⚡️Құрылтайдағы абсолютті үстемдік: «Әділет» 120 мандатты жұлып алғысы келеді...

«Әділет» партиясы алдағы додада парламенттегі мандаттың басым бөлігін иеленіп қалуды көздеп отыр, деп хабарлайды Ertenmedia.kz.

Партияның саяси кеңес мүшесі Марат Шибұтовтың мәлімдеуінше, «Аманатпен» некелескен жаңа құрылым Құрылтайдағы 100-ден 120-ға дейінгі депутаттық орынды жұлып алмақ.

Сарапшының пайымдауынша, қос тараптың бір-біріне ұсынары бар. «Әділеттіктер» әлі былғана қоймаған беделі мен әдемі атауын бұлдаса, экс-аманаттықтар дайын аймақтық филиал мен мәслихаттағы ықпалын кеңінен пайдаланбақ.

«Су жаңа партия Amanat-тың дайын электорына ортақтасып отыр деген пікір қисынсыз. «Әділеттің» сапында бұрын ешбір саяси ұйымның қатарында болмаған жаңа адамдар жетіп артылады. Бізде ме, бізде бренд бар, танымалдық бар, ресурс бар. Amanat біздің арқамызда «Нұр Отан» деген ауыр жүктен арылып, Құрылтайға күнәдан тазарып кіреді», — дейді Шибұтов.

Жаңа Парламенттегі 145 орынның 80 пайызына жуығын Айбек Дәдебай басқаратын жетекші күш иеленсе, өзгелерге орын жетпей қалуы әбден мүмкін.

Шибұтовтың айтуынша «Әділетке» жұтылған Amanat-тың репутациясы жаңа ұйымның беделіне сызат түсірмеу үшін партиялық тізімде бастан-аяқ жаңарту жүреді.

«Партияның сайлауалды бағдарламасы мен үміткерлер тізімінде ескі жүйені еске салатын есімдердің көлбеңдемеуіне көбірек көңіл бөлеміз», — дейді ол.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Асхат Аймағамбетов екі апталық курс оқыған психологтардың жоспарын күл-талқан қылды...

Психологиялық көмек көрсету саласын жабайы нарықтан кәсіби арнаға бұратын, маңызды қадам жасалды. Депутат Асхат Аймағамбетов өзінің авторлық заң жобасына Тоқаевтың қол қойғанын сүйіншілеп жеткізді деп жазады Ertenmedia.kz.

«Ендігі жерде екі апталық жеделдетілген курс оқып, өзін «психолог» немесе «психо-коуч» деп жарнамалап жүргендердің заңсыз қызметіне толықтай тыйым салынады. Сананы саудаға салған мамансымақтардың дәуірі аяқталып, алаң тек дипломды кәсіби мамандар мен бірыңғай мемлекеттік реестрге тіркелгендерге ғана бұйырмақ», — деп жазды Аймағамбетов.

Оның атап өткеніндей, осындай бастама қоғамның жан жарасын емдеуді бизнеске айналдырып, «сәттілік сырымен» жұрттың санасын улаған псевдомамандарға қарсы бағытталған пәрменді соққы.

Адамның жан дүниесімен жұмыс істеу үлкен жауапкершілікті қажет ететіндіктен, әлгі заң халықтың психологиялық қауіпсіздігін қорғаудың берік қалқаны болмақ.

Аталған жаңалық әлемжеліде де қызу талқылануда. Желі қолданушылары заңның дер уақытында қабылданғанын айтып, сан соғып қалған таныстарының хикаяларымен бөлісуде.

Сонымен қатар желідегі жұрт дәл осындай қатаң бақылау мен талаптарды бала болашағына тікелей әсер ететін дефектологтар мен логопедтердің, тіпті сырттай оқитын стоматологтардың да қызметіне енгізу қажеттігін алға тартып отыр.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Оқу-ағарту министрлігінде не болып жатыр? Тоқаевқа ұжымдық шағым жолданды...

Оқу-ағарту министрлігінде кадр саясатына қатысты шу шықты. Белсенді Гүлнар Мансұрқызы желіде тараған ұжымдық шағымға назар аударып, ведомствода кәсіби мамандар қысымға көріп жатыр деген мәселе көтерді, деп хабарлайды Ertenmedia.kz.

«Сүлейменова? Оқу-ағарту министрлігінде не болып жатыр өзі? Желідегі үндеуге қарағанда, ведомство мүлде басқа стандартқа сырғып кеткен. Сын айтушылар қазіргі жағдайды «ұнамағанды кетір, айтқаныңа көнетінді ал» деп қысқа-нұсқа сипаттап отыр», — деп жазды ол.

Сөзінше, министрлік қызметкерлерінің Тоқаевтың атына жолдаған шағымында жұмыстан шығарылған немесе кетуге мәжбүр болған жетекшілердің тізімі келтірілген.

Белсенді жазбасында министрліктен кеткен немесе қысым көрген адамдардың ұзын саны 22-ден асқанын алға тартып отыр. Арасында қаржы блогы, цифрландыру, инклюзивті және орта білім, Ы.Алтынсарин атындағы академия, «Өрлеу», «Талдау», «Дарын», «Талап», «Балдәурен» секілді маңызды құрылымдарға қатысы бар тәжірибелі мамандар бар екен.

Пікірінше, мәселе тек ауыс-түйісте емес. Шағымда кейбір адамдарды қызметке қою үшін біліктілік талабы төмендетіліп жатыр деген ауыр аргумент келтірілген. Жазбада «Өрлеу» және оның екі филиалындағы басшылық қызметке ғылыми дәрежесі жоқ, талапқа сәйкес келмейтін адамдар келгені де жазылған екен. Авторлар мұны жаңа стандарт нақты кандидаттарға ыңғайланып қайта әзірленіп жатыр деп топшылап отыр.

Бұдан сырт, ұзақ жыл еңбек еткен кәсіби мамандар қысым көріп жатқанда, ведомствоға күні кеше келген кей қызметкер мемнаградаға ұсынылғаны да айтылған екен.

Шағым авторлары уәкілетті органдарға тікелей жүгінуден қауіптенетінін де жеткізген. Олар арыз-шағым формалды жауаппен жабылып қала ма деп алаңдайды. Сондықтан анонимді сауалнама өткізіп, тәуелсіз аудит жүргізуді және министрлік басшылығына қатысты сынды әділ бағалауды сұрап отыр.

Арызды мән-жайын айтып берген Гүлнар Мансұрқызы жасанды интеллектке қатысты жеке мысалын да жаза кетіпті. Айтуынша, өткен жылдың соңында министрлік бұйрығымен жасанды интеллект жөніндегі жұмыс тобының құрамына ресми кірген.

