⚡️ Теріскейден тараған токсин. Алматы форумындағы идеологиялық диверсия...

Қазақстанға теріскейден түрлі «инфоцыған», псевдожурналист, поп-жұлдыз мен пропагандистерді тоқтаусыз тарту кейбір ықпалды адамдардың санасындағы «стокгольм синдромының» белгісі.

Саясаттанушы Досым Сәтпаев осындай пікір білдірді, деп хабарлайды Ertenmedia.

Оның айтуынша, Кеңес Одағы күйрегелі бері 30 жылдан астам уақыт өтсе де, қоғамның кей өкілі әлі күнге дейін сол дәуірдің идеологиясын сағынады.

«Осы уақытта мүлде жаңа буын өсіп жетілді. Қоғам өзін-өзі тану, деколонизация кезеңін басынан кешіруде. Бірақ кейбір бизнесмендер мен элита өкілдері осы үрдісті әлі толық қабылдамаған тәрізді.

Олар мемлекет қаржысын да, жеке қаржысын да көрші елдің инфоцығандары мен пропагандистерін шақыруға шашып жүр. Халықаралық форум өткіземіз деп жүргендер әлемнің түкпір-түкпірінен интеллектуалды, мәдени өнім беретін шын мәніндегі тұлғаларды әкелуі керек еді.

Алайда бұлар Қазақстанға маңайлатуға болмайтын персоналарға қызыл кілем төсеп мәз», – дейді ол.

Саясаттанушының бүй деуіне ресейлік коуч, инфоцыған Алексей Ситниковтың Алматыдағы атышулы Жанна Кан ұйымдастырған әйелдер форумындағы сөзі себеп болған.

Ресейден келген мейман Кремль көсемін «жеңілмейтін тұлға» деп сипаттап, оны бүкіл әлемге әсер етуші құдіретті күш ретінде дәріптеген еді. Ситниковтың сөзі басқыншы елдің ешбір әрекетін қолдамайтын қазақ қоғамында шу туғызып жатыр.

«Мұндай спикерлердің елге келуі өте қауіпті үрдіс. Бұлар Ресейдегі зомби-жәшікпен әлдеқашан біте қайнасып, соғыс пен агрессияның синониміне айналып кеткен. Қазақстанда бұларға қарсы мәдени және ақпараттық иммунитет қалыптасуы керек еді. Бірақ көріп отырғанымыздай, біздің кейбір азаматтар оларға әлі күнге дейін аузын ашып, таңырқай қарайды», – дейді Досым Сәтпаев.

Доскең осындай "токсичный" спикерлерге әлі де алаң беріп отырған біздің элитаны оңдырмапты. Толығырақ осы тұста.

Бұл мәселеге әлі де тоқталамыз. Бізге тіркелуді ұмытпаңыз👇

https://t.me/ertenmedia

⚡️Бөкеңнің мұрагері банкрот болды. Нұрбол Назарбаев елден шыға алмайды...

Болат Назарбаевтың үлкен ұлы Нұрбол Назарбаев банкротқа ұшырап, оған тиесілі компаниялар мен мүліктер бұғатталды, деп хабарлайды Ertenmedia.

Қазір экс-президенттің немере інісі 58 млрд теңге қарызы үшін істі болып жатыр. Оның банктегі есеп-шоты мен дүние-мүлкі бұғатталып, компаниялардағы үлесіне шектеу қойылған. Бұған қоса Нұрбол Назарбаев елден шығу құқығынан айырылды.

«Shishkin Like» арнасының мәліметінше, Назарбаевтар әулетінің ірі активтерін басқарған Prime cap бас компаниясы бүгінде жабылу алдында тұр.

Оған қарасты Prime Capital Real, Prime Capital Re Plaza, Prime Capital Invest сынды бірнеше кәсіпорынның Алматы мен Алматы облысында жылжымайтын мүлкі бар.

Сондай-ақ Prime Capital Re Talgar компаниясының атына тіркелген шарап зауыты мен жер телімдері, Prime Capital Re Ushkonyr иелігіндегі Шамалғандағы ауқымды аумақ, Іле ауданындағы «Qaz-Aq-Kus» құс фабрикасы, Карасайдағы «Бахар-А» тойханасы және басқа да жер телімдері бүгінде бұғаттаулы тұр.

Нұрболға тиесілі активтердің ішінде Алматы ауыр машина жасау зауытындағы (АЗТМ) үлестері де бар.

Бұған дейін Ertenmedia Нұрболдың есімі Активтерді қайтару комитетінің жабық тізімінде тұрғанын хабарлаған еді. Бізге жеткен инсайд бойынша оған қарсы кампания әулеттің капиталын қайтарудағы ірі науқанның ақтық әрі маңызды кезеңі.

Болат Назарбаев өзінің өсиетхатын алғаш рет 2014 жылы жазып, онда барлық мүлкін үлкен ұлы Нұрболдың атына табыстаған. Бөкеңнің өзі өмірден өткенмен, отбасының активтері ыдырай қоймаған еді.

Нұрбол мен оның інісі Ербол Назарбаевтар қолда бар мүлікті ұстап қалу үшін соңына дейін күресуге дайын деген ақпарат та тараған болатын.

Соңғы кезде ағайындыларға қарсы ақпараттық науқанның күрт күшейгенін байқауға болады. Мәжілістегі Ермұрат Бапи бастаған белді депутаттар Болаттың ұлдарына күн бермейін деп тұр. Бөкең қайтыс болса да, ол үшін "Жаңа Қазақстан" алдында жауап беретін адам бар. Ол Болаттың ұлы Нұрбол Назарбаев.

Бөкеңнің артында 9 заңды баласы, одан бөлек онға жуық заңсыз бала қалды. Оның ішінде бәйбішенің ұлдары Нұрбол мен Ербол Назарбаевтардың қолдары ұзын.

Ertenmedia Болат Назарбаевтың бақытты өмірін де, бақытсыз өмірін де жазған болатын. Әлі де көз қырын салып отырады. Бізге жазылып алыңыздар👇

https://t.me/ertenmedia

⚡️«Оттегі жетпеген» режиссер Қазақстанға қайта оралды...

Танымал режиссер Ермек Тұрсынов араға аз уақыт салып елге қайта оралды. Оның Қазақстанға келгенін экс-саясаткер Болат Әбілов растап отыр, деп жазады Ertenmedia.

Әбілов досының қысқа мерзімді «қуғын-сүргіннен» аман-есен оралғанын қуана хабарлаған екен. Бес айға жуық бөгде елде өмір кешкен Тұрсыновпен арадағы әңгіме ел ішіндегі ахуал, әлемдегі дүрбелең төңірегінде өрбіген.

