هل صلاة الاستخارة بتتصلى كل يوم فعلا ؟

♻️ فقه الزَّواج :
(٧) "الاستخارة إمتى؟"،،،
---------------------------
💥 هيَّ إيه الفكرة من الاستخارة؟!
▪️أنا مش عارفة اختار، أقول أيوة، ولَّا لأ على العريس، أو السَّفر، أو الوظيفة.... فبعمل استخارة، بأقول له:
"يارب اختارلي، لو الموضوع فيه خير ليَّا مشِّيه، لو شر وقَّفه".
ـ طيب عملتِ استخارة والخطوبة وقفت، ربنا سُبحانه وتعالى شاف إنَّها شر ليكِ، تقعدي إنتِ تعيطي وتقولي:
"ليه كده يارب ؟" 🤨
ـ مش إنتِ اللي طلبتِ من ربنا لو شر وقَّفه ؟؟!!! 😏
ده بدل ما تسجدي للَّه شكر إن ربّنا خلَّصك من حاجة مش خير ليكِ !!!
🔖📌الاستخارة مش علشان تجيب العريس ..
ـ أصل أنا بحبُّه أوي و عملت استخارة ٧٥ مرة 😭
😲 ليه كده يا بنتي؟؟!!!
إنتِ كده مش عايزة استخارة، إنتِ عايزة: صلاة "قضاء الحاجة" 😌
ـ لو إنتِ ضامنة إن العريس ده هوَّ اللي هيسعدك اعملي صلاة قضاء الحاجة 🙃

🔖📌 و مافيش حد على وجه الأرض يعرف إذا كان العريس ده هوَّ اللي هيسعدك، ولَّا حتَّى أمِّك اللي ولدتك ده علمه عند ربِّ العالمين بس ،،،
علشان كده تلاقي الأم و الأب في الفرح بيدعوا و يقولوا :
"يارب سلم"..

💥نتيجة الاستخارة مش بتكون بحلم تحلميه، و لا بإنِّك تفتحي المصحف لو لقيتِ آية عذاب يبقى ما ينفعش 🤨
🔖لو عندك فرصة شغل في شركتين، إنتِ ميَّالة لواحدة فيهم، لكن مش عارفة أي واحدة خير ليكِ هتعملي إيه ؟
▪️هاعمل استخارة، و أروح أقدم، وآخد بالأسباب.... يعني إيه ؟
ـ هاقدم الcv وأعمل المقابلة، وأشوف بابا يكلِّم صاحبه لو يعرف حد في الشِّركة دي .
ـ اتقبلتِ في الشِّركتين، لكن واحدة مرتبها أحسن ومكانها أقرب، تبقى دي إجابة الاستخارة و اختارها.

🔖لو إنتِ رايحة تشوفي عريس هتعملي استخارة و تاخدي بالأسباب اللي هيَّ :
هاروح بأحسن مظهر، وأحسن كلام، وبالتَّالي هأقدِّم أحسن انطباع عنِّي..
ـ الموضوع مشي، واتيسَّر يبقى خير، وقف.. يبقى مش خير .

✴️ الاستخارة = التَّوكل على اللَّه ،،،
🔹التَّوكل على اللَّه يعني :
- الأخذ بالأسباب.
- الرِّضا بالنتائج.
⭐ اتعلِّمي ترضي باللي ربنا بيديهولك، مش باللي إنتِ عاوزاه، واوعي تقولي ليه كده...أو اشمعنى أنا بيحصل معايا كده .
« يَابنَ آدَم ارْضَ بِمَا قَسَمتُهُ لكَ، تُرِحْ نَفسَك و بَدَنَكَ، وَ تُصبِح عِندِي مَحمُودًا، وَإنْ لَمْ تَرضَ بِمَا قَسَمتَهُ لَكٔ، سَلَّطتُ عَليْكَ الدُّنيَا، تَجْرِي فِيهَا جَري الوحُوشِ فِي البَرِيَةِ، وَلَنْ تَأخُذَ إلَّا مَا قَسَمْتُهُ لَكَ، وَ تُصْبِح عِنْدِي مَذمُومًا ».

