⚡️ Министрдің мәлімдемесі: қазақстандықтардың айыппұлы жаппай кешірілуі мүмкін...

Қазақстанда ел тарихындағы алғашқы әкімшілік амнистия өтуі мүмкін деп хабарлайды Ertenmedia.kz.

Ішкі істер министрі Ержан Сәденов Үкімет отырысында азаматтардың төленбей қалған айыппұлдарын кешіру тетігі ресми түрде қаралып жатқанын мәлімдеді.

Министрдің айтуынша, қазір орындалмаған әкімшілік айыппұлдарды толық немесе ішінара есептен шығару жолдары пысықталып жатыр.

Қандай құқықбұзушылық түрлері амнистияға ілігетіні, кешірілетін берешек көлемі және қарызды есептен шығару тәртібі мамандар деңгейінде егжей-тегжей талданып жатыр.

17 наурыз күні мемлекет басшысы осындай бұрын-соңды болмаған бастама көтерген еді. Содан кейін Үкімет деңгейінде нақты механизм әзірлеу жұмысы басталған.

Премьер-министр Олжас Бектенов профильді мекемелерге процесті созбауды тапсырды. Үкімет басшысы екі апта ішінде әкімшілік амнистияны іске асыруға қатысты нақты әрі толық ұсыныстарды әзірлеп әкелуді міндеттеген.

Сөйтіп, Қазақстан енді айыппұл саясатын қайта қарауға бағытталған жаңа кезеңнің табалдырығына келіп тұр. Егер бастама іске асса, талай азамат үшін жиналып қалған әкімшілік берешекке байланысты ауыртпалық едәуір жеңілдеуі мүмкін.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Қолыңыздағы телефон енді камераға да ілігеді: Жүргізушілерге нені білу керек...

Қазақстанда көлік тізгіндеген жүргізушілердің жолда келе жатып телефон пайдаланатын әдеті тыйылмай тұр деп хабарлайды Ertenmedia.kz.

Бұл туралы Ішкі істерге қарасты Әкімшілік полиция комитетінің ресми өкілі Ақтоты Боранова мәлімдеді. Оның айтуынша, жол қозғалысы ережесінде көлік жүргізу барысында телефонды қолға алып пайдалануға қатаң тыйым салынған. Тек арнайы құлаққап немесе дауыс зорайтқыш (громкая связь) арқылы сөйлесуге рұқсат етіледі.

«Телефонды магниттік ұстағышқа бекітіп қоюға тыйым салынады деген пікір қате. Егер телефон магнитті бекіткіште тұрса және жүргізуші оған қол тигізбей-ақ қарап отырса, заң бұзушылық болмайды. Ал рөлде отырып телефонды қолға алып, хабарлама жазу немесе қоңырау шалу тікелей заң бұзу болып есептеледі», – деді Боранова «Түскі формат» бағдарламасында.

Оның атап өткеніндей, рөлде телефон ұстаған жүргізуші көбіне-көп жол апатының себепкері болады. Назарын бір секундқа басқа жаққа аударғанның өзі қайғылы жағдайға соқтыруы мүмкін. Сол себепті жүргізушілерге тек арнайы hands-free жүйесі арқылы ғана байланысуға рұқсат етіледі.

Бұдан былай көлік тізгінінде отырып ұялы телефон пайдаланған жүргізушіге 5 АЕК көлемінде, яғни 21 625 теңге айыппұл салынады.

12 наурыздан бастап мұндай құқық бұзушылықты тек полиция қызметкерлері ғана емес, жол бойындағы автоматты камералар да тіркей бастады. Осылайша, рөлдегі телефон енді көзге түспей қалатын ұсақ тәртіп бұзушылық саналмайды.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Алматыда саясаткер Санжар Боқаев ұсталды...

Алматыда қоғам белсендісі Санжар Боқаев ұсталды деп хабарлайды Ertenmedia.kz.

Бас прокуратураның мәліметінше, Боқаевқа қатысты Қылмыстық кодекстің 128 және 131-баптары бойынша тергеу шаралары жүргізіліп жатыр.

«Боқаев жалған ақпарат тарату және қоғамдық пікірді бұрмалау мақсатында әлеуметтік желілерде кейбір тұлғалардың қоғамдық саябақ аумағында заңсыз ағаш кескені және құрылыс нысандарынан мүлік ұрлағаны туралы видеоматериалдар жариялаған. Тергеу мәліметіне сәйкес, Боқаев әлгі әрекеттерді табысы төмен адамдарға ақысын беріп, әдейі ұйымдастырған әрі қаржыландырған», – делінген Бас прокуратура хабарламасында.

Сонымен қатар оған өте ірі көлемде алаяқтық жасау бойынша айып тағылып отыр.

Еске салсақ, 2025 жылдың жазында ІІМ Санжар Боқаевтың өзін аңдып жүргені туралы мәлімдемесін жоққа шығарған. Сол кезде ол Алматы әуежайында өзін ұстауға әрекет болғанын айтқан еді.

2025 жылдың тамыз айында Боқаев Алматы орталығындағы жаңа төселген брусчатканы жұмысшылар жеке үйлерге алып кетіп жатқанын мәлімдеген.

Жақында Санжар Боқаев желідегі парақшасында АҚШ-қа көшіп, бизнесті қолға алғанын айтқан болатын. Ол қоғамдық жұмыстан шаршағанын, бірақ маңызды мәселелерді көтеруді жалғастыратынын жеткізген еді.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Байқап сөйлеңіз: депутат Базарбек Мәжіліс спикерінен ескерту естіді...

