🦷 Адамдарға емес экономикаға: мемлекет зейнетақы ақшасын пайдалануды шектей бастады

Көптеген стоматология және емханалар үшін Біріңғай жинақтаушы зейнетақы қорындағы азаматтар салымын пайдалану күрт қиындап кеткен.

БЖЗҚ-дан экономикаға 1,5 триллион теңге қаржы құю бойынша шешім шыққалы бері операторлар, оның ішінде Отбасы банк стоматология мен емханаларға ақша аудару процесіне қосымша бақылау енгізді дейді, DALA INSIDE дереккөзі.

Дереккөз пайымдауынша, операторлар БЖЗҚ-дан бейресми тапсырма алғанға ұқсайды. Нәтижесінде БЖЗҚ-дан сыртқа кететін ақша ағыны баяулауы тиіс. Себебі, экономикаға 1,5 триллион теңге бөлініп жатқан кезде, салымшылар өтініші қабаттасып, ол зейнетақы қорындағы ақшаның азайып қалуына әкелуі ғажап емес.

БЖЗҚ-қанша ақша бар?

Қазіргі таңда қорда 18,1 триллион теңге салымдар жинақталған. Одан жыл басынан бері 63 миллиард теңге алынды. Оның ішінде 15 миллиард тенге зейнетке жаңа шыққан азаматтарға төленді. 18 миллиард теңгені азаматтар баспана алуға, ипотека үшін шешіп алса, 9,1 миллиард теңгені тіс және денсаулықты жақсартуға пайдаланған.

Екі айда баспана мен тіске 27,1 миллиард жұмсалса, бір жылда бұл сома 162 миллиард теңгеден асып кетуі мүмкін. Операторлар ақша аударуды қиындату арқылы, 2024 жылы осы шығынды 100 миллиард теңгеден асырмауға тырысатын болады дейді, дереккөз.

DALA INSIDE бұл жағдайды бақылайтын болады. Бізге жазылып алыңыздар 👇

https://t.me/dalainside

🤏 C какой Стати төлейміз? Қазақстан Стати ісінде "эконом" режимге көшті

Қазақстан Статимен сотта барынша үнемдейтін болады. Енді шетелдік адвокаттар емес, біздің заңгерлердің жұмыс істеу мүмкіндігі қарастырылуда дейді, DALA INSIDE дереккөзі.

11 жылға созылып келе жатқан және қашан аяқталатыны белгісіз Стати ісіндегі соңғы сот шешімі былтыр қыркүйек айында шықты. Нидерланды соты Статидің құны 4 миллиард доллар болатын MG Kashagan B.V. акцияларына қатысты өтінішін қанағаттандырмады. Яғни акцияларға иелік етіп отырған «Самұрық-Қазына» акционерлік қоғамы жеңіске жетті.

«Стати ісі екіге бөлінген. Люксембург, Молдова мен Қазақстанда қылмыстық іс бойынша тергеу бар. Ал Статилер Қазақстанның активін бұғаттау бойынша шағымданған басқа елдерде азаматтық сот процессі өтуде. Мысалы, Нидерландыда азаматтық сот бітті. Ол Қазақстан пайдасында. Швецияда керісінше кімнің жеңгені түсініксіз. Негізгі проблема Люксембургте және ол ERG корпорациясына қатысты», - дейді, DALA INSIDE дереккөзі.

Проблема мынада. Александр Машкевич басқарып отырған ERG S.a.r.l бас компаниясы Люксембургта тіркелген. Анатол мен Габриель Статилер ERG корпорациясының Қазақстанға төлеуі тиіс дивидендін Люксембург соты арқылы 2013 жылы бұғаттап тастаған. Дивиденд арнайы шотта қордаланып жатыр, бірақ оны Қазақстан пайдалана алмайды. Бір сөзбен айтқанда, ERG-дің 40 пайыз үлесін ұстап отырған Қазақстан одан еш пайда көре алмай отыр. Және Қаржы министрлігі ол арнайы шотта қанша ақша қордаланғанын құпия ұстауда.

ERG дивидендтері аз ақша емес. Стати оны бұғаттамағанда біз оны экономикаға құя алар едік. Одан бөлек, 2013-2023 жылдар аралығында Әділет министрлігінің қомақты бюджеті осы Стати ісіне кетіп отырды. Қазір қамауда отырған экс Әділет министрі Марат Бекетаев «Bolashak Consulting Group» компаниясы арқылы біршама қаржыны сыртқа шығарып, ары қарай ақша қолды болды деген күдік бар.

Bolashak Consulting Group Вашингтонда орналасқан Norton Rose Fulbright заң фирмасы мен Франкфурттық Herbert Smith Freehills халықаралық заң конторасына Стати ісі бойынша әр сағатқа қыруар қаржы төлеп отырған. Жалпы, қазіргі кезге дейін Статимен соттасу үшін 300 миллион доллардан астам қаржы жұмсалды. Оның ең қомақты бөлігін экс министр Бекетаев 2021 жылы жаратқан. Сол жылы Статимен күреске 60,3 миллион доллар шығындалды.

Дереккөздің айтуынша, Қазақстан шетелдік заң фирмалары алған ақшаның қайтпайтындығын біліп отыр. Norton Rose Fulbright пен Herbert Smith Freehills сынды азулы фирмалармен тайталасуға еліміздің күші жетпейді.

Бірақ осы 300 миллион доллардың барлығы олардың қалтасында емес. Арасында Bolashak Consulting Group өз қалтасына тоғытқан қаржы да бар. Сондықтан тергеу органдары Марат Бекетаев пен Bolashak Consulting Group фирмасын кері құстыру бойынша жұмыс істей бастады. Олардан қанша қаржы қайтатыны шамамен мамыр айында белгілі болуы тиіс.

DALA INSIDE Стати мен Бекетаев оқиғасын 2022 жылдан бері бақылап келеді. Бізбен бірге болыңыздар 👇

https://t.me/dalainside

⚡ Ғабит Сәтмағамбетов компаниясы үстінен қылмыстық іс қозғау мәселесі көтерілді

«Нұр-Сұлтан Финанс» ЖШС инвесторы Әділбек Ахметов Астана мәслихатының экс-депутаты Ғабит Сәтмағамбетовтің бақылауындағы құрылыс компаниясына қатысты қылмыстық іс қозғамақшы деп жазады, ҚазТАГ ақпарат агенттігі. Компра мәліметінше, осы фирманың құрылтайшысы - Ғабит Сәтмағамбетов.

«Заңгер және бірнеше инвестормен полицияға «Нұр-Сұлтан Финанс» ЖШС-не және жалпы G-Park компаниясына қатысты алаяқтық фактісі бойынша қылмыстық іс қозғау туралы арыз жазуға бардық. Олар бізден бас тартты, содан кейін біз аудандық прокуратураға бардық, олар да бізден бас тартты. Енді біз қалалық прокуратурадан жауап күтеміз», - деді Ахметов ҚазТАГ агенттігіне.