"Қайда қарасаң аласапыран, шиеленіс, дағдарыс. Осындайда дүниеге даналық биігінен қарау маңызды", - деп толғаныпты Әбілов.

Экс-саясаткер Тұрсыновтың тұлғалық болмысына тамсанып, оның Қазақстан атынан үш рет «Оскарға» ұсынылғанын еске салыпты. Айтуынша, режиссердің шығармашылық шабыты енді-енді ашылып келеді, Ермектің отандық киноға әлі де берері мол.

Айта кетсек, мамырдың ортасында Тұрсынов Қазақстаннан біржола кетіп жатқаны туралы тосын жазба қалдырған. Елде өмір сүру ауырлап кеткенін, творчествосына шектеу қойылғанын және өзіне қысым жасалғанын айтқан. Тұрсынов салаға жауапты болған шенділерге, әсіресе Ақтоты Райымқұлова, Дәурен Абаев пен Асхат Ораловқа қатты шүйліккен-тұғын.

"Еркін шығармашылықпен айналысуыма амал қалдырмағасын, елден кетуге мәжбүрмін. Маған бұл елде оттегі жетпейді. Абсурд әдепкі жағдайға айналды. Біз құзға құлап барамыз", - деген болатын режиссер.

Өз кезегінде журналист Гүлбану Әбенова әлгі мәлімдеменің астарында басқа себеп жатқанын алға тартқан. Оның пікірінше, Тұрсынов отандық кинематографияда мемлекеттен ең көп қолдау көрген маман. Оған әрдайым қуатты PR жасалып отырған.

Әбенова режиссерге соңғы жылдары мемлекеттен миллиардтаған теңге бөлінгенін атап өткен. Тек "Бесмойнақ" фильміне 500 млн теңге жұмсалған, ол әлі күнге дейін көрерменге жол тартпаған. Режиссердің өзі жауапкершілікті мойнына алмаған көрінеді.

"Алдымен пандемияға сілтеді, сосын маргетингі төмен деді, кейін тағы бір себеп тапты. Ермек өзінен басқаның бәрін кінәлайды. Бір кезгі шалқыған заманның дәуірі өтіп, продюсерлердің үйіне Антикор сау етіп кіріп келгенде, Тұрсынов кенеттен қысым туралы сөйлей бастады. Бұғалтырынан бастап кәскәдөріне дейін тергеуге шақырды. Өзіне тықыр таянғанын сезіп, Қазақстаннан кетуді ұйғарды", – деп жазған еді журналист.

Ол сонымен қатар режиссердің отбасы соңғы он жыл бойы Испанияда тұратынын айтқан. Мәдениет комитеті кинематография басқармасының басшысы Ғани Мұратов "Ермек елден кетер алдында, мемлекеттен тағы да ақша (20 млрд теңге) сұрады" деп мәлім еткен еді.

Сөйткен Тұрсынов араға бес ай салып, Қазақстанға қайта оралды. Оның елде қанша уақытқа дейін аялдайтыны әзірге белгісіз.

Бұл мәселеге әлі де тоқталамыз. Бізге жазылып алыңыз👇

https://t.me/ertenmedia

⚡️ Тоқаевтың сөзін "қалқан" қылған әкім: Қандыағаштағы қызметтік роман немен аяқталды...

Ақтөбе облысы Қандыағаш қаласының әкімі Қазыбек Аққайыр ашынасын тепкіге жыққаны үшін кінәлі деп танылды, деп хабарлайды Ertenmedia.

Сот шенеунікке 314 560 теңге айыппұл салды.

Orda-ның мәліметінше сот процесі кезінде үйлі-баранды, ақарлы-шақарлы әкім жұмыс орнындағы әріптесімен әмпей-жәмпей болғанын жоққа шығармапты. Алайда көңілдесіне қол көтергенін мойындамаған. «Отбасымның алдында-ақ жазамды тартып отырмын» деген уәж айтқан екен.

Оқиға Жаңа жыл қарсаңында шенеуніктің кабинетінде болған. Әкім мен оның көңілдесінің арасында жанжал шығып, Аққайыр әйелдің алқымынан алып, бірнеше рет төмпештеп жіберген.

Соттағы соңғы сөзінде әкім болған іске өкініш білдіріп, тіпті президент Тоқаевтың сөзін мысалға келтірді:

«Президент кей әйелдердің айқай шығарып, қоғамдық тәртіпті бұзатынын айтқан еді. Қандыағашта да сондай әйелдер бар», – деген Аққайыр осылайша өз әрекетін ақтауға тырысты.

Судья оның уәжіне иланған жоқ. Аққайырдың кінәсі дәлелденіп, 314 560 теңге айыппұл салынды. Бұған қоса ол жәбірленушіге 100 мың теңге моральдық төлем және сонша көлемде адвокат шығынын өтеуге міндеттелді.

Бізге жазылып алыңыз👇

https://t.me/ertenmedia

⚡️ Ресейге кеткен вагондар. ҚТЖ-дағы Мәмин схемаларының құпиясы ашылды...

Асқар Мәминнің ҚТЖ басшылығындағы сегіз жылы ұлттық компания толық тұралатып кетті деп хабарлайды Ertenmedia.

Осы кезеңде ҚТЖ триллиондаған қарызға батып, темір жол саласындағы стратегиялық маңызы зор активтер қолдан қолға өткен. Компанияның локомотив құрастырудан бастап, астық тасымалына дейінгі маңызды секторы шетелдік серіктестерге сатылып кеткен.

Сөй деген қоғам белсендісі Елмар Құсайынов экс-премьердің КТЖ-ны басқарған жылдардағы қызметіне қатысты тың деректерді бөлісті.

Пікірінше, Назарбаевтың сенімді серігі саналған Мәминнен қалған «мұраның» зардабын Қазақстан әлі ұзақ уақытқа дейін тартатын болады.

Оның айтуынша, Мәмин басқарған 2008-2016 жылдар аралығында мемлекет ұлттық компанияның бірқатар ірі активтерінен айырылып қалған. Атап айтқанда, ресейлік «Трансмашхолдинг» ҚТЖ-ның басты активі Локомотив құрастыру зауытының 50 пайызын иеленсе, кейін Электровоз құрастыру зауыты акциясының 25 пайызы француздың «Alstom Transport SA» компаниясына берілген.

Сол кезеңде «Қамқор Локомотив» пен «Қамқор вагон» компаниясы жекешелендіріліп, соңында Құлыбаевқа жақын құрылымдардың бақылауына өткен.

