қазақстан" Нұрбол Назарбаевпен айналысатынын болжауға болады.

Кем дегенде Нұрбол Назарбаевқа рейдерлік және салықтан жалтару баптары бойынша айып тағуға материалдар дайын. Келесі аптада осы сұрақ бойынша жабық консультациялар басталады.

Болат Назарбаевтың империясын күйрету марқұмның қырқынан кейін жоспарланған болатын. Белгіленген мерзім өткендіктен, заңсыз активтерді қайтару бойынша комиссия Бөкеңнің барлық балаларындағы және таныс-жұрағатындағы активтерді тексеруге көшті. Болат Назарбаевтың артында 9 заңды баласы, одан бөлек онға жуық заңсыз бала қалды. Оның ішінде бәйбішенің ұлдары - Нұрбол мен Ербол Назарбаевтардың қолдары ұзын және барынша көп дүниеге таласы бар. Сондықтан мемлекет оларға көбірек көңіл бөлетін болады.

Болат Назарбаевтың мұрасы әрдайым DALA INSIDE назарында. Ол мұраны бірге бақылау үшін, бізге жазылып алыңыз 👇

https://t.me/dalainside

🌅 Ғабидолла Әбдірахымов депрессиядан шықты

Алайда Шымкенттің экс әкімін "Жаңа Қазақстанда" ешқандай лауазымды қызметке тағайындамау туралы бейресми нұсқау әлі күнге дейін өзінің күшін жоймаған.

Оның резюмесі біраз кабинеттерге кіргізіліп, рұқсат алмай кері қайтты, дейді DALA INSIDE дереккөзі.

Мемлекеттік қызметтегі мансабы күрт үзілгендіктен және Лондонда сүйіктісімен айрылысқан уақытта Ғабидолла Рахматоллаұлы терең депрессияға шалдыққан болатын. Сол кезде фейсбук комментарийлерінде желі қолданушыларымен ұрсысып, оларды сыпыртып боқтап тастады да, артынша аккаунтын өшіріп, мүлде фейсбуктан кетіп қалды. Қазір тек инстаграмды ғана қолданады.

Дереккөздің айтуынша Ғабидолланы өндіріс пен дистрибуция, зәйтун майын сату депрессиядан шығарды. Бүгіндері ол Испанияда өндірілетін "Aldonza" зәйтун майы мен қой ірімшігін Орталық Азия мен Қазақстанға тасумен айналысады. Бірақ баяғыдағыдай ағыл-төгіл табыс жоқ. Сондықтан Әбдірахымов "эконом" режимге көшті.

Ал оның сенімді серігі Данат Жумин Қазақстаннан қызмет таппағандықтан Еуропаны аралай бастаған. Жумин Ғабидолла Әбдірахымовпен 2017-2018 жылдары Шымкентте, ал оның алдында Нұр-Отан партиясында қызмет еткен болатын. Ғабидолланың қоғамдық келбетін, сыртқы имиджін Данат Жумин арнайы стратегия жасап, толықтай қалыптыстырып берді. Оған шамамен 40-50 миллион теңгедей қаржы жұмсалды дейді, жағдаймен таныс дереккөз.

DALA INSIDE "Ескі Қазақстан" шенеуіктерінің тағдырын бақылап отыр. Бізге жазылып алыңыздар 👇

https://t.me/dalainside

💰🫰 Жамбыл облысындағы "откат" ставкасы Қазақстан рекордын жаңартты

Ақпараттық сайттар мен газеттер Жамбыл облысының Ішкі саясат басқармасы өткізетін мемлекеттік ақпараттық тапсырыс тендерлеріне қатысудан бас тарта бастады.

Себебі, биыл Жамбыл облысының ақпараттық тапсырыс конкурстарында әлдебір делдалдар пайда болып, келісім-шарт сомасының 70 пайызын откат ретінде сұрай бастаған. Оны өзінше бір жаңа рекорд десе де болады.

