⚡️Сенаттың соңғы сапары. Парламенттегі бір палаталы кезеңге дайындық басталды...

Президент Тоқаев Парламентті бір палаталы ету халықаралық тәжірибеге сай шешім екенін айтты деп жазады Ertenmedia. Оның сөзінше, Мәжілістің қазіргі құрамы өз мерзімі аяқталғанша заң шығару жұмысын тұрақты атқара береді.

Сенаттың қызметі референдум өтіп, жаңа парламент сайланғанша жалғасады.

Президент саяси партияларға осы уақытты сайлауға тыңғылықты дайындалуға пайдалануды ұсынды. Сондай-ақ депутаттарды ел тағдырына қатысты ауқымды өзгерістерге жауапкершілікпен қарауға шақырып, мұндай реформа халықпен ашық талқылануы тиіс екенін атап өтті.

«Тек ашық диалог арқылы әділетті әрі қуатты Қазақстанды бірге құрамыз», – деді президент.

Бізге тіркелуді ұмытпаңыз👇

📱 Erteńmedia

⚡️ Сенатсыз Қазақстан: Тоқаев тактикасының тасасында тұрған транзит...

Саясаттанушы Досым Сәтпаев бүгінгі ұсыныс биліктің алдағы транзит кезеңіне дайындық амалы болуы мүмкін деп топшылайды.

Бұл туралы Ertenmedia хабарлайды.

90-шы жылдардың басында экс-президент Назарбаев пен Жоғарғы Кеңес арасындағы тартыстан кейін 1995 жылғы Конституция бойынша екі палаталы парламент пайда болған.

Сол кездегі Сенат биліктің «сақтандыру клапаны» рөлін атқарған еді.

"Тоқаевтың әзірдегі ұсынысы жаңа билік транзитіне дайындық секілді. Бір палаталы парламенттің спикері автоматты түрде президенттен кейінгі басты фигураның біріне айналады. Елде экс-президенттер үміт артатын тағы бір маңызды лауазым пайда болмақ", – дейді саясаттанушы.

Сәтпаевтың пікірінше егер қазіргі жүйе сақталып, сайлау туралы заң мен партиялық реформаланбаса, бір палаталы парламент те АП-ға тәуелді орган болып қала береді.

Билік сайлауды тек пропорционалды жүйемен, яғни партиялық тізім бойынша өткізу арқылы парламентті бақылауда ұстай беруге мүдделі.

"Пропорционалды жүйемен сайланатын парламенттің халық алдында легитимділігі төмен болады. Парламентке өткен партияның беделі де төмендейді. Оның үстіне, сайлаушы бүкіл партияға тұтас дауыс береді, жеке кандидатқа дауыс бере алмайды. Мұндайда депутаттар халықтың көңіл-күйінен гөрі, партия басшылығының қас-қабағына көбірек қарайлайды", – дейді сарапшы.

Сәтпаев Қаңтар оқиғасының басты себептерінің бірі де осында деп есептейді. Қоғамдағы наразы көңіл-күйдің саяси арналар арқылы сыртқа шықпауы әлеуметтік жарылысқа әкелген.

"Халық өз өңірінен, нақты бір округтен шыққан тәуелсіз кандидатқа дауыс бергісі келеді. Қазіргі партиялық тізім жүйесі бұған мүмкіндік бермейді. Елдегі зомби-партиялар да бұл мәселені шеше алмайды. Демек, пропорционалды жүйеге толық көшу саяси тығырыққа апарар жол", – дейді саясаттанушы.

Сарапшы Қазыбек Бейсебаев керісінше "Сенатты сақтап қалу керек" деп отыр. Толығырақ осы тұста.

Бізге тіркелуді ұмытпаңыз👇

📱 Erteńmedia

⚡️ Қарағандыдан табылған тосын қазына: Күйректікөлде сирек металдың мол қоры анықталды...

Қарағанды облысындағы Күйректікөл кенішінде сирек кездесетін металдың қоры бұрын болжанғаннан әлдеқайда көп екені белгілі болды.