Алайда осы уақыт ішінде бір ғана отырыс өткен. Содан кейін жұмыс тобы қайта жиналмаған, ұсыныс қабылданбаған, сарапшылармен жүйелі талқылау жүрмеген.

«Жақында цифрландыру бағытына жауапты вице-министр келді. Бірақ ол да сарапшылар қауымдастығымен бірде-бір рет байланысқа шыққан жоқ. Жұмыс чатында толық тыныштық. Түптеп келгенде, Тоқаевтың тапсырмасы бюрократияның ішінде көміліп жатыр», — деп жазыпты Гүлнар Мансұрқызы.

Әзірге Оқу-ағарту министрлігі желіде тараған шағым мен белсенді көтерген мәселеге қатысты түсініктеме бергені туралы мәлімет жоқ. Редакция ведомство ұстанымын жариялауға дайын.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Мәжілістен кеткен өткір дауыс: Бақытжан Базарбек депутаттық мандатымен қоштасты...

Мәжілісте талай даулы мәселені көтеріп, көптің көңілінен шыққан Бақытжан Базарбек Парламенттегі қызметін аяқтағанын мәлімдеді деп хабарлайды Ertenmedia.kz.

Заң шығарушы органда үш жарым жылға жуық еңбек еткен халық қалаулысы желідегі парақшасында оқырманмен ой бөлісті.

"Парламенттегі үш жарым жылдық қызметімде еліме және халқыма адал әрі принципті түрде қызмет етуге тырыстым. Мәжілістің беткеұстар депутаттарының біріне айналдым. Егер халықтың сенімі мен құрметіне ие бола алсам, демек, жүріп өткен жолым зая кетпегені", - деді Базарбек.

Саясаткер өз сөзінде алдағы уақытта өмірлік жаңа кезең басталатынын, кез келген өзгеріс жолдың соңы емес, тек жаңа белес екенін алға тартты. Сондай-ақ осы уақытқа дейін өзіне қолдау көрсетіп, сенім білдірген барша азаматтарға шынайы алғысын білдірді.

"Енді мен еркінмін. Өмірімде жаңа кезең басталады. Бір есік жабылса, екіншісі ашылады", - деген Бақытжан Базарбек негізінен, өзінің кәсіби саласы жер заңнамасы, қала құрылысы және сыбайлас жемқорлықпен күрес бағытында өзекті мәселелерді көтерген еді.

Депутат тұсында Алматы, Астана сияқты ірі шаһарлардағы бейберекет құрылыстарды, сейсмикалық қауіпті аймақтар мен тау бөктеріндегі заңсыз нысандарды салуды тоқтатуды талап етті. Ірі латифундистер мен олигархтардың қолында заңсыз кеткен жайылымдық және ауыл шаруашылығы жерлерін мемлекетке қайтару мәселесін тұрақты көтерді. Осы бағыттағы заңнамалық өзгерістерге ұйытқы болды.

Желідегі қауым Мәжілістегі ең белсенді әрі принципшіл депутаттың Құрылтай тізімінен тыс қалғанын қайран қалуда.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Сүлейменованы сүріндіру операциясы: депутат Әбенов домалақ арыздың түпкі мақсатын айтты...

Оқу-ағарту министрінің үстінен жазылған «ұжымдық хаттың» төңірегінде дау көбейді. Депутат Мұрат Әбенов Ақордаға жолданды делінген құжаттың АП-ға түспегенін айтып, министрге қарсы ақпараттық шабуыл жүріп жатқанын мәлімдеді, деп хабарлайды Ertenmedia.kz.

Cөзінше, Сүлейменованың жұмысын сынау мен қоғамда қасақана теріс пікір туғызудың арасы жер мен көктей. Әлгі домалақ арызды кім жазғаны да белгісіз екен. Құжаттың Тоқаевқа ресми түрде жолданғанын растайтын айғақ та жоқ. Соған қарамастан, хат бір мезетте бірнеше блогер мен ақпарат құралының уысына түскен.

«Әзір ғана Президент әкімшілігіне мұндай хат түспегені жөнінде ақпар алдым. Сонда Тоқаевқа жетпеген хат әлемжеліге қалай тарады?» — дейді таңғалған Әбенов.

Депутат хатқа қол қойды делінген азаматтардың авторлықтан басын ала қашқанына назар аударған екен. Пайымынша, негізгі мақсат шағымды Президентке жеткізу емес, ел алдында министрдің масқаралау болуы мүмкін.

Атышулы хатта Сүлейменованың бірқатар маманды қызметтен шеттеткені негізгі уәж ретінде көрсетілген. Әбенов бұған болса, қара аспанды төндірудің қажеті жоқ деп есептейді.

«Осы салада миллионға жуық адам тер төгіп жүр. Соның 600 мыңы мектепте жұмыс істейді. Оған балабақша, колледж, қосымша білім беру орталығы мен түрлі мекеме қызметкерін қосқанда, жарты жыл ішінде 20-30 адамның ауысуы қалыпты дүние. Арасында министрдің талабына сай болмағандар да болуы мүмкін. Тізімдегі адамдардың бәрін шетінен қудалады деген дәлел жоқ», — деді депутат.

Әбенов тізімде аты аталған бірнеше адаммен жеке-дара сөйлескен екен. Көпшілігі ешкімге өкпесі жоқ екенін, қызметтен өз еркімен кеткенін жеткізген. Пікірінше, министрді хатпен қорқыту арқылы кейбіреулер бір орында жылдар бойы тапжылмай отырған кадрларға тиіспейтін жағдай орнатқысы келуі әбден мүмкін.

Әбенов? Депутат министрліктегі ауыс-түйіске жеткілікті негіз бар деп есептейді. Соңғы жылдары білім саласында былық-шылық күрт көбейген. Президент Тоқаев Жұлдыз Сүлейменованы осы олқылықтың жолын кесу үшін арнайы тағайындаған.

Ауа жайылып кеткен жекеменшік мектептермен ымырасыз күрес жүргізіп, заңсыз лицензияның жолын кескен министрдің әрекеті осы бизнеске орта жолдан қосылғандардың ызасына тиуі де ғажап емес.

«Жұлдыз ба, Жұлдыз еңбек жолын мұғалімдіктен бастап, мектеп директорына дейін өскен, білім саласын бүге-шүгесіне дейін білетін тұлға. Ол қолға алып жатқан өзгерістер осы саланы сүлікше сорып келген кейбіреулердің құтын қашырып отыр. Әлгі ұжымдық хатқа осы тұрғыдан қарау керек», - дейді ол.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Құрылтайға өтпеген өткір үн: Базарбекке қойылған шлагбаум кімдерге ескерту болды...

