АССАЛОМУ АЛАЙКУМ!

Янги бир кун эзгу ният, яхши тилаклар билан бошланиши лозим. Чунки тилаклар дуоларга айланади. Ихлосла қилинган дуолар эса ижобат бўлади

Аллоҳим хайрли дуоларингизни мустажоб қилсин, кунингиз файзу баракотли ўтсин!!!

https://t.me/diyonatli

#Раддия #Мақола

ПАЙПОҚ-МАҲСИЛАРГА МАСҲ ТОРТИШ ҲУКМИ

Бисмиллаҳир роҳманир роҳийм

Ислом шариати инсонларга енгиллик ва қулайликни назарда тутган ҳолда, баъзи ибодатларда рухсатлар берган. Ана шундай енгилликлардан бири – маҳсига масҳ тортишдир. Бу масалада барча мазҳаб уламолари иттифоқ қилганлар, яъни маҳсига масҳ тортиш жоиздир.

Аммо ҳозирги кунда кенг тарқалган “пайпоқ-маҳси”ларга масҳ тортиш масаласида уламолар ўртасида муайян тафсилотлар мавжуд. Буни тўғри тушуниш учун фиқҳ китобларида келган “жавроб” тушунчасига эътибор қаратиш лозим.

“Жавроб” сўзи луғатда оёққа кийиладиган, уни ўраб турадиган нарсани англатади. Илк даврларда жавроблар асосан жундан ёки қалин матодан тайёрланган бўлиб, оёқни иссиқ сақлаш учун хизмат қилган. Уларнинг асосий хусусияти – қалин, мустаҳкам ва юришга яроқли бўлганидир. Шу жиҳатдан улар маҳсига яқин бўлган.

Фиқҳ уламолари жавробга масҳ тортишни унинг сифатига қараб баҳолаганлар. Агар жавроб қалин бўлиб, оёқда мустаҳкам турса ва узоқ масофага юришга яроқли бўлса, унга масҳ тортиш жоиз деб қаралган. Аммо у юпқа бўлса, сув ўтказса ёки оёқни тўлиқ ёпмаса, унга масҳ тортиш жоиз эмас, деб айтилган.

Ҳанафий мазҳабида масалага алоҳида эътибор берилган. Имом Абу Ҳанифа раҳимаҳуллоҳ дастлаб жавробга масҳ тортишни фақат у тери билан қопланган бўлса жоиз деганлар. Кейинчалик эса имом Абу Юсуф ва имом Муҳаммад раҳимаҳумаллоҳлар жавроб қалин ва мустаҳкам бўлса, унга масҳ тортиш мумкинлигини таъкидлаганлар. Ҳанафий мазҳабида фатво ҳам шу қавл асосида берилган.

Шофеъий ва Ҳанбалий мазҳабларида ҳам жавробга масҳ тортиш учун унинг қалинлиги ва юришга яроқли бўлиши шарт қилинган. Моликий мазҳабида эса асосан тери маҳсига масҳ тортиш жоиз деб қаралган.

Бугунги кунда оддий пайпоқлар одатда юпқа, шаффоф ва сув ўтказувчи бўлади. Шунинг учун уларга масҳ тортиш уламолар иттифоқига кўра жоиз эмас. Чунки бундай пайпоқлар маҳси ёки қадимги жавроб ўрнини боса олмайди.

Фақатгина қуйидаги шартларга жавоб берадиган пайпоқ-маҳсиларга масҳ тортиш мумкин:

-қалин ва мустаҳкам бўлиши;
-оёқда боғичсиз туриши;
-оёқни тўлиқ, жумладан тўпиқларни ёпиши;
-узоқ масофага юришга яроқли бўлиши;
-сувни дарҳол ўтказиб юбормаслиги;
-остини кўрсатмайдиган даражада бўлиши.

Агар ушбу шартлардан бири топилмаса, бундай пайпоққа масҳ тортиш жоиз бўлмайди.

Хулоса қилиб айтганда, шариатда белгиланган енгилликлардан фойдаланиш учун уларнинг шартларига амал қилиш зарур. Оддий пайпоқларга масҳ тортишдан сақланиш, эҳтиёткорлик билан иш тутиш ва ишончли фиқҳий манбаларга таяниш ҳар бир мусулмон учун муҳимдир.

