በትምህርት ሚኒስቴር ሚኒስትር ዴኤታነት የተመደቡት አዲስ አመራሮች የስራ ርክክብ አደረጉ፤

----------------------- // -------------------

(ጥቅምት 04/2019 ዓ.ም) በትምህርት ሚኒስቴር ሚኒስትር ዴኤታነት የተመደቡት ዶ/ር ቶላ በሪሶ እና ዶ/ር ሰለሞን አብርሃ ከቀድሞ ሚኒስትር ዴኤታዎች የስራ ርክክብ አድርገዋል።

በዚህም የቀድሞ የአጠቃላይ ትምህርት ልማት ዘርፍ ሚኒስትር ዴኤታ ክብርት ወ/ሮ አየለች እሸቴ አዲስ ለተመደቡት ዶ/ር ቶላ በሪሶ መልካም የስራ ዘመን በመመኘት የስራ ርክክብ ያደረጉ ሲሆን፤
በተመሳሳይ የከፍተኛ ትምህርት ልማት ዘርፍ ሚኒስትር ዴኤታ የነበሩት አቶ ኮራ ጡሹኔ በዘርፉ አዲስ ለተመደቡት ሚኒስትር ዴኤታ ዶ/ር ሰለሞን አብርሃ የስራ ርክክብ አድርገዋል።

በሥራ ርክክብ መድረኩ ላይ የተገኙት የትምህርት ሚኒስትሩ ፕሮፌሰር ብርሃኑ ነጋ ባስተላለፉት መልዕክት፣ ባለፉት ዓመታት በትምህርት ዘርፉ የተጀመሩ የሪፎርም ሥራዎች የማይቀለበሱበት ምዕራፍ ላይ መድረሳቸውን ገልጸው የቀድሞ አመራሮች ላበረከቱት ከፍተኛ አስተዋጽኦ ምስጋና አቅርበዋል። አዲስ የተመደቡት አመራሮችም ያላቸውን ሰፊ ልምድ በመጠቀም ለዚህ ታሪካዊ ምዕራፍ ስኬትና ቀጣይነት ትልቅ አቅም እንደሚሆኑ ሙሉ እምነት እንዳላቸው ተናግረዋል። ሙሉ መረጃውን ለማግኘት ይህንን ሊንክ ይጫኑ፤ https://web.facebook.com/share/p/19FKeHEc1A/

የተፋጠነ የትምህርት መርሃ ግብሮችን ለማሻሻል ያለመ አህጉራዊ አውደ ጥናት በአዲስ አበባ በመካሄድ ላይ ነው።

------------------- // -------------------

(ጥቅምት 16/2019 ዓ.ም) የኢትዮጵያን የተፋጠነ የትምህርት ፕሮግራም (ALP) ተሞክሮዎች ለአፍሪካ አገራት ለማካፈል እና የትምህርት ቀውሶችን በዘላቂነት ለመቅረፍ ያለመ አህጉራዊ አውደ ጥናት በአዲስ አበባ በመካሄድ ላይ ይገኛል።

በአውደ ጥናቱ መክፈቻ መልዕክት ያስተላለፉት የጎልማሶችና መደበኛ ያልሆነ ትምህርት መሪ ሥራ አስፈጻሚ ዶ/ር ዬሴፍ አበራ የትምህርት ቀውሱን ለመፍታት ከትምህርት ውጪ የሆኑ ሕፃናትን ችግር በከተማ እና በገጠር ነባራዊ ሁኔታዎች ላይ በተመሠረቱ የጣልቃ-ገብነት ስልቶች ማስተካከል እንደሚገባ አስገንዝበዋል።


ከዚሁ ጋር በተያያዘም የኢትዮጵያን የተፋጠነ የትምህርት ፕሮግራም (ALP) ተሞክሮዎች ለሌሎች የአፍሪካ አገራት በማካፈል እና ሰፋ ያለ ልምድ ልውውጥ በማድረግ የመንግሥትን የመሪነት ሚና ማጠናከር እንደሚገባ አሳስበዋል።


በተጨማሪም የትምህርት ባለሙያዎች አቅም ግንባታ እና የጥራት ማረጋገጫ ሥራዎች ተጠናክረው መቀጠል እንዳለባቸው አበክረው ገልጸዋል። ሙሉ መረጃውን ለማግኘት ይህንን ሊንክ ይጫኑ፤ https://web.facebook.com/share/p/1CKLgRmZWE/

