የጠቅላይ ምክር ቤቱ የትምህርትና ስልጠና ዘርፍ ​በአማራጭና በጎልማሶች ትምህርን ዙሪያ ምክክር አካሄደ።
••••••••••••••••••••••••••••••••••••••••••••••••••••••••
መስከረም 30፣ 2019 ዓ.ል| ረቢዑል ሳኒ 29 1448 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
••••••••••••••••••••••••••••••••••••••••••••••••••••••••
አዲስ አበባ

የኢትዮጵያ እስልምና ጉዳዮች ጠቅላይ ምክር ቤት የትምህርትና ሥልጠና ዘርፍ መደበኛ ባልሆነ የትምህርት ፕሮግራም መሠረታዊ የአማራጭ እና የጎልማሶች ትምህርትን ለደረሳዎችና ዑለሞች ተደራሽ ለማድረግ የሚያስችል የግንዛቤ ፈጠራና የምክክር መድረክ አካሄደ።

የጠቅላይ ምክር ቤቱ የስራ አስፈጻሚ አባልና የትምህርትና ስልጠና ዘርፍ ተጠሪ ሸይኽ ዚያድ ዓልይ በእንኳን ደህና መጣችሁ መልዕክት ባስጀመሩት በዚህ የውይይት መድረክ ላይ የኢትዮጵያ እስልምና ጉዳዮች ጠቅላይ ምክር ቤቱ የልማትና ማህበራዊ ጉዳዮች ምክትል ፕሬዝዳንት ሸይኸ ሐሚድ ሙሣ መልዕክት አስተላልፈዋል።

ምክትል ፕሬዝደንቱ ሸይኽ ሀሚድ ሙሳ በዚህ መልዕክታቸው ጠቅላይ ምክር ቤቱ በየጊዜው ተቋማዊ ቁመናውን በማሻሻልና የአገልግሎት አሰጣጡን በማዘመን አደራ የሰጠውን ህዝበ ሙስሊም ለማገልገል እየሰራ እንደሚገኝ ገልጸዋል።

ሸይኽ ሐሚድ ሙሳ አክለውም በትምህርትና ስልጠና ዘርፍ የሚሠራው ሥራ ለዑማው ዘላቂ ጥቅም የሚያስገኝ በመሆኑ በኢስላማዊ የትምህርት ተቋማት የሚገኙ ደረሳዎች እና ዑለማዎች ዘመናዊና አማራጭ የጎልማሶች ትምህርት የሚያገኙበት ሁኔታ መመቻቸቱ ሀገራዊ ሚናቸውን ከፍ ያደርጋል ብለዋል።

የጠቅላይ ምክር ቤቱ የትምህርትና ሥልጠና ዳይሬክቶሬት ዳይሬክተር አቶ አልዩ ሰዒድ ዘርፋ በበኩላቸው የትምህርትና ስልጠና ዘርፍ በ2019 በአማራጭ መሠረታዊ ትምህርትና በጎልማሶች ትምህርት ፕሮግራም ላይ ቅድሚያ ሰጥቶ በትኩረት እንደሚሰራ አብራርተዋል።

በትምህርት ዘርፍ ዙሪያ በቂ ግንዛቤ መፍጠር እና ከባለድርሻ አካላት ጋር የጋራ ውይይት ማድረግ በመንፈሳዊና በመደበኛ የትምህርት ዘርፍ ያለውን ቅንጅት ለማሻሻል እንደሚያግዝም አቶ አልዩ ሰዒድ አክለዋል።

በውይይቱ ላይ የተገኙት የኢፌዴሪ የትምህርት ሚኒስቴር የጎልማሶች መሠረታዊ ትምህርት ዴስክ ሃላፊ አቶ ዘላለም አራጋው አማራጭ እና የጎልማሶች ትምህርት አተገባበር እና የፖሊሲ አቅጣጫዎች ዙሪያ ለውይይት መነሻ የሚሆን ጥናታዊ ጽሁፍ አቅርበዋል።