Мемлекеттік қызметкерлер биліктің сойылын соғады деген депутат Базарбектің сөзі Мәжіліс спикеріне жақпай қалды деп жазады Ertenmedia.kz.

Депутаттың пікірінше, мемлекеттік қызмет бірінші кезекте халыққа қызмет.

"Өкінішке қарай, мемқызметшілердің көпшілігі мұны жоғарыдағы басшысына, билікке қалтқысыз қызмет ету деп қарастырады. Олардың көкірек көзін ашу керек. Жұма сайын кітапханаға жіберіп, Абай мен Макиавеллиді оқыту қажет", - деді Базарбек.

Алайда мәжілісменнің мәлімдемесін Ерлан Қошанов қолдай қоймады.

"Мен мемқызметтің барлық сатысынан өткен адаммын. Осы салада мемлекетшіл тұлғалар өте көп. 80 мың адамға күйе жағуға болмайды. Сондықтан байқап сөйлеу керек", - деді Мәжіліс спикері.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Назарбаеваның сейфіндегі құпиялар: Боқаев не үшін қамауға алынды...

Саясаткер Санжар Боқаевтың ұсталуына қатысты істің астарында экс-әкім Досаевтың беделіне жасалған шабуыл мен Дариға Назарбаеваның ықпалын тежеу ниеті жатуы мүмкін деп хабарлайды Ertenmedia.kz.

Танымал журналист Гүлжан Ерғалиеваның пайымынша, ресми айыптар гранит ұрлығы мен тал-теректі заңсыз кесу сияқты ұсақ-түйек заңсыздықтар шынайы көрінбейді. Себебі Боқаев жүргізген репортажда Алматы әкімдігінің бюджетті талан-таражға салған әрекеті, шенеуніктердің қала мүлкін жеке мүддеге пайдаланғаны нақты әшкереленген еді.

Ерғалиеваның айтуынша, дәл осы дәлелді репортаждар Боқаевтың биліктің ішінен нақты ақпарат алып отырғанын аңғартады.

«Санжар әрекеттері тек азаматтық белсенділікпен шектелмейді, оның артында ұйымдастырылған саяси науқан тұруы мүмкін. Бұл бұрынғы Алматы әкімі Ерболат Досаевтың беделіне нұқсан келтіруге бағытталған», – дейді журналист.

Ерғалиева Досаевтың президент Тоқаевтың сенімді адамы қатарына енгенін ескерсек, билік енді Алматы әкімдігіндегі Санжарды қажетті мәліметпен «қамтамасыз» еткен ақпарат көзін анықтауға тырысады деп санайды.

Журналист Боқаевтың азаматтық белсенділігіне бұған дейін де күмәнмен қарағанын жасырмады.

«Қалалық ішкі саясат басқармасы басшысының орынбасары ретінде билікке ыңғайсыз БАҚ-тарды жабу ісімен айналысқан болатын. Типографияда газет-журналдың басылуына тыйым салу, тираждарды тәркілеу, журналистердің қатысуынсыз өткен сот процестері осының бәрінің басы-қасында Боқаев жүрді», – деп еске алады Ерғалиева.

Журналистің пікірінше, «бұрынғы Назарбаевтықтардың» ешқашан шын мәнінде биліктен алшақтауы мүмкін емес. Өйткені олардың қызметіндегі барлық құпиялар, табыстар мен жеңілістер бұрынғы қожайындарының сейфтерінде сақталған.

Бұл жерде Ерғалиева Санжар Боқаевтың Дариға Назарбаеваның және оның бұрынғы күйеуі Қайрат Шәріпбаевтың қасында кеңесші қызметін атқарғанын еске салады. Шәріпбаев басшылық еткен «ҚазТрансГазда» кейінірек ірі жемқорлық схемалары әшкереленген еді. Осыған байланысты Боқаев Назарбаева әулетінің былықтарына тікелей қатысы болуы немесе олардан хабардар болуы ықтимал деген пікір бар.

Гүлжан Ерғалиева Боқаевтың ұсталуы жаңа Конституция күшіне енгеннен кейінгі Тоқаев билігінің саяси «тазалау» науқанының басталғанын көрсетеді деп санайды.

«Президент Тоқаевтың «сахна сыртындағы қуыршақ ойнатушылардың заманы өтті» деген сөзі бекер емес. Бұл билік элитасындағы ықпалды «ескі Қазақстанның» реваншистеріне қарсы үлкен күреске дайындық. Боқаев стратегиялық фигура емес, бірақ ол Назарбаеваның айналасындағылар туралы маңызды ақпарат көзі болуы мүмкін. Сондықтан АҚШ-тан Қазақстанға оралды, себебі оған келісімге келу ұсынысы түскен...», – дейді журналист.

Толығырақ осы тұста.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Өскеменді дүр сілкіндірген іс: Жақсылық Омарға екі бірдей ауыр айып тағылды...

Өскеменде Шығыс Қазақстан облысы әкімінің бірінші орынбасары Жақсылық Омарға қатысты сот процесі басталды деп хабарлайды Ertenmedia.kz.

Қылмыстық іс материалына сәйкес, облыс әкімінің орынбасарына Қылмыстық кодекстің екі бірдей ауыр бабы бойынша айып тағылған.

Нақтырақ айтқанда, оған «ірі мөлшерде алаяқтық жасау» (190-бап, 3-бөлім, 1,2 тармақтары) және «ірі көлемде пара алу» (366-бап, 3-бөлім, 3 тармақ) бойынша айып тағылып отыр.