Геологиялық барлау жұмысының жаңа дерегі бойынша, кеніштің коммерциялық тұрғыдан тиімді қоры бастапқыда айтылған 20 млн тоннадан асып, 28,2 млн тоннаға жеткен деп хабарлайды Ertenmedia.

2022 жылы басталған барлау жұмыстары барысында геологтар тереңдігі 300 метрге жететін төрт негізгі учаскеден церий және өзге де сирек кездесетін металдардың жоғары концентрациясын тапқан.

Қарағанды облысы әкімінің орынбасары Әлібек Әлденейдің айтуынша, зерттеу кезінде аймақтың басқа бөліктерінен алтын, мыс пен вольфрамның жаңа кен орындары да анықталған.

«Қазірдің өзінде шетелдік компаниялар осы бағытта зерттеулер жүргізіп жатыр. Мұның арқасында өңірдің минералды шикізат базасы кеңейіп, сирек кездесетін әрі бағалы металдарды өңдейтін жаңа өндірістер ашылады», – деді Әлденей.

Толығырақ осы тұста.

Бізге тіркелуді ұмытпаңыз👇

📱 Erteńmedia

⚡️Целинныйдағы құдалар кездесуі: Боранбаевты қолдауға келген Дариға...

Алматыдағы «Целинный» заманауи мәдениет орталығының ашылу салтанатында атышулы Дариға Назарбаева төбе көрсетті.

Экс-елбасының үлкен қызы шараға өзінің құдасы бизнесмен Қайрат Боранбаевты қолдау үшін арнайы келген деп хабарлайды Ertenmedia.

«Целинныйды» қайта жаңғырту жұмысы 2018 жылы басталған. Алайда пандемия мен Боранбаевтың қамауға алынуына байланысты орталық тек биыл, 5 қыркүйекте ашылды.

Орталықтың ашылуында журналистер Боранбаевтан жөндеу жұмысының не себепті 7 жылға созылғанын және жобаға қанша қаржы кеткенін сұрады.

«Неге бәрі үнемі ақша жайлы сұрайды? Бұл жобадағы басты мақсатымыз шығынды санау емес, мәдени-көркем жобалар өтетін ерекше алаң қалыптастыру. Жоба толығымен өз қалтамнан қаржыландырылды. Шынын айтқанда, қаражатты талқылауға еш ықыласым жоқ", – деді Боранбаев.

Орталық 90-жылдары театрға, кейіннен екі залы бар кинотеатр мен түнгі клубқа айналған еді.

2014 жылдан бері жұмыс істемеген ғимаратты 2015 жылы Боранбаев сатып алып, заманауи мәдениет орталығына айналдыруды қолға алған болатын.

Боранбаев Дариға Назарбаеваның туған құдасы. Оның қызы Аида марқұм Айсұлтан Назарбаевтың жары болған.

Бізге жеткен мәлімет бойынша Назарбаева Алматыға 27 тамызда келген.

Фото: Orda порталы

Бізге тіркелуді ұмытпаңыз👇

📱 Erteńmedia

⚡️ RT-ның экраны бұлдыраған күн: Тоқаевпен салғыласқан Симоньянға ауыр диагноз қойылды...

Петербор форумында Тоқаевпен пікір таластырып, Қазақстанның Донецк пен Луганскіні мойындаудан бас тартуын ашық сынаған RT бас редакторы Маргарита Симоньян ауыр науқасқа шалдыққанын мәлімдеді деп хабарлайды Ertenmedia.

Ресейлік журналист Владимир Соловьевтің «Россия 1» арнасындағы авторлық бағдарламасына қатысып, ауыр дертке шалдыққанын, 8 қыркүйекте күрделі операция жасататынын айтты.

«Осы аптада дәрігерлер маған ауыр, қорқынышты диагноз қойды. Ертең операцияға жатамын», – деді Симоньян.

