የከፍተኛ ትምህርት ተቋማት ተማሪዎች ከክፍል ከሚሰጠው እውቀት ባሻገር በክህሎትና በአመለካከት ስራ ፈጣሪ ሆነው መውጣት እንዳለባቸው ተጠቆመ፤

የትምህርት ሚኒስቴር ተማሪዎች በዩኒቨርስቲ ቆይታቸው ስራና ስራ ፈጣሪነት ዙሪያ ተገቢውን ክህሎትና አመለካከት ይዘው መውጣት እንዲችሉ ማዕከላትን ማቋቋም (Center for Employment and Entrepreneurship Development) በሚቻልበት ሁኔታ የምክክር መድረክ አካሂዷል።
====================
(ጳጉሜን 1/2017 ዓ.ም) በከፍተኛ ትምህርት ልማት ዘርፍ የአካዳሚክ ጉዳዮች መሪ ሥራ አስፈጻሚ ዶ/ር ኤባ ሚጀና ውይይቱን በከፈቱበት ወቅት እንደገለጹት የከፍተኛ ትምህርት ተቋማት ተማሪዎች የሥራ ፈጣሪነት አመለካከትና ክህሎትን እንዲለበሱ በትኩረት ሊሰሩ እንደሚገባ ጠቁመው ተቋማቱ ማዕከላቱን በበቂ ግብዓት ማደራጀት ይጠበቅባቸዋል ብለዋል።
የከፍተኛ ትምህርት ተቋማት ለተማሪዎቻቸው እውቀት ብቻ ከማስተላለፍ አውድ ወጥተው ወደ ስራ ፈጠራ ስርዓተ-ምህዳር ለውጥ ሊያደርጉ እንደሚገባ ጠቁመው ማዕከላቱ በቀጣይ የሚመጥናቸውን የሰው ሀይልና አደረጃጀት አንዲኖራቸው እየተሰራ መሆኑንም ተናገረዋል።
በከፍተኛ ትምህርት ልማት ዘርፍ የመምህራንና ተማሪዎች ልማት ዴስክ ሀላፊ አቶ በየነ ተዘራ የከፍተኛ ትምህርት ተቋማት ተማሪዎች ያገኙትን እውቀት ከአለማችን ተጨባጭ ሁኔታ ጋር እያገናዘቡ ወደ ተግባር መቀየርን የሚለማመዱበትና የሥራ ፈጠራ አመለካከትና ክህሎት የሚያሳድጉበትን ማዕከል እንደ አንድ ወሳኝ የመማር ማስተማሪያ ግብዓት በመቁጠር አቋቁመውና አጠናክረው መስራት የሚጠበቅባቸው መሆኑን ገልጸዋል፡፡ ሙሉ መረጃውን ለማግኘት ይህንን ሊንክ ይጫኑ፤ https://www.facebook.com/share/p/1JfjQhpzkD/

የ2018 ዓ.ም. ትምህርት ቤቶች ከመስከረም 05/2018 ዓ.ም ጀምሮ የመማር ማስተማር ሥራ ይጀምራሉ ፤ትምህርት ሚኒስቴር
ከ2018 የትምህርት ዘመን ጀምሮ በሁሉም ትምህርት ቤቶች ሞባይል ስልክ ፣ ታብሌትና ኤሌክትሮኒክስ ቁሰቀቁሶችን ይዞ ትምህርት ቤት መምጣት ተከልክሏል፡፡

----------------------------------------

(ጳጉሜን 01/2017 ዓ.ም) የ2018 የትምህርት ዘመን የትምህርት ቤቶች አከፋፈት አስመልክቶ ትምህርት ሚኒስቴር ከክልል ትምህርት ቢሮ ኃላፊዎች ጋር የበይነ-መረብ ምክክር ባደረገበት ወቅት የአጠቃላይ ትምህርት ልማት ዘርፍ ሚኒስትር ዴኤታ ክብርት ወ/ሮ አየለች እሸቴ እንደገለጹት የ2018 የትምህርት ዘመን የመማር ማስተማር ሥራ ሰኞ መስከረም 5/ቀን 2018 ዓ.ም በይፋ ይጀመራል።

በትምህርት ካሌንደሩ መሠረት ዓርብ መስከረም 2 / 2018 ዓ.ም. ትምህርት ቤቶች ክፍት ሆነው መምህራንና ተማሪዎች ውይይት የሚያደርጉበትና መስከረም 5/2018 ዓ.ም ደግሞ በይፋ ለሚጀመረው የትምህርት ስራ ቅድመ ዝግጅት የሚያደርጉበት ቀን መሆኑንም ክብርት ወ/ሮ አየለች አስታውቀዋል፡፡

በ2018 የትምህርት ዘመን ባለፈው ዓመት ከትምህርት ገበታ ውጪ የሆኑ ተማሪዎችን ጨምሮ ሁሉም እድሜያቸው ለትምህርት የደረሱ ህጻናትና ተማሪዎች ወደ ትምህርት ቤት እንዲመጡ ወላጆች፣ መምህራንና የዘርፉ ባለድርሻዎች የጀመሩትን የንቅናቄ ተግባር አጠናክረው ሊቀጥሉ እንደሚገባና የትምህርት ቤት ምዝገባም እስከ መጨረሻው ቀን አጠናክሮ መቀጠል እንደሚገባ ተናግረዋል፡፡ ሙሉ መረጃውን ለማግኘት ይህንን ሊንክ ይጫኑ፤ https://www.facebook.com/share/p/19VhCdzuyH/