Сот отырысы бүгін, 19 наурызда Өскеменнің қылмыстық істер жөніндегі мамандандырылған ауданаралық сотында ашық тәртіппен өтіп жатыр. Айыпталушының тергеу изоляторында ұстау мерзімі істің соңына дейін ұзартылды.

Еске сала кетейік, 13 ақпанда Жақсылық Омардың ұсталғаны туралы ақпарат желіде тараған еді. Алайда сол кезде облыс әкімдігі өкілдері бұл жөнінде нақты мәлімет бермей, Омардың денсаулығына байланысты демалыста екенін айтқан болатын.

18 ақпанда Ұлттық қауіпсіздік комитеті әкім орынбасарына қатысты іс тергеліп жатқанын ресми түрде растағанымен, тергеудің толық мән-жайы туралы ақпарат жарияланбаған.

Жақсылық Омар 2025 жылдың сәуірінен бастап ШҚО әкімінің бірінші орынбасары қызметін атқарған. Оған дейін 2018-2024 жылдары Өскемен қаласының әкімі болған. Әкім орынбасары желіде белсенділігімен танымал, қызметіне қатысты ақпаратты жиі жариялап отырған.

Қазір сот ісі жалғасуда. Облыстағы саяси ортада аталған іс үлкен резонанс туғызуда. Әкім орынбасарынан басқа да тұлғалардың ұсталғаны туралы мәлімет бар.

Бұған дейін Сақтағанов тарапынан Шнайдер көпіріне қатысты сын айтылып, облыс әкімі жемқорлықтың алдын алу жөнінде құқық қорғау органдарымен бірнеше мәрте кеңес өткізген еді.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Ғылым қорының «ғажайыптары»: Тоқаев миллиардтаған қаржының қайда кеткенін сұрады...

Қазақ ұлттық университетінде ғалымдармен жүздескен президент Тоқаев еліміздегі ғылыми жобалардың түк пайда әкелмей отырғанын сынға алды деп хабарлайды Ertenmedia.kz.

Президенттің айтуынша, Ғылым қоры инновацияны ынталандыру үшін жаңа функцияға ие болғанымен, іс жүзінде тек имитациямен айналысып жатыр.

«Өзін-өзі алдаудың қажеті қанша? Ғылым бар секілді, бірақ оның нақты нәтижесі қайда? Маған жеткен инсайд бойынша, үш мыңнан аса ғылыми жобаның тек 193-інен коммерциялық пайда алынып, нарыққа соның тек 29-ы шыққан. Яғни, индустриялық нәтиже жоқтың қасы!», – деді президент.

Ғылым қорының қызметіндегі тағы бір сорақы жағдай Ақордаға жеткен екен.

Мемлекет басшысының айтуынша, заманауи өндірістерді ашуға бөлінген жер телімдері бос тұр, ал қателікке жол берген қор басшылығы осыған бөлінген мемлекет ақшасын қайтармаған, құқық қорғау органдарына да жүгінбеген.

«Құқық қорғау органдарының өзі грант ретінде бөлінген қаржының Ұлттық мемлекеттік ғылыми-техникалық сараптама орталығы мен Ғылым қоры қызметкерлеріне заңсыз аударылғанын анықтап отыр», – деп мәлімдеді президент.

Осыған байланысты Тоқаев Үкіметке ғылым саласында тәртіп орнатуды және ең бастысы бұған жұмсалған мемлекет ақшасын қатаң бақылауды тапсырды.

«Ғылымды қаржыландыруға келгенде, қаражатты мақсатсыз жұмсауға жол берілмеуі тиіс», – деп түйіндеді Тоқаев.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Наурыздағы күтпеген шешім: Назарбаевтың биліктен кеткеніне жеті жыл толды...

Қазақстанды 30 жыл бойы басқарған Нұрсұлтан Назарбаевтың президенттік қызметтен кеткеніне бүгін тура 7 жыл толды деп хабарлайды Ertenmedia.kz.

2019 жылы 19 наурызда тікелей эфир арқылы Әбішұлы өзінің президенттік өкілеттігін тоқтататынын жариялаған еді. Ол кезде Назарбаев 78 жаста болатын. Ол ел басқарған жылдарында халқына адал қызмет еткенін айтып, қолдау көрсеткен жұртшылыққа алғыс білдірген.

Назарбаев Конституцияға сәйкес өз өкілеттігін Сенат төрағасы Қасым-Жомарт Тоқаевқа тапсырған. Сол күнгі үндеуінде Тоқаевты «адал, сенімді әрі тәжірибелі тұлға» деп атап, оның ел тізгінін ұстауға лайықты екеніне сенім білдірген.

Кейіннен Назарбаев өзіне ізбасар іздеуге үш жыл бойы дайындалғанын айтты. Ол шешімді жарияламас бұрын, Кремль көсеміне хабар бергенін жеткізген.

«Бұл шешім жайында ешкімге тіс жарған емеспін. Тек сол күні таңертең Путинге қоңырау шалдым. Ол үшін бұл күтпеген жаңалық болды», – деп еске алды Нұрекең кейінгі бір сұхбатында.

Алайда Назарбаев ресми түрде отставкаға кеткенімен, саясат сахнасынан бірден кетіп қалмады. Ол Қауіпсіздік кеңесінің төрағасы, «Нұр Отан» партиясының жетекшісі ретінде мемлекет ісіне белсенді араласуды жалғастыра берді. Сөйтіп қос билік туралы алыпқашпа әңгімеге түркті болды.

Президент Тоқаев кейінгі сұхбатының бірінде «үлкен және кіші президент» деген ұғымға жол бермеу керектігін ашық айтты. Оның пайымынша, биліктен кеткен адам толық кетуі тиіс. «Кеткен екенсің, біржола кет», – деді Тоқаев.