Бұған қоса, Мәмин тұсында «Транпорттың сервис орталығы" компаниясы Қайрат Сатыбалдының меншігіне берілген. Кейін компанияның 629 теміржол торабын заңсыз иеленгені анықталып, активтер мемлекетке қайтарылған еді. Сатыбалды тарифтерді негізсіз өсіргені үшін сотталған болатын.

Одан бөлек, 2014 жылы ҚТЖ мен Әлия Назарбаеваға қатысы бар «Instant Payments» ЖШС арасында келісім жасалған. Компания сатылған әр билеттен комиссия ұстап келген. Бұл шарт тек 2022 жылы ғана бұзылды.

Экономист Олжас Құдайбергеновтың есебінше, Мәмин басқарған жылдары ұлттық компания 2 триллион теңгеден аса қарызға батқан. Осы кезеңде ҚТЖ табысты қызметінен емес, сырттан алынған кредит есебінен көрсетіп келген.

2013 жылы «Қазтеміртранс» пен ресейлік «Русагротранс» бірігіп, «Астық-Транс» компаниясын құрып, әрқайсысы оған 1500 вагоннан берген. Арада бір жыл өткенде қазақстандық тарап акциясының барлығын ресейлік серіктесіне сатып жіберген. Нәтижесінде, Қазақстанның стратегиялық маңызы зор астық тасымалы нарығы толықтай ресейлік компанияның қолына өткен.

2019 жылы «Астық-Транс» акциясы офшорлық Malesto Investments компаниясына сатылып кеткен. Биылғы есеп бойынша, Қазақстанның астық тасымалындағы «Астық-Транс» үлесі 89,5 пайызға жеткен.

"Бұрынғы премьерден қалған мұраның зардабын толық бағалау үшін ондаған, тіпті жүздеген қылмыстық істің томдары да жеткіліксіз. Қазақстан стратегиялық маңызы жоғары активтерінен айырылып, темір жол саласын толықтай ақсатып алды", - дейді Елмар Құсайынов.

Мәминге әлі де тоқталамыз. Бізге жазылып алыңыз👇

https://t.me/ertenmedia

⚡️Тоқаевтың теріскей тактикасы: Ресеймен қатынастың жұмсақ сөзі мен қатқыл есебі...

Президент Тоқаев Душанбеде өткен «Орталық Азия - Ресей» саммитінде Кремль Қазақстанның стратегиялық серіктесі екенін айтты, деп хабарлайды Ertenmedia.

«Әлемде бұрын-соңды болмаған геосаяси дүрбелеңге қарамастан, Ресей Қазақстанның одақтасы әрі стратегиялық серіктесі болып қала береді», – деді Мемлекет басшысы.

Президенттің айтуынша, Ресей мен Орталық Азия арасындағы сауда айналымы 2024 жылы 20 пайызға артып, $50 млрд-тан асқан.

Оның жартысынан көбі Қазақстан мен Ресей арасындағы сауда үлесі, былтыр ол $28 млрд-қа жетті. Ресей Қазақстан экономикасына $26 млрд-тан аса инвестиция құйып, ең ірі инвесторлардың қатарына енген.

«2030 жылға дейін Қызылордадан Ресей шекарасына дейінгі автожолды төрт жолаққа дейін кеңейтеміз. Ресей және Түрікменстанмен бірлесіп, «Солтүстік-Оңтүстік» дәлізінің шығыс тармағын дамытамыз. 2027 жылға қарай оның жүк өткізу әлеуетін екі есеге арттыру көзделген. Былтыр осы бағыт бойынша жүк тасымалы 2,5 млн тоннаға жетті. Дәліздің әлеуетін толық ашу үшін бірлескен инвестициялық бағдарлама әзірлеу қажет. Бұл мәселелерді 12 қарашада Ресейге жасайтын сапарым алдында егжей-тегжейлі талқылауды ұсынамын», – деді Тоқаев.

Оның сөзінше, Қазақстан Ресей мұнайының Қытайға жеткізілуіндегі негізгі транзиттік бағыт. Қазір жылына 10 млн тонна ресейлік мұнайды Қытайға тасымалдап отыр, тіпті биыл бұл көрсеткіштен асып кеткен. Жуырда Петерборда Мәскеу мен Астана газ саласындағы ынтымақтастық жөніндегі маңызды келісімге қол қойған.

Экологиялық мәселелер де назардан тыс қалмады.

Президент Орталық Азия мен Ресейдің экология жөніндегі арнайы министрлер кеңесін құруды ұсынды. Кеңес трансшекаралық өзендер мен Каспий теңізінің экологиялық ахуалын бақылауға алып, Каспийдің су ресурсын сақтау бойынша мемлекетаралық бағдарлама әзірлеуі қажет.

«Су қауіпсіздігі өте-мөте маңызды мәселе. Сондықтан су ресурстары мен ауыл шаруашылық жерлерінің жай-күйін нақты бағалап, төтенше жағдайды болжау үшін бірлескен ғарыштық мониторинг бағдарламасын іске асыруды ұсынамын», – деді Мемлекет басшысы.

Президенттің айтуынша, орыс тілі ортақ байлық әрі байланыстырушы фактор болып қала бермек. Дегенмен бұл қазақ тілінің мемлекеттік мәртебесін нығайтуға еш кедергі болмауы керек екенін ескертті.

«Мен жастарымыздың орыс тілін жақсы білуі маңызды екенін үнемі айтып келемін. Алайда бұл қазақ тілінің мемлекеттік мәртебесін нығайту жөніндегі жұмысқа кедергі келтірмейді. Тіліміз бізге Жаратқаннан берілген әрі оның мәртебесі Конституцияда бекітілген. Сондықтан қазақ тіліне назар аудару, көңіл бөлу жалғасады. Менің ойымша, жастарымыз екі немесе тіпті үш-төрт тілді еркін меңгеруге толық қабілетті», – деді Тоқаев.

Бізге жазылып алыңыз👇

https://t.me/ertenmedia

⚡️Алматының жүрегіне қадалған мұнаралар: заңсыз құрылысқа рұқсат берген шенділерге тықыр таянды...

Алматы әкімдігінің бірқатар лауазымды тұлғаларына қаладағы даулы құрылыстарға қатысты тексеру басталды, деп хабарлайды Ertenmedia.

Бұл туралы премьер Олжас Бектенов депутаттар сауалына берген жауабында мәлімдеді.

«Алматы әкімдігінің құрылыс сапасын қадағалайтын жауапты мекемелеріне қатысты тексеру тағайындалды. Биыл төртінші тоқсанға жоспарланған кешенді тексеріс аясында құрылыс нысандарына берілген рұқсат құжаттардың заңдылығы толық зерттеледі», – деді үкімет басшысы.

