‏مرحبا يا اللي ما بين الغيد وحدك دُرّه
‏عند غيرك ما يجي للزين ذكر و طاري

‏والله ان البال محدٍ غير زولك مرّه
‏تسرحين بقلبي اللي يعشقك و افكاري

‏من عرفتك و الغلا فـ الصدر لله دره
‏يا اجمل ارزاق الحياة و مكسبي واقداري .

‏هذا الحرير اللي مخلّا ومْهدود
‏تلمّه الريح ويعوّد ينتثر

‏ويطير سرب مْن العصافير ويعود
‏اليا هدا بال السواليف وخثر

‏وش هالجمال اللي وكل ماله بزود
‏حتى تجاوزتي وصرتي هالكثر

‏من رقّتك جايز على رمل النفود
‏لو داست اقدامك مايلقى لك أثر

‏جيتيني ورحتي مثل ذعذاع نود
‏واحييتي بقلبي شعورٍ مندثر .

أهلين يا سمحَ المحيّا وسهلين
يا راس مال اللي يبيك ورصيده

أشتاق لك شوق الشقي للملايين
اللي حياته كلها عالحديده

لا شفت وجهك قلت للهم بعدين
يروح هم القلب ويعود عيده

يميزك عن باقي الناس ثنتين
ثنتين من غير المزايا الفريده

معطيك رب الصايمين المصلين
اللي جعلنا كل أبونا عبيده

عطاك عين ما خلق مثلها عين
والخد بلحاله يبي له قصيده

يا عاذل ما غرتك موضة الفين
ولا لقينا صورتك فالجريده

وجهك إذا شفته تذكرت شيئين
الحظ الأوفر والحياة السعيدة .

" رزانة الخيل لا مَشيت بطق الطبل
رقيقة الحس همّاسة بحرفٍ بخيل

ما يقبل القلب لو عقلي لغيرك قبل
أنتي كثيرة زمانك بالزمان القليل

كنتي جميلة وزادت فتنتك عن قبل
ومثلك إذا مرّ أي حاجة تزين وتميل

منتي نبيلة فقط أنتي وريثة نُبل
حفيدة أول رجل يطري ببال الدخيل

وحيدتي قلبي الغارق بحبك ذبل
محتاج منّك شعور يمكّن المستحيل " .

جادلٍ ربي عطاها قابليّه
بالنبا الطيب وبالطبع الحياويّ

درةً عن المطاميع محميه
ماتطيش الا على أصوات العزاوي

من سلايل عزوتن فالجاهليه
الخصوم بفعلهم راحو نحاويّ

وصفها وصف الزعوج الباتليه
بالحلا والرق والزين الرهاويّ

كن لون يدينها لون برديه
والكفوف خضابها جمرً يضاوي

كنها يوم وقفت في أرضً خليه
عطفت الفارس شليويح العطاوي

طوحت بخمارها الريح القويه
يوم طار الستر عن الوجه الحياويّ

كن وصف الأكلبي يطري عليه
لبتن من فوقها الخمري ثعاوي .