በሀዋሳ ከተማ ሲካሄድ የነበረው የአጠቃላይ ትምህርት ልማት ዘርፍ ሀገራዊ ምክክር መድረክ የ2018 ዓ.ም የቁልፍ ተግባራት ውጤት አመላካች መለኪያዎች ላይ የጋራ ስምምነት በመፈራረም ተጠናቋል።

----------------------------------------------

(ነሐሴ 16/2017 ትምህርት ሚኒስቴር) የትምህርት ሚኒስቴር ለሁለት ቀናት በሀዋሳ ከተማ ሲያካሄድ የነበረው የአጠቃላይ ትምህርት ልማት ዘርፍ ሀገራዊ የምክክር ከሁሉም የክልልና ከተማ መስተዳድር ቢሮዎች ጋር የ2018 ዓ.ም የቁልፍ ተግባራት ውጤት አመላካቾችን የስምምነት ሰነድ በመፈራረም አጠናቋል።

መድረኩ በቀጣይ በሀገር አቀፍ ደረጃ የተሻለ ውጤት ማስመዝገብ በሚቻልባቸው ጉዳዮች ላይ በጥልቀት የተመከረበትና በቀጣይ የትኩረት አቅጣጫዎች ላይ ከመግባባት የተደረሰበት መሆኑ ተመላክቷል።

በመድረኩ የተገኙት የአጠቃላይ ትምህርት ዘርፍ ሚኒስትር ዴኤታ ክብርት ወ/ሮ አየለች እሸቴ የትምህርት ተሳትፎ፣ ጥራትና ፍትሃዊነትን በማረጋገጥ ረገድ በ2017 የትምህርት ዘመን የተገኙ ስኬቶችን በማስፋትና በማስቀጠል በመጭው አመት የተሻለ ውጤት ማስመዝገብ በሚቻልባቸው ጉዳዮች ላይ መድረኩ በመምከር አቅጣጫ ያስቀመጠ መሆኑን ገልፀዋል።

በዘርፉ የአፈጻጸም ሂደት ውስጥ የሚያጋጥሙ ተፈጥሮአዊና ሰው ሰራሽ ተግዳሮቶች በመሻገር በ2018 የትምህርት ዘመን የተሻለ ውጤት ለማስመዝገብ የሚደረገውን ጥረትም እንዲሁ አጠናክሮ ማስቀጠል እንደሚገባ የተመከረበት እንደሆነም ክብርት ሚንስትር ዴኤታዋ አያይዘው ገልጸዋል። ሙሉ መረጃውን ለማግኘት ይህንን ሊንክ ይጫኑ፤ https://www.facebook.com/share/p/1UQesBy5es/

በ2017 የአጠቃላይ ትምህርት ልማት ዘርፍ እቅድ አፈጻጸም መሳካት መምህራን ለነበራቸው ሚና እውቅና ተሠጠ።
--------------------------------------------
(ነሐሴ 17/2017 ዓ.ም) በአጠቃላይ ትምህርት ልማት ዘርፍ የ2017 የትምህርት ዘመን እቅድ አፈጻጸም መሳካት የኢትዮጵያ መምህራን ላበረከቱት አስተዋጽኦ እውቅና ስጥቷል።

ለሁለት ቀናት በሀዋሳ ከተማ ሲካሄድ በነበረው የአጠቃላይ ትምህርት ልማት ዘርፍ ሀገር አቀፍ የምክክር መድረክ ማጠናቀቂያ ላይ የኢትዮጵያ መምህራን ማህበር በዘርፉ የ2017 የትምህርት ዘመን እቅድ አፈጻጸም ሂደት ውስጥ ላበረከቱት አስተዋጽኦ ተመስግነዋል።