Қос билік туралы күбір-сыбыр 2022 жылдың қаңтарындағы қайғылы оқиғаларға түрткі болды деп санайды Тоқаев.

Назарбаев саясаттан тек сол оқиғадан кейін ғана түбегейлі кетті. 2022 жылы 5 қаңтарда Тоқаев Қауіпсіздік кеңесінің төрағалығын өз қолына алғанын мәлімдеп, Назарбаевты биліктегі соңғы қызметінен айырды.

Назарбаев үш минуттық видеоүндеу арқылы өзінің биліктен біржолата кеткенін растап, «зейнеткер ретінде» астанада тұрып жатқанын хабарлады. Жеті жыл бұрынғы тарихи үндеудің жаңғырығы ел жадынан әлі де өше қойған жоқ.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Енді несие рәсімдеу қиындайды: 19 наурыздан бастап не өзгерді...

Қазақстанда 19 наурыздан бастап тұтынушылық несие рәсімдеу тәртібі қатаңдады деп хабарлайды Ertenmedia.kz.

Енді банктер қашықтан қарыз рәсімдеген кезде міндетті түрде биометриялық аутентификация жүргізуге тиіс. Ал 150 АЕК-тен асатын несиені толықтай онлайн жолмен беру тоқтатылды.

Жаңа талапқа сай, мұндай көлемдегі қарызды алу үшін клиент банк бөлімшесіне өз аяғымен баруы керек. Қазіргі есеппен 150 АЕК шамамен 648,7 мың теңгеге тең. Елеулі өзгерістің бірі қарыз алушының бұрынғы берешегіне қатысты.

Енді өзге несие немесе микрокредит бойынша 30 күннен асқан кешіктірілген төлемі бар адамға жаңа тұтынушылық несие берілмейді.

Тағы бір жаңалық міндетті «салқындау кезеңі». Банк өтінімді мақұлдаған күннің өзінде ақшаны бірден аудармайды. Қаржы ұйымы кемінде 24 сағат күтуге міндетті. Содан кейін қарыз алушы несие алуға келісімін қайта растауы керек.

Жаңа ереже алаяқтық жолмен рәсімделетін несиелерге қарсы қорғанысты да күшейтеді. Егер сот шешімімен қарызды алаяқтар рәсімдегені дәлелденсе, банк сол берешекті есептен шығаруға міндетті. Айтқандай, 19 наурыздан бастап ағымдағы шоттар бойынша сыйақы төлене бастады.

Осынау өзгерістерге депутаттар Әбенов-Базарбек тандемінің әрекеті түрткі болған еді.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Тасмағамбетовке қарсы ақпараттық артиллерия: «Ивангали» сценариін кім сызды...

Саяси сахнадан біршама алыстаған Иманғали Тасмағамбетовтың төңірегіндегі түрлі күбір-сыбыр толастар емес. Бұл туралы белгілі журналист Бигелді Ғабдуллин жазды деп хабарлайды Ertenmedia.kz.

Автордың пікірінше, Тасмағамбетовке қарсы ақпараттық науқанның түпкі себебі оның саяси беделі мен ел алдындағы тұлғасынан қорыққан бақталастарының қызғанышы мен үрейі. Оны билік үшін қауіпті қарсылас көретіндер кез-келген мүмкіндікті пайдаланып, беделіне көлеңке түсіруге тырысып жүр.

«Иманғалидың есім-сойын ел жадынан ешкім өшіре алған жоқ. Оның саяси сахнаға қайта оралуы кейбір жартыкеш саясаткерлерді үрейге бөлейді. Олар Тасмағамбетовты әлі күнге дейін көре алмайды», – дейді Ғабдуллин.

Журналисттің айтуынша, Тасмағамбетовке қарсы жиі қолданылатын аргументтің бірі Шаңырақ оқиғасы. Алайда автор бұған Иманғалиды кінәлауды орынсыз деп санайды.

«Шаңырақ оқиғасына Имекеңнің қандай қатысы бар? Үй-жайды сүруге бұйрық беретін әкім емес, одан жоғары тұрған органнан шығатыны белгілі. Алматы халқы жақсы біледі, Шаңырақтағы жерді оңды-солды үлестірген парақор шенеуніктер. Иманғали келіп, Авгийдің атқорасын тазалай бастағанда, осы схемадан пайда тапқандар оған қарсы арандату ұйымдастырды», – деп жазады журналист.

Ғабдуллин экс-президенттің тұсында биліктің ұшар басында болған кез келген адамның үстінен компромат жиналатынын еске салды. Оның айтуынша, атышулы Рахат Әлиев Тасмағамбетовке қарсы компромат жинауда айрықша көзге түскен.

«Әлиев Иманғалидің атын естісе, кірпідей жиырыла қалатын. Ол Тастың жолын жабу үшін қолдан келгеннің бәрін істеді. Сенбесеңіз, Қаңтардан кейінгі полковник Мұхтар Қарабековтың сұхбатын шолып шығыңыз. Самат Әбіш пен Дариға Назарбаева одан Тасмағамбетовке қарсы жалған куәлік беруді талап еткен. Қарабеков төрт жыл бойы ҰҚК жертөлесінде отырса да, жалған құжатқа қол қоймады. Мұндай мысал жетіп артылады», – деп жазады автор.