Оның айтуынша, G-Park құрбандары аз емес. WhatsApp-та топта зардап шеккен 600-ге жуық адам бар. Онда видео, прокуратураға жазған хаттар, барлығы жиналған.

Полицияның Сәтмағамбетовтың DALA INSIDE үстінен жазған арызын бірден қабылдап, қылмыстық іс қозғап жібергенін еске салған бастамашыл топ өз арыздарын органдардың қараусыз қалдырғанына таңырқап отыр. Себебі, бұл оқиғада 600-ден астам жәбірленуші, қолындағы сот шешімін орындата алмай жүрген 15-20 адам бар.

DALA INSIDE телеграм арнасы мен ҚазТАГ ақпарат агенттігі осы мәселені бақылауда ұстайды 👇

https://t.me/dalainside

⚡️ Қазақстан жаңа Елтаңбаға жақын

Оның алдында DALA INSIDE жазған Елтаңбаны ауыстыру бойынша инсайдты бүгін Ұлттық құрылтайда Мемлекет басшысы растады.

«Ал Елтаңбамызға қатысты сыни пікірлер айтылып қалады. Оны Кеңес заманындағы Гербке ұқсатып жатады. Тым эклектикалық, күрделі дейді. Мұндай ойды ел ісіне бей-жай қарамайтын белсенді азаматтар ғана емес, мамандар да айтып жүр. Орынды пайымдар ескерусіз қалмауы керек.Ортақ келісімге келген жағдайда арнаулы комиссия құруға болады. Бұл комиссия мәселені жан-жақты қарастырып, қоғамдық талқылау өткізеді. Сосын Қазақстанның жаңа Елтаңбасының жобасын жасауға ашық байқау жарияланады», - деді Президент Қасым-Жомарт Тоқаев.

Оның алдында "Жаңа адамдар" қозғалысы жүргізген сауалнамадан кейін идеологиялық блок Елтаңбаны жаңалау туралы жабық консультациялар өткізген еді. Шынымен де, көптеген азаматтардың Қазақстан Елтаңбасын танымайтындығы анықталды. Сауалнамаға қатысушылардың 70 пайызы Елтаңбамыздың бейнесіндегі жекелеген элементтерінің мәні мен мағынасын түсінбейтінін көрсетті. Сауалнамаға қатысушылардың 30 пайызы ғана алты бірдей ұқсас рәміздер арасынан біздің төл Елтаңбамызды нақтылап, танып көрсете алды. Ал көбісі ұқсас рәміздер арасынан қанатты тұлпары бар өзіміздің елтаңбамызды емес, құстар мен айдаһар бейнеленген өзге рәміздерді көрсеткен.

Қазіргі Елтаңбаға 32 жыл толды. Ол 1992 жылы қабылданған еді. Авторлары – белгілі сәулетшілер Жандарбек Мәлібеков пен Шот-Аман Уәлиханов.

Оның орталық геральдикалық элементі – көгілдір түс аясындағы шаңырақ (киіз үйдің жоғарғы күмбез тәрізді бөлігі) бейнесі. Шаңырақты айнала күн сәулесі секілді тараған уықтар шаншылған. Шаңырақтың оң жағы мен сол жағына аңыздардағы қанатты пырақтар бейнесі орналастырылған. Жоғарғы бөлігінде – көлемді бес бұрышты жұлдыз, ал төменгі бөлігінде «Qazaqstan» деген жазу бар. Жұлдыздың, шаңырақтың, уықтардың, аңыздардағы қанатты пырақтардың бейнесі, сондай-ақ  «Qazaqstan» деген жазу – алтын түстес.

Әрине, әзірге жаңа Елтаңба нақты қандай болуы керек деген мәселеде ортақ көзқарас жоқ. Бұл бойынша қызу талқылау жүретіні сөзсіз. Бізге жазылып алыңыздар 👇

https://t.me/dalainside

⚖️ Bolashak Consulting Group дәуірі бітті. Енді біз Brown Rudnick фирмасымен жұмыс істейміз

Экс Әділет министрі Марат Бекетаев қамауға алынғаннан кейін 2015-2022 жылдар аралығында Қазақстанның құқығын сыртқы юрисдикцияларда қорғау ісін басқарған «Bolashak Consulting Group» келмеске кетті. Және Марат Бекетаевтың тергеу барысында беріп жатқан мәліметтері жинақтала келе, Bolashak Consulting Group компаниясына қатысты қылмыстық іс қозғалуы да ғажап емес.

Bolashak Consulting Group-ты юрист-консультант Ғани Битенов басқарады. Ол сонымен қатар Herbert Smith Freehills заңгерлік конторасының Франкфурттағы бөлімшесінде қызмет етеді. Әділет министрлігін 2015-2022 жылдар аралығындағы «Bolashak Consulting Group» транзакциялары қызықтырып отыр. Сол кездері сыртқы сотқа бөлінген бюджеттің көбісі Анатол мен Габриель Статилермен соттасуға жұмсалған. Статилер ісі бойынша бізге Herbert Smith Freehills и Norton Rose Fulbright заңгерлік фирмалары адвокаттық қызмет көрсеткен болатын.

Енді Қазақстан Brown Rudnick халықаралық заңгерлік фирмасымен 2024 жылдың аяғына дейін келісім-шартқа отырды дейді, DALA INSIDE дереккөзі. Фирма FARA заңы аясында тапсырған декларациясында өзін «АҚШ пен Ұлыбритания сот істері мен арбитражында өкілдік қызметін атқарады» деп көрсеткен.

Онымен бірге Greenberg Traurig заңгерлік фирмасы да ҚР Әділет министрлігінің Вашингтонтағы мүддесін қорғауын жалғастыратын болады. Ол заңгерлік қызметтерге қатысты. Ал лоббистік жұмысқа келсек, Қазақстан ол жағын қысқарта бастады. 2023 жылы Әділет министрлігі американдық лоббистік конторалар - Mercury Public Relations пен RJI Capital-мен келісім-шартты бұзды. RJI Capital кезінде Қазақстан билігінің тапсырмасымен қашқын олигарх Мұхтар Әбілазов пен Виктор Храпуновтарды қудалаған болатын.

Қазақстанға лоббиға қатысты позициясын өзгерту керек. Себебі, «Ескі Қазақстан» билігіндегілер лоббистік фирмаларды тек жеке басы үшін пайдаланған болатын. Ал мемлекеттік мүдде, біздің табиғи байлықтар бойынша жасалған контракттардың шарттарын қайта қарау, визаны жеңілдету, Дүниежүзілік сауда ұйымы, ЕАЭС сынды ұйымдардағы позицияны жақсарту сияқты жұмыстар мүлде ұмыт қалды.