Ол денсаулығының нашарлағанына қарамастан, эфирге шығып, майданда жүрген әскерилер мен олардың отбасына қолдау көрсетуді жөн санағанын жеткізді. Сондай-ақ, журналист өзінің күйеуі, режиссер Тигран Кеосаянның тоғыз айдан бері комада жатқанын да еске салды.

"Орыста "бәле келсе қақпаңды аш" деген сөз бар ғой. Біздің үйдің қақпасы қазір тіпті жабылмайтын болды, тағдыр дауылы соғып, жұлып әкетті", – деді Симоньян.

Еске сала кетсек, Маргарита Симоньян Санкт-Петербург экономикалық форумында президент Тоқаевты ашық пікірталасқа шақырып, Қазақстанның Луганск пен Донецкіні мойындаудан бас тартуын сынға алған еді.

Қазақстан президенті халықаралық құқықтың екі негізгі принципі территориялық тұтастық пен ұлттардың өзін-өзі анықтау құқығы бір-біріне қайшы келетінін айтып, Ақорданың бұл мәселедегі ұстанымы нақты екенін жеткізген болатын.

Бізге тіркелуді ұмытпаңыз👇

📱 Erteńmedia

⚡️ Вашингтонның визалық лабиринті: АҚШ-қа асыққан ресейліктердің Астанаға ағылған көші...

Орыстарға АҚШ визасын алу қиындай түсті. Бұдан былай туристік, оқу немесе жұмыс визасына үміткерлер сұхбаттан өту үшін Варшава немесе Астанаға баруға мәжбүр деп хабарлайды Ertenmedia.

Американың Мем.департаменті визалық өтініштерді қарастыру тәртібін жаңартты. Енді Ресей, Беларусь, Ауғанстан және Солтүстік Корея сияқты 16 елдің азаматы өз елінде орналасқан АҚШ-тың дип.өкілдігінен визалық қызметті ала алмайды.

Аталған елдердің тұрғындары визалық сұхбаттан өту үшін басқа мемлекетке баруы тиіс.

2021 жылдың мамырынан бастап Мәскеудегі АҚШ елшілігі Кремль енгізген шектеудің салдарынан дипломатиялық емес визаны рәсімдеуді тоқтатқан еді. Сол кезден бастап ресейліктер Еуропадағы немесе Орта Азиядағы елдерге барып, виза алуға мәжбүр болды. Бұған дейін олар кез келген шетелдік АҚШ елшілігіне өтініш бере алатын.

Енді жағдай тіпті күрделене түсті. Мем.департаменттің жаңа тәртібіне сай, Ресей азаматтары АҚШ визасын тек Польшадағы (Варшава) немесе Қазақстандағы (Астана) дип. өкілдіктер арқылы ғана рәсімдей алады.

Шешімнің нақты орындалуы да қиындық туғызады. Мәселен Польша орыстарға гуманитарлық жағдайларды қоспағанда, іс жүзінде виза бермейді. Варшаваға визалық сұхбаттасуға бару мүмкіндігі өте төмен.

АҚШ дипломаттары өз азаматтығынан тыс елде сұхбаттан өткен азаматтарға күту мерзімінің ұзақ болатынын да ескертіп отыр.

Қазақстанға келер болсақ, Астанадағы АҚШ елшілігі алдағы уақытта орыстар үшін негізгі визалық орталыққа айналуы ықтимал.

Кремльдің басқыншылығынан кейін АҚШ елшілігі Ресейдегі жұмысын 75 пайызға қысқартып, Владивосток, Екатеринбург пен Петербордағы консулдықты жауып тастаған.

Бізге тіркелуді ұмытпаңыз👇

📱 Erteńmedia

⚡️Жолдауға бармаған Бас прокурор: Берік Асылов Сингапурде не жоғалтты...

Берік Асыловтың Сингапурда өткен халықаралық прокурорлар жиынына барып, Тоқаев Жолдауына қатыспауының астарында салмақты себеп жатыр деп жазады Ertenmedia.