"Жамбыл облысы Ішкі саясат басқармасымен ара-қатынасын үзгісі келмеген ақпарат құралдары бұл тендерден сыпайы ғана бас тартты. Бірақ екі жергілікті БАҚ материал жинап, оны Антикорға тапсыруға ниетті болып отыр", - дейді, DALA INSIDE дереккөзі.

Қазір Жамбыл облысындағы Ішкі саясат басқармасын өте тәжірибелі маман, тиімді идеолог Улана Сламбекова басқарады.

"Тендердегі делдалдардың көбейіп кеткеніне Улананың тікелей қатысты жоқ. Қол астындағы қызметкерлерінен келіп отырған кесапат. Бірақ солардың жұмыстарын қадағалау мен жемқорлыққа қарсы мәдениет сіңіруде әлдебір салғырттық бар", - дейді, дереккөз.

Қалай болғанда да, биыл Жамбыл облысы айды аспанға шығарып, өзінің ашкөздігімен ақпарат құралдарын таңдай қаққызды. Көптеген бас редактордың облысқа деген сый-құрметі төмендеп кетті. Ол әлі өзінің әсерін беретін болады. Себебі, меншікті тілшілерге Жамбыл облысына қатысты сыни материалды көбейту бойынша тапсырмалар түсе бастаған.

DALA INSIDE дереккөзі жағдайды бақылап отыруға уәде берді. Бізге жазылып алыңыздар 👇

https://t.me/dalainside

👍 Жамбыл облысы: бізде бәрі "норм"

DALA INSIDE инсайдерінің Жамбыл облысындағы мемлекеттік ақпараттық тапсырыс бойынша "құбылыстар" туралы хабарына ресми реакция келді.

"Жамбыл облысы әкімдігінің ішкі саясат басқармасының негізгі қызметтерінің бірі – ақпараттық саясатты жүзеге асыру болып табылады... Мемлекеттік тапсырысты орналастыру Қағидаларына сәйкес Басқарма жыл сайын облыста мемлекеттік ақпараттық саясаттың тақырыптық бағытының тізімін қалыптастырады және оны басшылыққа алып жұмыс жасайды.

Аталған Қағида шеңберінде Басқарма МАТ (мемлекеттік ақпараттық тапсырыс - еск. DI) іске асыру мақсатында тиісті конкурстық рәсімдер өткізіп, байқау комиссиясымен жеңімпаздар анықталады. Яғни конкурс жеңімпазы жеке дара емес Қағидаларда көрсетілген бағалау нәтижелеріне сүйене отырып комиссияның ортақ шешімімен анықталады.

Осы ретте, басқарманың ресми сайтында МАТ іске асыру бойынша конкурс өткізу туралы хабарландыру орналастырылып, бұқаралық ақпарат құралдары өзге қатысушылар мен тең дәрежеде конкурсқа қатыса алады.

«DALA INSIDE» телеграм-арнасында жарияланған ақпарат шындыққа жанаспайды. Заңға қайшы әрекеттер туралы ақпаратыңыз болса тиісті құзырлы органдарға хабарлауларыңызды сұраймыз", - деп хат жолдады, Жамбыл облысының Ішкі саясат басқармасы.

DALA INSIDE қостараптылық принципіне сай, кез-келген инсайдқа ресми жауап берілсе, оны еш кедергісіз жариялауға әзір. "Ескі Қазақстанның" көптеген олигархтарына өз пікірін ашық білдіруге қатысты ұсыныс айтылған еді. Ешқайсысы ашық диалогқа шықпады.

Жамбылдағы инсайдерден хабар келіп жатса, ол ақпарат та жарияланатын болады. Бізбен бірге болыңыздар 👇

https://t.me/dalainside

🪨 "Жақсы депутаттан, шаруақор әкім шықпайды": Берік Әбдіғалидың карьерасы қыл үстінде тұр

Қаңтардың ортасында Ақорданың Есіл өзеніне қараған кулуарында жаңадан құрылған облыстардың экономикалық дамуына қатысты жабық жиын өтіп, Түркістан, Жетісу, Абай және Ұлытау облыстары әкімдерінің жұмыстары сараланды, – деп хабарлайды DALA INSIDE арнасы өзінің тұрақты дерекөзіне жүгініп.