#دكتورة_سوزان_علمتني

لو عيد ميلاد حد بتحبه ❤️ هتعمل ايه؟

هتفكر تجيبله هدية 🎁
ومعاها كارت 💌

الكارت💌 هو الصلاة والسلام علي الرسول

الهدية🎁 لازم تكون حاجة تفرحه …
ايه اللي يفرح الرسول عليه الصلاة والسلام؟

من اول شهر ربيع نبدأ ((الصلاة والسلام)) علي الرسول طول ما احنا رايحين وجايين.. وفي المواصلات .. وبعد كل صلاة .. واحنا بنغسل المواعيين .. وقبل ما ننام

ابدأو في تجهيز هديتكم وكارتكم من دلوقتي 🙏

لتحميل نسخة PDF من ورق الصلاة والسلام علي الرسول من موقع الدكتورة سوزان 👇

‏https://dr-suzan.com/wp-content/uploads/2021/03/28-الصلاة-و-السلام-علي-رسول-الله.pdf

#دكتورة_سوزان_علمتني

فقه الزواج (٨): نتيجة الاستخارة ؟

♻️ فقه الزَّواج :
(٨) "نتيجة الاستخارة"،،،
-----------------------------
♦️ الاستخارة غير قضاء الحاجة ...
ـ في الاستخارة أنا بأقول لربنا :
"أنا مش عارفة أقبل، ولَّا أرفض العريس.. يارب اختارلي" ...
ـ مش تكوني جايبة حد مرتبطة بيه عاطفيًّا، و تقولي أعمل استخارة علشان الموضوع يمشي !!!
إنتِ كده عايزة تصلِّي قضاء حاجة مش استخارة 😏.
ـ لمَّا تكوني مقتنعة أو معجبة بالعريس، ممكن تعملي استخارة، لكن في الحالة دي لازم تُبقي على الحياد، وترضي باللي ربنا يختاره، وتقتنعي إنُّه هو الخير ليك.
📌 واحنا قلنا قبل كده:
احنا ما بنتعلقش بحد، احنا بنتعلق بس "باللَّه و رسُوله"
( احنا بنخلِّي النَّاس هيَّ اللي تتعلق بينا 😉) .

♦️ طيب ازاي نعرف نتيجة الاستخارة؟!
ـ احنا مش بنعرف نتيجة الاستخارة بحلم أو رؤيا نشوفها ( مش احنا النَّاس دي 😏) ولا إنِّك تفتحي المصحف وتشوفي الآيات و الكلام ده 😏!!

♦️ نتيجة الاستخارة بتظهر في حاجتين :ـ
▪️١ـ تيسير الأمور .
( تلاقي الأمور ماشية مُيسَّرة، جايين يتعرَّفوا علينا تلاقيهم قرأوا الفاتحة، وبعدها خطوبة و كتب كتاب، والموضوع مشي ،طبعًا عادي يكون في اختلافات، لكن مش خناقات)
▪️٢ـ مُباركة أولي الأمر (الأب والأم).
ـ "طيب همَّ مش موافقين" .. مش موافقين توقَّفي الموضوع فورًا.
ـ" بس أنا بحبُّه🫪 "..
بتحبِّيه اخبطي راسك في الحيط..أنا قلتلك ما تتعلقيش بحد 🤨

♦️لو أصرِّيتِ عليه، وأهلك اضطروا يوافقوا غصب عنهم، اعرفي إن مش ممكن ربنا هيباركلك في الزَّواج ده أبدًا 😞
📌 مش ممكن ربنا يباركلك في موضوع و إنتِ كاسرة قلب أمِّك أو أبيك، مش زواج بس أي موضوع .
ـ إنتِ من وقت ماكنتِ نُطفة في بطن أمِّك ربنا بيحط في قلب أمِّك وأبيكِ رادار بيعرفوا بيه إيه اللي فيه خير ليكِ، وإيه اللي فيه شر، همَّ مش غاويين يعكننوا عليكِ و خلاص !🤨

🔖ـ "أنا هروح النَّادي"..
-ماما :" لأ، ما تروحيش"
ـ " لا، أنا اتفقت مع أصحابي خلاص"..
🔹ولمَّا تركبي دماغك و تنزلى تروحي، يقفل باب التَّاكسي على هدومك، و تتقطَّع، وترجعي في نفس التَّاكسي 😏
ربنا مش مبارك في الخروجة، لإنِّك كسرتِ قلب أمِّك.