Айтуынша, Тасмағамбетов ҰҚШҰ-ның хатшысы болған тұста тағы бір компромат науқаны басталған. «Ивангали» деген жағымсыз атауды ойлап тауып, оның образын халыққа қарсы қойғысы келген. Алайда Тасмағамбетов миссиясын абыроймен тәмәмдап, елдің бірде-бір ұлттық мүддесін табанға таптатпаған.

Ғабдуллин мақаласын былай түйіндейді:

«Оны тартпаға тастай салғысы келгендердің ойлағаны орындалмады. Тасмағамбетов қазір билік кабинетіне байланып қалмаған, ұлттық деңгейдегі саясаткер. Оны құртуға тырысқандар, керісінше халықтың алдындағы беделін асқақтатты. Қытайлар, мұнараның биіктігін көлеңкесінен, ал адамның ұлылығын оны көре алмайтындардың санынан білуге болады дейді. Сол рас».

Айта кетелік, бұған дейін Тасмағамбетов өзін «Кремль адамы» деп қаралаған қауымға жауап қатқан болатын.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Генералмын, осы да жетеді: Бозымбаев вице-президенттікті ысырып қойды...

Бектеновтің орынбасары Қанат Бозымбаев өзін вице-президент қызметіне баруы мүмкін деген әңгімені салқын қабылдайтынын айтты деп хабарлайды Ertenmedia.kz.

Оның сөзінше, мұндай талқыларды тым жақын қабылдап жүрген жоқ, қазір бар назарын өз жұмысына аударған.

Бозымбаев кадрлық әңгімелерге қатысты пікірін астарлап жеткізді.

Айтуынша, генерал болуды армандамайтын солдат болмайды, бірақ өзінің қазіргі лауазымы да генералдық деңгейдегі қызмет болғандықтан, оған осының өзі жеткілікті.

Сонымен бірге ол мұндай шешім жеке қалау не қоғамдық болжаммен емес, Конституция аясында қабылданатынын еске салды. Бозымбаевтың айтуынша, вице-президентке қатысты таңдауды президент жасайды, ал ол парламентпен келісім арқылы рәсімделеді. Ал халық пен сарапшылардың мұндай тақырыпты талқылауы Қазақстан үшін қалыпты құбылыс саналады.

Шенеунік ықтимал тағайындау жөніндегі әңгімені елдегі үйреншікті саяси болжамдардың бірі ретінде бағалады. Алайда өзі дәл сондай лауазымға барамын деп ойламайтынын да ашық аңғартты.

Бұған дейін танымал заңгер Айман Омарова вице-президент Назарбаевтың жақындарының арасынан шығуы мүмкін деген болжам жасаған.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Рахаттың құпия шоты: елшіліктен офшорға жеткізілген 50 миллион еуроның сыры...

Экс-премьер Әкежан Қажыгелдин активтерді қайтару науқанының соңы сұйылып кеткенін сынға алды деп хабарлайды Ertenmedia.kz.

«Новый газетаға» сұхбат берген Мағжанұлының пікірінше науқан бастапқы мәнінен ауытқып кеткен. «Ескі Қазақстанның» шағын қағамыз деген билік олигархтармен мәмілеге келіп, шынайы тергеу жүргізу ниетінен тайқыған.

Қажыгелдиннің сөзінше, заңды түрде жүргізілген халықаралық тергеудің көмегімен Назарбаев отбасының ондаған миллиард долларын небәрі алты ай ішінде Қазақстанға қайтаруға болатын еді. Бірақ Астана бұдан айнып қалған.

«Біз жақтан Қаңтардан кейін ұсынған заңның мақсаты елде азаматтық соғыс тудырмай, әділеттілікке жол ашу еді. Алдымен қаражаттың қайнар көзін анықтайтын әділ тергеу қажет болды. «Отбасының» уысындағы активтің шығу тегіне қатысты нақты айғағы болса, билік әулетке өткір-өткір сұрақ қояр еді. Алайда Назарбаев отбасына тиесілі капиталдың нақты ауқымы тергелмей, билік оны «достық келісіммен» шешуді таңдады», – дейді Қажыгелдин.

Экс-премьер Назарбаевтың тұңғышы Дариға мен күйеубаласы Тимур Құлыбаев заңсыз жолмен байығанын дәлелдейтін фактілерді Ақорда мен шетелдік құқық қорғау органдарына жолдаған екен. Сөзінше, атышулы Рахат Әлиев Австриядағы елші қызметінде жүргенде, қызметтік көлікпен 50 млн еуроны Лихтенштейін банкіне апарып, жеке шотына салған.

«Президент пен оның айналасы осы істерді асты-үстіне түсіріп ақтарса, бүкіл пирамиданың шайқаларын түсінді. Сондықтан тергеуден әдейі бас тартты. Тимур мен Дариғаның тонау масштабы тіпті сұмдық. Біз ұсынған проект әулеттің ондаған миллиард долларын жеті қат жер астынан суырып алар еді. Бірақ билік бұған мүдделі болған жоқ. Есесіне «ескі Қазақстанмен» келіссөз жүргізіп кетті. Қайрат Сатыбалдыдан 2 миллиард долларды қайтарып, оны түрмеден босатқанмен, Құлыбаевпен мәміле әлі жалғасып жатыр», – деп түйіндеді ол.

Сұхбат барысында Қажыгелдин қазіргі үкімет құрамының бұрынғы кадрлардан арылмағанын сынға алды. Айтуынша, Қаңтар оқиғасынан кейін жаңа саяси элита қалыптасуы керек еді, ескі жүйенің шенеуніктері реформаларды әлі күнге дейін тежеп отыр.