Балапанды күзде санайды демекші, жиында аталған облыстарға жауапты инспекторлардың ой-пікірлері тыңдалған.

Арнамызға жеткен ақпарат бойынша, жиында Түркістан облысы әкімі Дархан Сатыбалды мен Жетісу облысы әкімі Бейбіт Исабаевтың жұмысына жоғары баға берілді.

Ал өткен жылы жазда Абай облысында орын алған орман өрттерінен кейін облыс басшысы Нұрлан Ұранхаевтың жұмысына қатысты біраз сын айтылған болатын. Бірақ Ұранхаев өзіне айтылған сыннан қысқа уақытта нәтиже шығарып, Ақорданың сеніміне тағы да ие болған. Осылайша Ұранхаев өзінің позициясын сақтап қалды.

Жиынға қатысушылар Ұлытау облысы әкімі Берік Әбдіғалидың жұмысына көңілдері толмайтындарын ашып айтқан. 2022 жылы маусым айында Ұлытау облысы әкімі Берік Әбдіғали мырза Ұлттық құрылтайдың алғашқы отырысын жоғары деңгейде өткізіп, Ақорданың алдында сенім кредитіне ие болған еді. Бірақ Берік мырза жиын-тоймен жинаған атақ-абырой өзіне жылдар бойы азық болмайтыны есепке алмаған сыңайлы.

Өйткені жаңа облыстың құрылғанына 3 жылға таяса да, әкімдікке бағынышты кейбір мемлекеттік мекемелер (айталық, Халықты жұмыспен қамту орталығы) әлі күнге дейін жекеменшік сауда орындарын паналап отырғаны Ақордаға ұнамаған.

Өзге облыстар басқармалар мен мекемелерге арналып, ғимараттар салып, жұмыстарын дөңгелетіп кеткен. Ал Ұлытау облысында бірқатар мемлекеттік мекемелердің жұмысын ұйымдастыру ісі әлі күнге дейін оң шешімін таппауда.
Қоғамдық өмірде ұлтжанды азамат ретінде танылған Берік Әбдіғали әкімшілік ұйымдастыру жұмыстарының бұлайша ұзаққа созып жібергені Ақорданың ашуын туғызып отыр.
Бұдан басқа облыс әкімінің жергілікті жердегі негізгі жұмыс беруші "Қазақмыс" корпорациясының басшылығына сөзін өткізе алмауы да оны тұйыққа тірей түскен.

DALA INSIDE инсайдері, шағын құрамда өткен кездесуде Берік Әбдіғалиды басқа іскер, шаруашылыққа мығым әкіммен ауыстыру мәселесі бір ауыздан қолдау тапқан деседі.
Тарихта Ұлытау облысының алғашқы әкімі ретінде қалатын Берік Әбдіғали алдағы уақытта қос шатырлы Парламентке қайта оралып, өзінің сүйікті иедологиялық ісімен айналысуы мүмкін.

Ақорданың кулуарында өткен жиында жауапты тұлғалар бір ауыздан "жақсы депутаттан, шаруақор әкім шықпайды" деген байламға келді. Ақпан айында Ұлытау облысы әкімін ауыстыру ісі бойынша Президентке тиісті ұсыныс дайындалып, тапсырылмақшы.

Бүгінде Берік Әбдіғалиды алмастыратын бірнеше кандидаттардың досьесі жан-жақты електен өтуде. Сенімді дереккөзге сүйеніп, алдағы уақытта арнамызға үміткерлердің тізімін жариялауға күш салатын боламыз.

DALA INSIDE арнасын бақылап отырыңыз. Басты инсайдтар бізді өзі іздеп табуда 👇

https://t.me/dalainside

🛬 Чартер арзан болады: ҚазМұнайГаз 1,6 миллиард теңгенің тендерін түсіндіргісі келді

«ҚазМұнайГаз» АҚ чартерлік рейстерді ұйымдастыру бойынша 1,6 миллиард теңгеге жариялаған конкурсына түсініктеме берді.