በአማራጭ የመምህርነት ሙያ የሰለጠኑ የመጀመሪያዎቹ 693 ዕጩ መምህራን ተመረቁ።

----------------------- // -------------------------
‎
‎(ጥቅምት 18/2019 ዓ.ም) በአማራጭ የመምህርነት ሙያ ሥልጠና የሰለጠኑ የመጀመሪያዎቹ 693 ዕጩ መምህራን ከኮተቤ የትምህርት ዩኒቨርሲቲ ተመረቁ።

ትምህርት ሚኒስቴር እንደ ሀገር የሚስተዋለውን የመምህራን አቅርቦት ችግር ለመቅረፍ ከወሰዳቸው አማራጮች መካከል በተለያዩ የትምህርት መስኮች ተመርቀው ወደመምህርነት ሙያ መቀላቀል ለሚፈልጉ ምሩቃን ባመቻቸው የስልጠና እድል በኮተቤ የትምህርት ዩኒቨርስቲ ስልጠናቸውን ሲከታተሉ የቆዩ 693 እጩ መምህራንን አስመርቋል።

‎
በምረቃ ሥነ ሥርዓቱ ላይ የተገኙት የመምህራንና የትምህርት አመራር ልማት ተ/ሥራ አስፈጻሚ ወ/ሮ አሰገደች ምሬሳ፣ መምህርነት ለትውልድ ቀረጻ እና ለሀገር ግንባታ ወሳኝ ሙያ መሆኑን ገልጸው ምሩቃኑም ይህንኑ ኃላፊነት በመገንዘብ፣ በታማኝነት፣ ሙያው በሚጠይቀው ሥነ ምግባርና በቁርጠኝነት በመሥራት ለተማሪዎቻቸው አርአያ እንዲሆኑና ለሀገራቸው እድገት የድርሻቸውን እንዲወጡ አደራ ብለዋል። ሙሉ መረጃውን ለማግኘትይህንን ሊንክ ይጫኑ፤ https://web.facebook.com/share/p/1bme24Q28J/

የኢትዮጵያ የትምህርት ሪፎርም ለሌሎች አፍሪካ ሀገራት በትምህርት ጥራት ማሻሻያ ረገድ አርዓያ መሆን እንደሚችል ተገለጸ።

------------------------- // --------------------------

(ጥቅምት 24/2019 ዓ.ም) የዩኔስኮ የአፍሪካ አቅም ግንባታ ተቋም (UNESCO-IICBA) የአቅም ግንባታ ከፍተኛ የፕሮግራም አስተባባሪ የሆኑት ዶ/ር ቪክቶሪያ ኪሳቼ ካኖቤ በኢትዮጵያ በመተግበር ላይ ያለዉ የትምህርት ሪፎርም ስራ እና የተፋጠነ የትምህርት መርሃ-ግብር (Accelerated Learning Programme) ትግበራ ሌሎች የአፍሪካ ሀገራት ትልቅ ልምድ የሚቀሰምበት መሆኑን ገለጹ።


ከተለያዩ ሀገራት ልኡካን ቡድን አባላት ጋር በመሆን በአዲስ አበባ የሚገኙ ትምህርት ቤቶችን እና ሌሎች መሰል የፌዴራል ተቋማትን የጎበኙት ሀላፊዋ የኢትዮጵያን የትምህርት ፓሊሲና ስትራቴጂ ትግበራ ሌሎች የአፍሪካ ሀገራት በርካታ ልምዶችን ሊቀስሙበት እንደሚገባ ጠቁመዋል።

በተለይም በተፋጠነ የትምህርት መርሃ-ግብር አተገባበር ረገድ ይዘቶችን ለአጭር ጊዜ ማስተካከል፣ መምህራንን የማነሳሳት ስራዎች እና የተማሪዎች ወሳኝ የማሰብ ችሎታን ለማጎልበት እየተደረጉ ያሉ ጥረቶች ከፍተኛ አድናቆት የሚቸራቸው መሆኑን አመላክተዋል። ሙሉ መረጃውን ለማግኘት ይህንን ሊንክ ይጫኑ፤ https://web.facebook.com/share/p/19rueyuQZr/