Осы орайда Қажыгелдин Президентке елмен ашық әрі тікелей диалог орнатуды ұсынды:

«Халықтың көзіне тіке қарап, ашық Zoom-конференция арқылы нақты балама реформаларды талқылау керек. Қазір ең қажет шара кедейлікпен күресу».

Пікірінше, қазіргі биліктің ең басты кемшілігі шешуші сәтте нақты әрекеттен бас тартып, мәселені келісіммен бүркемелеуге бейімдігінде. Ал оның салдары ұрланған миллиардтардың офшырда қалуы, билік айналасындағы жемқорлықтың жалғасуы және қарапайым халықтың тұрмысының түзелмеуі.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️ Әл-Фарабидегі форсаж: Депутат Әбенов Ішкі істер басшысына шұғыл үндеу жасады...

Депутат Мұрат Әбенов Алматыдағы жол қозғалысына қатысты қатаң сын айтып, жантүршігерлік жол апаты болған әл-Фараби көшесінен тікелей эфирге шықты деп хабарлайды Ertenmedia.kz.

Депутат мегаполисте тәртіп жоқтығын, құқық қорғаушылардың тек қарапайым халыққа ғана айбат көрсетіп, қалталы, ықпалды тұлғалардың заңсыз әрекетіне көз жұма қарайтынын қатаң айыптады.

«Бүтін қаланы дүр сілкіндірген сұмдық трагедия орын алды. Халық кінәлі адам жазадан құтылып кете ме деп қауіптенуде. Қолын қанға малған жүргізуші әлі күнге дейін СИЗО-ға қамалған жоқ. Ауруханада жатыр дейді. Онда не болып жатқанын кім білсін?! Қанынан арап-шарапты шығартып, жауапкершіліктен жалтарудың амалын іздеп жатқан шығар. Алматы полициясы тек қарапайым азаматтарға ғана күші жетеді», – деп ашынды депутат тікелей эфирде.

Әбеновтің айтуынша, Алматыда ақшасы мен байланысы барларға "қой" дейтін қожа жоқ. Айтқандай, тікелей эфирі кезінде қымбат көліктер полицияның көз алдында жоғары жылдамдықпен жүйткіп өткен. Депутаттың пікірінше, әл-Фараби даңғылындағы түнгі форсаждан бүкіл полиция хабардар болса да, ешқандай әрекет жасамай отыр.

«Себебі, көлік иелері қалталылар, аға-көкесі мықты. Олар ешкімнен қаймықпайды. Конституция өзгергенімен, бұлар үшін ештеңе өзгермеді. Көліктер көз алдымызда құйындай ұшып өтіп жатыр. Ал жол полициясы соларға қарап тұр», – деді депутат.

Мәжілісмен осы орайда Ішкі істер басшысы Ержан Сәденовке жүгініп, парламент қабылдаған заңдардың іс жүзінде тек қарапайым халыққа ғана қолданылатынын айтып, наразылығын білдірді.

«Министр мырза, Алматыға келіп, жағдайды көзбен көріңіз. Мен секілді көшеге шығыңыз. Алматы бетімен кетіп барады. Оңды-солды жарысып жүрген көліктер, тәртіпсіздік. Біз жолға қатысты өте қатаң заңдар қабылдадық. Бірақ бұлар тек қарапайым халыққа қарсы қолданылады. Үш адамның өліміне себепкер болған көлік иесі неге қамауда емес? Камералар неге тек айыппұл салуға жұмыс істейді?», – деп ашынды Мұрат Әбенов.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Ерболат Досаев Президент әкімшілігіндегі лауазымынан босатылды....

Ерболат Досаев Президент әкімшілігі басшысының орынбасары қызметінен босатылды деп хабарлайды Ertenmedia.kz.

Мемлекет басшысы Қасым-Жомарт Тоқаев тиісті жарлыққа бүгін, 25 наурызда қол қойды. Кадрлық шешімнің нақты себептері ресми хабарламада көрсетілмеген.

Досаев Президент әкімшілігі басшысының орынбасары лауазымын 2025 жылдың қыркүйегінен бері атқарған еді.

Оның орнына Мемлекет басшысының экономикалық мәселелер жөніндегі көмекшісі болып Нұрлан Байбазаров тағайындалды.

Айта кетелік, бұған дейін Алматыда белгілі саясаткер, қоғам белсендісі Санжар Боқаевтың ұсталғанын хабарлағанбыз. Журналист Гүлжан Ерғалиева осы тұста Досаев пен Боқаевтың арасындағы кикілжің туралы тың мәлімет айтқан. Күні кеше Боқаевтың ҰҚК абақтасына ауысқаны белгілі болған еді.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️ ЕҰУ беделіне қауіп төндірген атақ: Дугинді құрметті профессор қылған кім...

Threads желісінде қолданушылардың бірі Гумилев атындағы Еуразия ұлттық университетіне қатысты даулы мәліметті жариялады деп жазады Ertenmedia.kz.

Айтуынша, оқу орны ресейлік атышулы идеолог Александр Дугинге университеттің құрметті профессоры деген атақ берген. Ол Дугиннің ЕҰУ-де осындай мәртебеге ие екені жөніндегі деректі Wikipedia арқылы байқап қалған.

Осыдан кейін автор университетке ашық сауал жолдап, «бұл қалай болғаны?» деген мазмұнда мәселе көтерген.

Пост иесі өз жазбасында Дугиннің елімізге таққан айыптарына айрықша назар аударған. Кремль пропагандисі Орта Азия, соның ішінде Қазақстанға тіл тигізіп, біздің елді "дербес өмір сүруге хақысы жоқ" деген еді.