Біріншіден, ол 2024-2028 жылдарға, яғни 5 жылға жоспарланған. Тек рейс ұшса ғана ақысы төленіп отырады. Мұнай алпауыты әдеттегі іссапарларына кәдімгі әуе рейсін қолданып жүр. Чартер тек төтенше жағдай туып қалса сұратылады.

Мысалы, 2022 жылдың көктемінде КТК құбырында қазақ мұнайын тасуда проблемалар болғанда ҚазМұнайГаз делегациясы шұғыл түрде Новороссийскіге ұшып кетті. Себебі ол жаққа тікелей рейс жоқ, үш рет ұшақ ауыстыру керек. Немесе жыл сайын жазда тұрақты әуе билеттеріне сұраныс артып, баға шарықтағанда, ҚазМұнайГаз экологиялық жағдайы нашар батыс өңіріндегі жүздеген мұнайшының балаларын лагерге демалуға апарады. Мұндай жағдайда чартерлік рейс қарапайым рейске қарағанда арзан түседі.

Сол 1,6 миллиард теңге бес жылда тіпті игерілмей қалуы мүмкін дейді, ұлттық компания. Аз ұшса, аз төлейді. DALA INSIDE енді ҚМГ рейстерін бақылап отырмақ. Бізге жазылыңыздар 👇

https://t.me/dalainside

🇰🇿 Қазақстан жаңа Елтаңба туралы ойлана бастады

Жаңа Қазақстанға жаңа Елтаңба. "Жаңа адамдар" қозғалысы жүргізген сауалнамадан кейін идеологиялық блок Елтаңбаны жаңалау туралы жабық консультациялар өткізбек.

Шынымен де, көптеген азаматтар Қазақстан Елтаңбасын танымайтындығы анықталды. Сауалнамаға қатысушылардың 70 пайызы Елтаңбамыздың бейнесіндегі жекелеген элементтерінің мәні мен мағынасын түсінбейтінін көрсетті. Сауалнамаға қатысушылардың 30 пайызы ғана алты бірдей ұқсас рәміздер арасынан біздің төл Елтаңбамызды нақтылап, танып көрсете алды. Ал көбісі ұқсас рәміздер арасынан қанатты тұлпары бар өзіміздің елтаңбамызды емес, құстар мен айдаһар бейнеленген өзге рәміздерді көрсеткен. Бұл факт идеологиялық блокты қайран қалдырып отыр.

Қазіргі Елтаңбаға 32 жыл толды. Ол 1992 жылы қабылданған еді. Авторлары – белгілі сәулетшілер Жандарбек Мәлібеков пен Шот-Аман Уәлиханов.

Оның орталық геральдикалық элементі – көгілдір түс аясындағы шаңырақ (киіз үйдің жоғарғы күмбез тәрізді бөлігі) бейнесі. Шаңырақты айнала күн сәулесі секілді тараған уықтар шаншылған. Шаңырақтың оң жағы мен сол жағына аңыздардағы қанатты пырақтар бейнесі орналастырылған. Жоғарғы бөлігінде – көлемді бес бұрышты жұлдыз, ал төменгі бөлігінде «Qazaqstan» деген жазу бар. Жұлдыздың, шаңырақтың, уықтардың, аңыздардағы қанатты пырақтардың бейнесі, сондай-ақ  «Qazaqstan» деген жазу – алтын түстес.

Жаңа Елтаңба нақты қандай болуы керек деген мәселеде ортақ көзқарас жоқ.

Идеологиялық блок - ең бастысы адамдардың есінде қалатын, ұмытпайтын болсын деген ұстанымда.

Елтаңба туралы консультациялар құпия өтуде. Себебі, қоғамның оған қандай реакция берері түсініксіз. DALA INSIDE осы мәселе бойынша келесі аптада қосымша екі инсайдермен байланыспақ. Сол кезде детальдарын анықтай аламыз. Бізге жазылып алыңыздар 👇

https://t.me/dalainside

⚡️Менің сөзімді сөйле! Тина Канделаки Нурлан Сабуровқа с..гінді...