DALA INSIDE осы тақырыпты әлі де зерттей береді 👇

https://t.me/dalainside

🇷🇺💥 Қазақстандағы релоканттардың Путинді қолдамауы Кремльдің ашуын келтірді

Кремль Ресей Федерациясы Президенті сайлауының шет елдердегі қорытындысы бойынша нақты шешімдер қабылдайтын болады. Экзитпол дерегінше, сайлауда жеңіске жеткен Владимир Путинге Алматыда сайлауға қатысқан Ресей азаматтарының небары 9 пайызы ғана өз дауысын берген. Оның қарсыласы Владислав Даванков 69% жинаған.

Астана да оңып тұрған жоқ, ондағы релоканттар да Путинге дауыс беруден бас тартып, бюллетеньдерді бүлдіру не Даванковқа дауыс берумен айналысты.

Осыған қатысты, Кремль Ресейдің Астанада отыратын Қазақстандағы елшісі Алексей Борадавкин мен Алматыдағы бас консулы Дмитрий Тураевпен консультациялар өткізетін болады дейді, DALA INSIDE арнасының Мәскеудегі дереккөзі.

Талқыланатын негізгі бағыт - релоканттарды бақылау, олардың Қазақстанда антипутиндік ұйымдар құрып, жергілікті халықты Ресейдің қазіргі билігіне қарсы қоюын болдырмау. Бұл ретте, дипломаттарға ФСБ мен Россотрудничество да барынша көмектеседі деп ойластырылған.

Осыған орай, Қазақстандағы Ресей релоканттарының арнайы реестрін жасау мәселесі талқыланатын болады. Реестрде әр релоканттың саяси көзқарасы, қазіргі режимді қолдайтыны/қолдамайтындығы тіркеліп тұрмақ.

Ресей Президенті сайлауының нақты нәтижелері 20 наурыздан кейін шығады. Алдын-ала статистика бойынша, Владимир Путин 80 пайыздан астам дауыс жинаған. Қазақстан Президенті Қасым-Жомарт Тоқаев ресейлік әріптесін ресми құттықтады.

Путин Ресейді 2000 жылдан бері билеп келеді. 2004, 2008, 2012, 2018 жылдары төрт рет президенттікке қайта сайланды. 2020 жылы ол Конституцияны өзгертіп, 2024 жылы сайлауға түсу мүмкіндігін алды. Енді Путин 2030 жылға дейін Ресейді ресми түрде басқаратын болады.

DALA INSIDE Кремльдің Қазақстанның ішкі саясатындағы маневрларын сараптап отыр. Бізбен бірге сараптаңыздар 👇

https://t.me/dalainside

💣 Ресей әскери рельске толық отырмақ

"Крокус Сити холлдағы" ФСБ-нің көлеңкесі көріне бастаған "теракттан" кейін бес жұмыс күні ішінде Ресейде Федерация Кеңесінің кеңейтілген отырысы өту тиіс дейді, DALA INSIDE дереккөзі. Онда "соғыс жағдайын" жариялау туралы ұсыныс әзірленіп, президент Владимир Путинге жолданады. Ал Путин өз кезегінде Қауіпсіздік кеңесін шақырып, ресми соғыс жариялау бойынша ұжымдық шешім қабылдатпақ. Мәселені 8 сәуірге дейін реттеу жоспарланған.

Сонда бұған дейін өздері арнайы әскери операция деп атап келген Украинадағы агрессия ресми соғыс статусын алады. Одан кейін не өзгермек?

Соғыс жағдайында Кремль өзінің қарсыласын Украина емес, "бізге жау блок" (НАТО + санкцияға қосылғандар) деп аясын кеңейтпек. Және кез-келген шешім қабылдауға, халықпен санаспауға мүмкіндік алады.

Басты мақсат: қауіпсіздік белдеуі мен тактикалық ядролық қару қолдануды ақтап алу. Ол үшін Ресей суверенитетіне қауіп төнді деген себеп керек болып тұр.

Қауіпсіздік белдеуі - жаңа соғыстарға апаратын жол дейді, дереккөз. Ресей өз аумағын қорғау желеуімен шекарасынан 50 шақырым ары территорияларға, яғни көрші елдердің аумағына кіріп, арнайы қауіпсіздік зоналарын құруы мүмкін.

Ондай жағдайда Калининград облысының қауіпсіздігі деген сылтаумен Литваны басып алып, құрлық арқылы шектесетін коридор құра алады. Арғы жағындағы Польшамен мәселені тактикалық ядролық құрал арқылы шешу жоспарланған. Оңтүстік жақтан қауіпсіздік керек деген сылтаумен Қазақстан аумағына да еніп кетуге формалды желеу табылады.

Осыған орай Қазақстан да дереу Қауіпсіздік Кеңесінің отырысын өткізбек дейді, DALA INSIDE дереккөзі. Ресми Ташкент те осы аптадан қалдырмай күштік құрылымдар басшыларын жинайды. Тоқаев пен Мирзиеев осы қауіпке қатысты күш біріктірмек. Қазақ-өзбек арасындағы әскери уағдаластықтар Әзірбайжан Президенті Илхам Гейдарұлы Әлиевке де хабарланып отыратын болады.

Сайлау өткізіп, 6 жыл мерзім алған Путин НАТО-мен Еуропада бетпе-бет келуге дайын. Оны АҚШ-тың Еуропадағы соғысқа қаншалықты араласа алатыны қызықтырады. Республикалықтар жеңіске жетсе, Путинге олардың АҚШ қорғанысына ғана көңіл бөліп, сыртқы мәселеде шаруамыз жоқ деген ұстанымы ауадай қажет. Ол үшін Дональд Трамп АҚШ президенті болуы тиіс.

Крокустағы теракт осы үлкен пазлдың бірінші бөлшегі ғана. Енді соғыс режимі жарияланып, Трамп президент болса, пазл жинала бастайды.

Адамзат ақыры болатын апокалипсиске аз уақыт қалды. Сондықтан DALA INSIDE арнасына жазылып үлгерген жөн👇

https://t.me/dalainside

💣 КТК-ға биыл тиіспейміз. Астана Киевті Вашингтон арқылы әрең ұстап отыр

Қазақстан жабық дипломатиялық каналдар арқылы Киевтің Каспий құбыр консорциумының Новороссийсктегі терминалдарын бомбыламау туралы уәдесін алды. Оған Шеврон лоббиі аясында жүретін АҚШ конгрессмендері ат салысқан.

АҚШ сенаторы Стив Дэйнс негізінен осы мәселе бойынша Астанаға ұшып келді дейді, DALA INSIDE дереккөзі. Түйткілді сұрақ Президент Тоқаевпен жабық есік жағдайында талқыланған.

