#taqdimot

Ona tilimizning ilmiy va adabiy xazinasi kengaymoqda

Toshkent viloyati Pedagogik mahorat markazida o‘zbek tilining boyligini, tarixiy taraqqiyotini va adabiy merosini o‘rganishga xizmat qiluvchi uchta muhim nashr – to‘rt jildlik “Alisher Navoiy ensiklopediyasi”, “O‘zbek adabiy tili imlo qoidalarining shakllanish tarixi” hamda “O‘zbek tili omonimlari lug‘ati” kitoblarining taqdimot marosimi bo‘lib o‘tdi.

Taqdimotda Vazirlar Mahkamasi huzuridagi O‘zbek tilini rivojlantirish jamg‘armasi direktori Azizjon Eminov, Davlat tilida ish yuritish asoslarini o‘qitish va malaka oshirish markazi direktori Inomjon Azimov, O‘zbekiston Yozuvchilar uyushmasi Toshkent viloyati bo‘limi boshlig‘i, O‘zbekiston xalq shoiri Mahmud Toir, O‘zbekiston Jurnalistlar uyushmasi Toshkent viloyati bo‘limi boshlig‘i Rahmatilla Sheraliyev, Markazning Toshkent viloyati hududiy bo‘linmasi rahbari Abdurashid To‘ychiyev, viloyat hokimining ma’naviyat va davlat tili masalalari bo‘yicha maslahatchisi Shahnoza Xo‘jayeva, soha vakillari, olimlar, ijodkorlar va jamoatchilik faollari ishtirok etdi.

Tadbir avvalida o‘zbek tilining milliy o‘zlikni anglash, ma’naviy merosni asrab-avaylash va kelajak avlodga yetkazishdagi o‘rni haqida fikrlar bildirildi. Shuningdek, davlat tilining nufuzini oshirish, adabiy til me’yorlariga rioya qilish va ona tiliga hurmatni kuchaytirish masalalariga e’tibor qaratildi.

Taqdimot davomida kitoblarda o‘zbek adabiy tilining shakllanishi va imlo qoidalarining takomillashuvi, tilimizning lug‘aviy boyligi hamda buyuk mutafakkir Alisher Navoiy ijodiy merosini chuqur o‘rganish masalalari yoritildi. Mazkur nashrlarning ilmiy izlanishlar, ta’lim jarayoni va milliy ma’naviy merosni keng targ‘ib etishdagi ahamiyati alohida ta’kidlandi.

Shuningdek, tadbir doirasida tilni asrash, uning nufuzini oshirish va ona tiliga ehtiromni yuksaltirishga qaratilgan videoroliklar namoyish etildi. Ishtirokchilar yangi nashrlar yuzasidan fikr-mulohazalarini bildirib, savol-javoblarda qatnashdi.

Bunday ma’rifiy tadbirlar o‘zbek tilining ilmiy asoslarini chuqur o‘rganish, milliy adabiy merosni keng targ‘ib etish hamda davlat tiliga bo‘lgan hurmat va e’tiborni yanada mustahkamlashga xizmat qiladi.

✈️Telegram | ™️Facebook | 📺 Youtube

Qoraqalpog‘istonda "Umummilliy diktant" o‘tkazildi

🔘Bugun, 15-oktabr kuni Bilim va malakalarni baholash agentligi Qoraqalpog‘iston Respublikasi bo‘limida Qoraqalpog‘iston Respublikasi Vazirlar Kengashi tomonidan tashkil etilgan vazirliklar, davlat qo‘mitalari, idoralar, xo‘jalik birlashmalari, tashkilotlar va muassasalarning rahbarlari va xodimlari ishtirokida "Umummilliy diktant" tadbiri o‘tkazildi. Unda besh yuzga yaqin rahbar va xodimlar ishtirok etdi.

Diktantdan asosiy maqsad davlat tilining nufuzini yanada oshirish, yozma savodxonlikni yuksaltirish va davlat tilida ish yuritish ko‘nikmalarini shakllantirishdir.

Tadbirda Qoraqalpog‘iston Respublikasi Vazirlar Kengashi Raisining ma’naviyat va davlat tili masalalari bo‘yicha maslahatchisi - departament boshlig‘i P.Dabilov va Davlat tilida ish yuritish asoslarini o‘qitish va malaka oshirish markazining Qoraqalpog‘iston Respublikasi hududiy bo‘limi boshlig‘i F.Bobojonov ishtirok etib, ishtirokchilarga omad tiladi.

"Umummilliy diktant" davlat tiliga hurmatni kuchaytirish, aholining savodxonlik darajasini oshirish va o‘zbek tilining jamiyat hayotidagi nufuzini yanada mustahkamlashga xizmat qiladi.

✈️Telegram | ™️Facebook | 📺 Youtube