Соңғы бес жыл бедерінде Алматы әкімдігі RAMS Kazakhstan құрылыс компаниясымен алысып келеді.

Атап айтқанда, компания салған NEF Uptown, RAMS City, Rams Garden, RAMS Evo және Signature тұрғын үй кешенінің барлығынан дерлік заң бұзушылық анықталған.

«NEF Uptown» кешені бойынша тапсырыс беруші мен құрылысшыға (мердігерге) кемшілікті жою туралы талап қойылған. Нәтижесінде кем-кетіктер түзетіліп, нысан пайдалануға берілген.

«RAMS City» және «Rams Garden» кешенінде анықталған заңсыздық бойынша құрылыс компаниясына әкімшілік жаза қолданып, оларды орындау міндеттелген. Компания талапты орындаған соң ғана тұрғын үйлер пайдалануға берілген.

Жақында ғана қоғам назарын аударған атышулы «Beyond» тұрғын үй кешені бойынша құрылыс тоқтатылып, әкімдік тарапынан олқылықты жою туралы ұйғарым берілген.

Еске салсақ, бұған дейін Базарбек-Пономарев тандемі Алматыдағы RAMS компаниясының жобаларын құмырсқаның илеуіне теңеп, қаланың қақ ортасынан «VIP-адамдарға арналған» 40 қабатты тұрғын үй салуға қарсылық білдірген еді. Тұрғындар ауқымды құрылысқа қарсылық білдіргесін дауға президент Тоқаев араласып, қала әкімі Дархан Сатыбалдыға мұндай жобаларға тежеу қоюды тапсырған еді.

Бізге жазылып алыңыз👇

https://t.me/ertenmedia

⚡️Сюцай синдромы. Баталов басқаратын палата кімдерге табынады...

«Атамекен» кәсіпкерлер палатасының Алматыдағы филиалы «сюцай» деп аталатын күмәнді ағым өкілдерін шақырып, бизнесмендерге тренинг өткізбек болыпты. Бұл туралы телегадағы OK Channel арнасы жазды деп хабарлайды Ertenmedia.

Арнаның айтуынша, тренингті өзін «халықаралық дәрежедегі сарапшы» ретінде дәріптейтін ресейлік Сергей Теплых өткізуі тиіс болған. Ол өзін БҰҰ-ның «Әлем елшісі», «2019 жылғы үздік цифролог», «Бейбітшілік үшін алтын орден» және BRICS Award of Honor медалінің иегерімін деп көрсеткен.

Тексере келе, әлгі атақ-марапаттың ешбірі ресми түрде расталмаған, шындыққа сай келмейтіні анықталған.

«Алаяқ секта мем.құрылымдардың қолдауымен жаңа деңгейге көтеріліп жатыр. Үкімет те құрылтайшысы болып саналатын, кәсіпкерлер жарна төлейтін «Атамекен» палатасы енді бизнесмендерді осы күмәнді ағымға тартуды жөн санапты», – делінген хабарламада.

Арна авторлары егер тренинг өтер болса, палата басшысы Райымбек Баталов пен Бас прокурорға арызданатынын айтқан. Олар осыған мұрындық болғандарды «мемлекеттік деңгейдегі алаяқтық» үшін заң алдында жауап беруге шақырып отыр.

Айғай-шудан қорыққан «Атамекеннің» Алматы филиалы іле-шала тренингтің өтпейтінін жеткізген екен. Палата директоры алдағы «сюцай сектасының өкілдерін» шақырмауға уәде беріпті.

Арна авторлары ұқсас жағдай бұрын Астанада да болғанын еске салды. Бір-екі жыл бұрын «Аманат» партиясының елордалық филиалы сюцай қозғалысының жетекшісіне «Тоқаевтан алғыс хат» берілгені туралы дау шыққан еді. Кейін партия филиалы хаттың жалған екенін айтып, полицияға шағым түсіретінін мәлімдеген. Бірақ іс сол күйі жалғасын таппаған.

Ertenmedia-ға жеткен мәлімет бойынша соңғы жылдары еліміздегі «сюцай» ағымы қанатын кеңге жоюда. Күмәнді ағымның өкілдерін түрлі жабық шараларға шақырып, "уағызын" ұйып тыңдайтын аудитория ұлғайып келеді.

Ал сіз сюцайға сенесіз бе?..

Бізге жазылып алыңыз👇

https://t.me/ertenmedia

⚡️ «Қырық пайыздық қамыт». Базалық мөлшерлеменің 18 пайызға жеткені нені білдіреді...

Қазақстанда ипотека мен автонесие 25 пайызға дейін көтерілуі мүмкін. Ал тұтынушылық несие тіпті 40 пайыздан асып түсуі ғажап емес.

Бұған Ұлттық банктің базалық мөлшерлемені 18 пайызға көтеруі себеп жазады Ertenmedia экономист Алмас Шөкинге сілтеп.

«Меніңше, қазіргі ахуалды «сейсмикалық өзгеріс» деген сипаттаған жөн. Табанымыздың астындағы қара жердің өзі сәт сайын шайқалып тұрғандай әсер қалдырады», — дейді ел экономикасының шатқаяқтап тұрғанын меңзеген Шөкин.

Сарапшының айтуынша, базалық мөлшерлеме 18 пайызға жеткенде банктер ең сенімді клиенттеріне қысқа мерзімді несиені 22 пайызбен ғана бере алады.

Ал қарапайым халыққа ипотека мен автокредит кемінде 24-25 пайыз, тұтынушылық несие болса 40 пайызға дейін шарықтайды.

«Мұндайда экономикаға инвестиция тартып, өндірісті қалай дамытуға болатынын түсіну қиын. Шағын бизнес те, қарапайым халық та зардап шегеді. Ең өкініштісі пайыздық мөлшерлеме жақын уақытта төмендей қоймайды», – деп болжайды сарапшы.

Экономист Бектенов үкіметінің саясатына сынап отыр. Ұлттық қордан алынатын трансферттің көлемін ұлғайту мүмкіндігі таусылғасын, билік сырттан қарыз алуға көшкен.

Мәселен 8 триллион теңгелік мемлекеттік инвест. бағдарлама «Бәйтерек» арқылы жүзеге аспақ. Ол үшін «Бәйтерекке» 1 триллион теңге бөлінеді де, қалған 7 триллион теңгені ішкі нарықтан қарызға алады.

«Түсінбейтінім, ішкі нарықтан мұндай орасан соманы қандай пайызбен алмақшы? Бұл да кемі 21-22 пайызбен алынатын несие ғой. Мұндай пайыздық жүктемемен қай жоба өзін ақтай алады? 22 пайыздық несие үш жарым жылда екі еселенеді», – деп атап өтті сарапшы.