Жаңа саяси маусымнан бастап қызу іске кірісетін Құрылтайдан ережеге көне бермейтін, өз бетінше күн тәртібін қалыптастыра алатын бірнеше азамат сырт қалды. Желідегі қауым, соның ішінде Бақытжан Базарбектің тұлғасына ерекше екпін беруде деп жазады Ertenmedia.kz.

Ақорда идеологтарына Мәжілісті дебат алаңы ретінде қарастырған Базарбектің стилі қауіпті сезілсе керек. Жер мәселесі, құрылыс олигополиясы, есімі ескі Қазақстанмен байланысты тұлғаларға үш жыл бойы тыным бермеген экс-депутат саяси элита ішіндегі «статус-квоны» бұзғандай әсер қалдырады.

Базарбекті саяси тізімнен сызып тастауға осы бір ықпалды топтың ұжымдық реакциясы да әсер еткені анық. Мәжіліс трибунасында жүріп жеке брендін тым қатты күшейтіп жіберген білікті заңгердің мәлімдемелері соңғы кезде ресми риторикадан да өтімдірек болып кеткені өтірік емес.

Иә, әуел баста ол қоғамның буын шығаруға қызмет қылды. Бірақ, бұл рөлдің жарамдылық мерзімі бар-тын. Билік халықтың наразылық энергиясы осы бір тұлғаның төңірегіне тым қатты шоғырланып кеткенінен шошып қалғандай.

Сондықтан қазіргі саяси дизайн үшін Базарбекті уақытында шектеу өте маңызды болды.

Заңгер ретінде мықты болғанымен, саяси маневрге, кулуарлық келісімдерге бара бермейтін Базарбектің принципшілдігі өзіне таяқ боп тиген тәрізді. Оны сыртқа тебу арқылы қазіргі жүйе өзге депутаттарға да «шектен шықпау» туралы белгі беріп отыр.

Біздіңше, Базарбектің Құрылтайдан шеттеуі оның саяси салмағының қаншалықты артқанын көрсететін барометр. Иә, әзір асығыс үкім шығаруға болмас. Қазіргі беталысқа қарасақ, біреулер Базарбекті шешім қабылдау тетіктерінен толық ажыратып, «жай ғана блогер немесе белсенді заңгер» деңгейіне түсіріп тастауды көздеп отырғандай. Ресми мінберсіз кез келген саясаткердің ықпалы уақыт өте келе әлсірейтінін жүйе жақсы біледі.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Мәжілістегі маңғыстаулық мінез: Жаңбыршинсіз Құрылтай кімге жайлы болмақ?

Құрылтайда сырт қалған тағы бір танымал есім - Еділ Жаңбыршин. Жүйенің өз ішіндегі «ревизияға» ілігіп кеткен Жаңбыршин қазақтілді қауымның үдесінен шыға білген депутат-тұғын. Соңғы айда Аружан Сайынмен салғыласып, елге қажет заңды қабылдауға мұрындық болған Едекең тек Маңғыстау емес, бүкіл Батыс өңірінің «амбассадорына» айналып үлгерген еді.

Батыс өңірдің психологиясын дөп басып танитын саясаткер ретінде Жаңбыршин Жаңаөзен мен Маңғыстаудағы кез келген ереуіл мен наразылықты «сыртқы күштердің арандатуы» деп сипаттайтын ресми риторикаға да қарсы шықты. Мәселенің әлеуметтік-экономикалы сипатын, биліктің халықпен диалог құра алмай отарғанын Мәжіліс төрінен ашық айтуы желідегі жұртқа жаққан-тын.

Батыс өңіріне сіңіп алған қытайлық инвесторларды да қара терге түсірген сәтін ұмыта қойған жоқпыз.

Елдегі жылу электр стансылары мен энергі инфрақұрылымның тозуына қатысты өткір сауалдары Үкіметтің бүйіріне қанжардай қадалған. Ол, ол ма Риддер, Екібастұздағы апатты мемдеңгейдегі қылмыс деп санап, стратегиялы нысандарды меншіктеп, халық есебінен байыған нақты олигархтардың атын атап, түсін түстеп берген.

Біздіңше, Құрылтай құрамының тізімін жасаушы ат төбеліндей топ «бұдан былай Парламент ішінде тек келісілген дебат жасайық» келіскен тәрізді. Мұндайда Жаңбыршин мен Базарбек сынды процесті кулуардан шығарып, тікелей ел талқысына салатын харизматтар өзінің ескі, консервативті қалыбына қайта оралып жатқан жүйеге сәйкеспейтіні түсінікті.

Қарапайым бұқара алдындағы сөзі шенділердің уәдесінен салмақтырақ естіле бастаған Едекеңе бюрократиялық аппарат іштей кек сақтауы да ғажап емес. Әкім-қаралар мен министрлер өзін Парламент алдында әлсіз, дәрменсіз сезінгенді ұнатпайды. Әлгілерді тікелей эфирде тықсырып, кәсіби деңгейіне күмән келтіретін Жаңбыршинді Құрылтайға жолатқысы келмегендердің шоғыры көп болуы мүмкін.

Соңғы жылдары әдепкі депутат емес, халық комиссарына айналып кеткен Жаңбыршиндердің Құрылтайдан аласталуы әзіргі саяси архитектураның «мазасыз элементтерден» арылу процесіне ұқсайды.

Мұнай-газ секторы мен энергі алпауыттардың көп жыл бойы көзден таса ұстап келген келісімдерінің пердесін түріп, нақты схемаларды ашық айтқан экс-депутат ұжымдық лоббидің қарсылығына да ұрынып қалғандай әсер қалдырады.

Едекеңнің, Базарбектің өткірлігі басқа депутаттардың фон болып, көлеңкеде қалып қоюына әкелгенін де мойындау керек. Құрылтайға іріктелген тұлғаларға қарап-ақ үлкен үйдегі қауымның саяси сахнаны тегістеп тастаған аңғарасыз. Солай. Енді ешкім орта деңгейден суырылып, жарқырап алға шықпайды. Құрылтайды «нотариаттық кеңсеге» айналдырғысы келгендер мақсатына жеткендей.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Теңге тиыннан құралады: ForteBank депозиті 19,5 пайызға дейін табыс ұсынады...

Қазақ «теңіз тамшыдан құралады» дейді. Аз-аздан жиналған қаражатты үйде не картада ұстай бергеннен гөрі, табыс әкелетін іске жаратқан әлдеқайда ұтымды. ForteBank жинақ депозитінің жылдық тиімді сыйақы мөлшерлемесі 19,5 пайызға дейін жетеді, деп хабарлайды Ertenmedia.kz.