ጳጉሜ 2 የህብር ቀን “ብዝሃነት የኢትዮጵያ ጌጥ” በሚል መሪ ቃል ተከበረ፤
የትምህርት ፣ የሠላም፣ የፍትህ እና የመንግስት ኮሙኒኬሽን አገልግሎት ሚኒስቴር መ/ ቤቶች የህብር ቀንን '' ብዝሃነት የኢትዮጵያ ጌጥ '' በሚል መሪ ቃል በጋራ አክብረዋል።

------------------------------------------------

(ጳጉሜን 2/ 2017 ዓ.ም) የአጠቃላይ ትምህርት ልማት ዘርፍ ሚኒስትር ዴኤታ ክብርት ወ/ሮ አየለች እሸቴ ቀኑ በፓናል ውይይቱ በተከበረበት ወቅት እንደገለጹት ብዝሃነት የሀገራዊ ስኬቶቻችን መሠረት በመሆኑ የወል ትርክት ግንባታን ማጠናከር ከሁላችንም እንደሚጠበቅ ጠቁመው የብዝሃ ኢትዮጵያ ጌጦችን ማጽናትና በቀጣይም አዳዲስ ድሎችን በማስመዝገብ ከትውልድ ወደ ትውልድ እንዲሸጋገር ማድረግ ይገባል ብለዋል።

ክብርት ሚኒስትር ዴኤታዋ ከዚህ ጋር አያይዘው ለጋራ ራዕያችን እውን መሆን ብዝሃነትን በማስተናገድ የተገነባ ጠንካራ አገራዊ አንድነት፣ መተሳሰብ፣ መቻቻል፣ ፍቅርን በይቅርታ ማጠናከር እንደሚያስፈልግ ተናግረዋል።

ክብርት ወ/ሮ አየለች አክለውም ትምህርት ቤቶች የብዝሃ ኢትዮጵያ መገለጫ በመሆናቸው በትምህርትና ስልጠና ፖሊሲው ብዝሃነትን የሚቀበሉ፣ የሚከባበሩ፣ የሚተሳሰቡ ፣አብሮ ለመኖር ፈቃደኛ የሆኑ ዜጎችን በመፍጠር የበለጸገች ኢትዮጵያን እውን ለማድረግ ከታችኛው እርከን ጀምሮ በትኩረት እየተሰራ መሆኑን ተናግረዋል፡፡ ሙሉ መረጃውን ለማግኘት ይህንን ሊንክ ይጫኑ፤ https://www.facebook.com/share/p/17PZ4ahyrk/

ለሴት ተማሪዎች የትምህርት ውጤታማነት ትኩረት ተሰጥቶ እየተሠራ መሆኑን ክብርት ወ/ሮ አየለች እሸቴ ገለፁ።

---------------------------------------

(ጳጉሜ 02/2017 ዓ.ም) የጳጉሜን 2 የህብር ቀንን ምክንያት በማድረግ ለዳግማዊ ሚኒሊክ እና ለቴጌ መነን የሴቶች አዳሪ ትምህርት ቤቶች የሴት ተማሪዎች ንፅህና መጠበቂያ ቁሳቁስ ድጋፍ ተደርጓል።

በዚሁ ወቅት የትምህርት ሚኒስቴር ሚኒስትር ዴኤታ ክብርት ወ/ሮ አየለች እሸቴ የተደረገው ንጽህና መጠበቂያ ድጋፍ ለሴት ተማሪዎች ትምህርት ውጤታማነት የላቀ ትርጉም ያለው መሆኑን ተናግረው መሠል ስራዎች ተጠናክረው ይቀጥላሉ ብለዋል

አክለውም በቅርቡ የጸደቀው የአጠቃላይ ትምህርት አዋጅ ውስጥ ከተካተቱ ጉዳዮች አንዱ ሴት ተማሪዎችን በትምህርት ውጤታማ የማድረግ ጉዳይ መሆኑን ጠቅሰው ትምህርት ቤቶች ሴቶች በትምህርት ቤት ውስጥ ከሚያሰፈልጓቸው ነገሮች አንዱ የሆነውን የንጽህና መጠበቂያ ማቅረብ እንዳለባቸው የሚደነግግ መሆኑን አስረድተዋል፡፡

አዋጁ በቅርቡ የጸደቀ መሆኑን የጠቀሱት ክብርት ሚኒስትር ዴኤታዋ ለአዋጁ መተግበር በትምህርት ዙሪያ የሚሰሩ ሁሉም ባለድርሻ አካላት በትብብር፣ በመተጋገዝና በመደጋገፍ መስራት እንዳለባቸው አስገንዝበዋል፡፡

የሴቶችና ማህበራዊ ጉዳይ ሚኒስትር ክብርት ኤርጎጌ ተስፋዬ(ዶ/ር) በበኩላቸው አገር የሚገነባው በእያንዳንዱ ዜጋ አስተዋጽኦ በመሆኑ በህብር በመቆም በአንድነት በመሆን ኢትዮጵያን ከፍ ማድረግና የመደጋገፍና የመረዳዳት እሴቶቻችንን ማጎልበት እንደሚገባቸው ተናግረዋል፡፡ ሙሉ መረጃውን ለማግኘት ይህንን ሊንክ ይጫኑ፤
https://www.facebook.com/share/p/19NojjS3hB/