"يافرحة العيد مالك فالحنايا شريك
‏دوّر وتلقى ورا الأضلاع عيديّتك

‏انسف جديلك قبل تنسف مذارع يديك
‏الغيم تاجك وسطح الأرض زوليّتك

‏حتى الفساتين وعقود الذهب تحتريك
‏الكل منها يبي يلمس خصوصيّتك"
‏__سعود مبارك.

"أنا عيديّتي في صوت شخصٍ معيّن
‏الحبيب اللبيب اللي وساعٍ عيونه

‏أطرقٍ في نهار العيد يوم يتزيّن
‏ودّك تعايده وتعايد اللي يجونه"

أعايدك من قبلهم: شيء مرغوب
‏وأعايدك من ضمنهم: شيء كايد!

‏قبل نهار العيد مع جِدّة الثوب
‏والطيب، والحنّا، ولبس القلايد

‏نوبٍ أقول لْيا طْلعت شمسه ونوب
‏أقول لو غيري سبقني وعايد!

‏مْباركٍ عيدك ولا هو بماجوب
‏الواجب أكبر من كلام وقصايد

"من حسنها ما همّها زحمة العيد
‏تاخذ من أدنى شيء ولا تجادل

‏من زينها لوّ ما لبسَت لبسٍ جديد
‏صعبة تنافسها من الغِيد جادل" 🤍

"يكتمل عيدي إذا اكتملت وصوفك
‏أنا الاحوج للتهاني وأنت الأبدا

‏لا دريت إنّي ماراح اقدر أشوفك
‏ادري إنّ العيد خلّص قبل يبدا"
‏–فيصل العطاوي

"كل عيدٍ قبل ما اعرْفك يجيب الغبون
‏اجعلي عيد الفطر عيد ردّ الاعتبار

‏طلةٍ ماهيب منّك تساورها الظنون
‏اكثر اللي ناسب العيد؟ وجهك بإختصار"
‏__حشان بن مصلح.

"من عاش فيك عيده ما ينتظر العيد"
‏__بدر عبدالمحسن.

"الرضى لايّامي اللي قرّبتني صوبك
‏ولّا انا ماكنت لا طيّب ولاني راضي

‏عايديني في بهاك وضحكتك واسلوبك
‏لا يمر العيد واحساسي معه عالفاضي" __البحّا.

عيدكم مبارك، ينعاد عليكم بصحه وعافيه يارب 🤍

"حبّة العيد ما فيھا زريه
‏من بغى صاحبه لا تمنعونه"

"ترى ما يلحق أيام السنة مشروه
‏إذا حتى صباح العيد.. ما جابك" – المشيعلي

أرحبي يا اللي تزاحم لك أسراب القلوب
‏كنها تزاحم الناس في مشعر مِنى
‏
‏اشكريني يوم احنّك من كبار الذنوب
‏واعذريني يوم أزيدك مع العنوة .. عنا
‏
‏الضمير الحيّ نوعٍ من أنواع الحروب
‏" يا ضمير مدور المصلحة نوم الهنا "
‏
‏ما قدر يكسب محبّتْك يا الظبي اللعوب
‏غير أنا وأعوذ بالله من كلمة أنا
‏
‏ان تركتيني قتيلٍ على مفرق دروب
‏اكتبي فتّانة العصر مرّت من هنا
‏
‏واحفري قبرك وزاني وطيحي دوب دوب
‏ودي أقابلْلك لا قمت في دار الفنا
‏
‏والله لا وجهك بعادي ولا قلبي بطوب
‏مير ميلي لين اشوف المنايا والمُنى
‏
‏لا تشكّلتي مع الريح وانسام الهبوب
‏ما لقيت مْن العبارات غير الله لنا