Оның пайымдауынша, қазіргі геосаяси жағдайда аймақ елдері Мәскеулің ықпалына қайтып оралу керек. Әйтпесе, Батыс, АҚШ, Қытай немесе Еуроодақтың ойын алаңына айналады-мыс.

Пост авторы академиялық мекемелердің қауіпті тұлғаларға мәртебе бергеніне наразылық білдіріп отыр. Ertenmedia осыған байланысты университет басшылығына сауал жолдайтын болады.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Шайбадағы шағын деталь: Маңғыстау әкімінің әрекеті желіні тәнті етті...

Ақтауда өткен жаңа мұз сарайының ашылуында көптің көзіне түскен шағын эпизод желіде қызу талқыға түсті деп хабарлайды Ertenmedia.kz.

Кадрда Маңғыстау облысының әкімі Нұрдәулет Қилыбай Қазақстан туы бейнеленген шайбаны алып, оның ойын барысында қолданылуына жол бермегені көрінеді. Мұз айдынындағы сол сәт лезде интернетке тарап, жұрт назарын өзіне аударды.

Еліміздің туы бейнеленген шайбаны алғаш байқап, оны мұз бетінен көтеріп алған Қилыбайдың протоколдан тыс әрекеті көпшіліктің тарапынан оң бағасын алуда.

"Әкімнің мемлекеттік рәмізге деген құрметі мен ішкі жауапкершілігі жоғары екені байқалып тұр, кейбір шенділер мұндайға мән бермеуші еді. Мемлекетті құрметтеу мінберден айтылған ұзынсонар сөз емес, дәл осындай бір сәттік әрекетпен өлшенеді", - деп жазуда желідегі қауым.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Ұзабаев рұқсат берді: Әл-Фарабидегі апаттан кейін Алматы полициясында "чисткі" басталды...

Әл-Фараби даңғылындағы үш адамның өмірін қиған ауыр апаттан соң Алматы полиция департаментінде кадрлық тазалау басталды деп хабарлайды Ertenmedia.kz.

Cmn.kz дерегінше, департамент басшысының орынбасары Ержан Ұзабаев түнеукүні оқиғадан кейін денсаулығына байланысты шұғыл демалысқа шығып кеткен. Дереккөздің мәліметіне сәйкес, ол алдағы уақытта қызметінен кетуі мүмкін.

Бұған дейін заңгер Молдахан Әділетхан әлемжеліде Әл-Фарабидегі апаттың жаңа деректерін жариялаған еді. Zeekr-мен жарысқан екінші көлікте полиция басшылығының өкілі болғаны айтылуда.

Заңгер жариялаған видеода жасөспірімнің көлік айдауға дәл сол Ержан Ұзабаев рұқсат бергенін айтқан.

Департаменттегі ақпарат көзінің хабарлауынша, аяқасты демалысқа шыққан Ұзабаевтың артынан Алматы әкімшілік полициясы басқармасының бастығы Серік Шұмаев қызметінен босатылған. Сондай-ақ Алматы әкімшілік полициясының арнайы батальонында үш взвод командирі және патрульдік полиция полкінің бір рота командирі қызметінен шеттетілген.

Еске сала кетсек, 21 наурызға қараған түні Алматыдағы Әл-Фараби даңғылында ауыр жол апаты болып, үш адам қаза тапқан болатын. Тергеу анықтаған мәліметке сәйкес, Zeekr маркалы электромобиль жоғары жылдамдықпен келе жатып, қарсы бетке шығып Mercedes автокөлігімен бетпе-бет соқтығысқан.

Mercedes жүргізушісі мен екі жолаушысы 20 және 22 жастағы бойжеткен қыздар оқиға орнында қайтыс болды. Zeekr жүргізушісі ауыр жарақатпен ауруханаға жеткізілді.

Алматы полиция департаментінің ресми өкілі Салтанат Әзірбек Ержан Ұзабаевқа қатысты деректің мұқият тексеріліп жатқанын мәлімдеп, Zeekr жүргізушісі ауруханада арнайы күзет бақылауында екенін айтты. Денсаулығы жақсарғаннан кейін ол бірден қамауға алынады.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Әл-Фарабидегі форсаж: министр Сәденов Алматыға арнайы делегация жолдады...

Әл-Фараби даңғылындағы үш адамның өмірін жалмаған ауыр апаттың жаңғырығы Астанаға жетті деп хабарлайды Ertenmedia.kz.

Шұғыл жиын өткізген министр Сәденов апаттың мән-жайын зерттеп, әділ шешім шығаратын арнайы делегацияны Алматыға жолдапты.

Құрамында тәжірибелі мамандар топтасқан делегация Алматының полиция департаментіне қызметтік тексеру жүргізеді. Апат кезінде камераға түсіп қалған полиция көлігі мен оған заңсыз жапсырылған нөмірге қатысты қылмыстық іс қозғалған.

Полиция басшыларының бірінің жүргізушісіне қатысты тағы бір іс қозғалыпты. Жүргізуші изоляторға қамалған. Сәденовтың пәрменімен Алматы полициясының бірқатар басшылары жұмыстан қуылған.

"Егер олардың кінәсі дәлелденсе, қызметтен қуылумен шектелмейді!", - дейді Ішкі істер басшысы.

Бұған дейін заңгер Молдахан Әділетхан әлемжеліде Әл-Фарабидегі апаттың жаңа деректерін жариялаған еді. Zeekr-мен жарысқан екінші көлікте полиция басшылығының өкілі болғаны айтылуда.