Украинаның 2024 жылғы ұрыс бағдарламасы Ресейдің отын-жанармай инфрақұрылымын жоюды көздейді. Осыған сәйкес, қазір дрондар арқылы Ресейдегі ірі мұнай өңдеу кешендері мен жанармай терминалдарына соққы беріле бастады. Новороссийскідегі КТК мұнай терминалы да әу баста осы тізімге кірген болатын. Себебі, ол арқылы Ресей 2023 жылы экспортқа 7,4 миллион тонна мұнай шығарып, одан түскен пайданы соғыс қажетіне жаратты.

Бірақ бүкіл Қазақстан экономикасы КТК құбырына қарап отыр. Еліміз 2023 жылы 90 миллион тонна мұнай өндіріп, оның 70,5 миллион тоннасын экспортқа жіберген. Соның 56 миллион тоннасы КТК арқылы Еуропаға кетті. Теңіз кенішінен 27,4 миллион тонна, Қашағаннан 17,8 миллион тонна, Қарашығанақтан 9,6 миллион тонна КТК құбырына құйылды. Бір сөзбен айтқанда, КТК құбырына дәл қазір балама жоқ. Новороссийскідегі терминалға бомба түссе, қазақ экономикасы тоқтайтын болады. Одан Shevron, Shell, Eni сияқты алпауыттар да орасан зиян шегеді.

КТК Ресей территориясы арқылы жүретіндіктен, осы елдің құбырға ықпалы зор. Ресей Каспий құбыр консорциумының "Транснефть" арқылы 24%, "МК КТК Компани" арқылы 7%, LUKARKO арқылы 12,5% үлесіне иелік етеді. Сонда КТК-ның 43,5 пайызы де-факто Ресейдің қолында. Украинаның КТК-ны Ресейдің стратегиялық активі деп тауып, жойғысы келетіні де осыдан болып отыр.

Киев Астананы ренжіткісі келмейді дейді, DALA INSIDE дереккөзі. Бірақ 2024 жылы Ресей КТК арқылы кемінде 8 миллион тонна өз мұнайын айдаса, онда Украина оған көз жұмып қарап отыра алмайды.

АҚШ тарапы КТК жүйесі арқылы қазақ мұнайын тасымалдауды көбейтіп, "орыс мұнайына құбырда орын қалдырмайық" деген ұсыныспен шыққан. Сонда Киев тынышталатын болады.

Бірақ КТК құбырын қазақ мұнайымен толтыруда проблема бар. Анығын айтсақ, бізде ондай көлемде мұнай жоқ. 2023 жылы КТК құбыры модернизациядан өтіп, тасымалдау қуаты жылына 83 миллион тоннаға дейін өсті. Соның 72,5 миллион тоннасын КТК Қазақстанға бөліп отыр. Бірақ біз сол 72,5 миллион тонна мұнайды құбырға құя алуымыз неғайбыл. Тіпті осы көлемді әрең толтырсақ та, КТК қуатының артық 10 миллион тоннасы қалады. Оны биржадан орын алған ресейлік мұнай компаниялары бөліп алмақ. Демек Киев тағы да "температурить" ете бастайды.

Біз неге КТК-дағы 72,5 миллион тонна мұнай квотасын толтыра алмаймыз? 2024 жылы Қазақстан максимум 90,3 миллион тонна мұнай өндіреді. Оның 2 миллион тоннасын уәде бойынша "Баку-Тбилиси-Джейхан" құбырына құюымыз керек. "Дружба" құбыры арқылы Германияға кемі 1 миллион тонна жіберу контракталған. 9 миллион тонна "Атырау-Самара" арқылы кетеді. Қытайға "Атасу-Алашанькоу" бойымен 1,2 миллион тонна баруы керек. Сонда 77,1 миллион тонна қалады.

Былтыр ішкі нарықтың мұнайға деген сұранысы 18 миллион тоннадан асты. Биыл кемінде 18,5 миллион тонна болуы тиіс. Сонда біздің КТК-ға бере алатын көлеміміз 60 миллионнан тонна шамасында ғана болмақ.

Киевке Вашингтоннан "КТК-ға тиіспе" деген сигналдар көп келді. Бірақ келесі жылы жағдайдың қалай өзгерері белгісіз. Стив Дэйнс Астана ұшып келген соңғы сенатор емес екенін ішіміз сезеді.

DALA INSIDE қазақ экономикасының күретамырын бақылап отыр. Сіз де осындай шытырман геосаясаттан хабардар болыңыз 👇

https://t.me/dalainside

⚖️ Деболатизация: "Алтын ордада" ауқымды реформа жүруде

Орталық Азияның ең ірі сауда жүйесі, ел экономикасының күретамыры "Алтын Орда" базарында әділдік орнап, барлық процестер цифрландырылды. Ол өз кезегінде бюджет табысын толықтырып, саудагерлердің ертеңге деген сенімін нығайтып отыр.

"Big City Market" басқарушы компаниясы келгелі бері, базарда ауқымды реформалар жүруде. Қазіргі уақытқа дейін, базар модернизациясына 600 миллион теңге жұмсалды. 2024 жылға да келелі инвестициялар көзделген.

Не істелді?

Көліктердің кіруі мен тұрағы цифрландырылды. Қазір төлем ақысы QR код пен POS терминалдар арқылы жүзеге асуда. "Алтын Орда" басқармасы арнайы LED экранды іске қосты. Әр көліктің мемлекеттік нөмірі мен уақыт сессиясы көрсетіліп тұрады. Тауарын сатқысы келген әр көлікке жол ашық. Тек заңды ақысын төлесе болғаны. Одан бірден мемлекетке салық есептеледі. Сауда жасап тұрған кәсіпкерлер де ақыны QR, POS терминал арқылы қабылдап, салықтарын төлеуде.

Қауіпсіздік мәселесі де цифрландырылды. 300 камера, 8 ПТС, 360 градусты камералар жұмыс істеуде. Адамды бет әлбетінен анықтайтын жүйе нәтиже беруде. Ол ұры-қарылар базасына қосылған. Ондай ұры пайда болса, камераға ілінсе, бірден құқық қорғау органдарына сигнал жіберіледі.

Аренда, оның төлемі, келісім-шарт сынды кәсіпкерлермен жұмыс цифрлануда. Қазір altynordaresmi.kz сайты пилотты режимде іске қосылды. Ол ірі базардың еговы сияқты болмақ. Енді барлық жұмыс онлайнда атқарылады.

"Алтын Орда шекарасын кеңейтпек. Жаңа үшінші павильон бой көтеруде. Ол қосымша жаңа мың сауда орнын жасақтайды. Одан кейін төртінші павильон салынбақ. Жаңа қоймалар бар", - дейді "Big City Market" ЖШС директоры Данияр Дүзбаев.

Базарда болашақта 10 мыңнан астам толық цифрланған сауда орны жұмыс істемек. Базар күніне 100 мың келушіні қабылдай алмақ. Әр операция ашық өтіп, одан салық төленетіндіктен, "Алтын Орда" сауда кешенінің ел экономикасын дамытудағы рөлі бірнеше есеге артатын болады.

