በጅጅጋ ከተማ የህጻናት ነፃ ከአንገት በላይ የቀዶ ጥገና ሕክምና መስጠት ተጀመረ ።
•••••••••••••••••••••••••••••••••••••••••••••••••••••
መስከረም 10/2019 ዓ.ል| ረቢዑል ሳኒ 9/1448 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
••••••••••••••••••••••••••••••••••••••••••••••••••••••
ጅግ ጂጋ |
​
የኢትዮጵያ እስልምና ጉዳዮች ጠቅላይ ምክር ቤት የማኅበራዊ አገልግሎቶች ዘርፍ ከሶማሌ ክልል እስልምና ጉዳዮች ከፍተኛ ምክር ቤት እና ከጅጅጋ ዩኒቨርሲቲ ሸይኽ ሀሰን ያባሬ ኮምፕሬሄንሲቭ ስፔሻላይዝድ ሆስፒታል ጋር በመተባበር በጅጅጋ ከተማ ለ100 ህፃናት ነፃ ከአንገት በላይ የቀዶ ጥገና ሕክምና አገልግሎት መስጠት ጀመረ።

“ከአንገት በላይ ደህንነት ለሁለንተናዊ የህፃናት ጤናማ ሕይወት” በሚል መሪ ሀሳብ የተጀመረው ይህ ነጻ የህክምና አገልግሎት ንቅናቄ ተጋላጭ የሕብረተሰብ ክፍሎችን በማገዝ ማኅበራዊ ደህንነትን የማረጋገጥ ተልዕኮ ያለው ስለመሆኑ ተመላክቷል።

ነጻ የህክምና ንቅናቄውን በንግግር ያስጀመሩት የኢትዮጵያ እስልምና ጉዳዮች ጠቅላይ ምክር ቤት የማህበራዊ ጉዳይ ኃላፊ ዶክተር ኢብራሂም አህመድ የህፃናትን ጤና መደገፍ የላቀ ሰብዓዊ እና ማኅበራዊ ተግባር ነው ብለዋል።

ኃላፊው አክለውም በጤና ችግር ምክንያት ከመደበኛ ሕይወት ተነጥለው የሚችሉ ህፃናትን በመለየት ነጻ የሕክምና ዕድል እንዲያገኙ ማድረግ እንደሚገባ ተናግረዋል።

የጅጂጋ ዩኒቨርሲቲ ሸይኽ ሀሰን ያባሬ ኮምፕርሄንሲቭ ስፔሻላይዝድ ሆስፒታል ሜዲካል ዳይሬክተር ዶክተር አይድሩስ መሀመድ በበኩላቸው ሆስፒታሉ አስፈላጊውን የሕክምና ባለሙያና መሠረተ ልማት በማዘጋጀት አገልግሎቱን በጥራት ለማቅረብ ዝግጁ መሆኑን አረጋግጠዋል።

የሶማሌ ክልል እስልምና ጉዳዮች ከፍተኛ ምክር ቤት የአስተዳደርና ልማት ምክትል ፕሬዝዳንት ሸይኽ ሙሀመድ ዓሊ ዩሱፍ የተጀመረው ነጻ የህክምና አገልግሎት ህጻናቱ ተገቢ ሕክምና በነጻ እንዲያገኙ ከማድረጉም በላይ የቤተሰቦችን ማኅበራዊና ኢኮኖሚያዊ ጫና በማቃለል የህፃናትን የወደፊት ተስፋ ያለመልማል ብለዋል።

ነጻ የህክምና አገልገሎቱ ለሰባት ቀናት የሚቆይ ሲሆን በቆይታውም 100 ህፃናት ነጻ የምርመራ፣ የቀዶ ህክምና፣ የክትትል እና የምክር እንዲሁም እንደ አስፈላጊነቱ የሪፈራል አገልግሎቶች እንደሚያገኙ ተመላክቷል።
•••••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

የኢትዮጵያ እስልምና ጉዳዮች ጠቅላይ ምክር ቤት ፕሬዝዳንት ከጀርመን ምክትል አምባሳደር ጋር ተወያዩ።
••••••••••••••••••••••••••••••••••••••••••••••••••
መስከረም 11/2019 ዓ.ል | ረቢዑል ሳኒ 12/148ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
••••••••••••••••••••••••••••••••••••••••••••••••
አዲስ አበባ

​የኢትዮጵያ እስልምና ጉዳዮች ጠቅላይ ምክር ቤት ፕሬዝዳንት እና የኢትዮጵያ የሃይማኖት ተቋማት ጉባኤ የበላይ ጠባቂ የክቡር ዶክተር ሸይኽ ሐጂ ኢብራሂም ቱፋ በኢትዮጵያ የጀርመን ፌዴራላዊ ሪፐብሊክ ኤምባሲ ምክትል አምባሳደር ዶክተር ፈርዲናንድ ቮን ዌይሄን በጽሕፈት ቤታቸው ተቀብለው አነጋገሩ።

የክቡር ዶክተር ሸይኽ ሐጂ ኢብራሂም ቱፋ በውይይቱ ላይ ሰላም ጉዳይ የሀገርና የዜጎች ብቸኛ አማራጭ መሆኑን ጠቁመው ጠቅላይ ምክር ቤቱ እና የኢትዮጵያ የሃይማኖት ተቋማት ጉባኤ ለሀገር ሰላምና ልማት በጋራ እየሠሩ እንደሚገኙ ጠቅሰዋል።

ፕሬዝደንቱ አክለውም ጠቅላይ ምክር ቤቱ በአዋጅ መቋቋሙ ህዝበ ሙስሊሙ ከሌሎች ወገኖቹ ጋር ለሀገር ልማትና ዕድገት በሙሉ አቅሙ እንዲሰራ ከማድረጉ ባሻገር ለሰላምና ለሕዝቦች አብሮነት ትልቅ እሴት መጨመሩን አስረድተዋል።

​በኢትዮጵያ የጀርመን ኤምባሲ ምክትል አምባሳደር ዶክተር ፈርዲናንድ ቮን ዌይሄ በበኩላቸው የጀርመን መንግሥት ከጠቅላይ ምክር ቤቱ ጋር በሰላም፣ በትምህርት፣ በሰብዓዊ እርዳታና በልዩ ልዩ የማኅበራዊ ልማት ዘርፎች በትብብር ለመሥራት ያለውን ጽኑ ፍላጎት ገልጸው ቀደም ሲል የተጀመሩ የጋራ መግባባቶችን በተጠናከረ ሁኔታ ለማስቀጠል እንደሚሰሩ አረጋግጠዋል።

​በመጨረሻም ምክትል አምባሳደሩ ጠቅላይ ምክር ቤቱ ለተደረገላቸው ሞቅ ያለ አቀባበል በእራሳቸውና በኤምባሲያቸው ስም ምስጋና አቅርበዋል።
••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ቨቨዠፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1