Шөкин Үкімет тарапынан қолға алынып жатқан ауқымды инвестициялық жобалардың нақты өндіріс пен тұтынушы нарығына пайдасы шамалы екенін айтады. Ал Ұлттық банк осы жолы инфляцияның шарықтауын тым кеш байқап қалған.

«Мүмкін Сүлейменовке базалық мөлшерлемені жазда-ақ көтере түсу керек пе еді? Қазіргі инфляция деңгейін теңгенің бағамына қарап-ақ болжауға болады. Доллар қайда кетсе, инфляция да сол жаққа кетеді. Немесе керісінше инфляция артса, доллар да оның соңынан ереді», – деп түйіндеді сарапшы.

Бізге жазылып алыңыз👇

https://t.me/ertenmedia

⚡️Түркияға тур, қымбат телефон, элиталы парфюм: Ақтөбе элитасын жемдеген 6 миллиард...

Ақтөбеде CNPC-ге қарасты қытайлық компанияның бұғалтыры мен басшысының орынбасары 6 миллиард теңгеден астам қаржыны қолды қылғаны үшін сотталды.

Мұнай-газ саласының сарапшысы Нұрлан Жұмағұлов осы іске қатысты тың дерекпен бөлісті, деп хабарлайды Ertenmedia.

Оның айтуынша, CNPC-дің еншілес кәсіпорны «СНПС-Ақтөбемұнайгазға» қарасты «Ту-Ха» мұнай-техникалық қызмет көрсету компаниясының екі қызметкері сеніп тапсырылған мүлікті талан-таражға салу және заңсыз жолмен тапқан қаражатты заңдастыру бойынша кінәлі деп танылған.

Оларға 8 жылға бас бостандығынан айыру жазасы кесілді. Жалпы шығын көлемі 6 миллиард теңгеден асып жығылған.

Айыпкерлердің айтуынша, 2004 жылдан 2020 жылға дейін компания басшылығының бұйрығымен ақшаны қолма-қол шығарып, қаражатты қазақстандық шенділерге пара ретінде үлестіріп келген.

Атап айтқанда…

Шетелдік жұмыс күшін кедергісіз кіргізу үшін ай сайын доллармен Ақтөбе облысының Еңбек департаменті мен облыс әкімдігіне ақша төленген.

Экология департаментіне жыл сайын химреагенттер мәселесін «шешу» үшін 20 мың доллар беріліп тұрған.

Ал Миграция қызметіне Қытайдан жұмысшылардың кедергісіз келуі үшін жалпы сомасы 2,4 миллион доллар жұмсалған.

Сондай-ақ 2016 жылы компания талапқа сай келмесе де, лицензиялау комитетіне пара беру арқылы арнайы қызмет түріне рұқсат алған.

Одан бөлек, кеден органына баж салығын азайту мақсатында 500 мың доллар, Ақтөбе облысының прокуратурасына 100 мың доллар, ал қаржы полициясына салық төлеуден жалтаруға байланысты қозғалған қылмыстық істі жабу үшін тағы да пара берілген.

Жұмағұловтың жазуынша...

компания қазақстандық лауазымды тұлғаларға сый-сияпат жасауға да аямай ақша бөлген. Шенеуніктерге шетелге сапар ұйымдастырып, қымбат телефон, элиталы парфюм, сағат пен фитнес-орталықтардың абонементі тарту етілген.

Тергеу кезінде анықталғандай, қытайлық басшылар ақшаны қолма-қол айналымға түсіру үшін салықты 3 пайызбен төлейтін шағын кәсіпорындарды пайдаланған.

Сарапшы қытайлықтардың біздің шенділердің ұртын майлағанын олардың өздері үшін үлкен қауіп деп отыр. Қытай заңнамасында шетелдік шенеуніктерге пара берген адам өлім жазасына кесіледі.

Толығырақ осы тұсқа салдық.

Бізге жазылып алыңыз👇

https://t.me/ertenmedia

⚡️Қымбатшылыққа еті үйренген ел: Үш жүзге жеткен бензинге ешкім таңғалмады...

Қазақстанда бензин бағасы тағы қымбаттады. Қазанның басында жанармай нарығындағы негізгі ойыншылар АИ-95 маркалы бензиннің бір литрін 300 теңгеден сата бастады, деп хабарлайды Ertenmedia.

Digitalbusiness дерегінше межені ең бірінші болып Compass жанармай бекеті бағындырған.

1 қазанда Астанада АИ-95 бағасы 300 теңгеге жетсе, Алматыда бұл бензин тіпті 305 теңгеге саудаланды. Қазір Royal Petrol секілді ірі желілер де осы бағамен сатуға көшті.

Жалпы баға өзгерісіне келсек, АИ-92 маркасының бір литрі 235 теңгеден 238 теңгеге көтерілді. АИ-95 маркалы бензин бірден 5 теңгеге қымбаттап, қазір 300 теңгеден сатылып жатыр.

Ал АИ-98 бензині бүгінгі таңда 350 теңгеден ұсынылуда. Дизель бағасы 331 теңге.

Билік маңындағы сарапшылар бензин бағасының 300 теңге межесінен асуы қоғамда бұрынғыдай дүрбелең тудырмағанын атап өткен екен.

Бізге жазылып алыңыз👇

https://t.me/ertenmedia

⚡️«Сюцай» сынды індеттің иесі кім: Сарымның Балаеваға бағытталған батыл сауалы...

Депутат Айдос Сарым Ақпарат министрі Аида Балаеваға сауал жолдап, елдегі ақпараттық кеңістікте күмәнді тренинг пен далбаса дәрістердің тым көбейіп кеткеніне алаңдаушылық білдірді, деп жазады Ertenmedia.

Оның пікірінше, бүгінде бұл мәселе жеке адамның таңдау еркіндігі шеңберінен шығып, тұтас қоғамға қауіп төндіретін «пандемияға» айналған.

«Кез келген әлемжеліні ашсаңыз жалған пайғамбарлар, ғалымсымақтар мен алаяқтар ұйымдастырған сансыз семинар, курс пен дәрістен көз сүрінеді. Осындай күмәнді схемаға алданып, мыңдаған адам жиған-терген табысынан айырылуда», – дейді депутат.

Сарымның айтуынша, кейбір тренингтер эзотерикалық қаржы пирамидасына айналып кеткен. Мұндай «менталды індет», «психологиялық есірткіге» тіпті тұтас ұжымдар мен отбасылар шырмалып қалған.