Осы жұмыс бірден нәтиже берді. Болат Назарбаев дәуірінде, 2014-2022 жылдары "Алтын Орда" 9 жыл ішінде 250 миллион теңге салық төлесе, базардың иесі ауысқалы 500 млн теңгеден аса салық берді. Яғни, соңғы екі жылда бұрынғыдан 14 есе көп салық жиналатын болған.

DALA INSIDE Алтын Ордадағы реформаларды бақылап отыр.

Осы тақырып төңірегіндегі келелі репортаж 👇

https://youtu.be/fnVykvZJKlc

⚡ Шұғыл амал: Бозымбаевтың вице-премьер болуы еш сценарийде қарастырылмаған еді

Қазақстандағы тоғыз облыстың су астына кетуі Қытайдағы форумнан оралған Президент Қасым-Жомарт Тоқаевтың форс-мажор жағдайында кадрлық шешім қабылдауына ықпал етті. Жексенбі демалыс екеніне қарамастан президент кеңесшісі Қанат Бозымбаев Премьер-министрдің орынбасары қызметіне тағайындалды.

"Бозымбаев аймақтық саясатқа, тұрғын үй-коммуналдық шаруашылық жүйесіне, төтенше жағдайлар мен су ресурстарына жауапты болады. Әсіресе соңғы екі бапқа басты күш салу тапсырылды", - дейді, DALA INSIDE дереккөзі.

Бұл бағытқа бұған дейін Премьер-Министрдің бірінші орынбасары Роман Скляр жауап беретін. Роман Васильевич профессиясын ауыстырмады. Қатаң сөгіс алғаны болмаса, ол да қызметінде.

"Склярға өзі жақсы білетін өндіріс, автопром саласы қалдырылды. Шын айтқанда төтенше жағдаймен күресу оның профилі емес еді", - дейді, дереккөз.

Бозымбаевтың келуімен Үкімет құрамы күшейді. Ол зардап шеккендермен жұмыс, сынған дүниені қалпына келтіру, ақша бөлгізу, жер-жердегі жұмысты ұйымдастыру сияқты жұмыстарға жақсы маманданған. Бұл бағыттағы оның стилі марқұм Бердібек Сапарбаевқа ұқсайды.

Негізі, Бозымбаевқа қатысты жоспар басқа еді. Бірақ топан су барлық жоспарды бұзды. Мемлекет басшысы жақсы көмекшіден айрылды. Есесіне Үкімет аймақтармен жұмыс істей алатын вице-премьермен толықты.

"Бозымбаев биылғы апаттың салдарын реттеп, келесі жылы еріген қар суы мен жаңбыр суының барлығы тоғандар мен су құймаларына жиналатындай система жасауы тиіс", - дейді, дереккөз.

Оның ойынша, судың барлығы жерге сіңбей, ағып кеткендіктен, жазда ауыл шаруашылығы саласында үлкен апаттар басталады. Ауыл шаруашылығы министрі Айдарбек Сапаровқа үлкен сынақ келе жатыр.

Бұл жолғы "цунами" үкіметтің тең жартысының жаза арқалауына алып келді. Шұғыл кеңес қорытындысы бойынша Премьер-Министрдің бірінші орынбасары Роман Скляр, Су ресурстары және ирригация министрі Нұржан Нұржігітов, Атырау облысының әкімі Серік Шәпкенов, Ақмола облысының әкімі Марат Ахметжанов, Алматы облысының әкімі Марат Сұлтанғазиев, Павлодар облысының әкімі Асайын Байханов пен Абай облысының әкімі Абай Нұрлан Ұранхаевқа қатаң сөгіс берілді. Ал Батыс Қазақстан облысының әкімі Нариман Төреғалиев, Ақтөбе облысының әкімі Асхат Шахаров және Қостанай облысының әкімі Құмар Ақсақалов қызметтік талапқа толық сай еместігі туралы ескертулер алды.

Премьер-Министр Олжас Бектенов су тасқынынан зардап шеккендердің барлығына көмек көрсетіліп, шығын өтелетінін айтты. Қазір оның көлемі есептеліп жатыр.

DALA INSIDE су мен Үкімет арасындағы шайқасты бақылап отыр. Бізбен бірге болыңыздар 👇

https://t.me/dalainside

💥 Полиция Сәтмағамбетов компаниясына қатысты қылмыстық іс қозғады

Астана мәслихатының бұрынғы депутаты Ғабит Сәтмағамбетов құрылтайшы болып табылатын "Нұр-Сұлтан Финанс" ЖШС үлескерлерінің арызы бойынша қылмыстық іс қозғалды. Бұл туралы ҚазТАГ жазады.

"Астана қаласы Есіл ауданының полиция басқармасы үлескерлердің өтініші бойынша ҚР ҚК 190-бабының 2-бөлігі (алаяқтық) бойынша сотқа дейінгі тергеп-тексеру жұмыстарын жүргізуде. Оның негізінде істің мән-жайын анықтау үшін тиісті шаралар қабылданады. Қазіргі уақытта барлық қажетті тергеу әрекеттері жүргізілуде. Нәтижесі бойынша кінәлі тұлғалардың іс - әрекеттеріне құқықтық баға беріліп, аталмыш іс бойынша шешім қабылданатын болады", - деп жауап берді Ішкі істер министрлігі ҚазТАГ редакциясының жолдаған сауалына.

Оның алдында, «Нұр-Сұлтан Финанс» ЖШС инвесторы Әділбек Ахметов Астана мәслихатының экс-депутаты Ғабит Сәтмағамбетовтің бақылауындағы құрылыс компаниясына қатысты қылмыстық іс қозғамақшы деп жазған болатынбыз. Компра мәліметінше, осы фирманың құрылтайшысы - Ғабит Сәтмағамбетов.

"Заңгер және бірнеше инвестормен полицияға «Нұр-Сұлтан Финанс» ЖШС-не және жалпы G-Park компаниясына қатысты алаяқтық фактісі бойынша қылмыстық іс қозғау туралы арыз жазуға бардық. Олар бізден бас тартты, содан кейін біз аудандық прокуратураға бардық, олар да бізден бас тартты. Енді біз қалалық прокуратурадан жауап күтеміз", - деген еді, сол кезде Ахметов ҚазТАГ агенттігіне.

Ахметовтың айтуынша, G-Park құрбандары аз емес. WhatsApp-та топта зардап шеккен 600-ге жуық адам бар. Онда видео, прокуратураға жазған хаттар, барлығы жиналған.

Полицияның Сәтмағамбетовтың DALA INSIDE үстінен жазған арызын бірден қабылдап, қылмыстық іс қозғап жібергенін еске салған бастамашыл топ өз арыздарын органдардың қараусыз қалдырғанына таң қалған еді. Себебі, бұл оқиғада 600-ден астам жәбірленуші, қолындағы сот шешімін орындата алмай жүрген 15-20 адам болды. Сайып келгенде іс оңынан туып, полиция олардың арызын қараусыз қалдырмады.