Жиын барысында екі ел арасында қылмыстық істер бойынша өзара құқықтық көмек туралы келісімге (MLAT) қол қойылды.

Бұл Орта Азия елдерінің ішінде Сингапурмен жасалған алғашқы құжат.

Оның ерекшелігі күдікті активтерді бұғаттау, тәркілеу, дәлелдерді жинау және активтерді елге қайтаруға тікелей құқықтық мүмкіндік беруінде.

Біздіңше Бас прокурорға Жолдау мен Сингапурдың арасында таңдау жасауға тура келген.

Құқықтық тұрғыдан Сингапурмен келісімге қол қою Астанаға шетелге шығарылған заңсыз активтерді қайтаруға мүмкіндік береді. Бұған дейін сингапурлық құқық қорғау органдары Қазақстаннан келетін қаржылық запростарға жауап қатпауға толық құқылы еді.

Мәселен, егер Қазақстан белгілі бір жемқордың банк шоты немесе жылжымайтын мүлікке қатысты мәлімет сұратса, сингапурлық тарап мұндай өтінішті елемей тартпаға тастай салатын. Қазір бұл кедергінің бәрі жойылды.

Тікелей әріптестік орнап, осы келісімнің негізінде жасалған сұрау салуларға жауап беру міндеттеледі.

Осылайша Бас прокуратура заңсыз ақша жасырынатын тағы бір «сенімді» елдің есігін жапты. Кім біледі, бәлкім Сингапурдан да ескі Қазақстанның сыртқа шығарылған миллиардтары табылып қалар.

Бірақ бір кілтипан бар: билік осы келісімді нақты құқықтық құрал ретінде пайдалана ма, әлде бұл кезекті имидждік қадам ба?

Шын мәнінде, алғашқы нәтиже көп ұзамай көрінуі керек: Сингапурға құқықтық көмек бойынша жасалатын сұраныстар, активтерді бұғаттау мен тәркілеу туралы алғашқы сот шешімдері және олардың жария есебі.

Келісімнің тиімділігі Тоқаевтың саяси еркіне байланысты. Егер Астана дәлелді әрі ашық істерді қолға алуға дайын болса, онда бұл келісімнен нақты нәтиже шығады.

Саяси ерік шынайы құқықтық шешімдермен үйлеспесе, активтерді қайтару науқаны бұрынғыдай жабық есік артындағы келісім мен шантаждың құралы болып қалуы мүмкін.

Бізге тіркелуді ұмытпаңыз👇

📱 Erteńmedia

⚡️Базарбек-Пономарев тандемі RAMS-қа тыным бермей тұр...

Мәжілісмендер аты даудан арылмай келе жатқан RAMS құрылыс компаниясының мәселесін тағы көтерді деп хабарлайды Ertenmedia.

Сергей Пономарёв депутаттық сауалында елдегі құрылыс компанияларының былықтарын жіпке тізді. Соның ішінде көпшіліктің наразылығын тудырған RAMS компаниясы да бар.

«Телефоным осы компания салған тұрғын үй кешендерінің тұрғындарынан түскен шағымға толып қалған. Компания елдегі ең ірі құрылыс салушылардың сегізінші орнында тұр.

Тұрғындар RAMS тұрғызған кешендердің сапасыздығын жиі сынайды. Құрылыс нормасының сақталмауы өз алдына, кейбір нысанда құрылыс жұмысы аяқталмаған күйі қалған.

Соған қарамастан, компания жаңадан алып кешендердің құрылысын бастап жатыр», – деді депутат.

Айтуынша, RAMS компаниясы бастапқыда тұрғындарға ірі жобаны іске асырып, жолды кеңейтіп, трансформаторлық қосалқы станция, мектеп пен емхана салып, жақын маңдағы өзеннің жағалауын абаттандыруға және 6 гектар жерді жасыл аймаққа айналдыруға уәде берген. Бірақ оның бірде-бірі орындалмаған.