Бұған қоса, депутат мемлекетке қарасты компаниялар мен квазимемлекеттік сектор да тренинг пен тимбилдинг деген желеумен осыған репутациясы күмәнді коучтердің қызметін сатып алатынын, сол үшін қымбат қонақүйлерге тапсырыс беріп, бюджет қаржысын оңды-солды шашатынын сынады.

«Мемлекет қаржылық алаяқтықпен, киберқылмыспен, нашақорлықпен, түрлі сектамен арпалысып жатыр. Аталған қауіптің барлығын бойына жинаған осындай күмәнді топтар мен олардың төбе басында тұрған жетекшілермен неге күреспейміз?» – деген сауал қойды депутат.

Айдос Сарым министрліктен:

«Сюцай» секілді ұйымдардың қызметі мен олардың қоғамға әсері бақыланып отыр ма, мұндай ұйымдардың әрекетіне ғылыми тұрғыдан баға беріле ме, халық арасында ақпараттық-түсіндіру жұмысы жүргізіле ме және мемлекетте осы бағытта жұмыс істейтін білікті мамандар мен ғылыми ресурстар жеткілікті ме деген сұрақтарға жауап беруді талап етті.

Айта кетелік, бұған дейін Ertenmedia «Атамекен» палатасының «сюцай» деп аталатын күмәнді ағым өкілдерін шақырып, бизнесмендерге тренинг өткізбек болғанын жазған еді.

Бізге жазылып алыңыз👇

https://t.me/ertenmedia

⚡️Бектеновтің дедлайны: Тоқаев түзетуді талап еткен бағдарламада қандай шикілік бар...

Шағын бизнес пен қымбатшылықтан қажыған халықтың шағымы Ақордаға жеткен тәрізді.

Тоқаев Үкіметке апта соңына дейін қазіргі экономикалық реформаның кем-кетігін түзету жоспарын әзірлеуді тапсырды, деп хабарлайды Ertenmedia.

Президент бағдарламадағы басымдықты шағын және орта бизнесті қолдауға, халықтың табысын арттыруға бағыттауды міндеттеп отыр.

Мемлекет басшысының айтуынша, экономикалық саясат негізінен ел мүддесі мен жаһандық трендке сай келеді. Дегенмен бағдарламаның нақты орындалуын шағын бизнесті көтермелеуге, инвестициялық ахуалды жақсартуға және жалпы экономиканы сауықтыруға бейімдеу керек.

Бектеновтың 48 сағат уақыты бар...

Бұған дейін Ertenmedia-ға пікір білдірген экономист Расұл Рысмамбетов биліктің кедейлікпен күрес стратегиясы жұмыс істемейтінін айтқан.

«Халықта капитал жоқ. Тіпті үтік пен шәугімге дейінгі шағын дүниені де кредитке алатын болдық. Қымбат зәулім үйлер аңырап-қаңырап тұр. Оған көшіп барады-ау деген орта таптың табысы ортайып қалған. Тапқан табысыңның тең жартысын тамаққа жұмсау, шыны керек трагедия», — деген еді ол.

Бірер ай бұрын Тоқаев жаңа Салық кодексіне қол қойған.

2026 жылғы 1 қаңтардан бастап құжатқа сәйкес қосылған құн салығының базалық мөлшерлемесі 12 пайыздан 16 пайызға дейін көтеріліп, жеке табыс салығының прогрессивті шкаласы енгізіліп, «байлыққа салынатын салық» пайда болады.

Кодекс қабылданған соң бизнес өкілдері оның тәуекелі жоғары екенін мәлімдеді. Сарапшылар кәсіпкерлер үшін алдағы жылдар «тіршілік үшін күрес кезеңіне» айналатынын айтуда. Жаңа салық саясаты бухгалтерияны қиындатып, шығынды арттырып, микробизнеске ауыр соққы болмақ. Көптеген шағын кәсіпкер жеңілдетілген режимнен айырылуы мүмкін.

Елдегі екі таңбалы инфляция қазақтардың қалтасын қағып-сілкіп жатыр. Halyk Finance есебінше тұрғындардың жалпы шығынының 52,5 пайызы азық-түлікке жұмсалады екен.

Мәжіліс депутаты Асхат Рақымжановтың дерегінше Қазақстанда кедейлік деңгейі соңғы он жылда екі есеге жуық өскен. 2015 жылы халықтың 2,7 пайызы кедей деп есептелсе, 2024 жылдың соңында бұл көрсеткіш 5,1 пайызға жеткен.

Бізге жазылып алыңыз👇

https://t.me/ertenmedia

⚡️Туыстар тепкісіндегі тағдыр. Бір үйдің бес баласы баспанадан айырылып, анасынан ажырады...

Ақтөбеде бес бала видео үндеу жолдап, қоғамнан араша сұрады, деп хабарлайды Ertenmedia.

Олар аналарының еркінен тыс психиатриялық ауруханаға жатқызылғанын, ал өздері балалар орталығына түскенін айтып, көмек сұрап отыр.

Балалардың үлкені Құралайдың сөзінше, жанжалға себеп баспана мәселесі.

"Қазір біз “Аяла” балалар орталығындамыз. Бір-ақ күнде анамызды психиатриялық ауруханаға алып кетті. Біз осында тап болдық. Үй сатылғанда туыстар анамды өз үлесінен бас тартуға мәжбүрледі. Енді бауырларымды жетімдер үйіне жіберуі мүмкін. Біз қорқып отырмыз. Әкеміз ішімдікке салынған, анамыз бізді жалғыз өзі бағып келді. Бір-ақ күнде бүкіл отбасымыз быт-шыт болды", – дейді қыз.

Құралайдың айтуынша, үй сатуға келіспеген соң, туыстары үйге басып кіріп, анасын соққыға жыққан.

Сол оқиғада полиция шақырған тәтесі анасына жала жауып, «қолында пышағы бар, адамдарға шабуыл жасады» деген сылтаумен ауруханаға жатқызған. Құралай бұл жайтты толық видеоға түсіргенін де айтып отыр.

Балалардың анасы қазір Алматыдағы Республикалық психикалық денсаулық орталығында емделуде. Ақтөбе облыстық денсаулық сақтау басқармасы 1986 жылы туған әйелдің психиатриялық есепте тұрғанын растады.

Балаларға алғаш болып қол ұшын созған ерікті Әсел Мұхан оларды өз қамқорлығына алған. Оның сөзінше, балалар әлі күнге дейін анасын уайымдап, туыстарынан қауіптенеді.

Қазіргі таңда балалар омбудсмені Динара Закиева балалардың анасымен байланыста екенін, әйелдің Алматыда диагнозын қайта тексертіп жатқанын жеткізді.