ForteBank ұсынған депозитті 100 мың теңгеден бастап ашуға болады. Салым тек теңгемен қабылданады. Номиналды мөлшерлеме мерзіміне қарай 5,6 пайыздан 17,95 пайызға дейін, ал жылдық тиімді сыйақы мөлшерлемесі 5,75 пайыздан 19,5 пайызға дейін белгіленген.

Клиент ақшасын 3, 6, 12 немесе 24 айға орналастыра алады. Мерзімді таңдауға еркіндік берілген. Бірі күзгі оқу маусымына қаржы жинаса, енді бірі көлікке, баспанаға немесе отбасылық сапарға деп қор құрады. Әркім өз жоспарына қарай қолайлы уақытты таңдайды.

Депозитті кез келген уақытта толықтыруға болады. Ай сайын табыстың белгілі бір бөлігін аударып отырған адам жинағын біртіндеп молайтады. Қаражат көбейген сайын есептелетін сыйақы көлемі де арта түседі. Яғни салымшының ақшасы бос жатпай, өзіне жұмыс істейді.

Депозиттің жоғары мөлшерлемесі жинаққа тәртіппен қараған адамға тиімді. Салымнан ақшаны ішінара алу қарастырылмағандықтан, қаржы белгіленген мерзімге дейін шотта сақталады. Мұндай талап көздеген мақсатына жеткенше жинағын шашпай ұстағысы келетін клиентке қолайлы.

Қажет болған жағдайда депозитті мерзімінен бұрын жабуға мүмкіндік бар. Ондай кезде сыйақы жылдық 0,1 пайыз мөлшерлемемен қайта есептеліп, қаражат өтініш берілгеннен кейін кемінде 32 күнтізбелік күн өткен соң қайтарылады.

Сондықтан салымға күнделікті шығыннан артылған, жақын арада қажет болмайтын ақшаны орналастырған жөн.

Жинақ депозитіне 20 млн теңгеге дейін кепілдік беріледі. Оны банк бөлімшесіне бармай-ақ Forte мобильді қосымшасы арқылы ашуға болады. Қосымшаға кіріп, мерзімді таңдап, шотты толықтыру жеткілікті.

Жинақтың үлкен-кішісі жоқ. Ең маңыздысы алғашқы қадамды жасау және бастаған істі жолда қалдырмау. ForteBank депозиті ақшасын сақтап қана қоймай, одан қосымша табыс тапқысы келетін адамға осындай мүмкіндік ұсынып отыр.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Дариға мен Тимурды тергеген депутат: Ермұрат Бапидің ескі Қазақстан миссиясы аяқталды ма?..

Қаңтардан кейін билікке Ермұрат Бапи ауадай қажет болды. Тәуелсіз журналистиканың аңызы, жылдар бойы оппозициялық шепте шыңдалған Бапидің Мәжіліске келуі Жаңа Қазақстанның «біз өзгердік, ескі гвардия келмеске кетті» деген риторикасының тірі айғағы еді деп жазады Ertenmedia.kz.

Жаңа билік қалыптасып, ескі элитаның реваншистік амбициясы өте жоғары болған өтпелі кезеңде Ақордаға ескі жүйенің кез келген рефлексін бірден басып тастайтын, олардың заңсыз активтері мен кулуарлық қадамдарын қоғамға жария ететін «ақпараттық қару» керек болды. Бапи осы міндетті мінсіз атқарды.

Оның аузымен билік ескі кланның қалдықтарына, экс-елбасыға, оның тұңғыш қызына, күйеубаласына және басқа да ет жақындарына ұдайы соққы беріп отырды.

Біздіңше, Бапидің Құрылтай тізімінен табылмауы билік транзитінің екінші фазасы басталғанын білдіреді.

Ақорда үшін «Қаңтар оқиғасы» мен оның зардабы, ескі кланның қылмыстары туралы риторика өзінің саяси өтімділігін жоғалта бастағандай. Саяси элита өзара мәмілеге келіп, бейбітшілік келісіміне қол қойған сәтте, Бапи сияқты ымыраға көне бермейтін фигуралардың қажеттілігі азаяды. Ерекең әлгіндей келісімге қарамай, ескі кланды аяғына дейін төпелеуді тоқтатпас еді. Ол бар жерде элитааралық реваншизм тақырыбы күн тәртібінен түспес еді.

Ескі кланның негізгі қаржылық және саяси орталықтары бақылауға алынған бетте, Бапи сияқты «ауыр артиллерияны» алғы шепте ұстаудың қажеттілігі жойылғандай әсер қалдырады.

Ерекеңнің сөзі жүйе жазған сценарийден шығып кеткенін де мойындау керек. Оның бойындағы отыз жылдық шынайы оппозициялық табиғат пен журналистік инстинкт осы жасанды шеңбердің ішінде ұзақ тұра алмады. Ол тек Назарбаев кланын емес, қазіргі атқарушы биліктің де сол ескі жүйенің сарқыншағын әлі күнге дейін сақтап отырғанын, кадрлық саясаттағы дәрменсіздікті де сынай бастады.

Депутаттың кез келген резонансты мәселені, мейлі ол заңсыз актив, мейлі Қаңтардан кейінгі элиталық қақтығыстар болсын өзіндік экспрессиямен әрі инсайдерлік деңгейде елге жеткізіп отырғаны үлкен үйдегі қауымға ой салды ма ойлаймыз. Түптеп келгенде, қоғамда «шындықты тек Бапи айтады, ал мемаппарат тек соның соңынан салдарымен күресіп жүр» деген қауіпті стереотип орнықты.

Біз білсек, ескі Қазақстанның шетел асқан активтерін қайтару қазір мәжілістегі эмоция алаңынан заңгерлер мен банкирлердің үнсіз үстеліне ауысқан, ал бұл үстелде Ерекеңе орын табылмасы анық еді.

Бапидің Құрылтайға қатысты соңғы риторикасы оның жүйемен арадағы соңғы компромиссі болуы әбден мүмкін. Оған «алаңнан сыпайы түрде кету» мүмкіндігі берілді, бұл ресми биліктің де, оның да беделін сақтап қалудың жалғыз жолы еді.

Билік ескі кланды жеңді (немесе келісті), енді оған бұл соғыстың батырлары керек емес.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Болат Ақшолақов Атырау облысының әкімі қызметіне тағайындалды.

Бұған дейін бір мезетте екі облыста кадрлық ауыс-түйіс болатыны айтылған еді. Атыраумен қатар 17 шілдеде Ұлытау облыстық мәслихатының да жиыны өтеді.

✈️ https://t.me/ertenmedia

⚡️Ақшолақовтың Атырауға келуі: Ақорда мұнайлы аймақтарға қатысты ұстанымын өзгертуде...