በመማር ማስተማር፣ በትምህርት ለትውልድ፣ በትምህርት ቤት ምገባ እንዲሁም በአጠቃላይ የትምህርት ዘርፉ ስራዎች የተሳኩ እንዲሆኑ ከመምህራን በተጨማሪ የተማሪ ወላጆች ህብረትም ላበረከቱት አስተዋጽኦ ሚኒስቴሩ ምስጋና ያቀረበ ሲሆን በመጪው አመት የተሻለ ውጤት ማስመዝገብ እንዲቻል ሁሉም የዘርፉ ተዋንያኖች ሚናቸውን በተጠናከረ መልኩ እንዲወጡ ጥሪ ቀርቧል።

የአጠቃላይ ትምህርት ልማት ዘርፍ ሚንስትር ዴኤታ ክብርት ወ/ሮ አየለች እሸቴ በዚሁ ወቅት ባስተላለፉት መልዕክት አሁን ላይ በትምህርቱ ዘርፍ የምንሰራቸው ስራዎች ትክክለኛነት የመጪው ትውልድ እጣ ፈንታ የሚወስኑ በመሆናቸው ሀላፊነታችንን መወጣት ይገባልም ብለዋል።

በማያያዝም የበለጸገችና ያደገች ሀገር ለመፍጠር ሁሉም የትምህርት ጉዳይ ያገባኛል የሚል ባለድርሻ አካል በሚፈለገው ልክ መስራት እንደሚገባው አሳስበዋል።

የትምህርት አገልግሎትን ከትርፍ ጋር ብቻ አያይዞ መሥራት ሀገርን እንደሚጎዳ ተገለጻ፡፡
---------------------------------------------
(ነሃሴ 20/2017 ዓ.ም) የኢትዮጵያ የትምህርትና ሥልጠና ባለሥልጣን በአዲስ አበባ ከተማ አስተዳደር ላይ አገልግሎት እየሰጡ ባሉ የግል ከፍተኛ ትምህርት ተቋማት ላይ ባካሄደው የዳግም ምዝገባ አፈጻጸም ዙሪያ ባዘጋጀው የውይይት መድረክ የተገኙት የትምህርት ሚኒስትሩ ፕሮፌሰር ብርሃኑ ነጋ የትምህርት አገልግሎትን ከትርፍ ጋር ብቻ አያይዞ መሥራት ሀገርን እንደሚጎዳ ገልጸዋል፡፡

መንግስት የትምህርት ጥራትን ለማረጋገጥ ባለፉት የለውጥ ዓመታት ትኩረት ሰጥቶ እየሰራ መሆኑን ጠቅሰው በተጠናው ጥናት መሠረት በተካሄደውና በቀጣይ በሚካሄደው ምዘና ዝቅተኛ የምዘና መስፈርቶችን የማያሟሉ የግል ከፍተኛ ትምህርት ተቋማት ከትምህርት ሥርዓቱ እንዲወጡ የሚደረግ መሆኑን አስገንዝበዋል፡፡

የከፍተኛ ትምህርት ተቋማት ለሀገር ሁለንተናዊ ልማት የሚጠበቅባቸውን ሚና እንዲጫወቱ ከሀገር ወቅታዊና የወደፊት ፍላጎት እንዲሁም ከዓለም ነባራዊ ሁኔታ ጋር በመቃኘት መምራት እንደሚገባ ጠቅሰዋል።

ፕሮፌሰር ብርሃኑ አክለውም ይህ በግል ከፍተኛ ትምህርት ተቋማት ላይ የተጀመረው የብቃት ምዘና ሥራ ያለ ምንም ማዳላት በተመሳሳይ መልኩ በመንግሥት ተቋማት ላይም ተግባራዊ እንደሚሆንም ጠቁመዋል። ሙሉ መረጃውን ለማግኘት ይህንን ሊንክ ይጫኑ፤ https://www.facebook.com/share/p/19fvNZn2Q7/