Әкесі болса, 2021 жылы ажырасқалы отбасынан бөлек тұрады, балалар өміріне араласпайды әрі ішімдікке тәуелді екені белгілі болды. Әйелдің жеке баспанасы жоқ, қазір ол дағдарыс орталығының көмегіне мұқтаж.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️ШҚО экологиясындағы «эпидемия»: 130 миллиондық «аванспен» ұсталған Ботабаев...

ШҚО-ның экология департаментін басқарған Мамай Ботабаев аса ірі көлемде пара алғаны үшін 10 жылға сотталды, деп хабарлайды Ertenmedia.

Orda-ның мәліметінше Антикор оны былтыр шілдеде жол-құрылыс компаниясы басшысының орынбасары Қанат Дырынбаевтан 8,5 млн теңге алып жатқан жерінде ұстаған.

Тергеу дерегінше, бұл бастапқы аванс қана. Ботабаев жалпы алғанда 130 млн теңге көлемінде пара алмақ болған.

Сот процесінде бұрынғы шенеунік өз кінәсін мойындаған жоқ. Дегенмен, сот оған 10 жыл 1 ай мерзімге бас бостандығынан айыру жазасын тағайындады. Пара берген Қанат Дырыңбаев та дәл осындай мерзімге сотталды.

Бұл іске қатысы бар тағы бір тұлға «Инком-Шығыс» ЖШС-ның басшысы Марат Ақылғазин. Ол пара ақшасын заңдастырмақ болғаны үшін 6 жылға бас бостандығынан айырылды.

Тергеу барысында Ақылғазин Дырынбаевтың заңсыз табысын өз компаниясы арқылы жасыруға әрекеттенгені дәлелденген. Үкіммен келіспеген тарап апелляциялық шағым түсіруі мүмкін.

Айта кету керек, Мамай Ботабаев Шығыс Қазақстан облысының экология департаментін небәрі жарты жыл басқарған.

Оған дейін Абай облысында қызмет етіп, бұл лауазымға парамен ұсталған бұрынғы басшы Данияр Әлиевтің орнына келген еді. Әлиев қазір колонияда жазасын өтеп жатыр.

Әлиевтің тұтқындалуына бір ай қалғанда оның орынбасары Рауан Тұраров та алтын өндіруші компаниядан пара алғаны үшін 7 жылға сотталған болатын. Осылайша, ШҚО экология департаментінің соңғы үш басшысы да парамен ұсталып, түрмеге қамалды.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Жұманғарин Конгреспен келісуге кетті: Қазақстан мен АҚШ арасындағы соңғы тосқауыл алынбақ...

Ақорда мен Ақ үй қырғиқабақ соғыс заманынан қалған сауда шектеуінен құтылуға жақын, деп хабарлайды Ertenmedia.

«Орта Азия жаһандық геосаяси пазлдың маңызды бөлшегі болады» деген әулие Бжезинскийдің болжамы ақиқатқа айналуда.

Уашингтонға жұмыс сапарымен барған вице-премьер, Ұлттық экономика министрі Серік Жұманғарин АҚШ Конгресі мүшелерімен кездесуде атышулы Джексон–Вэник түзетуін алып тастауды екі сағат бойы талқылаған екен.

Әзірге екі ел арасындағы сауда-саттыққа осы түзету ресми түрде кедергі келтіріп тұр. Жұманғарин аталған шектеуді жою процесін Конгресс тездетеді деген үмітте.

Министрдің айтуынша, Қазақстан америкалық инвесторлар үшін сенімді серіктес және бизнесті кеңейтуге ашық ел. Ол АҚШ Сауда палатасының өкілдерімен кездесуде екі ел арасындағы әріптестікті білім беру, цифрландыру және энергетика саласында тереңдетуді ұсынған.

Қазір Қазақстанда 30-ға жуық шетелдік университет бар, олардың екеуі әмерикалық оқу орындары.

Америкалық конгрессмендер бұл мәселеде Қазақстанға толық қолдау көрсетуге дайын екенін жеткізген. Бұған дейін сенатор Джеймс Риш пен конгрессмен Роберт Адерхольт Джексон–Вэник түзетуін алып тастауды қолдайтындарын және екі ел арасындағы тұрақты сауда шарттарын орнату маңызды екенін айтқан еді.

Айта кетейік, қазіргі АҚШ мемлекеттік хатшысы, бұрынғы сенатор Марко Рубио аталған түзетуді «ескірген әрі абсурд» деп атаған болатын.

Ол Қазақстанның нарықтық экономика талаптарына сай екенін және ДСҰ сынағынан сәтті өткенін алға тартқан. Дегенмен Джексон–Вэник түзетуін түпкілікті алып тастау үшін АҚШ Конгресінің келісімі қажет.

Бұған дейін әйгілі Atlantic Council аналитика орталығы бізге қатысты терең талдау жасап, 78 млн тұрғыны бар аймақты Қытай мен Ресейдің талауына беріп қоймауды үндеген еді.

"Астананың геосаяси потеницалымен санасатын кез келді. Экономикадағы (біз айтқан soft power) әріптестік бұдан былай АҚШ-тағы министрлер кабинетінің деңгейінде қаралуы тиіс, оны жұмыс тобына ысыра салуды доғару қажет", — деген еді Atlantic Council.

❗️Әміриканың халықаралық саясаттағы бағыт-бағдарына ықпал ететін The National Interest журналы да осы сарында сөйлеген еді. Басылым «аз уақыттан кейін Қазақстанда орыстың пенсионерлері ғана қалады…» деп болжап отыр.

Конгресс Жексон және Веник заңына termination (күшін жойса) жасаса, Қазақстанға ағылатын ақша мен инвестиция, тауар атаулы ондаған, жүздеген есе өседі. Ресейдің экономикалық экспанциясын тежейтін паритет пайда болады. АҚШ ел нарығына енсе, ескі Қазақстаннан қайтарылған ірі компаниялар америкалық кәсіпкерлердің иелігіне берілуі мүмкін. Оның жалғыз жолы Жексон және Веник заңының күшін жою.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Бензин мен тарифтің «тайм-ауты»: Үкімет халықтың қалтасына қарайлай бастады...

Қазақстан үкіметі бензин мен коммуналдық қызмет бағасының өсуіне мораторий жариялады, деп хабарлайды Ertenmedia.

Үкіметтің баспасөз қызметінің мәліметінше, 16 қазаннан бастап елде инфляцияны ауыздықтап, халық пен бизнесті қолдауға бағытталған шаралар іске қосылады.

Атап айтқанда, инфляциялық жағдай тұрақталғанша АИ-92 маркалы бензин мен дизель бағасы қымбаттамайды.