DALA INSIDE телеграм арнасы мен ҚазТАГ ақпарат агенттігі осы қылмыстық істі бақылауда ұстайды 👇

https://t.me/dalainside

🇺🇲 АҚШ елшілігі мен ЦРУ Қазақстанмен басқаша ойнау туралы шешім қабылдады

Теңіз кенішіне қатысты аймақтық ойыншылар, оның ішінде Ресейдің амбициясы ояна бастағандықтан, американдықтар да қазақ мұнайының басында қала беру үшін ақырына дейін күреспек ниетте. Және түрлі қитұрқы жолдардан да қашпайды.

"Қысым екі бағыт бойынша жүрмек. Бастысы - деңгейі жоғары саяси кездесулер. Сенаторлар жиі келе беретін болады. Және Қазақстан басшылығын Вашингтон жиі шақыртпақ. Екінші қосымша бағыт - грантта отырған үкіметтік емес ұйымдар мен БАҚ арқылы демократия мәселесінде қоғамдық қысым көрсету" - дейді, DALA INSIDE дереккөзі.

Теңізшевройл АҚШ-тың еліміздегі басты экономикалық рычагы болып келеді. Ресей басты ықпал ету тетігі ретінде КТК құбырын таңдаса, Қытай уран мен транзиттік жобалар арқылы Қазақстанды байлап, матап отыр.

АҚШ Қазақстандағы Ресейге қарсы жұмысын паралельді импортты толық шектеу мен санкцияның орындалуын арқылы жүргізсе, Қытайға қарсы балансты Шыңжаңдағы лагерьлер мәселесін ұмыттырмау арқылы реттеуде.

"Осы орайда ЦРУ тарапынан біздегі биліктің жоғарғы эшелонында отырған адамдарды уыстан шығармау үшін, олардың есеп-шоттары, транзакциялары бойынша ақпарат жиналған. Сырттағы активтерді кез-келген уақытта бұғаттау мүмкіндігі бар АҚШ осы опциясын кез-келген елдің билігіне қарсы ұтымды пайдаланады дейді", - дереккөз.

АҚШ Қазақстан үшін шантажист мемлекетке айнала ма? Теңіздегі контракт аяқталатын 2033 жылға жақындап қалған сайын, Вашингтонның маскасы сыпырыла бастамақ. Егер ЦРУ түрлі ойындар бастаса, американдықтарға демократия емес, тек мұнай керек екені анықталатын болады. Қадірі кеткен "демократия" деген термин АҚШ қолында тек желеу, түпкі мақсатқа жету құралы болып қала бермек.

DALA INSIDE ЦРУ мен АҚШ елшілігі қадамдарын да байқап отырмақ. Әдемі ертегіге сіздер де сене бермеңіздер 👇

https://t.me/dalainside

🌱 ҚазМұнайГаздың қолдауымен Арал теңізінің құрғаған табанына 4,4 млн-нан астам сексеуіл көшеттері егілмек

5 сәуірде ҚМГ Басқарма төрағасы Мағзұм Мырзағалиев, Қызылорда облысының әкімі Нұрлыбек Нәлібаев, сондай-ақ Экология және табиғи ресурстар вице-министрі Нұркен Шәрбиев Арал теңізінің құрғаған табанына сексеуіл көшеттерін отырғызу жобасына қатысты.

Бұл жоба Мемлекет басшысы Қасым-Жомарт Тоқаевтың елді көгалдандыру жөніндегі экологиялық бастамасын қолдау мақсатында іске асырылып отыр.

«Қазақ халқы сексеуіл ағашын ежелден қасиет тұтқан. Табиғаттың қорғаны, тіршіліктің жаңаруын білдіретін бұл өсімдіктің бағасы бөлек болған. Біз кәсіпорындарымыз орналасқан өңірлерді көгалдандыру жұмысына белсенді атсалысып келеміз.
ҚМГ құрғаған Арал түбінде 15 мың гектар алқапқа 4 миллионнан астам сексеуіл көшетін отырғызу бойынша міндеттеме алды. Осылайша, компанияның жасыл экономиканың дамуына және табиғатты болашақ ұрпақ үшін қорғап қалуға қосқан үлесін арттырамыз. Сондай-ақ бұл — тұрақты даму қағидаттарын берік ұстанатынымыздың іс жүзіндегі көрінісі», — деді Мағзұм Мырзағалиев.

Егілген сексеуіл көшеттері Арал теңізінің құрғау салдарынан жыл сайын пайда болатын шаң мен тұздан қорғауға көмектеседі. Сонымен бірге бұл өңірдегі жануарлар мен өсімдіктер әлемін сақтап қалып, шөлейттену процесін баяулатуға мүмкіндік береді.

Осылайша, ҚазМұнайГаз еліміздің экономикалық дамуына үлес қосып қана қоймай, әлеуметтік салаға және экологиялық жобаларға көрсеткен қолдауын арттырып отыр.

Жобаны ҚР Экология және табиғи ресурстар министрлігінің Орман шаруашылығы және жануарлар дүниесі комитетіне қарасты «Республикалық орман селекциялық тұқым өсіру орталығы» іске асыратын болады.

Жалпы, «ҚазМұнайГаз» компаниялар тобы елімізді көгалдандыру ісіне өз үлесін қосып, өңірлерде ағаш егуді дәстүрге айналдырған. Мысалы, 2023 жылы ҚазМұнайГаз өз күшімен шамамен 40 мың жасыл желек отырғызды.

🏭 Бір рет қана беруге болады. Ары қарай Лукашенко өзі көмектессін

Ресей қажет жағдайда Қазақстаннан 100 000 тонна бензинді резервте ұстауын бейресми каналдар арқылы сұраған болатын, дейді DALA INSIDE дереккөзі. Энергетика министрлігінің ресми хат алмағаны да сондықтан.

Екінші жағынан Беларусь Мозырь мұнай өңдеу зауытының қуаты Ресейдің бүкіл қажеттілігін өтеуге жетеді деп сендіріп отыр. Онымен бірге Минск Мозырьдің күші жетпей жатса Нафтандағы қосымша өңдеу қуаттарын іске қоса аламыз деген ойда.

Ресейге бензин сата бастау Беларусь экономикасына бірден қан жүгіртетін болады. Александр Лукашенконың көп жылдар бергі арманы осы болатын. Қазақстан Беларусь мұнай өңдеу зауыттарының күші жетпей жатса ғана назарға алынбақ.

"Бізде энергоаудит ай сайын жүреді. 100 мың тонна резерв әрине бар" - дейді, дереккөз. "Ресей ЕАЭС аясында ресми сұраса, Астана оның қолын қайтармайды деп ойлаймын. Екінші жағынан, ЕАЭС ортақ энергетикалық нарығы іске қосылмады. Яғни сұраған нәрсені беруге міндеттіміз деген шарт жоқ".