Еске сала кетсек, 21 наурызға қараған түні Алматыдағы Әл-Фараби даңғылында ауыр жол апаты болып, үш адам қаза тапқан болатын. Тергеу анықтаған мәліметке сәйкес, Zeekr маркалы электромобиль жоғары жылдамдықпен келе жатып, қарсы бетке шығып Mercedes автокөлігімен бетпе-бет соқтығысқан.

Mercedes жүргізушісі мен екі жолаушысы 20 және 22 жастағы бойжеткен қыздар оқиға орнында тіл тартпай кетті. Zeekr жүргізушісі ауыр жарақатпен ауруханаға жеткізілді. Денсаулығы жақсарғаннан кейін ол бірден қамауға алынады.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Депутат Базарбек Ішкі істер саласын толық тазалауды талап етті...

Мәжіліс депутаты Бақытжан Базарбек Алматыдағы Әл-Фараби даңғылында болған қайғылы жол апатына байланысты ішкі істер органдарын толық тазалауға шақырды деп хабарлайды Ertenmedia.kz.

Депутаттың айтуынша, мұндай жағдайлардың алдын алудың жалғыз жолы елдегі барлық құқық қорғау органдарына жаппай тазалау жүргізу.

«Өзім Әл-Фарабидің бойында тұрамын, күн сайын көз алдымда элиталық көліктер мен спорткарлар жарысады.

Бірақ солардың біреуінің айыппұл төлегенін, жұмыстан қуылғанын немесе жазаланғанын көрген емеспіз. Өйткені оларды жоғары лауазымды шенеуніктер мен бай-бағландардың «балалары» ретінде полиция қызметкерлері қорғаштап отыр. Алматыда ғана емес, мұндай жағдай бүкіл Қазақстан бойынша бар.

Сондықтан ішкі істер органдарына кешенді тазалау қажет. Бұл тек Алматыға қатысты емес, барлық өңірлерге ортақ мәселе», – деді Бақытжан Базарбек үкімет дәлізінде.

Оның сөзінше, мұндай оқиғалар ел үшін өткеннің еншісінде қалуы керек еді. Алайда олар әлі күнге дейін жалғасып отыр. Депутаттар президентке үндеу жолдап, жол қозғалысы саласында тәртіп орнатуды талап етпек.

Сондай-ақ депутат алдағы уақытта жарияланатын әкімшілік рақымшылыққа қатысты да пікір білдірді. Оның айтуынша, амнистия жол ережесін өрескел бұзатын жүргізушілерге қолданылмауы тиіс.

«Бізге амнистия жарияланады деген ақпарат жетті. Әл-Фарабидегі қайғылы жағдай секілді фактілер рақымшылық туралы заң жобасын талқылаған кезде ескерілуі қажет. Заң жобасын әлі көрген жоқпыз, Мәжіліске түскенде міндетті түрде жұмыс тобының құрамына кіріп, осы мәселені көтеремін», – деп түйіндеді депутат Бақытжан Базарбек.

Еске сала кетсек, 21 наурызға қараған түні Алматыдағы Әл-Фараби даңғылында ауыр жол апаты болып, үш адам қаза тапқан болатын. Күні кеше осы мәселеге байланысты шұғыл жиын өткізген Ішкі істер басшысы Алматыға арнайы десант жолдаған болатын.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Баян Алагөзова дабыл қақты: Діни радикалдар қазақтың мәдени коды мен тілін талқандауда...

Танымал продюсер Баян Алагөзова әлемжеліде эмоционалды үндеу жасап, Қазақстандағы діни радикализмнің өршуіне қарсы шара қолдануға шақырды деп хабарлайды Ertenmedia.kz.

Алагөзова елдегі діни радикалды топтардың күшеюі ұлттың мәдени кодына және ұлттық қауіпсіздігіне тікелей қатер төндіретінін ашық айтты.

«Бұл ма, бұл тақырып бүгін мені әбден ашындырды. Тағы да әлемжеліде радикал ағымның өкілдерімен бетпе-бет келдім. Осы орайда құзырлы органдарға ҰҚК-ге, прокуратураға жүгінгім келеді. Сіздер елде не болып жатқанынан хабардарсыздар деп сенемін. Ерте ме, кеш пе, бұл тоқтатылуы тиіс. Бұл бүтін бір ұлтқа төнген үлкен қауіп», – деп атап өтті Алагөзова.

Продюсердің пікірінше, радикалды ағымдардың әлеуметтік желідегі белсенді үгіті қазақ халқының төл мәдениеті мен ана тіліне нұқсан келтіруде.

«Күндіз-түні желілерде "сақалдылар", "оранғандар", уахабтар еркін насихат жүргізуде. Олар бізді тілімізден, дәстүрімізден, төл мерекемізден айыруда. Бұлай жалғаса берсе, ертең бәріміз арабша сөйлейтін күн туады. Олардың қатары күн санап артып, агрессиясы күшейіп келеді», – дейді ол.

Осыған байланысты Алагөзова билікті нақты әрі батыл қадамдарға баруға үндеп, Ата заң деңгейінде елдің зайырлы сипатын қорғауды және діни пропагандаға қатаң тыйым салуды ұсынды.

«Біз зайырлы мемлекет екенімізді Конституциямен бекітіп, кез келген діни насихат пен радикалдық пропагандаға заңмен тосқауыл қоюымыз керек. Бұл мәселеде енді жайбарақат отыруға болмайды», – деп түйіндеді продюсер.

Продюсердің мәлімдемесі желіде қызу талқыға түсіп, көзі қарақты қауымның көпшілігі Баянға қолдау білдіріп жатыр.

Бұған әлі де тоқталамыз. Бізге жазылып алыңыз👇

✈️ https://t.me/ertenmedia