በመጨረሻም በቀጣዩ በጀት ዓመት መሠረታዊ የአማራጭ እና የጎልማሶች ትምህርት ተግባራዊ የሚያደርጋቸውን መርሃ ግብሮች በማጠናከር ዑለማዎችንና ደረሳዎችን በማብቃት ለህዝበ ሙስሊሙ የተሻለ አገልግሎት እንዲችሉ ማድረግ እንደሚገባ የውይይቱ ተሳታፊዎች ሃሳባቸውን አንስተዋል።

በውይይቱ ላይ የጠቅላይ ምክር ቤቱ የዑለማ ጉባዔ ዘርፍ ምክትል ፕሬዝዳንት ሸይኽ ጁነይድ ሐምዛ፣ ሥራ አስፈጻሚ አባላት፣ ከፍተኛ የሥራ ኃላፊዎች፣ ባለድርሻ አካላትና ጥሪ የተደረገላቸው እንግዶች ተገኝተዋል።
••••••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነትና ሚዲያን ይከታተሉ | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

የፌዴራል፣ የክልል እና የከተማ ሸሪዓ ፍርድ ቤት ዳኞች የወንዝ ዳርቻ ፕሮጀክቶችን ጎበኙ።
••••••••••••••••••••••••••••••••••••••••••••••••
ጥቅምት 1/ 2019 ዓ.ል| ረቢዑል ሳኒ 30/1448 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••••••••••••••••••••
አዲስ አበባ |

የፌዴራል፣ የክልል እና የከተማ ሸሪዓ ፍርድ ቤት ዳኞች (ቃዲዎች) በጠቅላይ ሚኒስትር ዶክተር ዐቢይ አሕመድ አነሳሽነት የተጀመረው የ"ሸገርን ማስበብ" ፕሮጀክት አካል የሆነውን የእንጦጦ እስከ ፒኮክ ና ቀበና የወንዝ ዳርቻ ልማትን ጎበኝተዋል።

ፕሮጀክቱ በአዲስ አበባ ከተማ አስተዳደር ከተጀመሩ ታላላቅ የከተማ ውበት፣ የአካባቢ ጥበቃ እና የመዝናኛ ልማት ስራዎች መካከል አንዱ እና ዋነኛው መሆኑ በጉብኝቱ ወቅት ተነግሯል።

​የፌደራል ጠቅላይ ሸሪዓ ፍርድ ቤት ፕሬዝደንት ሼይኽ መከተ ሙሄ
የጉብኝቱ ዋና ዓላማ ፣ በክቡር ጠቅላይ ሚኒስትር ዶክተር ዐቢይ አሕመድ ራዕይ አፍላቂነት እና በክብርት ከንቲባ አዳነች አቤቤ አመራር ሰጪነት የተከናወነው የወንዝ ዳርቻ ልማት በከተማችን ያመጣውን ዘመናዊ ለውጥና ውበት ማሳየት መሆኑን ተናግረዋል።

ሸሪዓ ፍርድ ቤት ዳኞቹ (ቃዲዎቹ) "አይቻልም" የሚለውን አስተሳሰብ በመስበር፣ ወደየክልሎቻቸውና ወደተሰማሩበት የሙያ መስክ ሲመለሱ አወንታዊ ለውጥ እንዲያመጡ ለማነሳሳት ያለመ መሆኑን አመላክተዋል።

የጠቅላይ ሸሪዓ ፍርድ ቤት ምክትል ፕሬዚዳንት ሼይኸ አብዱልመናን መሀመድ አህመድ በበኩላቸው፣ የፌዴራል፣ የክልል እና የከተማ ሸሪዓ ፍርድ ቤት ዳኞች (ቃዲዎች) መንግስት የሰራቸውን ታላላቅ የልማት ስራዎች በአካል ተገኝተው በመጎብኘታቸው የተሰማቸውን አድናቆት ገልጸዋል።
የፌደራል ፣ የክልልና የከተማ የሸሪዓ ፍርድ ቤት ዳኞች በበኩላቸው በጉብኝቱ መደሰታቸውን ተናግሰዋል።

•••••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1