Президент Тоқаевтың жарлығымен Серік Шәпкеновтің Атырау облысы әкімі қызметінен босауы әдепкі ауыc-түйіс емесін ішіміз сезген-ді. Қол астындағы екі бірдей орынбасардың (Тілек Махуов пен Мейіржан Мұқасов) жемқорлық күдігімен кісенделуі ақыр соңы Шәпкеновтың түбіне жеткені анық. Бірақ, бұл да басты уәж емес. Алып мұзтаудың бергі беті ғана деп пайымдайды Ertenmedia.kz.

Қазір еліміздің сыртқы саудасы небәрі бес-ақ тауар түріне байланып тұр. Соның ішіндегі қара алтыннан түсетін кіріс қана емес, сыртқа жөнелтілетін физикалық көлемі де күрт құлдырауда. Мұнай экспорты 14 пайызға азайып, газ экспорты тіпті 73 пайыздан астам құлдилаған.

Осындай алмағайып шақта ел бюджетін толтырып отырған өңірдегі шенділердің жемқорлық дауына шырмалуы Ақорданың шыдамын тауысса керек. Үлкен үйдегі қауым өмірлік маңызы бар облысты бақылаудан шығарып алғанын кеш те болса түсінген тәрізді.

Кәсіби мұнайшы, салалық ауыр салмақты тұлға саналатын Ақшолақов Ақорданың мұнайлы аймақтарға қатысты басқару философиясын түпкілікті өзгерткенін көрсететін басты факт.

Осы уақытқа дейін өңірді негізінен әлеуметтік балансты сақтайтын, гуманитарлы-әкімшілік реңі басым кадрлар басқарып келген-ді. Әзіргі ауыс-түйіс аймаққа шаруашылық сипаттағы саясаткер емес, өндірістің тетігін білетін инженер керек болғандай әсер қалдырады.

Ақшолақов? Ол трансұлттық алпауыттардың ішкі асханасын, ТШО, Қашаған мен Қарашығанақ сияқты алып жобалардың қалтарыстарын бес саусағындай білетін өндіріс генералы. Осы арқылы Астана халықаралық консорциумдарға да қатаң сигнал беріп отыр деуге әбден болады.

Бізге жеткен мәлімет бойынша, Ақшолақовтың басты миссиясы Атырауды тек шикізат көзі емес, трансұлттық капиталмен тең дәрежеде сөйлесетін, ұлттық мүддені қатаң қорғайтын геоэкономикалық фронтқа айналдыру.

Назарбаевтың тұсында қалыптасып, санаға сіңген, әрі кетсе жол жөндеп, құбыр тартумен шектелетін «шаруақор әкім» (хозяйственник) деген ұғым да бірте-бірте келмеске кетеді деп тұспалдаймыз. Өңір басшысы тек асфальт төсеп, бюджеттің қаржысын игеретін қарапайым прораб деңгейінде қала алмайды.

Ақшолаков сияқты технократтың Атыруға келуі келуі аудан аралап, лента қиятын әкім форматын күл-талқан етеді үмітіміз бар. Уақыт көрсетеді.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Әділетханнан кейінгі вакуум: Абзал Құспанның ең үлкен саяси жобасы енді басталуы мүмкін...

Экс-депутат Абзал Құспанның бизнеске бет бұруы әсілінде заңгерлік нарықты қазақтандыруға жол ашатын таптырмас мүмкіндік деп пайымдайды Ertenmedia.kz.

Біздегі заң шығару жүйесі мен сот өндірісі әліге дейін орыстілді құқықтық парадигмаға бағынып келеді. Қазақ тіліндегі заңгерлік кеңес, талдау көбіне құрғақ аударма деңгейінен аса алмай жүр немесе тым үстірт сипатқа ие.

Салдарынан сіз бен біз секілді қарапайым қазақтарға өз құқығын қорғау тетіктерін түсінуі өте-мөте қиын. Қазақ тілі тым құрығанда тұрмыстық заңгерлік (алимент, несие, мұрагерлік) деңгейіне жете алмауда.

Қазақтілді сегментке заң тілін қарапайым тілмен тарқатып, өзі де байқамай осы бір вакуумды толтыруға тырысқан заңгер Әділетхан Молдахан сотталып, ақпараттық алаңнан аластатылды.

Әділетханның аудиториясы заңгерлік сауатқа сусап отырған, мемтілдегі өткір құқықтық контентті іздеген қалың бұқара еді. Оның шеттетілуімен босап қалған осы бір алып трибунаны белгілі бір деңгейде беделі бар, сөзі өтімді тұлға ғана иелене алады.

Ол ма, ол Абзал Құспан болуы әбден мүмкін.

Артық әсірелемей айтсақ, желідегі Әділетханның оқырманы іздеген өткірлік пен ақиқатты Абзал Құспан өзінің саяси салмағымен, заңдық біліктілігімен толықтырып, нағыз «халықтық адвокатқа» айналатын мүмкіндігі бар.

Оның деңгейіндегі кәсіби маманның заңгерлік медиа-бизнеске оралуы нарықты аударма деңгейіндегі құрғақ кеңестерден құтқарар ма еді. Анығында, уақыттың өзі соны талап етіп отыр.

Бұдан былай, қазақтілді ортада заң баптарын орыс тілінен қазақшаға көшіріп үйренген ережені қабылдамайтын протест күшейе береді.

Сот жүйесін де, прокуратура қызметін де, заң шығару процесін де іштен білетін Құспан осы іске шындап кіріссе, мемаппараттың өзін қазақ тілінде сапалы, заңды жұмыс істеуге мәжбүрлейтін қоғамдық-құқықтық институт та құра алады.

Иә, экс-мәжілісменнің ішіне кіріп шыққан жоқпыз. Оның қандай ойда жүргені бір құдайға мәлім. Дегенмен бұл идеяны Абзал Құспанның құлағына алтын сырға ретінде жеткізуді жөн көрдік.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Аймағамбетов псевдопсихологтардың кассасын жапты: инстаграмдағы «емшілердің» ертегісі аяқталды...

Әлемжеліні жаулаған арзан мотивация, энергиә алмасу мен карма тазарту индустриясының дәурені ресми түрде аяқталды деуге негіз бар.

Тоқаев «Психологиялық қызмет туралы» жаңа заңға қол қойғалы желідегі псевдокоучтардың белсенділігі біртіндеп бәсеңдеп жатыр деп жазады Ertenmedia.kz.

Осыған дейін екі апталық курс бітіріп, мыңдаған адамның тағдырымен ойнаған, депрессия мен мазасыздықты аураны түзетумен емдемек болғандардың парақшасы жаппай тыныштала бастапты.