«Компания тұрғын үй кешендерін халыққа тапсырғаннан кейін де үлкен мәселе шығып жатыр: егілген тал-терек солып қалған, ғимараттың қасбеті құлап, терезе мен қаптамалар сынып түсіп жатыр, шатырдан су ағып, жертөлелердің іші көгеріп кеткен», – дейді депутат.

Сонымен қатар тұрғындар су мен жарықтың жиі өшіп қалатынын, автокөлік қоятын орынның жетіспейтінін айтып, жиі шағымданады екен.

Осындай даулы мәселе шешілмей жатып, RAMS Алматыда тағы бір алып құрылыс 40 қабатты Beyond кешенін сала бастаған.

«Осы жоба да тұрғындардың жаппай наразылығын тудырды. Депутаттардың араласуымен кешеннің құрылысы уақытша тоқтатылып, оның заңдылығы мен қала құрылысына әсері тексеріле бастады. Алматы қаласының экологиялық тепе-теңдігін сақтау үшін осы бейберекет құрылысты тоқтату қажет. Мұндай заңсыздық қаланың өмірін парализдеп, мем.бюджеттің басты доноры саналатын Алматының дамуын тежейді», – деді депутат.

Пономарёв осыған байланысты RAMS компаниясының барлық нысанына кешенді тексеру жүргізуді және Beyond көпқабатты кешенінің құрылысын мүлдем тоқтатуды талап етті.

Айта кетелік, бұған дейін депутат Базарбек Алматыдағы 40 қабатты құрылысты тоқтатып, RAMS компаниясының заңсыз әрекетін әшкерелеген еді.

Бізге тіркелуді ұмытпаңыз👇

📱 Erteńmedia

⚡️Құлыбаевтың жаңа қонысы: активтер дауы аяқталды, инвестиция дәуірі басталды...

Құлыбаевтың «Астана» халықаралық қаржы орталығында (АХҚО) жаңа холдингтік компанияны тіркеуі нені білдіреді?

Саясаттанушы Ғазиз Әбішев әлгі шешімді ірі бизнес өкілдерінің президент Тоқаевтың жаңа экономикалық бағытын қолдау ретінде бағалайды деп жазады Ertenmedia.

Әбішевтің айтуынша Құлыбаевтың АХҚО-да Almex Holding Limited компаниясын тіркеуі елдегі активтерді қайтару науқанының ресми түрде саябырсыған кезеңімен сәйкес келіп тұр.

Президент жуырда ғана активтерді қайтару жөніндегі комитетті қайта атауды тапсырған еді. Жаңа атауда бұрынғыдай «активтер» сөзі жоқ, есесіне «инвестицияларды қорғау» түсінігі пайда болды.

Бұл биліктің ірі бизнес өкілдерін үркітіп-қорқыту саясатының орнына, олармен өзара сенім мен серіктестік қарым-қатынас орнатуға ниетті екенін аңғартады.

«Соңғы кезде ауқатты азаматтар активтерді қайтару үрдісіне қарсылық көрсетудің орнына, Президент Тоқаев белгілеген бағытқа қарай бет бұрып жатыр. Бұл бағыт нақты секторға инвестиция құю, қайырымдылықпен айналысу және жалпы экономиканы дамыту. Құлыбаевтың Almex Holding Limited компаниясын АХҚО-да тіркеуі осы үрдістің айқын көрінісі. Өйткені, АХҚО Лондон, Сингапур және Дубайдың тәжірибесіне негізделген, ағылшын құқығына сүйенетін беделді халықаралық алаң. Мұнда инвесторлардың мүддесі жоғары деңгейде қорғалады», – дейді саясаттанушы.

Сарапшының пайымдауынша, Құлыбаевтың қадамы АХҚО-ның ірі инвесторлар арасындағы беделін күшейтіп, олардың орталыққа деген сенімін нығайта түседі.

Тимур осылайша тәуекелді ақылмен бағалап, капиталын халықаралық деңгейде қорғайтын алаңда орналастыруды жөн көрген.