ከሁሉም የአገሪቱ ክፍሎች ለተውጣጡ የሁለተኛ ደረጃ ትምህርት ቤት ተማሪዎች የፕሮግራም ኮዲንግና አልጎሪዝም ስልጠና ተሰጠ፤

-------------------------------------------------

(ነሃሴ 20/2017 ዓ.ም) በትምህርት ሚኒስቴር የማህበረሰብ ጉድኝትና ሀገር በቀል ዕወቀት ዴስክ ኃላፊ ወ/ሮ ሰላማዊት አለሙ እንደገለጹት ስልጠናው የተሰጠው ከሁሉም ክልሎችና የከተማ መስተዳድሮች ለተውጣጡ አንድ መቶ ሃያ አንድ ከ9ኛ-11ኛ ክፍል ላሉ የሁለተኛ ደረጃ ትምህርት ቤት ተማሪዎች ነው፡፡

የትምህርት ሚኒስቴር ከአዲስ አበባ ዩኒቨርስቲና ከአዲስ ኮደር ጋር በመተባበር ባዘጋጀው አገር አቀፍ የክረምት ስልጠና መርሃ ግብር ተማሪዎቹ በኮምፒውተር ፕሮግራሚንግና አልጎሪዝም ፕሮግራሞች ዙሪያ በንድፈ ሀሳብና በተግባር የተደገፈ እውቀት እንዲጨብጡ መደረጉንም ገልጸዋል፡፡

ስልጠናው ዲጅታል ኢትዮጵያን እውን ለማድረግ በክቡር ጠቅላይ ሚኒስትር አብይ አህመድ (ዶ/ር) የተጀመረው የ5 ሚሊዮን ኮደርስ መርሃ ግብር አጋዥ መሆኑን ኃላፊዋ ጨምረው ተናግረዋል፡፡

የአዲስ ኮደር ፕሬዚዳንት ፕሮፌሰር ጂላኔ ኔልሰን በበኩላቸው በአልጎሪዝምና ፕሮግራሚንግ ላይ አተኩሮ ለአራት ሳምንታት በተሰጠው ስልጠና ከመላ አገሪቱ የተመለመሉና ከ9ኛ እስከ 11ኛ ክፍል ያሉ የሁለተኛ ደረጃ ተማሪዎች ተሳታፊ መሆናቸውን ገልጸዋል፡፡ ሙሉ መረጃውን ለማግኘት ይህንን ሊንክ ይጫኑ፤ https://www.facebook.com/share/p/1DxmMJYaD5/

የትምህርት ሚኒስትር ዴኤታው ክቡር አቶ ኮራ ጡሹኔ በእስራኤል የክልል ትብብር ሚኒስቴር ዋና ዳይሬክተር የተመራ የልዑካን ቡድን ተቀብለው አነጋገሩ።

(ነሃሴ 23/2017 ዓ.ም) የከፍተኛ ትምህርት ልማት ዘርፍ ሚኒስትር ደኤታ ክቡር አቶ ኮራ ጡሽኔ የእስራኤል የክልል ትብብር ሚኒስቴር ዋና ዳይሬክተር ጊላድ ሻድሞን (Gilad Shadmon) የተመራ የልዑካን ቡድን አባላትን ተቀብለው ባነጋገሩበት ወቅት በሁለቱ አገራት መካከል በትምህርቱ ዘርፍ ያለውን ትብብር ማጠናከር በሚቻልበት ሁኔታ ላይ ተወያይተዋል።

በዚሁ ጊዜ የከፍተኛ ትምህርት ልማት ዘርፍ ሚኒስትር ዴኤታው በአገራቱ መካከል የከፍተኛ ትምህርት ትብብር በተለይም በአካዳሚክ ፣ በምርምር በዩኒቨርስቲ ኢንዱስትሪ ትስስር ከእስራኤል ዩኒቨርስቲዎች ልምድና ተሞክሮ መቅሰም እንደሚያስፈልግ ገልጸዋል።

በፈጠራና አዳዲስ ቴክኖሎጂዎች ፣ በግብርና ፣ በኢንፎርሜሽን ኮሙኒኬሽን ቴክኖሎጂ ፣ በማዕድንና በሌሎችም ዘርፎች ትብብር ማሳደግ እንደሚያስፈልግም ክቡር ሚኒስትር ዴኤታው ተናግረዋል።