Пәзитивті ойлау мен миллионерлік сананы уағыздап, іс жүзінде кәсіби медицина мен шынайы психологияға қарсы үгіт жүргізгендер Ақордаға қарсы келе алмасы анық. Қоғамдық сананы инфоқоқыстан тазартуға себепші болған Асхат Аймағамбетовтің еңбегін де бөлек атап өту керек.

Адамдар нақты өмірлік қиындықпен күресіп, кәсіби маманның көмегіне жүгінудің орнына, желідегі желбуаз тренингтердің уақытша берілетін эйфориясына тәуелді болып қалған-тұғын. Экс-депутат әзірлеген заң осы бір қауіпті үрдісті уақытында тоқтатқандай.

Елдің миын улап, отбасылардың ажырасуына, тіпті қайғылы жағдайға себепкер болған пысықайлар адамның бойындағы қорқыныш пен депрессияны жасанды түрде қоздырып, артынан соны емдейтін жалған сиқырлы курстарды миллиондап сататын.

Тағы біразға кешіксек, лжепсихологтардың әрбір сәтсіздік үшін әке-шешені кінәлауға шақырған (детский травмы) уағыздары қоғамда ұрпақтар қақтығысын тудырар еді. Қазақ дүниетанымында тәрбие мен отбасылық құндылықтар «жарақат» іздеуге емес, кешірімге, құрметке және әулеттік тұтастыққа негізделген.

Аймағамбетов атындағы заңның түпкі мәнін тарқатып айтсақ, әзір бізге кез келген өкпесін «травмы» деп атайтын әлжуаз ұрпақ емес, қиындыққа төтеп беретін, жауапкершілікті өз мойнына алатын салауатты қоғам қалыптастыру қажет.

Ендігі жерде заң аясында құрылған мемлекеттік реестр мен әрбір кеңестің ғылыми негізделуі туралы талап әлгіндей схемалардың жұмыс істеуіне жол бермейді.

Біздіңше, алдағы уақытта экранның арғы жағынан отырып, «энергияңды көтер, миллиондарды таррт» деп ақыл айтқан, аура тазалағыш пысықайлар парақшасын жауып, жұмыс іздеу порталдарында түйіндеме толтыра бастайды.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Ақорданың ауыр чемоданы немесе Ұлытау неге аяққа тұра алмай жатыр...

Ұлытауды жеке облыс етіп құру әуелде әдемі естілгенімен, әсілі популистік сарыны басым шешім еді. Эмоция саябырсып, суық бұғалтерия басталғанда Үкімет экономикалық тұрғыдан мүгедек өңір құрып алғанын түсінді деп жазады Ertenmedia.kz.

Біздіңше Бектенов бастаған министрлер кабинеті Ұлытаудың тамырына қалай қан жүгіртерін білмей дал. Өңір талайдан бері дотациялық тұңғиықта жатыр. Қазақмыс сияқты корпорациядан өзге дербес экономикалық дрәйвері, өз-өзін ақтайтын инфрақұрылымы атымен, затымен жоқ.

Республикалық бюджеттен ұдайы субсидия сұрайтын, бірақ кері қайтарымы нөлге тең өңірді басқару стилі бір-бірінен аумайтын басшылармен кризистен алып шығу мүмкін емес.

Ақорда аймақты әдепкі әкімшілік схемамен басқаруды тоқтатпаса, облыс жақын жылдары Астананың мойнына мықтап тұрып мінеді. Әлбетте, үлкен үйдегі қауым осыдан төрт жыл бұрынғы шешімнің асығыстау болғанын мойындай қоймас, сондықтан Ұлытауды сүйреп жүруге мәжбүр.

Байқағанымыз, аймаққа саяси салмағы бар басшылардың мүлде аттап басқысы жоқ. Астанадағы ақ жағалылар Ұлытаудың кез келген мықты технократтың түбіне жететін депрессиялы өңір екенін әлдеқашан түсінген.

Алдыңғы екі әкімнің тағдыры осының айқын дәлелі ме дейміз. Билік бұған дейін аймаққа тарихи-рухани реңк бермек боп гуманитарды да жіберіп көрді, онысынан түк шықпады. Қазіргі әкімнен де Ұлытауды ұшпаққа шығарады деп күту аса үлкен аңғалдық. Есет Бәйкен Астананың әкімдігінен, орталық аппараттың сұр коридорынан өткен орта қол аппаратчик.

Астананың «майлы, жайлы» бюджетімен жұмыс істеу мен Ұлытаудың тоз-тозы шыққан реалиымен бетпе-бет келу екі бөлек әлем.

Елордадан келген бюрократ өзіне дейінгі әкімдердің тағдырын қайталап, әрі кетсе алты айдан кейін Бектеновтен сөз ести бастауы әбден мүмкін. Өлі органимзге жасанды демалу аппаратын қосып қойған Үкімет те Ұлытауға бөлінген әрбір тиынның босқа кетіп жатқанын біледі, бірақ мойындай алмайды.

Сонымен, Ұлытау эксперименті сәтті болды ма? Біздіңше бұл елдің әкімшілік-территориялық реформасының ең ауыр, тіпті биліктің іштей бармақ тістеп отырған трагедиясы іспетті.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Тоқаевтың «Троя тұлпары»: Ақорда Турлов арқылы олигархтар дәуірін үнсіз жауып жатыр...

Тоқаевпен бірге Қытайға еріп барған Тимур Турлов осы арқылы өзін «Мәскеудің адамы» деп айыптайтын ақпараттық ызыңға соңғы нүктені қойды деп жазады Ertenmedia.kz.

Әдетте Мемлекет басшысының маңызды сапарында оның қапталында жүретін бизнес өкілдерін Ақорданың стратегиялық таңдауы деп қабылдау қажет.

Экс-елбасының тұсында онымен бірге кімдер жүруші еді? Бюджеттен субсидия суырып, жер-көкті монополиялап, ақшаны оффшырға тасыған ескі Қазақстанның олигархтары Назарбаевтың қасынан екі елі қалмайтын.

Ал Тоқаевтың Турловты қасынан қалдырмай ертіп жүруінің сыры неде? Біздіңше осы арқылы Ақорда «жаңа бизнес элитаның форматы осындай болуы керек» деген месседж жолдап отыр.

Былайша айтқанда, Президентке біреудің базарын тартып алып байығандар емес, цифрлық технология, финтех пен капитал әкелетін прагматиктер керек. Үлкен үйдің ықыласын сезген кәсіпкер де жақсылыққа жақсылықпен жауап қатып, әлеуметтік маңызы жоғары жобаларға капитал құюда.

