📦 Астанада әйелге марқұм әкесінің атынан хабарласқан

Елордада тұратын әйелге әкесінің атынан сәлемдеме келгені туралы хабар жеткен. Алайда бұл жағдай алаяқтардың кезекті айласы болып шықты.

Әлеуметтік желіде тараған видеода белгісіз адам әйелге марқұм әкесінен сыйлық жіберілгенін айтып, оның аты-жөнін нақты атап, сенімге кіруге тырысқан. Ол үшін ешқандай төлем талап етілмейтінін де алға тартқан.

Алайда әйел әкесінің 9 жыл бұрын дүниеден өткенін айтып, алаяқтың сөзін жоққа шығарған. Осылайша, оның өтірігі әшкереленді.

Батырдың ерлігі мемлекет деңгейінде мойындалды

Аңызға айналған қолбасшы Бауыржан Момышұлына ең жоғары мемлекеттік марапат — «Халық қаһарманы» атағы берілді. Бұл шешім туралы Президент Жамбыл облысына жасаған сапары кезінде хабарлады.

Мемлекет басшысы халықтың батырды бұрыннан ерекше құрметтейтінін атап өтті. Соған қарамастан, оның ерлігі ұзақ жылдар бойы ресми түрде лайықты бағасын алмаған. Енді бұл олқылықтың орны толып, тарихи әділдік қалпына келтірілді.

Көлік нөмірін енді өзіңіз таңдай аласыз

Полиция хабарлауынша, 5 қаңтардан бастап арнайы ХҚКО-ларда автокөлікке арналған нөмірді қалаған әріп пен сан комбинациясымен рәсімдеуге болады.

Қызмет бағасы таңдалған нұсқаға қарай:
• 10 АЕК — шамамен 43 250 теңге,
• 15 АЕК — шамамен 64 800 теңге.

Ал сұранысы жоғары «әдемі» нөмірлерге бөлек мемлекеттік баж белгіленген.

‼️Тоқаев: қаржылық қылмыспен күресте босаңсуға жол жоқ

Президент Қасым-Жомарт Тоқаев Қаржылық мониторинг агенттігіне барып, мекеме ұжымымен кездесті. Мемлекет басшысы қызметкерлерді кәсіби мерекемен құттықтай отырып, алдағы міндеттердің күрделілігіне назар аударды.

Президенттің айтуынша, қылмыстық топтар жасанды интеллектіні белсенді қолдана бастаған. Егер құқық қорғау органдары технологиялық үрдістерден кейін қалып қойса, бұл ұлттық қауіпсіздікке тікелей қатер төндіруі мүмкін.

Сонымен қатар әлеуметтік салаға бөлінген қомақты қаражатты заңсыз иемдену фактілері әлі де тыйылмай отыр. Мұндай алаяқтыққа мүлде жол беруге болмайтынын атап өтті.

Мемлекет басшысы криптовалюта арқылы капиталды шетелге заңсыз шығару әрекеттері жалғасып жатқанын айтып, көлеңкелі экономиканың елге орасан зор зиян келтіретінін ескертті. Бұл бағытта қатаң тосқауыл қою қажет.

Қажет болған жағдайда Агенттік құрылымында қосымша үш генералдық лауазым енгізу мүмкіндігі де қарастырылатынын жеткізді.

Тоқаев қылмыстың салдарымен күрескеннен гөрі, оның алдын алу әлдеқайда тиімді екенін айтты. Себебі келтірілген шығынды өтеу көп жағдайда мүмкін болмайды.

Сондай-ақ Президент жұмыс барысында шектен шығуға болмайтынын ескертіп, АФМ-нің басты мақсаты қаржы ұйымдарын жаппай тексеру емес, қауіп-қатерді алдын ала анықтау екенін атап өтті.

Бұдан бөлек, Мемлекет басшысы кей азаматтардың жасанды интеллектке шамадан тыс сеніп, мәтіндерін Grok пен ChatGPT секілді жүйелерге жаздырып жүргенін сынға алып, бұл білім алудың дұрыс жолынан ауытқуға әкелетін алаңдатарлық үрдіс екенін айтты.

📌Үкімет басшысы қолжетімді баспана мәселесін күшейтуді тапсырды

Үкімет отырысында Премьер-министр Олжас Бектенов азаматтарды қолжетімді баспанамен қамтамасыз ету жұмысын жандандыруды тапсырды.

Оның айтуынша, Қазақстан Республикасының Өнеркәсіп және құрылыс министрлігі өңір әкімдіктерімен бірлесіп, тұрғын үйлерді пайдалануға беру жоспарларының орындалуын қамтамасыз етуі керек.

Сондай-ақ жаңа тұрғын үй салу кезінде қалаларда жайлы орта қалыптастыруға ерекше назар аудару қажет. Яғни, мектептер, балабақшалар мен ауруханалар тұрғындарға жақын әрі қолжетімді болуы тиіс. Сонымен қатар инженерлік-коммуникациялық инфрақұрылымды дамыту жұмыстары да қатар жүргізілуі керек.

Премьер-министрдің сөзінше, ірі қалаларда, әсіресе Астана мен Алматыда құрылыс көлемі артып келеді. Дегенмен, моноқалалар мен ауылдық жерлерде де тұрғын үй құрылысын дамыту маңызды.

Осыған байланысты министрлікке Бәйтерек холдингі және өңір әкімдіктерімен бірге азаматтарды қолжетімді баспанамен қамтамасыз етуге бағытталған өңірлік бағдарламаларды белсендірек іске асыру тапсырылды.

🚨 Алматыда жантүршігерлік жол апаты: 3 адам қаза тапты

21 наурыз күні Алматыдағы Әл-Фараби даңғылы мен Меңдіқұлов көшесінің қиылысында ауыр жол апаты болды.

Алдын ала мәлімет бойынша, Zeekr көлігінің жүргізушісі қарсы жолаққа шығып, Mercedes автокөлігімен бетпе-бет соқтығысқан.

Апат салдарынан Mercedes жүргізушісі және оның екі жолаушысы оқиға орнында көз жұмды. Ал Zeekr жүргізушісі жарақат алып, ауруханаға жеткізілген.

Қаза болғандардың жақындары мен қоғам өкілдері істің ашық әрі әділ қаралуын талап етуде.

Куәгерлердің айтуынша, апатқа себеп болған көлік жолда жарысқан болуы мүмкін.

Қазіргі таңда оқиға бойынша қылмыстық іс қозғалып, тергеу жүріп жатыр.

⚠️ Атырауда сауда орталығында жасөспірім құлап, жарақат алды

Оқиға Infinity сауда орталығы ішінде болған.

14 жастағы жасөспірім жоғары қабаттан салбырап тұрған сымдар арқылы төменге түспек болған. Алайда қауіпті әрекет сәтсіз аяқталып, ол құлап жарақат алған.

Мамандардың айтуынша, бала ересектердің қарауынсыз жүріп, қауіпсіздік ережелерін өрескел бұзған.

📌 Осы жағдайға байланысты оның ата-анасы әкімшілік жауапкершілікке тартылды.

🥇🇰🇿 Тоқаев паралимпиада чемпионы Ербол Хамитовты марапаттады

Президент Қасым-Жомарт Тоқаев Паралимпиада ойындарында топ жарған Ербол Хамитов пен бірқатар спортшыларды қабылдады.

Мемлекет басшысы Хамитовқа III дәрежелі «Барыс» орденін табыстады. Сонымен қатар, Спорт министрлігіне қарасты арнайы даярлау орталығының жаттықтырушылары Василий Коломиец пен Антон Жданович «Парасат» орденімен марапатталды.

Ал Солтүстік Қазақстандағы «Үміт» клубының жаттықтырушысы Аслан Тоқбаев «Құрмет» орденіне ие болды.