Наурызда украин дрондары Ресейдің мұнай зауыттарына дамылсыз шабуыл жасап, көрші елдің мұнай өңдеу әлеуетін 14 пайызға дейін кеміткен. Әзірше Кремль ішкі нарықта жаран-жағармаймен қапту тұрақты, жанармай қоры жеткілікті деп ақпарат таратуда.

Сәуірде Украина мұнай зауыттарына шабулды үдете түсуді жоспарлап отыр. Ол жоспар іске асса, Ресей мұнай өнімдерін экспорттаудан, импорттаушы елге айналуы бек мүмкін. Кремль наурыздан бастап алты айға дейін Ресей аумағынан бензинді сыртқа шығаруға шектеу қойды.

Қазір елімізде халық көп тұтынатын Аи-92 маркалы бензиннің 307 700 тонна қоры бар. Ал Аи-95 маркалы бензин резерві - 58 000 тонна, дизель резерві - 435 300 тонна.

Керек болса, отандық мұнай өңдеу зауыттары қуатын арттыра алады. Дәл қазір күнделікті сұранысты толық өтеуде.

DALA INSIDE бұл нарықты да бақылауда ұстап отыр. Дағдарыс жақындап қалса ескертеміз 👇

https://t.me/dalainside

📺 Дамымай жатқан сала: Қазақстан журналистикасы ірі сот процестеріне дайын емес

Қуандық Бишімбаев процесіндегі алқабилер "утечкасынан" кейін журналистер сот залынан қуылды. Алқабилер құрамы құпия ұсталады және заңмен қорғалады. Ол туралы процеске қатысып жатқан ақпарат құралдарының өкілдеріне алдын-ала ескертілген болатын.

"Елімізге белгілі телеарна сенсация жасаймын деп ережені өрескел бұзды", - дейді, DALA INSIDE дереккөзі. Тексеру жұмыстарының нәтижесінде ол ашық айтылатын болады.

Журналистер тексеру біткенннен кейін сот залына қайта орала алады. Тек ереже бұзған БАҚ не ескерту алады, не процестен аластатылмақ. Оның шешімін судья Айжан Құлбаева шығарады. Әзірге тілшілер сотты басқа бөлмеде онлайн қарайтын болды.

Отандық журналистикада белгілі бір регламентке, этикалық нормаларға мойынұсынбау фактілері аз емес. Өзін-өзі реттеу де әлсіз жүреді. Сонымен бірге, нақты фактілер мен сараптамадан көрі жанжалдық хайпке көп арқа сүйеп кеткен. Кезінде брифингтерде министрлер пен әкімдерге су тасқынына дайындық туралы сұрақ емес, "жалақыңыз қанша?", "қолыңыздағы не сағат?" сынды ортақ іске қажетсіз сұрақтар көп қойылды. Оның нәтижесінде мемлекетшіл шенеуіктер тарапынан журналистикаға деген құрмет азайып кетті және аудитория да арзан тақырыптарға бой үйрете бастады.

Журналистика сыртқы регуляторлы фактордан емес, ішкі талаптар мен өзара келісім негізінде дамитын салаға жатады. Сондықтан осы трансформациялық кезеңде бас редакторлардың өз жауапкершілігін түсінуі аса маңызды.

DALA INSIDE журналистердің сот залына оралғанын қадағалап отырмақ. Бізбен бірге болыңыздар 👇

https://t.me/dalainside

🥬 Боялған ақша: тасқын су жемқорлықты шайып кете ме?

Егер Антикор мен Ұлттық Банк мемлекеттік шығынға дайындалған ақшаны екі айда цифрлі теңгеге конверттесе, «Жаңа Қазақстан» биыл орнауы мүмкін дейді, DALA INSIDE дереккөзі.

Су тасқыны аяқталғаннан кейін, оның зардабын жойып, елді мекендерді қайта қалпына келтіруге қыруар қаржы кетпек. Және оның кейбір жемқор шенеуіктер тарапынан талан-таражға түсу қаупі бар.

«Сол жағалау» дәл осы төтенше жағдайдан кейінгі жұмысқа Үкімет резервін жұмсауда цифрлі теңге системасын тест ретінде пайдаланып көру туралы жабық консультациялар өткізуді ойластыра бастады.

Әу баста, цифрлі теңге биылдан бастап жол құрылысында тест ретінде өтуі тиіс болатын. Күптеген төтенше жағдай, және оның салдарына қыруар мемлекеттік қаржы жұмсалуы тиіс болып тұрғандықтан, билік цифрлі теңге күшін уақыт оздырмай осы бағытта тексеріп көру мүмкіндігін қарастыруға көшкен.

«Соңғы сөз Антикор мен Ұлттық Банкта. Технологиялық тұрғыдан дайынбыз ба, барлық сатып алу жүйелері бейімделді ме деген сұрақтарға Ұлттық Банкке қарасты Ұлттық төлем корпорациясы жауап беруі керек. Антикор өз тарапынан жедел анализ жасауы тиіс. Егер Үкімет цифрлі теңгені апаттан кейінгі қайта қалпына келтіруге енгізіп үлгере алмаса, онда ескі жоспарға оралады. Ондай жағдайда цифрлі теңге жол құрылысында пилоттан өтпек», - дейді, дереккөз.

Цифрлі теңге қолма-қол ақша емес. Тура сол теңге, бірақ электронды әмианда болады. Үкімет цифрлі теңгеге белгі соқса (ақшаны бояу), оның қайда аударылғанын, қандай мақсатта жұмсалғанын, кімнің қолында жүргенін көріп отырады. Белгі соғылған цифрлі теңгені ұрлау, ол арқылы жемқорлық жасау өте қиын. Сондықтан болашақта тендерлер, мемлекет тарапынан төленетін барлық қаржы осы цифрлі теңге форматына өтпек.

Су тасқынының зардаптарын жоюға кемінде 250-300 миллиард теңге қажет болуы мүмкін. Бұл 700 миллион долларға тең. Өте үлкен, қыруар ақша. Бюджет дефициті кезінде жемқорлыққа жол беруге мүлде болмайтынын орталық билік жақсы түсініп отыр.

DALA INSIDE жемқорлықпен цифрландыру арқылы күрес барысын бақылап отыр. Бізбен бірге болыңыздар 👇

https://t.me/dalainside

🇺🇲⚡🇷🇺 "Парасат" операциясы: Ресей ТЭЦ-ті реттегеннен кейін Теңіз мұнайына ауыз салады

Қазақстанды толық өз орбитасында қалдыру үшін Ресейге қазақ мұнайына иелік ету қажет. ФСБ жабық докладтарында "Шеврон мен Тоталдың Қазақстанға келуі Ресей лоббиінің салғырттығы" деп бағаланған. Енді алдағы 2-3 жылда Ресей өзі қаржыландыратын ақпараттық агенттер арқылы Қазақстандағы американдықтарға қарсы қаралау кампаниясын жүргізбек.