Аллоҳ таоло барчамизни тўғри йўлдан адаштирмасин ва ибодатларимизни тўғри адо этишга муваффақ қилсин.

Валлоҳу аълам.

Абдул Хамид домла Маликов,
Тошкент вилояти Пискент тумани "Пискент" жоме масжид имом-хатиби

Дўстларингизга ҳам улашинг:
https://t.me/diyonatli

Бу ҳам ризқдир

Бисмиллаҳир Роҳманир Роҳийм

Ризқ бу – бомдод намозига ўз вақтида улгуришингиз, мол-мулкингизда камбағалларнинг насибаси бўлиши, бирор кунингиз Қуръондан ўз вирдингизни ўқимасдан ўтмаслиги, бирор соатингиз Аллоҳни зикр қилмасдан ўтмаслиги, гарчи бир марта бўлса-да, зикр қилишингиз ризқдир.

Расулуллоҳ соллаллоҳу алайҳи васалламга салавот айтиш шарафига ноил бўлишингиз ҳам ризқдир ва яна қалб хушуси, кўнгил юмшоқлиги ва мискинларга бўлган муҳаббат ҳам ризқдандир.

Кимнинг куни юқоридагилардан бирор насибасиз ўтса, у ер юзидаги барча хазиналарга эга бўлса ҳам, аслида фақирдир!

Дўстларингизга ҳам улашинг:

https://t.me/diyonatli

Исмингизни айтишмайди…

Ибн Атоуллоҳ Сакандарий раҳимаҳуллоҳ бундай деганлар:

“Ўзингни номаълумлик ерига кўм!” Одамлар эътибори алдамчидир, бу ширин ёлғон, ширин заҳар каби ҳалок қилмасин, умрингни ёқиб кулини кўкка совурмасин.

Вафот қилганингда "Жасад қани?", "Мурда қаерда?" дейишади. Исмингни айтишмайди…

Жаноза намозингни ўқимоқчи бўлишганда "Тобутни ҳозирланглар", дейишади. Исмингни айтишмайди…

Дафн қилишаётганда "Маййитни олиб келинглар", дейишади. Исмингни айтишмайди…

Шундай экан, қавминг, мансабинг, наслу насабинг сени алдаб қўймасин.

Дўстларингизга ҳам улашинг:

https://t.me/diyonatli

Шавволдаги 6 кунлик рўза рамазон қазосидан ўтадими?

Савол: Мен ҳам шаввол ойида олти кун рўза тутмоқчи эдим. Аммо Рамазон ойида ҳам олти кун сабабли тута олмаганман. Энди мен шаввол ойида 6 кун рўза тутсам Рамазоннинг қазосини тутиб берган ҳисобланаманми?

Жавоб: Бисмиллаҳир Роҳманир Роҳийм. Шаввол ойидаги олти кунлик рўза қазо рўзалар ўрнига ўтмайди. Шунинг учун зиммасида Рамазон ойи рўзасидан қарзи бор бўлган киши аввало қазо рўзасини тутиши мақсадга мувофиқ. Чунки қазо рўзаларни нафллардан аввал тутилгани афзал саналади. Қазо рўзасини тутаётган киши бомдод намозининг вақти (субҳи содиқ) кирмасидан аввал "Рамазон ойидан тута олмаган қазо рўзани тутиш"ни ният қилиши керак бўлади. Агар ният қилолмай субҳи содиқдан кейин ният қилса, нияти эътиборли бўлмайди.

Шаввол ойидаги олти кунлик рўза нафл ибодат бўлиб, уни шаввол ойи давомида тутса ҳам бўлади. Шунинг учун Сиз аввал қазо рўзаларни мукаммал тутиб олиб, кейин шаввол ойи давомида олти кун рўза тутишингиз мақсадга мувофиқ. Валлоҳу аълам.

Ўзбекистон мусулмонлари идораси
Фатво маркази.

Дўстларингизга ҳам улашинг:

https://t.me/diyonatli