Жүзіне күлкі үйірілген Құлыбаев пен биліктің қарым-қатынасы қайта жылыған тәрізді. Толығырақ осы тұсқа салдық.

Бізге тіркелуді ұмытпаңыз👇

📱 Erteńmedia

⚡️Мәжілістегі бір топ депутат Ардақ Назаровпен жабық форматта әңгімелесуді жоспарлап отыр...

Депутат Ардақ Назаровтың пленарлық отырыста анасына құттықтау жолдауы Парламент қабырғасында бұрыннан қайнап жатқан ішкі қайшылықтың қақпағын ашып жіберді деп хабарлайды Ertenmedia.

Назаровтың мінберді жеке басының қуанышымен шатастырып алуы бірқатар әріптесінің жынына тиген. Депутаттық корпустағы ықпалды топ Назаровтың әрекеті парламенттік беделге үлкен сын екенін бетпе-бет жеткізу үшін жабық форматтағы кездесу өткізуді жоспарлап отыр.

Олардың пайымынша, парламенттік мінбер әлеуметтік желінің тікелей эфирі емес, мемлекеттің тағдыры шешілетін орын.

Осы мәселеге байланысты Мәжіліс спикері Қошановтың тарапынан да қатаң ұстаным байқалады.

Ерлан Жақанұлы орынбасарларына депутаттық мәлімдемелердің тәртібін қатаң қадағалауды, жеке сипаттағы мәлімдемеге мүлде жол бермеуді тапсырған.

Спикер мұндай әрекеттің Мәжілісті халық алдында ұсақтатып, мем.институт ретіндегі салмағын кемітіп, депутаттық корпусқа деген халық сеніміне көлеңке түсіреді деп алаңдайды.

Ertenmedia-ға пікір білдірген Мәжілістегі дереккөздердің айтуынша Назаровтың кешегі қылығы соңғы шақырылымдағы депутаттық құрамның ішкі қайшылығын да анық байқатқан.

Парламенттегі халықтың тарапынан мойындалған тұлғалар пулы келесі науқанға спортшылар мен шоу-бизнес өкілдерін мүлде жолатпау керек деген ұстанымда.

Олардың саяси тәжірибесінің аздығы, этикалық ұстанымының саяздығы парламенттік мәдениетті бұзып, Мәжілісті популизм мінберіне айналдырып жіберген.

Бұл кейстің парламенттік ортаның ішкі тәртібіне өзгеріс әкелуі мүмкін екені байқалады. Назаровтың әрекетінен соң Мәжіліс регламенті мен депутаттардың мінез-құлық кодексіне түзету енгізілуі ықтимал. Мінбердің қадірін кетіретін, халықтың аманатын жеке басының мәселесіне айналдыратын қадамға бұдан былай шектеу қойылады деген сыбыс бар.

Мәжіліс спикерінің талабы депутаттарды жеке бас пен елдік мәселені шатастырмауға, парламенттік мәдениетті сақтауға міндеттейтін қатаң ескерту болмақ.

Бұл туралы әлі де айтамыз. Бізге тіркелуді ұмытпаңыз👇

📱 Erteńmedia

⚡️Маңғыстаудағы қаралы жол: Сенек маңындағы апат он адамның өмірін жалмады...

Маңғыстау облысында жантүршігерлік жол апатынан 10 адам көз жұмды деп хабарлайды Ertenmedia.

Қайғылы оқиға 11 қыркүйек күні Қарақиян ауданындағы Сенек ауылынан 90 шақырым жерде болған. Toyota Hiace шағын автобусының жүргізушісі көлікті басқара алмай, жолдан шығып, бірнеше жолаушысымен бірге аударылған.

Оқиға орнында 8 адам қаза тапса, тағы екі адам ауруханаға барар жолда жан тапсырған. Жүргізуші мен тағы екі жолаушы түрлі жарақат алып, ауруханаға жеткізілді.

Біздің редакцияға жеткен мәлімет бойынша жолаушылар Бекет атаға зиярат етуге бара жатқан.