Батыс облыстарда "Мас американдық Атырауда қазақ қызын зорлады", "АҚШ Қазақстанды "гейлерге тиіспе" деп қысымға алып жатыр" деген тұрмыстық сценарийлер ойластырылатын болады. Дереккөз сөзінше, халық бір шулағаннан кейін, қоғамдық қозғалыс құрылып, ол "Шевронның кетуін" талап етіп, шерулер ұйымдастыру жоспарланған.

Операцияның алғашқы кезеңінде «Парасат» кәсіпкерлер альянсының үйлестіру кеңесі лоббистік қадам жасады. Олар Президентке Ресейдің батыста бұғатталып жатқан активтері есебінен Шеврон, басқа да батыс инвесторларының Теңіз, Қашаған және Қарашығанақ кен орындарындағы үлесін сатып алуды ұсынып отыр. Сонда мұнай саласына қазіргі батыс компанияларының орнына Ресей келсін деген ұстаным айтылды. Онымен бірге, Қазақстан Ресей ақшасын бұғаттан шығара алса, Росатом бізге АЭС салып бере алады деген идея көтеріп отыр.

"Парасат" кәсіпкерлер альянсын даулы кәсіпкер Олег Пак басқарса, оның үйлестіру кеңесінің төрағасы - Мәжіліс депутаты Ермұрат Бапи. Ал мұнайға қатысты бастама ресейшіл сарапшы Олжас Байділдинов тарапынан көтерілген. Оның есебінше, қазіргі контракттар ел бюджеті үшін мүлде тиімсіз.

"Кез-келген утопиялық ұсыныс белгілі бір дәрежеде ой тастауға бағытталған. Оны Парасаттағылар жақсы біледі және маневрларын Ресей мүддесін қорғау үшін жасап отыр", - дейді, DALA INSIDE дереккөзі.

Батыс Ресейдің 300 миллиард долларға парапар алтын-валюта резервін бұғаттады. Оны Ресей басқара алмайды. Бұғатталған ақшаны шешу тіпті сондай шешім қабылданса да бірнеше жылдарға созылатыны белгілі. Сондықтан Ресей бұғатталған қорды Қазақстан атына аударады, сол кезде Батыс ақшаны шешіп бізге береді деген іске аспайтын бос сөз. Батыс ол 300 миллиард долларды ешкімге берейін деп отырған жоқ.

Шеврон контракты аяқталуға жақындап қалған сайын Орталық Азиядағы текетірес бәсі жоғарылап барады. Ресей ашық лоббимен белсенді қимылдай бастады. АҚШ та өз қарымта қадамын жасайтыны анық. Мұндай істе олар өте шебер.

Ресей де, АҚШ та осы ретте қазақтілді депутаттарды пайдаланып қалуға мүдделі. Жыл аяғында қай депутаттың қай алпауыттың етегінен ұстағаны белгілі болмақ.

DALA INSIDE жақында уран, Ескі Қазақстанның Дариға арқылы жасалған кегі мен PRONTO-ның қайта оралуы туралы жазатын болады. Бізден алшақтамаңыздар 👇

https://t.me/dalainside

👼 "Ата, кел" уақытша паузаға қойылды

Ақорда өзінің қатаң реакциясын бергеннен кейін, тик-токта арнайы жүрген "Ата, кел" (Шал, кел) кампаниясы уақытша тоқтатылды.

Биылғы су тасқыны, былтырғы өрт, алдындағы Арыстағы жарылыстар кадрлары жинақталып, "Нұрекеңнің кезінде мұндай болмаған" деген жазбалармен көптеген видео дайындалып, біразы тик-токқа таралып кеткен болатын.

Оны бірінші президент кезінде дәурені жүрген, қазір барлық монополиядан толық айрылған, елдегі активтерінен құтылып жатқан бірнеше кәсіпкер консорциумы ойлап тапқан дейді, DALA INSIDE дереккөзі. Отбасының нақты қатысын дәлелдеу қиын.

16 сәуірде Дариға Назарбаева басқаратын "Нұрсұлтан Назарбаев Қоры" биліктің беделін түсіруге және қоғамдық-саяси жағдайды тұрақсыздандыруға бағытталған ақпараттық науқанға еш қатысы жоғын ресми мәлімдеп үлгерді.

"Нұрсұлтан Назарбаев Қорының қызметінде саяси да, ақпараттық-манипуляциялық та сипат жоқ. Қордың жұмысы тек әлеуметтік жобалар мен азаматтық бастамаларды дамытуға, ел жастарын қолдауға, қайырымдылық көмек көрсетуге бағытталған. Бұған қоса, Нұрсұлтан Назарбаев Мемлекет басшысы Қасым-Жомарт Тоқаевты және оның саяси бағытын әрдайым қолдағанын және қолдайтынын айтамыз. Бұл күндері ел тұрғындары сияқты Тұңғыш Президент те су тасқынынан зардап шеккен жандарға алаңдап отыр. Біз Мемлекет басшысы мен Үкіметтің ел өңірлерінде бұрын-соңды болмаған су тасқынының салдарын жою жөніндегі шарасын толығымен қолдаймыз", - делінген еді, мәлімдемеде.

Дереккөздің айтуынша, "Ата, кел" (Шал, кел) кампаниясы тик-токтағы жастарға бірінші президенттің жағымды образын жасау үшін ойластырылған еді. Назарбаев кезінде Қонаев қалай халықтың жадында болды, Назарбаев та солай қазіргі заман Қонаевы болғысы келеді. Бірақ сценарий оның авторлары ойлағандай өрбімеді.

Енді "Ата, кел" кампаниясының фокусын Назарбаевтың кезінде мынандай болмаған деген апаттардан керісінше оның кезінде осындай жақсы дүниелер істелген (Астананың салынуы, көпірлер, кіші Аралдың толуы) деген салиқалы видеоларға бұру ойластырылуда.

Назарбаев жаңа Қонаевқа айнала ала ма? Оны DALA INSIDE бақылап отыратын болады. Бізге жазылыңыздар 👇

https://t.me/dalainside

💰 Dala Finance жобасы іске қосылды

Қазақстан экономикасы, мұнайгаз, тау-кен, қаржы саласы бойынша шолуларға маманданған Dala Finance телеграм арнасы ашылды.

"Ол біздің DALA экосистемасының құрамына кіреді. DALA INSIDE бағыты барлық экономикадағы құбылыстарды қамти алмайтын болғандықтан, іскерлік бағытты бөлек дамытуға шешім қабылдадық. Әрі жарнама беруші серіктестердің тілегі осындай болды", - деді, экожүйе бас редакторы Думан Бықай.

Қазақтілді жаңа арнаға жазылыңыздар. Алғашқы мың жазылушылар арасында бағалы сыйлықтар ойнатылмақ.

👇