Орыс тілінің сойылын соғып, Ақордаға ақыл айтпақ болған Тинаның Қазақстанға кірер есігі тарс жабылғанын естіген боларсыздар.

Қазақ билігінің қарымта қайтарарын күтпеген Канделакидің талағы тарс айырылған сынды.

Төмендегі видеода бетпердесін шешіп, шынайы шовинистік болмысын паш еткен Тинаның соры қалың Сабуровқа с..гініп жатқанын байқауға болады.

"Ты, и тебе подобные...", - дейді Тина.

"Менің бір жағыма шығысып, шашбауымды көтер! Сен секілділер не Ресеймен бірге боласыңдар, немесе желкеңнен сүйреген күйі бұл елден қуып шығамын...", - деп шәуілдейді Канделаки.

Бұл жағдай қазақшылығы шамалы, солай бола тұра орысқа да сіңісе алмай жүрген Сабуров секілділерге сабақ болғаны анық.
Тинаның сөзін жадыңда сақта, Нұрлан! "Ты, и тебе подобные...".

DALA INSIDE бұған дейін Мәскеудегі дереккөзіне сүйеніп, қазақтардың әлемжеліде көрсеткен буллингі мен Қазақстанға кіруге тиым салғаннан кейін Канделакидің күйзеліске ұшырап, суицидке баруға талпынғанын жазған. Сабуровпен арадағы скандал осы сөзімізді растай түседі.

Айтқандай, арнаға тіркелуді ұмытпаңыз👇

https://t.me/dalainside

⚡️ Жаңа Премьер-Министр: ерік-жігері қатты, ешкімнен қорықпайтын адам

Мемлекет басшысы Үкіметті жаңарту бойынша бір тоқтамға келді дейді, DALA INSIDE дереккөзі. Реформаларды батыл жүзеге асыру үшін өзіне жауапкершілік алатын, сыннан қорықпайтын, халыққа, қоғамға ұнамайтын шешімдерді жүзеге асыра алатын адам керек екені нақтыланды.

Ал қазақтың Әлиханы осы талаптарға сай ма? Қазіргі Үкімет басшысы Әлихан Смайылов Қазақстанды қиын уақыттан аман алып шықты. Ол антикризистік менеджер ретінде функциясын жақсы атқарды.

Алайда, Смайылов даму менеджері емес дейді, сарапшылар. Ол кризистен алып шыға алады. Бірақ елді ары қарай даму жолына түсіру үшін басқаша ойлайтын жаңа премьер керек.

Қазақтың Әлиханы өзіне тиесілі сақтықпен болашағын жоспарлап, ойлап қойды. Ол премьер кезінде қатты артын жыртпады. Дипломатиямен, ешкіммен ұрсыспай жұмыс істеді. Себебі, премьерлік мәңгі емес. Бүгін ренжіткен адамы ертең алдынан шығатынын білді. Қазақтың Әлиханы осы жағынан алғанда елдің емес, өз болашағын көбірек ойлағаны рас.

Не болса да, жаңа премьерге Қазақстан дамуы үшін өз мансабын конға тігіп, бәрімен жұлысып, ұнамайтын шешімдер қабылдап, "жексұрын" болудан басқа амал қалмай отыр. Әйтпесе, Қазақстанның дамуы қиын.

Тоқаев шын реформатор-премьер таба ала ма? Алғашқы сигналды осы сәрсенбі естиміз. Сол кезде Үкіметтің кеңейтілген отырысы өтеді.

DALA INSIDE алғашқы инсайдтарды ертерек ала бастауы тиіс. Бізбен бірге болыңыздар 👇

https://t.me/dalainside

🎬 Алматылықтар "Достық Плазадағы" Cinemax кинотеатрына бойкот жариялады

Дәл осы кинотеатрда "Мастер мен Маргарита" фильмінің алдында Ресейдің Украинаға басып кіруін насихаттайтын, соғыс туралы пропагандистік көркем фильмнің жарнамасы көрсетілген. Оған біраз көрермен наразы болды.