Қазір осы дерек бойынша қылмыстық іс қозғалып, тиісті сараптама тағайындалды. Тергеу амалы министрдің жеке бақылауына алынған.

Мамандар жүргізушінің әрекетін, көліктің техникалық жағдайы мен жол сапасын мұқият тексеріп жатыр.

Жергілікті әкімдікпен бірлесіп, зардап шеккендер мен қаза тапқандардың отбасыларына қажетті көмек көрсетілуде.

Ақпаратты толықтырып отырамыз. Бізге тіркелуді ұмытпаңыз👇

📱 Erteńmedia

⚡️Назаровтан кейінгі нысана – Дәулет Мұқаев: Мәжіліс моральдық жауапкершілікке көшті...

Ардақ Назаровтың пленарлық отырыстағы даулы құттықтауынан соң Мәжілісте енді депутат Дәулет Мұқаевтың мәселесі қаралмақшы.

Оның «Декретке миллионмен» атты курсы заңды тікелей бұзбаса да, көпшіліктің жалған схемаларға ұрынуына себеп болғаны парламент ішінде үлкен талқыға түсті деп хабарлайды Ertenmedia «Курилка Байтерека» арнасына сілтеп.

Мәжілістегі дереккөздің айтуынша, Назаровтың оқиғасынан кейін депутаттық корпус арасында ішкі тексеріс басталған.

«Ол ұсынған курс заңды түрде бұрыс болмаса да, депутаттың қоғамдық беделі мен ықпалын пайдаланған ондаған әйел алаяқтыққа ұласқан әрекеттерге барды. Бұл парламенттің репутациясына ауыр соққы», – дейді дереккөз.

Бүгін Ақтөбеде екі бухгалтер әйелге сот үкімі шықты. Олар ондаған жүкті әйелді жалған жеке кәсіпкерлік арқылы рәсімдеп, мемлекетке 100 миллион теңге шығын келтірген.

Сотталғандардың бірі, 39 жастағы Гауһар Өмербекова, бұған дейін Дәулет Мұқаевтың курсын оқығанын мойындап отыр. Осыған ұқсас басқа істерде де күдіктілер Мұқаевтың курсын «үлгі» ретінде атағаны белгілі болды.

Депутаттың өзі бұған дейін бірнеше рет «ешқашан заң бұзуға шақырмадым» деп мәлімдеген еді. Дереккөз Мұқаевтың мәселесі тек заңдық емес, депутаттық этика тұрғысынан қаралуы тиіс екенін алға тартып отыр.

«Әрине, формалды тұрғыда Дәулет кінәсіз. Бірақ оған өзіне деген халықтың сенімін ақтамады деген айып тағылуы мүмкін. Жұртты жаппай жалған схемаға итермелеген, тікелей Мұқаевтың көпшілік алдындағы абырой-беделі мен насихаты екені анық», – деп қосты Мәжілістегі дереккөз.

Мәжілісте Дәулет Мұқаевтың мәселесі арнайы талқыланып, оның депутаттық мандатының тағдыры да қарастырылуы мүмкін.

Енді ол Мәжіліс алдында өз бастамаларының жалған кәсіпкерлікті ынталандырмағанын дәлелдеуі тиіс. Депутаттың жауапкершілігі тек заң алдында ғана емес, моральдық тұрғыдан да бағаланбақ.

Бұл туралы әлі де айтамыз. Бізге тіркелуді ұмытпаңыз👇

📱 Erteńmedia

⚡️ ҚМГ-ға жасалған шабуыл: ресейлік хакерлер мұнай алыбының жүрегіне қалай жол тапты...

Қазақстанның ең ірі мұнай-газ компаниясы «ҚазМұнайГазға» (ҚМГ) ресейлік хакерлік топ кибершабуыл жасады деген ақпарат шықты деп хабарлайды Ertenmedia Dark Reading басылымына сілтеп.