يجذبني العمق و احتاج الجمال العميق
‏و اخشّى من أحضان ما يفهمني عناقها

جيتها وأنا الشجاع اللي يقول الموت وينه
‏وأنطحتني بالعيون السود وأرهقني حوّرها

‏ماهقيت السيف الأملح ينثلم من ياسمينه
‏لين عنّت خيل فتنتها علي والله نصرها

حطني في قلبك وعينك وبين اهدابك
‏وعطني كفوفك كلام الناس مايعنيني

‏يا فديت اطباعك وضحكاتك وترحابك
‏وعينك اللي لا رضيت تحطها في عيني

‏والقصيد اللي معي يبدا بك وينهى بك
‏جعلني ما ابكيك يوم وجعل ماتبكيني

‏مادريت اني تعديت السما بأسبابك !
‏لين شفت الكل بالإجماع مُعجب فيني

الصدور اطرافها متراميه والليل هادي
‏لايروح الليل قبل استنطقه و اخذ جديده

‏كل ماسقت القدم بين المبادي والمبادي
‏اعترض لي طاري الشوق وخذيت الشعر بـ ايده

‏ارتجل لـ الشرد من الصيد عن صهوة جوادي
‏واعتق اللي من سهولة صيدته كلٍ يصيده

لاخذتني غايتي و ابطيت يا غاية مرادي
‏والمسافه كايده والحب باقي له شريده

‏احتريني والبسي لي كل لون الاّ الرمادي
‏الرمادي كل ماشوفه عرفت انه مكيده

‏ودي اضحك من بعد طول المعاتب والتمادي
‏ضحكة اللي يضحك من ادناة حاجه من حفيده

زمليني.. من هواجيس الغياب اللا إرادي
‏ان ذبحني طاري الفرقا وش انتي مستفيده

‏واعبري بي لاغدي عادي و انا مانيب عادي
‏الحريص تورّده للموت غلطته الوحيده

‏ياعنيده مامعي صبرِ مثل صبر المهادي
‏لاتعذرتي مثل عذر المعقّد بالعقيده

في رجى الله مايخليني لـ جِدّي واجتهادي
‏مارجيت الاّ وعده ولا خشيت الاّ وعيده

‏لا استوت في عيونك الثنتين قربي وابتعادي
‏والظروف اقسى من الماضي على اللي يستعيده

‏المصافح بالقلوب اصدق من مصافح الايادي
‏اسمحي لي كل يوم اصافحك وانتي بعيده

لاتحاتين الضما والجوع في رحلة جهادي
‏الحظوظ مقسمه والذيب ماياكل وليده

‏شاعرك لاهاموا اصحاب الشعر في كل وادي
‏مستعد يوقّف الدنيا على مطلع قصيده

قبلة الله على وجهٍ يسد وينوب
‏عن أمهار الجزيره و أزين أفراسها

‏ تلبس الجاذبيه والغنج لبس ثوب
‏وصيت أهلها عباةٍ تستر لباسها

‏كل عرقٍ جذبها نخبوي ومحسوب
‏فخمةٍ بالجمال و فخمه بساسها

‏غيدٍ أخاف من شدة ترفها تذوب
‏لا طواها الحنين وطال هوجاسها

السنافي والخوي وأغلى الجماعه
‏في نظرهم كنّي القصر الرئاسي

‏والرفيق الّي متاعي من متاعه
‏كن ربي خالقه يجلى عماسي

‏يا بعد من قلت له سمعاً وطاعه
‏وألتفت يمي وبادلني حماسي

‏انتشي لا قام ينفذ عن ذراعه
‏نشوة الّي حطم الرقم القياسي

‏من كثر مانيب أحبّه عن قناعه
‏لو عطاني ثوبه؟ بيطلع مقاسي
-محمد السكران

زملوني عن غلاه وعن طيوفه
‏وعن هبوبه في ضلوعي لا استهَبّت

‏واسترو قلبٍ تولّتْه الحسوفه
‏لين راجت في عروقه ثم شبّت

‏وارحمو عينٍ مدامعها ذروفه
‏مع مناذير الهوى والحب.. حبّت

‏وكفنو شعري وعَزو لي حروفه
‏الحروف اللي على حبه تربّت

‏الهوى ماله على العاشق مروفه
‏شف لياليه القديمه ويش خبّت!