Бірнеше Алматы тұрғыны келесі жолы жұмыртқа алып барып, сол пропагандистік фильмнің жарнамасы көрсетілсе, экранға жұмыртқа лақтырамыз деген пікірлерін әлеуметтік желіде жариялай бастады.

Кинопрокатқа қатысы бар DALA INSIDE дереккөзі жарнаманы кинотеатр өз бастамасымен көрсетіп отырған жоқ дейді.

"Ресейлік прокат компаниясы сол "Мастер мен Маргарита" фильмінің басына, пропагандистік фильм жарнамасын пленкаға басып жіберген. Яғни, қиып тастай алмайсыз. Қиындық сонда болып тұр"

Оның әдейі істелген қадам екенін байқауға болады. "Мастер мен Маргаритаға" ресейдің Z пропагандистері қарсы болып отыр. Фильмде украин актерлері де ойнаған. Және фильмнің өзін соғысқа қарсы болған режиссер Михаил Локшин түсірген.

Қалай болғанда да, Мастер мен Маргаритадағы Воланд сияқты, Достық Плазаны да әзәзіл айналдыра бастады. Кинотеатрға тез шешім қабылдап, арнайы мәлімдеме жасамаса, алматылықтар бойкоты кірісті кем дегенде 30 пайызға түсіріп тастай алады. Және "Z кинотеатр" деген стереотип пайда болып, беделі түсуі мүмкін.

DALA INSIDE тақырыпты бақылауға алды. Ал егер киноны прокаттан алып тастаса, Россотрудничество да іске араласады деп күтіп отырмыз. Бізбен бірге күтіңіздер 👇

https://t.me/dalainside

🌪️ Қожаназаров атындағы интригалар: Тамабекті министрліктен кетірген жел қайдан соқты?

Бүгін ең жас вице-министр, отыздағы ауыл шаруашылығы вице-министрі Әбілхайыр Тамабек қызметінен босады. Ол Жамбыл облысына қайтады дейді, DALA INSIDE дереккөзі.

"Тамабек Сол жағалаудағы тусовкаға сыймады. Себебі жер "лоббистерімен", латифундистермен ашық күрес жүргізді. Әсіресе Respublica партиясына ұнамай қалды"

Жас қасқыр Әбілхайыр Тамабек Мәжілістің кезекті бір отырысында Respublica партиясының төрағасы, аграрлық комитет мүшесі Айдарбек Қожаназаровпен ашық тартысқа кетіп еді. Сол залдағы тартыс кабинетаралық интригаларға ұласқанын естігенбіз. Қожаназаров қатты ренжіп, Мәжіліс депутаттарынан біртіндеп қол жинап, Тамабектен құтылудың жолдарын іздеген. Тіпті, көпшілік алдында кешірім сұратуға да тырысқан көрінеді.

Сол оқиғадан кейін Тамабек Мәжіліс жиналыстарына қатыспайтын болды. Ал депутат Қожаназаровтың жер мәселесіндегі әлсіз тұсы - басқаруындағы 400 мың гектар жері болып отыр. Тамабек қызметтен кеткеннен кейін жиналысқа келген министр, вице-министрлерді "сабап алуға" үйренген депутаттардың тынысы кеңейді.

Ақпарат құралдары экс вице-министрдің екі жылда мемлекет меншігіне он миллион гектар жер қайтару, сол жерді шаруаларға әділ бөлу, субсидия саласындағы өзгерістерге батыл қадамдар жасау сияқты істермен есте қалғанын жазып жатыр. Президент Тоқаев батыл қадамдар керек десе де, қой терісін жамылып Парламентке кіріп алған латифундистерге "батыл қадамдар" мүлде ұнамады.

DALA INSIDE Тамабек тағдырын бақылайтын болады. Бізбен бірге болыңыздар 👇

https://t.me/dalainside