Ақордаға неге Турлов сияқты технократтар ауадай қажет? Біздіңше, әзір Тоқаев жүргізіп жатқан саяси-экономикалық реформалар ішкі капиталға, инвестицияға өте-мөте мұхтаж. Ескі Қазақстанның өкілдері активін заңдастырудан қорқып, бұқпантайлап отыр, Батыстың ірі-ірі инвесторлары әзіргі жағдайға байланысты әр қадамын жеті рет өлшеп, бір рет кесуде.

Турлов? Біздіңше Тимекең Ақорданың геосаяси дағдарыс тұсында тапқан ең сауатты, ең тиімді прагматикалық серіктесі.

Президент кез келген сәтте реванш жасауға дайын тұрған «ескі Қазақстанның» олигархтарына сенім арта алмайды. Ақорда Құлыбаев пен Клебанов секілділерді репрессиясыз, Турлов сияқты жаңа, цифрлық капитал арқылы нарықтан ығыстырып шығаруда.

Осы тұрғыда Қазақстан азаматтығын алып, бүкіл бизнесін осы елдің заңдылығына байлаған, патриотизмді сөзбен емес, миллиардтаған салықпен және инвестициямен дәлелдеген Турловты Тоқаевтың «Троя тұлпары» деуге әбден болады. Ақорда сіз бен біздің көз алдымызда жаңа капитал институтын қалыптастырып жатыр.

Иә, Турловқа бағытталған шабуылдар бұдан кейін сап тыйылады дегенге сене алмаймыз. Тимекеңе тісін қайрап жүргендер «ақпараттық киллерлерге» тапсырыс беріп, «Ресей агенті» деген фобияны үдете түсуі ғажап емес.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Назарбаевтар капиталына қойылған секундомер: Нұрболдың алдынан соттың суық қабырғасы шықты...

Кейінгі күндері атышулы Нұрбол Назарбаевтың төңірегіндегі кейс қайта талқыға түсуде. Мемлекет әулетке дем алуға да, уақыт ұтуға да бұдан былай 1 секунд та мұрсат бермейтінін ұқтырды деп жазады Ertenmedia.kz.

Осы тұста экс-елбасының немере інісіне қатысты соңғы сот процесінің астарына үңіліп, мәселені барынша ұғынықты нақышта айтып беруге тырысайық. Сонымен...

Нұрбол ма, Нұрбол Активтерді қайтару комитетіне 63,7 млрд теңгеден астам берешегі бар екенін мойындай отырып, сотқа «төлем қабілеттілігін қалпына келтіру» (банкроттықтың баламасы, қарызды 5 жылға созып бөліп төлеу) процедурасын қолдануды өтініп арыз түсірген.

Алайда, Алматы облысы Қарасай аудандық соты да, кейін осы шешімнің үстінен қараған апелляциялық сот та өтінішті кері қайтарған. Неге?

Бас прокуратура Назарбаевтың бұған дейін де осындай арызбен бірнеше рет (2025 жылдың күзінде, 2026 жылдың ақпан-наурызында) сотқа жүгінгенін алға тартып отыр. Әлгі әрекетті «әлдеқашан күшіне енген сот шешімін айналып өтіп, мемлекетке қайтуы тиіс активтерді беруді барынша созу айласы» деп бағалауда.

Сотта Нұрбол өз атында емес, серіктестері мен «үшінші тұлғалардың» атына рәсімделген қымбат активі бар екенін, солар арқылы қарызды жабуға дайын екенін айтқан. Алайда сот Нұрболдың мұны растайтын нақты дәлел бермегенін, коммерциялық жылжымайтын мүліктен түсетін табысы, дивидендтері, депозиттері мен отбасылық шығындары туралы толық ақпаратты жасырып қалғанын анықтаған. Ал қарыздың құрамы қандай өзі?

Нұрбол Назарбаевтың үстінен қозғалған атқарушылық өндірістің жалпы сомасы 63,7 миллиард теңгені құрайды:

⚫️61,8 миллиард теңгеден астамы - Активтерді қайтару комитетінің пайдасына (мемлекет кірісіне) өндірілуі тиіс негізгі қарыз бен айыппұлдар.

⚫️1,6 миллиард теңгеден астам мемлекеттік баж салығы.

⚫️Қалғаны жекеменшік серіктестік алдындағы шағын берешектер.

«Төлем қабілеттілігін қалпына келтіру» бабын қалқан еткен Назарбаев қарызды төлеуді кейінге қалдырмақ болған, сөйтіп бұйрықтың орындалуын жылдарға созып жібергісі келген. Қулық-сұмдықты сезіп қойған сот ескі кланның мұрагеріне кеңшілік жасаған жоқ.

Болат Назарбаевтың тұсында феодалдық жолмен жиналған байлық (63,7 миллиард теңге) бұйырса, соңғы тиынына дейін бюджетке құйылады деген үміт бар.

Айта кетелік, Болат Назарбаев өзінің өсиетхатын алғаш рет 2014 жылы жазып, онда барлық мүлкін үлкен ұлы Нұрболдың атына табыстаған. Бөкеңнің өзі өмірден өткенмен, отбасының активі ыдырай қоймаған еді. Бөкеңнің артында 9 заңды баласы, одан бөлек онға жуық заңсыз бала қалды.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Wildberries-тегі Ватерлоо. Кремльдің цифрлық апиыны күлге айналып жатыр...

Кремльдің басты сауда платформасы Wildberries кешендері шетінен өртке оранып, күлі көкке ұшуда. Ресей экономикасы соңғы жылдары дәл осы электронды коммерцияның арқасында жан бағып отырған деп жазады Ertenmedia.kz.

Wildberries елдегі жалпы ішкі өнімнің (ВВП) 10 пайызға жуығын қамтып, миллиондаған адамның жалғыз нәпақа көзіне айналған-тын.

Мәскеу жылдар бойы Wildberries-ты орта тапты тыныштандыратын «цифрлық апиын» ретінде пайдаланды. Майдан шебіне бармай-ақ, маркетплейсте тауар өткізіп, бейбіт өмір сүріп жатырмыз деп ойлаған орыстар қазір ащы шындықпен бетпе-бет келуде.

90 мыңға жуық кәсіпкер барлық тауар қорынан, қаржысынан айырылып, жыламсырап отыр.

Батыстың барлау көздері меңзегендей, соңғы екі жылда Wildberries майданға қажетті қос мақсатты микросхема, дрон деталі, қытайлық навигациялық жабдықтар мен әскери киім-кешекті молынан тасымалдаған. Сайып келгенде қазір әлгі қоймаларда орыс халқының төплиі мен тұрмыстық техникасы ғана емес, бүтін Ресей армиясының астыртын жабдықтау арналары жанып жатыр.

Айтқандай, әзірде ғана Wildberries договырдағы форс-мажор бабын едел-жедел өзгертіп, кәсіпкерлерге соқыр тиын да төлеуден бас тартты. Солай.