Сондай-ақ 2026 жылдың бірінші тоқсаны аяқталғанша коммуналдық қызмет тарифтерінің де өсуіне жол берілмейді. Тарифті тұрақтандыру коммуналдық саладағы шығындарды оңтайландыру есебінен жүзеге асады.

Шағын және орта бизнесті қолдау мақсатында жаңа бастамалар қолға алынып жатыр.

Мәселен, 2026 жылдың 1 қаңтарынан бастап микро және шағын кәсіпкерлік субъектілеріне салық тексеруі, камералдық бақылау және келісімшарттарға қатысты сот талаптары тоқтатылады.

Бұдан бөлек, жеңілдетілген салық режиміндегі 44 қызмет түрінен басқа барлық сала бойынша шектеулер алынып тасталады.

Арзан ипотека көлемі екі есе ұлғайып, 500 млрд теңгеге жетеді. Тұрғын үй құрылысында «Наурыз», «Наурыз-Жұмыскер» және әскерилерге арналған «Әскери баспана» бағдарламалары кеңейтіледі. Құрылыс компанияларымен үш жылдық баға тұрақтылығын қамтитын офтейк-келісімдер жасалады.

Сондай-ақ, автокөлік сатып алуға арналған жеңілдетілген несие жалғасып, жеке тұлғаларға автокөлік лизингі енгізіледі. Бұған қоса «Бәйтерек» холдингі кәсіпкерлікті қолдаудың қосымша тетіктерін әзірлейді.

Айта кетелік, бүгін Тоқаев Бектеновке 48 сағат уақыт беріп, апта соңына дейін қазіргі экономикалық реформаның кем-кетігін түзетуді бұйырған еді.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Каспийде қалқып жүрген Лукойл: Лондон мен Ақорда арасында қандай ойын жүріп жатыр...

Ұлыбритания ресейлік «Лукойл» мен «Роснефть» компаниясын «қара тізімге» енгізгенімен, олардың Қазақстандағы бірқатар ірі мұнай-газ жобаларына қатысты қызметін шектемейтін болды, деп хабарлайды Ertenmedia.

Forbes-тың мәліметінше Британ үкіметі екі компанияның Қазақстан мен Әзербайжандағы стратегиялық жобаларда жұмыс істеуіне рұқсат берген.

Әсіресе, Қазақстан үшін маңызды Каспий құбыр консорциумы (КТК), «Теңізшевройл» (ТШО) және Қарашығанақ жобасы ерекше аталып, орыстардың осы жобадағы қызметін санкциядан уақытша босату қарастырылған. Аталған жеңілдік 2027 жылдың 14 қазанына дейін жалғасады.

Ресейлік компаниялар Қазақстанның мұнай-газ саласына дендеп еніп алған.

Атап айтсақ «Лукойл» компаниясы «Теңізшевройлдың» 5 пайыз, ал Қарашығанақ жобасының 13, 5 пайыз үлесіне ие. Бұдан бөлек, 2023 жылы «ҚазМұнайГаз» бен «Лукойл» Каспий теңізінің қазақстандық бөлігіндегі «Қаламқас-теңіз, Хазар, Әуезов» кен орындарын игеруге қатысты бірлескен келісімге қол қойған.

Келісім аясында «Лукойл» қазақстандық «Kalamkas-Khazar Operating» ЖШС-ның жарғылық капиталының 50 пайызын сатып алып, стратегиялық серіктес атанған болатын.

Ресейлік компанияның осы кен орындарына құятын инвестициясы алдағы жылдары 6 миллиард доллардан асатыны, ал алғашқы теңіз платформаларының іске қосылуы 2026 жылға жоспарланғаны айтылған.

Президент Тоқаев «Лукойлдың» Қазақстандағы қызметінің 30 жылдығына орай өткен іс-шарада компанияның елімізге салған инвестициясының жалпы көлемі 12 миллиард доллардан асқанын, осы уақытқа дейін 94 млн тонна мұнай және 60 млрд текше метр газ өндіргенін атап өткен еді.

Ал «Роснефттің» Қазақстандағы негізгі рөлі мұнай экспортын қамтамасыз ететін Каспий құбыр консорциумындағы үлесімен байланысты. Компания КТК-ның 7, 5 пайыз акциясына ие және қазақ мұнайының сыртқы нарыққа тасымалдануында шешуші мәнге ие оператордың бірі.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Зумерлерден сескенген билік: Ақорданы алаңдатқан Непал сабағы...

Саясаттанушы Досым Сәтпаев Ақорда пен Үкіметтің экономикалық реформаға қатысты соңғы шешіміне пікір білдірді, деп хабарлайды Ertenmedia.

Оның айтуынша, президент Тоқаев премьер Бектеновке «экономикалық саясатты халықтың мүддесіне қарай бейімдеу» туралы пәрмен берген.

Артынша Үкімет осы тапсырманы орындау үшін апыл-ғұпыл жиын өткізіп, «кабминнің» бұған дейін қабылдаған шараларының салдарымен күресуге кірісіп кеткен.

«Түсінгеніміз, үкіметтің осыған дейінгі істеген тірлігі халықтың мүддесіне қайшы келген болып тұр ғой. Жыл басынан бері желідегі қауым мен шағын-орта бизнес өкілдері де осыны қақсап айтып келді. Айналып келгенде мәселеге Тоқаев араласты, Ақорданың тоқпағы керек болды», – дейді Сәтпаев.

Саясаттанушы бүгінгі дүрбелеңнің тегін емесін, мұның артында тақап қалған референдум мен билік транзитіне түрткі болатын конституциялық өзгерістер жатқанын тілге тиек етіпті. Пікірінше, билік алдағы сайлауға дайындық аясында өз әрекетін қайта қарап отыр.

«Шын мәнінде жүйе «Қаңтардың» қайталануынан қауіптенеді. Елді әдемі ұрандармен алдаусырату саясаты нәтиже бермей тұр.

Әлеуметтік жағдай күрт нашарлап, баға өсіп, кіріс азайып барады. Әлемдік тәжірибеде көрсеткендей, халықтың қарны ашса, биліктің ұраны күресінге тасталады.

Түнеукүнгі Непал, Марокко, Мадағаскардағы кейінгі толқын жастардың (зумерлердің) көтерілісі талайды ойландырып тастады», – дейді Досым Сәтпаев.

Ertenmedia осының алдында Бектенов үкіметінің инфляцияны ауыздықтап, халық пен бизнесті қолдауға бағытталған шаралар пакетін іске қосқанын хабарлаған еді. Министрлер Тоқаевтың түртпегінен кейін қимылдай бастаған.

Бұған әлі де тоқталамыз. Бізге жазылып алыңыз👇

https://t.me/ertenmedia