Seqrite Labs сарапшыларының айтуынша, шабуылды ұйымдастырған топ биыл сәуірден бастап белсенділік танытып келеді. Хакерлер ҚМГ-ның қаржы бөлімінің қызметкерінің электронды поштасын бұзып кіріп, компания қызметкерлеріне жалған хаттар таратқан.

Хаттар «ШҰҒЫЛ!» деген тақырыппен тараған және қызметкерлерден «жаңа өзгерістерге байланысты жалақы мен жұмыс кестесі туралы құжаттармен танысып шығуды» талап еткен. Құжаттар архив түрінде ұсынылған.

Ашқан жағдайда, қызметкердің компьютеріне хакерлер арнайы бағдарлама орнатқан. Сол арқылы олар компанияның ішкі жүйесіне кіріп, ақпарат ұрлауға мүмкіндік алған.

Seqrite Labs бұл хакерлік топты «Noisy Bear» (Шулы аю) деп атаған. Зерттеушілер олардың Орталық Азияда, әсіресе Қазақстанның мұнай-газ саласына қызығушылық танытатынын айтады...

Толығырақ тұсқа салдық.

Бізге тіркелуді ұмытпаңыз👇

📱 Erteńmedia

⚡️ Қошановқа берілген карт-бланш: Тоқаев реформасының негізгі бенефициары кім..

Президент Тоқаевтың түнеукүнгі ұсынысы елдің саяси ландшафтын түбегейлі өзгертетін түрі бар деп пайымдайды Ertenmedia.

Реформаның түпкі мәні Сенаттың өз миссиясын орындап болғанында. Бастаманың астары да айқын.

Бір палаталы парламент Мәжіліс салмағын арттырып қана қоймай, оның төрағасын биліктің саяси әрхитектурасындағы орталық фигураға айналдырады.

Мәжіліс төрағасы бұған дейін көбіне рәсімдік рөл атқарса, енді парламенттік процестің негізгі дирижері болмақ. Оған заң шығару ісінен бастап, елдегі күн тәртібін айқындауға дейінгі жаңа құзырет пен саяси капитал беріледі.

Осы тұрғыдан реформаның жемісін көретін тұлға қазіргі Мәжіліс спикері әрі «Аманат» партиясының төрағасы Ерлан Қошанов болғалы тұр.

Ерлан Жақанұлы саяси баспалдақпен сенімді көтеріліп келе жатқан саясаткер. Қарағанды облысының әкімі ретінде өңірдегі күрделі процестің ортасында жүріп тәжірибе жинаса, АП-ны басқарған тұста саяси шешім қабылдау алаңында ықпалын бекемдей түсті.

Қошановтың партия мен парламенттегі ұстанымы Тоқаевтың талабымен толық үйлесіп, Ақорданың саяси бағдарын іске асыруда шешуші рөл атқарып отыр. Реформа жүзеге асса, мәжілістегі басым партияның жетекшісі барлық саяси процестің ұйытқысына айналмақ.

Бізге жеткен инсайд бойынша, президенттің бірмандатты депутаттардан көңілі қалған. Олар көбіне әлемжелідегі арзан ұпай жинайтын мәлімдемеден аса алмай, заң шығарушылық міндетін орындамаған.

Соған қарағанда Тоқаев саяси жүйені партиялық жауапкершілік аясында реформалауды көздеп отырған сыңайлы.

Қалай болған күнде келер жылғы кампания Қошановтың мансабындағы жұлдызды сәт. Әлбетте, көп нәрсе Ерлан Жақанұлының саяси менеджментіне тікелей байланысты.

Бір палаталы парламент Тоқаев дәуіріндегі маңызды белес десек, оның жүзеге асуын мәжілістің қазіргі спикерінсіз елестету қиын.

Президент жоспары іске асса, парламент жүйесіндегі ең ықпалды тұлға Қошанов болмақ. Алдағы саяси процестің басты интригасы да осында жатыр.

Бұл туралы әлі де айтамыз. Бізге тіркелуді ұмытпаңыз👇

📱 Erteńmedia