Жұмыссыз әкелердің декреттік демалысы зейнетақы өтіліне қосылатын болды

Мәжіліс қауіпсіз еңбек жағдайларын жетілдіру және жұмыскерлердің құқықтарын қорғауға бағытталған заң жобасын бірінші оқылымда мақұлдады.

Құжаттағы негізгі жаңалықтардың бірі — жұмыс істемейтін әкелердің бала күтімімен өткізген уақыты енді зейнетақы төлемдерін тағайындау кезінде еңбек өтілі ретінде есептеледі. Бұл норманы жүзеге асыру үшін Еңбек кодексі, Денсаулық кодексі және Әлеуметтік кодекске тиісті өзгерістер енгізілмек.

Сонымен қатар заң жобасында:
• келісу комиссияларының жұмысына делдал тарту тәртібін нақтылайтын ережелер ұсынылған;
• өндірістік жарақаттың ауырлығын анықтау тәртібі уәкілетті денсаулық сақтау органының құзыретіне беріледі.

📦 Астанада әйелге марқұм әкесінің атынан хабарласқан

Елордада тұратын әйелге әкесінің атынан сәлемдеме келгені туралы хабар жеткен. Алайда бұл жағдай алаяқтардың кезекті айласы болып шықты.

Әлеуметтік желіде тараған видеода белгісіз адам әйелге марқұм әкесінен сыйлық жіберілгенін айтып, оның аты-жөнін нақты атап, сенімге кіруге тырысқан. Ол үшін ешқандай төлем талап етілмейтінін де алға тартқан.

Алайда әйел әкесінің 9 жыл бұрын дүниеден өткенін айтып, алаяқтың сөзін жоққа шығарған. Осылайша, оның өтірігі әшкереленді.

Батырдың ерлігі мемлекет деңгейінде мойындалды

Аңызға айналған қолбасшы Бауыржан Момышұлына ең жоғары мемлекеттік марапат — «Халық қаһарманы» атағы берілді. Бұл шешім туралы Президент Жамбыл облысына жасаған сапары кезінде хабарлады.

Мемлекет басшысы халықтың батырды бұрыннан ерекше құрметтейтінін атап өтті. Соған қарамастан, оның ерлігі ұзақ жылдар бойы ресми түрде лайықты бағасын алмаған. Енді бұл олқылықтың орны толып, тарихи әділдік қалпына келтірілді.

Көлік нөмірін енді өзіңіз таңдай аласыз

Полиция хабарлауынша, 5 қаңтардан бастап арнайы ХҚКО-ларда автокөлікке арналған нөмірді қалаған әріп пен сан комбинациясымен рәсімдеуге болады.

Қызмет бағасы таңдалған нұсқаға қарай:
• 10 АЕК — шамамен 43 250 теңге,
• 15 АЕК — шамамен 64 800 теңге.

Ал сұранысы жоғары «әдемі» нөмірлерге бөлек мемлекеттік баж белгіленген.

‼️Тоқаев: қаржылық қылмыспен күресте босаңсуға жол жоқ

Президент Қасым-Жомарт Тоқаев Қаржылық мониторинг агенттігіне барып, мекеме ұжымымен кездесті. Мемлекет басшысы қызметкерлерді кәсіби мерекемен құттықтай отырып, алдағы міндеттердің күрделілігіне назар аударды.

Президенттің айтуынша, қылмыстық топтар жасанды интеллектіні белсенді қолдана бастаған. Егер құқық қорғау органдары технологиялық үрдістерден кейін қалып қойса, бұл ұлттық қауіпсіздікке тікелей қатер төндіруі мүмкін.

Сонымен қатар әлеуметтік салаға бөлінген қомақты қаражатты заңсыз иемдену фактілері әлі де тыйылмай отыр. Мұндай алаяқтыққа мүлде жол беруге болмайтынын атап өтті.

Мемлекет басшысы криптовалюта арқылы капиталды шетелге заңсыз шығару әрекеттері жалғасып жатқанын айтып, көлеңкелі экономиканың елге орасан зор зиян келтіретінін ескертті. Бұл бағытта қатаң тосқауыл қою қажет.

Қажет болған жағдайда Агенттік құрылымында қосымша үш генералдық лауазым енгізу мүмкіндігі де қарастырылатынын жеткізді.

Тоқаев қылмыстың салдарымен күрескеннен гөрі, оның алдын алу әлдеқайда тиімді екенін айтты. Себебі келтірілген шығынды өтеу көп жағдайда мүмкін болмайды.

Сондай-ақ Президент жұмыс барысында шектен шығуға болмайтынын ескертіп, АФМ-нің басты мақсаты қаржы ұйымдарын жаппай тексеру емес, қауіп-қатерді алдын ала анықтау екенін атап өтті.

Бұдан бөлек, Мемлекет басшысы кей азаматтардың жасанды интеллектке шамадан тыс сеніп, мәтіндерін Grok пен ChatGPT секілді жүйелерге жаздырып жүргенін сынға алып, бұл білім алудың дұрыс жолынан ауытқуға әкелетін алаңдатарлық үрдіс екенін айтты.