የእስራኤል የክልል ትብብር ሚኒስቴር ዋና ዳይሬክተር ጊላድ ሻድመን በበኩላቸው በኢትዮጵያና በእስራኤል መካከል የቆየ ወዳጅነትና ትብብር መኖሩን ጠቁመው አገራቸው በትምህርቱ ዘርፍ ከኢትዮጵያ ጋር ያላትን ግንኙነት ማጠናከር እንደምትፈልግ ገልጸዋል።

እስራኤል በግብርና በአካባቢ ጥበቃ በተለይም በውሃና አፈር ጥበቃና አያያዝ፣ በቴክኖሎጂ፣ በፈጠራና በሌሎችም ያላትን ልምድ ማካፈል እንደምትችልም ገልጸዋል።

በውይይቱ ላይ በኢትዮጵያ የእስራኤል አምባሳደር አብርሃም ንጉሴና ሌሎችም ጉዳዩ የሚመለከታቸው የሥራ ኃላፊዎች ተገኝተዋል።

ትምህርት ሚኒስቴር ከቻይና ህዝባዊ ሪፐብሊክ ትምህርት ሚኒስቴር አለም አቀፍ የህዝብ ለህዝብ ልውውጥ ማዕከል ጋር በጋራ ለመስራት የሚያስችል የመግባቢያ ስምምነት ሠነድ ተፈራረመ።

(ነሃሴ 23/2017 ዓ.ም)ትምህርት ሚኒስቴር ከቻይና ህዝባዊ ሪፐብሊክ ትምህርት ሚኒስቴር አለም አቀፍ የህዝብ ለህዝብ ልውውጥ ማዕከል ጋር በጋራ ለመስራት የሚያስችል የመግባቢያ ስምምነት ሠነድ ተፈራርመዋል።

ስምምነቱ የተቋም ለተቋም ግንኙነትን በማጠናከር የሁለቱ ሀገራት የእውቀትና ክህሎት ሽግግርን ለማሳለጥ የሚያስችል መሆኑ ተመላክቷል።

የትምህርት ሚኒስቴር የከፍተኛ ትምህርት ልማት ዘርፍ ሚንስትር ድኤታ ክቡር አቶ ኮራ ጡሹኔ ስምምነቱን በፈረሙበት ወቅት የቻይና መንግስት በኢትዬጵያ የትምህርት ልማት ዘርፍ ውስጥ ለሚያደርገው ድጋፍ ምስጋና አቅርበዋል

ሚኒስትር ድኤታው በማያያዝም ስምምነቱ ሀገራዊ ፍላጎት ላይ መሠረት በማድረግ በተለይም በማደግና በመስፋፋት ላይ ያሉ የዲጂታል፣ ሠው ሠራሽ አስተውሎ ፣ ሳይበር ሴኪዩሪቲና መሠል ትብብሮች ላይ የቻይና ባለሙያዎችንና ተቋማትን ድጋፍ እንደሚሹ አስገንዝበዋል።

መሠል ትብብሮች የህዝብ ለህዝብ ግንኙነቶችን በማጠናከርና ቅርርቦሽን በመፍጠር በሁለቱ ሀገራት መካከል ያለውን አጋርነትና ትብብር በበለጠ የሚያጠናክር መሆኑን ሚንስትር ድኤታው በማያያዝ ገልጸዋል።

የቻይና ህዝባዊ ሪፐብሊክ ትምህርት ሚኒስቴር አለም አቀፍ የህዝብ ለህዝብ ማዕከል ሀላፊ ዩ ቻንግሺዩ በበኩላቸው ቻይና አሁን ለደረሠችበት የእድገት ደረጃ የአለም አቀፍ ትብብር ያለው ሚና ወሳኝ መሆኑን ትገነዘባለች ያሉ ሲሆን በትምህርትና ተያያዥ ልውውጦች ከኢትዮጵያ ጋር ተባብሮ ለመስራት ፍላጎት ያላት መሆኑን ገልጸዋል። ሙሉ ዜናውን ለማግኘት https://web.facebook.com/share/p/17D1bheXY5/