♦️ «لَا يُشَاكُ عَبدٌ بِشَوكَةٍ إلَّا بِذَنبٍ أَذنَبَهُ »
فلمَّا تلاقي الدُّنيا مقفِّلة في وشك، ومعاكسة معاكِ ، روحي شوفي إيه الذَّنب اللي عملتيه... ( آفات اللسان مثلاً) ، أو شوفي غلطتِ في حق مين ؟!
يا إمَّا أذنبتِ في حق اللَّه، أو أذنبتِ في حق أهلك.

#دكتورة_سوزان_علمتني

فقه الزواج (٩): اتيكيت جلسة التعارف

♻️ فقه الزَّواج : (٩) "اتيكيت جلسة التَّعارف"،،،
♦️باشوف بنات قاعدة بتتكلِّم مع أم العريس أو أخته بتقولها : " إنتِ قولتِ كذا "🤨.. " إنتِ !!!! .. اسمها : "حضرتك" عيب، (فين احترام السِّن). 📌أي حد غريب عنِّك مهما كان سنه لازم تقوليله : "حضرتك" ..ليه ؟ علشان ما ترفعيش الكُلفة. حتَّى "العريس"؟! أيوه حتَّى العريس.. ـ "حضرتك تاخد سكر أد إيه؟ -مش سكرك أد إيه " 🤨
♦️ مشكلة تانية: "الصَّوت العالي".. ـ تلاقي بنت قاعدة تنده مامتها من بعيد، وهيَّ في المطبخ مثلاً : -"ماما شُفتِ إيشاربي الأزرق !!!🗣️ ما تروحي عندها وتكلِّميها... أو في وسط أصحابها بتناديلهم، أو بتهيص في حفلة 😏 🔖الصَّوت العالي ممكن ينرفز أو يستفز أي حد وخصوصًا لو بيتلكِّلك 😏 📌اللي صوتها عالٍ تتعود توطِّيه بدل ما يجيلها اللي يوطيهولها 😉.. ـ في رجالة أي صوت عالٍ بينرفزهم، حتَّى لو كنتِ بتتكلِّمي عادي... بيعتبروه إهانة..
♦️ تجنُّب الألفاظ البذيئة.. اوعي تعلَّقي على أي حاجة بلفظ بذيء أو شتيمة.. المكان ده مش نضيف..مش "......". ده فلان ده " يخرب.....". 🔖المفروض إن الألفاظ البذيئة هي كل ما يُؤذي السَّامع ( دلوقتي طبعًا بقت مُتداولة عادي بين النَّاس، واتعوِّدوا عليها )😔 📌 الألفاظ البذيئة بتْنزِّل جدًا من قيمتك وتقييمك عند النَّاس، وبتدي انطباع سيِّئ عن تربيتك والبيت اللي إنتِ جايه منه..
♦️ الغيبة و السُّخرية.... ـ اوعي تتكلِّمىي عن حد مش موجود في القعدة وتغتابيه، أو تتكلِّمي عنه بسخرية. احنا كمسلمين ما ينفعش نعمل كده ... ـ " ده مديري بيروح للموظفين و يقولهم : "بتاكلوا إيه؟ آكل معاكم و هو كرشه قدامه أد كده" 🫣 🔰{ قِيلَ: يَا رَسُولَ اللَّهِ مَا الغِيبَةُ ؟ قَالَ: ذِكرُكَ أخَاكَ بِمَا يَكرَهُ قَالَ: أرَأيتَ إنْ كَانَ فِيهِ مَا أقُولُ ؟ قَالَ: إنْ كَانَ فِيهِ مَا تَقُولُ فَقَدْ اغتَبتَهُ، وَإنْ لَمْ يَكُن فِيهِ مَا تَقُولُ فَقَد بَهتَّهُ .} «حديث حسن صحيح» 📌وده بيدِّي انطباع عنِّك وعن دينك..
#دكتورة_سوزان_علمتني