ኢትዮ ቴሌኮም እና ኤሪክሰን የ132 ዓመታት ታሪካዊ አጋርነታቸውን አከበሩ

ኩባንያችን እና ዓለም አቀፉ የቴክኖሎጂ ኩባንያ ኤሪክሰን 132 ዓመታት ያስቆጠረውን ታሪካዊ አጋርነታቸውን ከኤሪክሰን 150ኛ ዓመት የምስረታ በዓል ጋር በማስተሳሰር በዛሬው ዕለት በድምቀት አክብረዋል።

መርሐ ግብሩ የኩባንያችን ተ/ዋና ሥራ አስፈጻሚ አቶ ታሪኩ ደምሴ እንዲሁም የኤሪክሰን የአውሮፓ፣ መካከለኛው ምሥራቅና አፍሪካ ፕሬዚዳንት ፓትሪክ ዮሃንሰን የመሩት ከፍተኛ ልዑክ በተገኘበት በስትራቴጂያዊ የሁለትዮሽ ውይይት ታጅቦ ተከናውኗል።

አቶ ታሪኩ ደምሴ በዚሁ ወቅት እንዳስታወቁት፤ የሁለቱ ተቋማት የአጋርነት ግንኙነት እ.ኤ.አ በ1894 የመጀመሪያዎቹ የስልክ መገልገያዎች ወደ ሀገራችን ከገቡበት ጊዜ አንስቶ እስከ ዛሬው ዘመናዊ የ4G እና 5G ኔትወርክ ድረስ ተጠናክሮ የዘለቀ ነው።

በመርሐ ግብሩ ላይ በባርሴሎናው MWC 2026 በተፈረመው የኔትወርክ ማዘመኛና ማስፋፊያ ስምምነት መሰረት፤ በመከናወን ላይ የሚገኙትን የሞባይል ኔትወርክ ፕሮጀክትና ከዋናው የኤሌክትሪክ መስመር ውጪ ለሆኑ የገጠር አካባቢዎች በሚገኙ ጣቢያዎች የታዳሽ ኃይል ዝርጋታ ፕሮጀክቶች አፈጻጸምን ገምግመዋል።

በቀጣይም በኔትወርክ አውቶሜሽን፣ በሰው ሠራሽ አስተውሎት በሚደገፉ የዲጂታል መሠረተ ልማቶች እንዲሁም የአገልግሎት ጥራትንና የደንበኞችን ተሞክሮ ይበልጥ ለማሻሻል በሚያስችሉ የኔትወርክ ቴክኖሎጂዎች ላይ አጋርነታቸውን አጠናክረው ለመቀጠል ተስማምተዋል።

በመጨረሻም ሚስተር ፓትሪክ ዮሃንሰን ለኩባንያቸው 150ኛ ዓመት የምስረታ በዓልና ለ132 ዓመታት የአጋርነት ጉዞ በማስመልከት ለተደረገላቸው ደማቅ መርሐ ግብር ምስጋናቸውን አቅርበው፤ ኤሪክሰን ለኢትዮጵያ ሁለንተናዊ የዲጂታል ትራንስፎርሜሽን ዕውን መሆን ያለውን የማይናወጥ አጋርነት ዳግም አረጋግጠዋል።