Соғыс майдан даласынан Ресейдің әрбір азаматының босағасына, банк аккаунтына, онлайн себетіне ауысуда. Қоймалардың күйреуі, санкцияның қысуы, логистиканың тоқтауы орыстардың орта табын дәл осы жайлылық аймағынан жұлып алды

Кремльдің ең осал да осы орта тап. Майданға кеткен, украин топырағын тыңайтып жатқан маргинал бұқараға ақша беріп, аузын жабу оңай. Ал өз күнін өзі көріп, маркетплейсте айына миллиондар айналдырып отырған орта тап режим үшін ең қауіпті потенциалды сепаратист.

90 мың кәсіпкердің бір күнде далада қалуы осы топтың бұғып жатқан, іштей іріп жатқан ашу-зарын сыртқа шығаратын күн жақын. Кремль соғыста емес, дәл осы өзі кедейлендіріп, бұрышқа қамаған, бірақ іштей өшпенділігі қайнап жатқан орта табының саботажынан күйреп тынуы ғажап емес.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Жолақтан туған жанжал: Сайындағы шешім Дархан Сатыбалдыға петиция болып барды...

Алматыда Сайын көшесінің қосалқы жолына салынған автобус жолағына қатысты қарсылық күшейді. Дархан Сатыбалдының атына петиция жолдаған қалалықтар жобаны мерзімінен бұрын тоқтатуды талап етуде.

Петиция иелері Сайын көшесінің Рысқұлов даңғылынан Мұстафин көшесіне дейінгі бөлігіндегі арнайы жолақ кептелісті азайтудың орнына, қозғалысты одан әрі қиындатқанын алға тартып отыр, деп хабарлайды Ertenmedia.kz.

Сайын көшесінің су жаңа бөлігі маусым айының басында ғана ашылған-тын. Арада екі апта өтпей жатып, қосалқы жолдың бір жолағы қоғамдық көлікке берілген.

Өтініш иелері арнайы жолақ іске қосылғаннан кейін жол бойында кептеліс, қауіпті маневр және жүргізушілер арасындағы ұрыс-жанжал күрт көбейгенін жазуда. Әсіресе, жолақтың кейбір жолайрық алдында үзіліп қалуы көліктердің автобус жолағын кесіп өтуіне мәжбүрлеуде.

Дархан Сатыбалдыға дат айтқан петиция авторлары, стандарт бойынша қоғамдық көлікке арналған арнайы жолақ бір бағытта кемінде үш жолағы бар көшеде ұйымдастырылуы керек дейді. Ал Сайын көшесінің қосалқы жолында небәрі екі жолақ бар.

Тұрғындар әкімдік автобус жолағын енгізер алдында жасалған есеп-қисапты да жарияламады деп отыр. Құжатта автобус саны, жолаушы ағыны, қоғамдық көліктің жылдамдығы, өзге көліктің кідірісі және жедел жәрдем мен құтқару қызметінің қозғалысына әсері туралы дерек ашық айтылмаған екен.

«Күн сайын жүз мыңдаған адамның жүріп-тұруына әсер ететін шешім біреудің пайымына емес, ашық жарияланған есеп-қисапқа сүйенуі тиіс еді. Әкімдік Сайын көшесіндегі жобаны тоқтатып, бұрынғы қозғалыс сызбасын қалпына келтіріп, мәселені тұрғындармен талқылауы қажет», – дейді петиция авторлары.

Сонымен қатар петицияда жаңа автобус жолақтарын өзге көшелерге енгізуді уақытша тоқтату ұсынылған. Әкімдік әл-Фараби, Төле би, Сәтбаев, Шевченко, Құрманғазы, Рысқұлов секілді бірнеше ірі көшеде де осындай өзгеріс енгізуді қарастырып отыр.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️ Омбыдағы салқын душ: Тоқаев Путинге соғыстан шығатын есікті көрсетті...

Омбыда Кремль көсемімен кездескен президент Тоқаев ресей-украин соғысының тығырыққа тірелген айтып, батыл ұсыныс жасады деп жазады Ertenmedia.kz. 

Тоқаев Қазақстанның украин халқына, оның тілі мен мәдениетіне әрдайым үлкен құрметпен қарағанын ашық айтты. Артынша көпшілік дауыстап айтуға батпай жүрген ауыр сауалды алға шығарды.

«Қақтығыстың табиғаты көпшілікке, соның ішінде бізге де толық түсінікті емес. Соғыста уақытша тоқтату керек», – деді ол.

Тоқаев осы тұста екі тарапқа да Стамбұлда үзілген келіссөз үстеліне қайта оралуды ұсынды. 

Стамбул формуласын қайта тірілту Кремльдің агрессиясын тежеп, текетіресті уақытша болса тоңазытудың, ең бастысы, бейбіт халықтың қанын төгуді тоқтатудың әзіргі жалғыз жолы. 

Біздіңше, Тоқаев Омбыда Мәскеудің жанына жағатын сөз айтқан жоқ. Керісінше, Кремльдің соғысты ақтайтын аргументі әлі күнге түсініксіз екенін Путиннің өзіне естіртіп кетті. 

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Мәскеудің төбесіне төңкерілген шелек: Тоқаев Кремльдің соғыс уәжін күмәнге көмді...

Омбы төрiнде отырып, «мына соғыстың табиғаты бізге де, өзгеге де түсініксіз» деп қойып қалған Тоқаев Мәскеудің төбесіне мұздай суды төңкере салды.

Кремль көсемінің соғысты ақтауға тырысқан идеологиялық догмасы Астана тарапынан ашық түрде деконструкцияға ұшырады деп батыл айтуға болады. Путин үшін бұдан асқан шок терапия болуы мүмкін емес еді.

Қазақстан басшысы украин халқының тіліне, тарихы мен мәдениетіне деген құрметін ашық паш етіп, соғыстың түпкі табиғаты ақылға сыймайтын, ешкімге түсініксіз мағынасыз текетірес екенін бетке басты.

Осыған дейін аймақ лидерлерінің ешқайсысы Кремль иесінің көзінше дәл мұндай өткір де айқын позиция білдіруге батпаған еді.

Бұл ма, бұл Мәскеудің "артқы ауласы" саналатын елдердің ішінен балама ақпараттық фронт ашатын батыл стратегия.

Тоқаевтың Ыстамбұл келіссөзін қайта жандандыру ұсынысы Ресейді өзі бастаған соғыстан ар-ұятын сақтай отырып шығатын жалғыз саяси есікке нұсқау.

Мәскеудің медиамашинасы бұған қандай реакция беретінін ертеңгі күн көрсетеді.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia