في لحظات بتحس إنك غريب وسط كل اللي حواليك مش لأنك وحيد، بس لأنك فقدت الإحساس بالحاجة، فقدت الحماس، وبقيت بتعدي الأيام كأنها واجب لازم تخلّصه.

في ناس مبتبعدش مرة واحدة بيبعدوا حتة حتة، بكلمة ناقصة، بسؤال ما اتسألش، باهتمام قلّ يوم بعد يوم لحد ما تلاقي نفسك بتكمل من غيرهم، من غير ما تحس.

في أوقات بتعدي علينا نحس فيها إننا تعبانين من غير سبب واضح بس الحقيقة إن السبب هو كل حاجة سكتنا عنها، كل حاجة تعبنا منها ومحاولناش حتى نحكيها.

في لحظة معينة، بتبطل تدور على اللي يطمنك، وتبدأ تدور على نفسك اللي ضاعت وسط محاولاتك تفضل بخير وسط محاولاتك ترضي الكل، وتنسى إنك كنت محتاج حد يرضيك أنت.

في لحظات بتحس فيها إنك اتعودت على الغُربة مش غُربة المكان، لكن غُربة الإحساس. لما تكون وسط الناس ومفيش ولا كلمة قادرة توصل اللي جواك.

أوقات بتحس إنك بتحارب الدنيا كلها وإنت ساكت لا بتشتكي، ولا بتطلب، بس كل خطوة بتاخدها بتكلفك حتة من روحك، وبرضه بتكمل.

في ناس فاكرة إن الصمت راحة، بس الحقيقة إن الصمت ساعات بيبقى عبء كل كلمة ما اتقالتش، وكل وجع ما اتشرحش، بيتحول لجواك لحاجة تقيلة بتشدك لتحت كل يوم.

أوقات بتحس إنك عايش عشان تعافر مش عشان تستمتع، ولا تفرح، بس عشان تعدي اليوم من غير ما تنهار. وكل يوم بيعدي، بتحس إنك نجيت، بس مش عارف لحد إمتى.

في لحظات بتحس إنك اتعودت على التعب مبقتش تشتكي، ولا حتى تفتكر شكله. بتمشي في الحياة كأنك مؤقت، بتكمل وخلاص، وقلبك ساكت من كتر ما وجعك اتكرر.

في ناس مشيت وسابت وراها وجع مبينتهوش، لكن علم فينا بقينا نضحك بحذر، ونحب بخوف، ونسكت كتير. كل حاجة فينا اتغيرت من بعدهم، حتى إحساسنا بالأمان.

أوقات بتحس إنك بتتصرف بشكل طبيعي، بتضحك، وبتتكلم، وبتشارك بس جواك في فراغ كبير، فراغ ملوش سبب واضح، بس بيخلّي كل حاجة حواليك باهتة.

في لحظة معينة، بتحس إنك مش عايز حاجة من حد لا سؤال، ولا اهتمام، ولا حتى وجود. كل اللي محتاجه هدوء هدوء يشبه الراحة اللي بتدور عليها ومش لاقيها.

أوقات بتحس إنك بتحاول تبان بخير عشان متتسئلش متضطرش تشرح، متضطرش تواجه نظرات الشفقة، فبتختار الصمت، وبتعيش كأنك تمام، وأنت جواك حاجات كتير مكبوتة.

في حاجات بنعدي بيها مبتتنساش، مش عشان كانت كبيرة لكن عشان سابت جوانا أثر، غيرتنا من غير ما نحس، وخلتنا نبطل نكون نفس الشخص اللي كنا عليه قبلها.

في لحظات بتحس إنك محتاج تبعد عن كل حاجة عن الناس، عن الضوضاء، حتى عن أفكارك، وتدور على مكان هادي يخفف من زحمة جواك.

أوقات النهاية مبتبقاش بعد قصة طويلة ممكن تيجي في لحظة صمت، في نظرة باردة، أو في إحساس فجأة إنك مش عايز تكمل، وساعتها بتعرف إن الحاجة دي خلاص انتهت جواك قبل ما تنتهي بره.

في لحظة هتيجي تلاقي نفسك مش نفس الشخص هادي أكتر، بس جواك حكايات وجروح شكلتك. هتفتكر قد إيه عدّيت حاجات، وهتعرف إن التغيير كان ثمن البقاء.

في لحظة بتفهم فيها إنك اتغيرت من غير ما تحس مشيت من ناس كنت بتتمسك بيهم، وسكت في مواقف كنت دايمًا بترد فيها، ورضيت بحاجات زمان كنت بترفضها. التغيير ساعات بيجي بعد ما تتكسر بصمت.

أوقات بتفهم متأخر إنك كنت بتحاول تثبت وجودك في حياة حد عمره ما شافك بجد وساعتها متزعلش، متلومش، بس اتعلم تمشي وأنت مرفوع الرأس، لأنك كنت صادق، وده كفاية.

أوقات بتفكر قد إيه كنت بتحاول، وبتدي من قلبك، وبتتوجع من غير ما تشتكي وتيجي لحظة تقرر فيها إنك خلاص، هتبطل تبذل مجهود في مكان مش مقدّرك، وهتبدأ تختار نفسك قبل أي حد.